Karoa 5
Iehova Tomadiho Henia Taudia edia Ura-Kwalimu
IEHOVA ese tau ginigunana mai ena adavana danu ia havaraia neganai, ruaosi idia ura-kwalimu momokani. Paradaiso idia noholaia. Gorere ese edia moale ia hadikaia lasi. Idia mauri hanaihanai diba. To unai ura-kwalimu idia dogoatao totona, Dirava ena taravatu idia matauraia be gau badana.
2 Reana unai taravatu haida ia gwauraia hedinarai lasi, to Adam bona Eva ese idia badinaia be edia kara korikori bamona. Hegeregere, idia hitolo neganai idia aniani be namo, idia ranu mase neganai idia inuinu be namo. Dina ia diho neganai, idia laga-ani bona idia mahuta be namo. Iehova ese danu ia hereva henidia, gaukara ia henidia. Unai be oda ta bamona idia dekenai, to edia namo ia havaraia momokani! Unai oda amo gaukara idia abia, unai gaukara do idia moalelaia momokani, bona ia lalonai edia aonega be dala namodia ai do idia gaukaralaia. Natudia do idia havaraia, tanobada ena animal do idia biagudia bona Paradaiso do idia habadaia lao ela bona tanobada ibounai ia abia. (Gen. 1:28; 2:15) Dirava ese oda maragidia momo amo ia hametaudia lasi. Ruaosi be mai edia dala, sibodia be gau momo do idia lalohadailaia. Unai be mauri namo hereana, ani?
3 To, momokani, ena be Dirava ese Adam dekenai gwaumaoro ia henia gau haida do ia lalohadailaia, to ita gwau lasi herevana dahaka lalohadai ia abia, unai lalohadai ese namo do ia havaraia. Lasi. Ia be ura-kwalimu tauna dainai ia be mai ena maduna. Ia aonega totona, namona be ena Tamana guba dekenai ia kamonai henia bona Iena gaukara ia itaia namonamo. Bona Dirava ese lalo-parara ia henia Adam dekenai; unai amo, ia dibaia gaudia do ia gaukaralaia diba. Dirava ese Adam ia karaia, “sibona ena laulau bamona,” unai dainai Adam ena ura korikori be Dirava do ia tohotohoa, gau ta ia lalohadailaia neganai. Bema Dirava ese ia dainai ia karaia gaudia ia laloa bada bona bema ia ura Dirava ia hamoalea, do ia naria namonamo, unai bamona ia karaia totona.—Gen. 1:26, 27; Ioane 8:29 itaia.
4 Iehova ia ura unai tau ia hadibaia, taunimanima be Dirava dekenai idia tabekau be namo, badina be idia ia havaraia bona edia mauri ia henidia dainai. Unai dainai inai oda ia henia: “Uma gabu dekenai gini au ibounai edia huahua oi ania diba, idia be taravatu lasi, to kara namona bona kara dikana hadibaia au ena huahua oi ania lasi, badina be inai huahua oi ania dina dekenai do oi mase momokani.” (Gen. 2:16, 17) Unai taravatu ese unai tau ena ura-kwalimu ia kokia, a? Lasi vaitani. Adam be mai ena dala do ia kamonai o do ia kamonai lasi. Unai taravatu ese ia hametaua lasi. Ena be unai au tamona dekenai ena imana ia atoa lasi, to ia be mai ena aniani momo. To namona be ia abia dae ia noholaia tanobadana be Dirava ena bona Dirava ese ia karaia dainai ia ese ia lohiaia be maoro.—Sal. 24:1, 10.
5 To dahaka ia vara? Aneru ta be sibona ena namo ia tahua dainai, Eva ia koia Dirava ena ura ia dadaraia totona. Adam ese ena Tamana ia kamonai henia lasi, to ia be Eva danu idia kara dika. Adam bona Eva ese gau ta idia abia kava dainai, edia ura-kwalimu namo hereana idia haboioa. Kara dika ese ia biagudia, bena, Dirava ia hereva vadaeni bamona, edia davana be mase. Unai dainai, dahaka idia henia edia natudia dekenai? Kara dika idia henidia, bena idia vara negana amo idia ura kara dika idia karaia, bona idia be mai edia manoka idauidau dainai gorere idia abia, idia buruka bena idia mase. Taunimanima be edia tubudia ginigunadia amo ura dika idia abia dainai, bona Satana ese edia lalona ia ania dainai, iboudiai be dika idia davaria haraga diba. Inai mauri dikana be idau, bona Dirava ese matamana neganai taunimanima ia henidia ura-kwalimu be idau vaitani!—Roma 5:12; Iobu 14:1; Apok. 12:9.
