Doniki ta Ia Hereva

NEGA ta ia hereva doniki ta ena sivarai oi kamonai, a? Reana do oi gwau, ‘Lasi. Animal idia hereva diba lasi.’ To Baibel ese ia hereva doniki ta ena sivarai ia gwauraia. Unai ia vara dalana mani ita itaia.

Israela taudia be Kanana tanona dekenai idia vareai gwauraia. Moaba ena king, Balaki, be Israela taudia dekenai ia gari. Unai dainai, ia ese diba tauna ta ladana Balama, ia boiria Israela taudia ia gwauraia dika totona. Balaki ia gwauhamata Balama dekenai moni bada herea do ia henia, unai dainai Balama be ena doniki dekenai ia guia bona Balaki itaia totona ia lao.

Iehova ia ura lasi Balama ese Ena taunimanima ia gwauraia dika. Unai dainai aneru ta ia siaia mai ena tuari kaia latana danu, Balama ena dala koua totona. Balama ese aneru ia itaia lasi, to ena doniki ese ia itaia. Unai dainai doniki ia ura giroa, to hegeregere lasi dainai dala dekenai ia hekure. Balama ia badu bada, bona ena doniki be au amo ia botaia.

Iehova ena siahu amo doniki be Balama ia hereva henia. Doniki ia henanadai: ‘Lau be dahaka lau karaia oi dekenai, unai dainai lau oi botaia?’

Balama ia gwau: ‘Oi ese kavakava tauna bamona lau oi halaoa. Bema lau be mai egu tuari kaia oi do lau alaia mase.’

Doniki ia henanadai: ‘Lau be nega ta inai bamona lau karaia, a?’

Balama ia haere: ‘Lasi.’

Unai murinai Iehova ese Balama ena matana ia kehoa bona aneru ta mai ena tuari kaia ia itaia, dala dekenai ia gini. Aneru ia gwau: ‘Dahaka dainai oiemu doniki oi botaia? Emu dala koua totona lau mai, badina namo lasi oi lao Israela oi gwauraia dika. Bema oiemu doniki ia hekure lasi, oi lau alaia diba, to oiemu doniki do lau hadikaia lasi.’

Balama ia gwau: ‘Lau be lau kerere. Lau diba lasi oi be dala dekenai oi gini.’ Aneru ese Balama ia siaia, bona Balama ia lao Balaki ia itaia totona. Ia ura Israela ia gwauraia dika toho, to Iehova ena siahu dainai nega toi ia hanamodia.