Iesu ese Aposetolo 12 Ia Abia Hidi

Lagani toi mai kahana bamona Iesu be haroro gaukara ia karaia murinai, mai anina bada abia hidi do ia karaia. Daidia do ia abia hidi ia ida idia gaukara hebou totona? Daidia do ia treinia Keristani kongrigeisen idia gunalaia totona? Unai abia hidi karaia totona, Iesu ia ura Iehova ena heduru ia abia. Unai dainai ia sibona be ororo dekenai ia daekau, bona hanuaboi ibounai lalonai ia guriguri. Daba ai, Iesu ese ena hahediba taudia haida ia boiria mai bona aposetolo taudia 12 ia abia hidi. Edia ladana oi laloatao, a? Idia be Petero, Andrea, Iamesi, Ioane, Filipo, Batolomeo, Toma, Mataio, Alepa ena natuna Iamesi, Tadeo, Simona, bona Iuda Iskariote.

Inai aposetolo taudia 12 be Iesu ida do idia loaloa. Ia ese idia ia treinia murinai, haroro gaukara totona ia siaidia. Iehova ese idia dekenai siahu ia henia demoni idia lulua bona gorere hanamoa totona.

Iesu ese idia 12 ia gwauraia ena turadia, bona ia trast henidia. Ena be Farisea taudia idia laloa idia be diba bada lasi bona dagi lasi taudia. To Iesu ese idia dekenai treinini ia henia vadaeni. Unai amo Iesu ena mauri ai mai anina bada negadia ai, hegeregere ia do mase lasi negana ai bona ia toreisi lou murinai, idia be ia ida do idia noho. Iesu bamona, idia 12 amo momo be Galilea taudia. Haida be headava taudia.

Aposetolo taudia be goevadae lasi dainai kerere idia karaia danu. Nega haida idia laloa namonamo lasi bona idia hereva bona abia hidi kereredia idia karaia. Nega haida idia haheauka lasi. Bona daika be mai anina bada idia hepapahuahulaia. To idia be taunimanima namodia, Iehova idia lalokau henia. Iesu be guba ia daekau murinai, idia be Keristani kongrigeisen ena badina aukana ai do idia lao.