URA-KWALIMU ITA DAVARIA GABUNA
6 Hari inai nega lalonai, taunimanima be ura-kwalimu idia tahua be hoa gauna lasi, badina gau momo ese idia guidia. To ura-kwalimu momokani be edeseniai ita davaria diba? Iesu Keriso ia gwau: “Bema lauegu hadibaia hereva umui badinaia neganai umui be lauegu diba tahua taudia momokani. Hereva momokani be do umui diba, bona hereva momokani ese umui do ia ruhaia.” (Ioane 8:31, 32) Taunimanima be politikol lohiana ta o gavamani ta idia dadaraia bena ma ta idia abia hidi, ura-kwalimu idia abia totona, to Iesu ese ia herevalaia gauna ese unai bamona ura-kwalimu ia hanaia momokani. Kara dika ena hesiai metauna amo ita do ia ruhaia gauna ia herevalaia unai. (Ioane 8:24, 34-36 itaia.) Unai hegeregerena, bema taunimanima ta be Iesu Keriso ena hahediba tauna momokani ai ia lao, unai ese ena mauri do ia haidaua momokani, badina be kara dika ena hesiai amo do ia ruhaia.
7 To hari inai negai Keristen taudia korikoridia be do mai edia ura dikadia, edia tamadia sinadia amo idia abia uradia unai. Unai dainai idia hekwarahi noho. (Roma 7:21-25) To bema ta ese Iesu ena hadibaia herevadia ia badinaia momokani, kara dika ese do ia biagua momokani diba lasi. Ena anina lasi maurina gunana mai ena kara dikadia, sibona ena lalona hadikaia karadia, ia rakatania diba. Ena lalona do ia goeva Dirava vairanai, badina be ena kara dikadia gunadia ia gwauatao vadaeni, Keriso ena boubou gauna ia abidadama henia dainai. Ena ura dikadia ese do idia biagua toho lou, to Keriso ena hadibaia herevadia goevadia ia laloa dainai unai ura ia badinaia lasi neganai, ia hahedinaraia kara dika be iena biaguna lasi.—Roma 6:12-17.
8 Ita Keristen taudia be ura-kwalimu bada ita abia. Hadibaia herevadia koikoidia, sene karadia kereredia bona kara dika ena hesiai amo ita ia ruhaia vadaeni. Ita diba mase taudia be edena bamona bona toreisi lou herevana danu; unai dainai ita gari lasi, taunimanima ese ita do idia alaia mase garina; haida be unai garina idia gari dainai lalo-maoro idia negea. Ita diba taunimanima edia gavamani dikadia do idia ore bena Dirava ena kara maoromaoro Basileiana ese edia gabu do ia abia; unai ese ita ia ruhaia lalo-metau amo. To bema ita be inai bamona ita ura-kwalimu dainai gavamani ena taravatu ita laloa lasi o gavamani taudia ita matauraidia lasi badina be ita gwau inai orea gunadia be kahirakahira do idia ore, vadaeni ita be mai eda kerere.—1 Pet. 2:16, 17; Tito 3:1, 2.
9 Iehova ese ita ia rakatania lasi, sibona eda aonega amo mauri dalana namona ita davaria totona. Ita ia karaia dalana be ia diba, bona ia diba dahaka ese ita do ia hamoalea momokani bona dahaka ese ita do ia hanamoa daudau. Ia diba danu ia be edena negai ena palani do ia hagugurua, unai dainai ia diba edena kara ita tahua guna be namo. Ia diba danu edena lalohadai bona edena kara ese taunimanima idia hakereredia o edia hebamo idia hadikaia diba, unai gaudia dainai reana idia be Dirava ena Basileia ena hahenamo do idia abia lasi. Mai ena lalokau danu inai gaudia ia hadibaia ita dekenai, Bible amo bona iena orea amo. (Gal. 5:19-23; Mar. 13:10; 1 Timoteo 1:12, 13 itaia.) Bena namona be ita sibona ita lalohadai, unai sisiba do ita badinaia eiava lasi. Adam ese taunimanima edia ura-kwalimu ia haboioa sivaraina Bible lalonai bema ita laloa namonamo, do ita lalohadai namonamo. Do ita hahedinaraia ita tahua guna gauna be inai: Iehova danu do ita hebamo heheni namonamo.
