Stadi 22
Gadona Ena Regena Haidaua (Sense Stress Bona Modulation)
1 Hereva ta oi henia neganai, mai anina bada herevadia hahedinaraia goevagoeva totona bona hereva idauidau edia mamina idauidau hahedinaraia totona, bema emu gadona ena regena oi haidaua loulou, oi hereva henidia taudia ese emu hereva do idia kamonai mai edia ura ida, bona ena anina do idia abia haraga.
2 Namona be oiemu gadona ena regena oi haidaua, hereva haida o lalohadai haida edia anina o edia mamina hahedinaraia goevagoeva totona. Unai bamona oi karaia neganai, idia kamonai taudia be idia diba edena hereva be mai anina bada bona edena be mai anina maragi.
3 Namona be oi diba guna edena hereva ta ta be mai anina bada, bena unai hereva oi gwauraidia neganai, oiemu gadona ena regena oi haidaua be namo. Namona be anina maragi herevadia be unai bamona oi karaia lasi.
4 Baibel ena hereva haida o Gima Kohorona ena paragraf be oi duahia hedinarai gwauraia neganai, namona be oi laloa namonamo guna, edena hereva do oi duahia neganai emu gadona ena regena do oi haidaua. Inai be mai anina bada, badina be unai hereva be oi ese oi torea lasi to tau ta ese.
5 Vadaeni, emu gadona ena regena be edena bamona oi haidaua diba, anina bada herevana ta o lalohadaina ta hahedinaraia goevagoeva totona? Dala haida be inai: Emu gadona oi habadaia eiava oi hamaragia, oi ha-aukaia eiava oi hamanokaia, oi hadaea eiava oi hadihoa; oi hereva metairametaira eiava oi hereva haragaharaga; hereva ta vairanai eiava murinai oi laga-ani. Danu, emu imana oi gaukaralaia, bona emu vairana ena toana oi haidaua. Hereva oi hegaegaelaia neganai, unai bamona do oi karaia herevadia oi makaia.
6 Hereva badadia hahedinaraia goevagoeva. Tadikaka momo be inai bamona idia karaia lasi dainai, edia hereva idia ore murinai, idia kamonai taudia be hereva badana ta idia laloatao diba lasi. Ena be ta ese hereva badadia ia makaia guna, to ia gwauraia neganai bema ena gadona ena regena ia haidaua lasi, idia hedinarai goevagoeva lasi, bona reana idia boio bamona.
7 Unai dainai emu hereva be inai bamona oi laloa namonamo guna be namo: Edena lalohadai be mai anina bada? Ia murinai, edena be bada? Unai oi davaria neganai, unai hereva oi makadia, bena emu hereva oi gwauraia lalonai, unai anina bada herevadia ta ta oi herevalaidia negadiai, emu gadona ena regena oi haidaua oi hahedinaraidia goevagoeva totona, bena idia kamonai taudia ese unai lalohadai badadia do idia laloatao.
8 Hereva idauidau edia mamina idauidau hahedinaraia (modulation). Inai ese iseda hereva idia kamonai taudia ia durudia idia hakala totona. Anina be iseda gadona ita haidaua, hereva idauidau edia mamina idauidau hahedinaraia totona. Iseda gadona ena regena ita karaia ia dae neganai, unai amo ita hahedinaraia unai hereva ita moalelaia o ita ura henia bada. Ita hadihoa neganai, unai amo ita hahedinaraia ita gwauraia herevadia be hereva mai metaudia o lalo-metau herevadia.
9 Oi hereva goada matamaia neganai, oi hahedinaraia hereva badana ta oi herevalaia gwauraia. Anina maragi herevadia oi gwauraia haraga. Anina bada herevadia oi gwauraia neganai oi hereva metairametaira, bona ta oi gwauraia vadaeni murinai, oi naria sisina bena ma ta oi gwauraia.
10 Danu, namona be emu gadona ena regena ia dae bona ia diho, emu hereva edia mamina idauidau hahedinaraia totona. Inai oi dibalaia totona, mani Genese 18:3-8 bona 19:6-9 oi duahia mai emu gado regena ida.
11 Oi hereva noho lalonai, emu gadona ena regena oi haidaua loulou, emu hereva ena anina o ena mamina hahedinaraia totona. Oi hereva noho lalonai, bema mamina oi abia emu gadona ena regena oi haidaua be namo, Baibel ena siri ta oi duahia hedinarai, eiava henanadai ta o hereva hegeregerena ta oi gwauraia.