Iesu be King Bamona Ia Mai

IESU ese matakepulu taudia rua ia hanamoa murinai, Ierusalema kahirakahira ia noho hanua maragina ta dekenai ia mai. Iena hahediba taudia rua ia hamaoroa: ‘Hanua dekenai umui vareai bona doniki ta do umui davaria. Iena varo umui kokia bona lau dekenai umui mailaia.’

Doniki be Iesu dekenai idia mailaia neganai, ia latanai ia helai. Bena Ierusalema dekenai ia lao, unai be daudau lasi. Hanua kahirakahira ia mai neganai, taunimanima hutuma idia mai ia hedavari henia totona. Idia momo ese edia kouti idia kokia bona dala dekenai idia atoa. Ma haida ese pama au edia rigidia idia utua. Dala dekenai idia atoa bona idia boiboi: ‘Dirava ese Iehova ena ladana ai ia mai king ia hanamoa!’

Idaunegai Israela dekenai, king matamatadia be taunimanima ese idia itaia totona, doniki ta dekenai idia guia bona Ierusalema lalonai idia vareai. Iesu be unai bamona ia karaia noho. Bona inai taunimanima idia hahedinaraia idia ura Iesu be edia king ai ia lao. To ma haida ese ia idia ura henia lasi. Iesu be dubu dekenai ia lao neganai, ia vara karana ese unai ia hahedinaraia.

Dubu dekenai Iesu ese matakepulu bona aena dika taudia ia hanamodia. Natudia maragidia ese unai idia itaia neganai, Iesu hanamoa herevadia idia gwauraia. To unai ese hahelaga taudia ia habadua, bona Iesu idia hamaoroa: ‘Inai natudia maragidia edia hereva oi kamonai, a?’

Iesu ia haere: ‘Oibe, lau kamonai. Baibel lalonai inai hereva umui duahia lasi: “Natudia maragidia edia uduna amo Dirava ese hanamoa herevadia do ia abia mai,” a?’ Unai dainai natudia maragidia ese Dirava ena king idia hanamoa noho.

Ita ura unai natudia ita tohotohoa, ani? Reana taunimanima haida ese ita do idia koua toho basileia ita herevalaia totona. To Iesu ese taunimanima totona do ia karaia gau namodia be ma haida dekenai do ita herevalaia noho.

Iesu be tanobada dekenai ia noho neganai, iena nega ia ginidae lasi ia be king bamona ia lohia totona. Unai be edena negai do ia mai? Iesu ena hahediba taudia idia ura diba. Stadi gabena dekenai unai do ita itaia.