URA-KWALIMU IDAUNA IDIA URA HENIA
10 Taunimanima matamatadia haida, idia maragi negana amo idia be Iehova ena Witness taudia edia orea lalonai, idia ura ura-kwalimu idauna idia abia, bona badadia haida danu be unai bamona. Reana idia laloa inai tanobada be mai ena hairai, bona idia laloa momo dainai idia ura bada tanobada taudia edia kara idia tohotohoa. Reana dala idia tahua lasi, muramura dikadia amo moale mamina idia abia totona, idia inuinu kekero totona o idia sihari kava o idia heudahanai totona. To sikuli negana o gaukara negana murinai tanobada taudia idia bamodia matamaia. Idia ura edia bamodia matamatadia ese idia do idia abia dae, unai dainai edia hereva bona edia kara idia tohotohoa matamaia.—3 Ioane 11.
11 Nega haida, tanobada ena kara idia karaia totona edia lalona be unai bamona ia veria tauna be ia gwau ia be Iehova ena hesiai tauna ta. Unai bamona ia vara Eden dekenai, Satana ese Eva ia koia neganai bona Eva ese Adam ena lalona ia ania neganai. Unai bamona ia vara Keristen taudia ginigunadia bogaragidiai, bona hari inai neganai danu. Unai bamona taudia momo idia ura dikadika moale ena mamina idia abia badabada. Idia ese ma haida edia lalona idia ania, moale idia tahua totona. “Idia gwau ‘Umui emui ura karadia sibona do umui karaia, umui be ura kwalimu taudia.’ To unai dika taudia sibona be dika bona mase edia hesiai taudia.”—2 Pet. 2:18, 19.
12 Edia kara ena anina be dika. Sihari kava karadia ese lalohisihisi idia havaraia. Reana unai kara dainai gorere idia davaria o idia rogorogo kava o edia headava idia doko. (Her. 6:32-35; 1 Kor. 6:18; 1 Tes. 4:3-8) Muramura idia ania kava taudia haida idia badu kava, idia hereva goevagoeva lasi, idia itaia goevagoeva lasi, edia kwarana idia giroagiroa, laga idia ania namonamo lasi, idia kava bena idia mase. (Hereva Lada-isidia 23:29-35 itaia.) Haida ese unai muramura ania karana idia rakatania diba lasi, unai dainai moni idia henaoa o idia dadia idia hoia totona. To unai kara idia karaia matamaia taudia momo be ena dokona dikana idia diba, to idia ura bada moale ena mamina idia abia, unai dainai idia be sibodia idia koia, idia gwau unai be ura-kwalimu dalana. To gabeai idia davaria idia be kara dika ena hesiai taudia, bona kara dika ese ia biagudia mai ena dagedage bada! To bema harihari ita laloa namonamo, unai bamona dika do ita davaria lasi.—Gal. 6:7, 8.
HEKWAKWANAI IA MATAMAIA GABUNA
13 Unai hekwakwanai momo idia matamaia gabuna mani oi laloa. Bible ia gwau: “Hedibagani ena badina korikori be, tau ta sibona ena ura dainai kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia. Bona kara dika ia tubu bona ia bada neganai, mase ia havaraia.” (Iak. 1:14, 15) To dahaka ese unai ura ia havaraia? Ta be ena lalona dekenai ia laloa gaudia ese. Nega momo badina be ia ese Bible ena hereva idia badinaia lasi taudia ia bamodia dainai. Momokani, ita ibounai ita diba namona be ‘kara dika taudia danu ita turana karaia’ be kerere. To edena taudia be unai bamona ita gwauraidia be maoro? Iehova ena lalohadai be dahaka? Bema henuai idia noho henanadai bona Bible siridia ita laloa namonamo, lalohadai maorodia do ita davaria.
Bema taunimanima haida edia toana be namo, anina be ita bamodia be namo, a? (Genese 34:1, 2, 18, 19 itaia.)
Edia herevahereva bona edia hevaseha herevadia ese idia hahedinaraia ita tura henidia be namo eiava? (Ef. 5:3, 4)
Bema edia lalohadai Dirava dekenai be iseda lalohadai hegeregerena lasi, unai dainai ita laloa momo be namo, eiava? (1 Korinto 15:12, 32, 33 itaia.)
Bema Iehova idia ura henia lasi taudia ita bamodia, Iena lalona ena mamina be edena bamona? (2 Sisiga 19:1, 2 itaia.)
Ena be kamonai lasi taudia danu ita gaukara hebou o ita sikuli hebou, to edena bamona ita hahedinaraia edia hebamo ita tahua lasi? (1 Pet. 4:3, 4)
Televisen raraia bona buka, magazine bona niuspepa duahia be taunimanima bamodia daladia. Edena gaudia, inai dala amo idia mai, be idia dekenai ita naria namonamo be namo? (Her. 3:31; Isa. 8:19; Ef. 4:17-19)
Iehova ese ita tura henidia taudia ia itaia neganai, dahaka ia diba ita dekenai? (Sal. 26:1, 4, 5; 97:10)
14 Dirava ena Nega Matamatana be kahirakahira momokani. Iena Basileia amo taunimanima be Satana bona ena tanobada dikana ibounai amo do ia ruhadia nege. Mauri hanaihanai Paradaiso lalonai do idia abia diba. Bena Dirava ese ia karaia taudia iboudiai ese ura-kwalimu, “Iehova ena lauma” hegeregerena, do idia abia. (2 Kor. 3:17) Bema ta ese unai ibounai ia reaia badina be Dirava ena sisiba Bible lalonai hari ia dadaraia dainai, ia be kavakava ani? Namona be hari inai negai iseda Keristen ura-kwalimu ita gaukaralaia namonamo, unai amo ita ibounai do ita hahedinaraia goevagoeva ita ura momokani “Dirava ena natuna edia ura-kwalimu hereadaena” ita abia.—Roma 8:21, NW.
INAI HEREVALAIA LOU
● Taunimanima ginigunadia ruaosi be edena bamona ura-kwalimu idia abia? Hari inai negai taunimanima be unai bamona ura-kwalimu idia abia, eiava?
● Keristen momokani taudia be dahaka ura-kwalimu idia abia to tanobada taudia ese idia abia lasi? Edena bamona idia abia?
● Tanobada taudia edia ura-kwalimu idia tahua taudia edia kerere davana be dahaka?
● Dahaka dainai ‘kara dika taudia danu ita turana karaia’ lasi be gau badana? Ita be Adam bamona lasi, to daika ena lalohadai kara dika dekenai ita abia dae?
[Study Questions]
1, 2. (a) Dirava ese edena bamona ura-kwalimu ia henia taunimanima ginigunadia ruaosi dekenai? (b) Edena taravatu ese edia kara idia biagua?
3. Adam be mai ena ura-kwalimu gau haida be ia sibona do ia lalohadailaia; edena dala amo heduru ia abia diba, iena ura-kwalimu ia gaukaralaia namonamo totona?
4. (a) Dirava ena oda ese Adam ena ura-kwalimu ia kokia a?
(b) Dahaka dainai unai bamona oda ia henia be maoro?
5. (a) Adam bona Eva ese edia ura-kwalimu hereadaena edena bamona idia haboioa? (b) Bena dahaka ia vara idia dekenai, bona anina be dahaka ita dekenai?
6. (a) Ura-kwalimu momokani be edeseniai ita davaria diba?
(b) Iesu ese edena bamona ura-kwalimu ia herevalaia, Ioane 8:31, 32 dekenai?
7. (a) Vadaeni, hari inai nega lalonai edena dala amo kara dika amo ita ia ruhaia? (b) Unai ura-kwalimu ita abia totona, dahaka ita karaia be namo?
8. (a) Keristen tomadiho momokani ese edena dala ma haida amo ita ia ruhaia? (b) Unai dainai gavamani ena lohia taudia be edena bamona ita laloa be namo?
9. (a) Iehova ese ita edena bamona ia durua mai ena lalokau danu, ura-kwalimu bada ita abia totona? (b) Adam ese ena ura-kwalimu ia gaukaralaia kerere dainai dika ia vara; bema gau ta ita lalohadailaia neganai, edena bamona ita hahedinaraia unai dekenai ita lalo-parara?
10. Sibodia be Keristen idia gwauraia taudia haida ese edena bamona ura-kwalimu idia tahua?
11. Nega haida daika ese edia lalona unai bamona ia veria?
12. (a) Tanobada taudia edia kara ese dahaka lalohisihisi gaudia ia havaraia? (b) Bema unai kara idia karaia taudia be ena dokona idia diba, dahaka dainai idia karaia noho mai edia ura danu?
13. (a) Dahaka ese unai ura dikadia ia havaraia? (b) Daika ena lalohadai ita abia be namo bena unai amo do ita diba edena taudia danu ita turana karaia be namo lasi? (c) Paragraph ena dokona dekenai idia noho henanadai ta ta oi haerelaia neganai, Iehova ena lalohadai oi gwauraia hedinarai.
14. Bema Dirava ena sisiba Bible lalonai be hari inai nega lalonai ita badinaia, dahaka ura-kwalimu hereadaena be vaira negana lalonai do ita abia?