Karoa 7
Dirava ese Dika Ia Koua Lasi ena Anina Ita Dekenai
HEREVANA hekwarahi momo iseda mauri lalonai ita davaria, to unai be Dirava ena kerere lasi. Ia ese taunimanima ginigunadia ia havaraia neganai idia goevadae, bona Paradaiso dekenai ia hanohodia. Bema idia gwau-edeede murinai ia be maoromaoro ia hamasedia, taunimanima edia bese mai edia gorere, ogogami bona kara dika idia noho lasi hari. To mai ena hebogahisi danu Iehova ese Adam bona Eva nega ia henidia, edia goevadae lasi besena do idia havaraia, ruaosi do idia mase lasi neganai. Mauri hanaihanai mai ena moale bada herea be Adam ese ia haboioa, to Iehova ese Keriso ena amo dala ia karaia, Adam ena bese taudia mai edia abidadama ese ia haboioa gaudia do idia abia lou totona.—Deut. 32:4, 5; Ioane 10:10.
2 Inai dala amo ita ta ta ia durua bada herea. To Bible ese ma gau ta ita ia hadibaia, unai gau ena anina ese ita ta ta hamauria karana ena anina ia hanaia momokani.
IENA LADANA BADANA DAINAI
3 Iehova ese ena palani tanobada bona taunimanima totona do ia hagugurua neganai, do ia hamomokania ia be guba bona tanobada edia Lohia Badana bona hereva momokani Diravana, bona unai amo sibona ena ladana do ia abia isi. Iehova ena dagi be bada herea dainai, guba taudia bona tanobada taudia be maino dekenai idia noho namonamo totona, iena ladana idia matauraia bada bona ia idia kamonai henia be gau badana.
4 Adam bona Eva ia karadia murinai, gaukara ia henidia. Ia hadibadia namonamo, iena ura be tanobada ibounai do idia biagua bona Paradaiso do idia habadaia; to unai sibona lasi, edia bese amo do idia hahonua danu. (Gen. 1:28) Ruaosi edia kara dika dainai unai palani do ia moru bona unai dainai Dirava ena ladana do ia dika, a?
5 Iehova ese Adam ia hadibaia, bema kara namo bona kara dika hadibaia auna ena huahua ia ania, ia ania “dina dekenai” do ia mase momokani. (Gen. 2:17) Dirava ena hereva hegeregerena, Adam ia kara dika dinana dekenai Iehova ese unai kara dika taudia ruaosi ia kota henidia, ia gwau do idia mase. Edia dika davana amo idia roho mauri diba lasi. Hahemaoro dalanai, Dirava ena matana ai, Adam bona Eva be unai dina korikori dekenai idia mase. (Luka 20:37, 38 itaia.) To ena palani hegeregerena tanobada be taunimanima amo do ia hahonua totona, Iehova ese nega ia henidia, edia bese do idia havaraia guna bena gabeai do idia mase momokani. Dirava vairanai lagani 1,000 be dina tamona bamona, unai dainai Adam ena mauri lagani be 930 neganai ia mase, unai be “dina” tamona lalonai. (Gen. 5:3-5; Salamo 90:4 bona 2 Petro 3:8 itaia.) Unai dala amo Iehova ese ena hereva, do ia panisidia negana ena hereva, ia hamomokania, bona ruaosi edia kerere ese iena palani, tanobada be Adam ena bese amo do ia hahonua palanina, ia koua lasi. To unai dainai kara dika taudia idia mauri noho diba.
6 Mose ena negai Iehova ese Egypt ena pavapava dekenai ia gwauraia herevana danu ese ia hahedinaraia dahaka dainai Dirava ese kara dika taudia ia haheauka henidia. Farao ese Israel taudia ia koudia Egypt do idia rakatania lasi neganai, Iehova ese ia alaia haraga lasi. Iehova ese hisihisi 10 amo unai tano ia hahisia neganai, ena siahu be hoa daladia idauidau amo ia hahedinaraia. Hisihisi namba 7 be Farao ia hadibaia guna neganai, Iehova ia gwau ia ese Farao bona ena bese taudia tanobada ena kopina amo ia hamasedia ore haraga diba. Iehova be ma ia gwau: “To inai totona mauri lau henimu vadaeni, lauegu siahu dohore oi itaia, vadaeni tanobada ibounai lauegu ladana dohore idia matauraia totona.”—Eso. 9:15, 16.
7 Iehova ese Israel ia hamauridia neganai, gabu daudau dekenai taunimanima ese iena ladana bona iena sivarai idia kamonai. Unai nega amo ema bona hari lagani 3,500 bamona idia ore vadaeni, to ia karaia karana idia laloaboio lasi. Unai neganai Iehova ena ladana korikori bona iena sivarai momokani idia herevalaia. Unai ese Iehova ena ladana ia abia isi, badina be ia hahedinaraia ia ese ena gwauhamata ia hamomokania bona ena hesiai taudia ia durudia. Ma ia hahedinaraia ia be mai ena siahu bada herea dainai gau ta ese ena ura ia koua diba lasi. Nega sisina murinai Iehova ese ena siahu bada do ia hahedinaraia badabada, bona ena ladana do ia hahairaia, lauma dikadia bona taunimanima dikadia iboudiai ia hamasedia ore neganai. Unai kara idia itaia taudia do idia laloaboio lasi, bona hahenamo do ia mailaia ela bona hanaihanai!—Esek. 38:23; Apok. 19:1, 2.
‘DIRAVA ENA AONEGA BE DOBU HEREA’
8 Aposetolo Paulo ese Roma taudia ia tore henidia neganai, ia henanadai, ia gwau: “Dirava ena kara be maoromaoro lasi, a?” Bena ia haere neganai Dirava ena hebogahisi bona Iehova ena hereva Farao dekenai ia gwauraia hedinarai. Ia ese danu ia gwau ita taunimanima be raro bamona, uro karaia tauna ena imana dekenai. Ia gaukaralaia dalana be raro ese ia maumauraia diba lasi, ani? Paulo be ma ia gwau: “Dirava be inai bamona ia karaia vadaeni. Ia ura be iena badu bona iena siahu do ia hedinaraia. Unai dainai ia ese ia badu henia gaudia dekenai ia haheauka henia ela bona do idia mase ore. Bona ia ura danu iena hairai badana do ia hedinaraia. Ia ese inai hairai haida ia henia vadaeni ita dekenai. Oibe, mai bogahisihisi danu ia ese ita ia karaia hegaegae vadaeni, iena hairai do ita abia totona. Badina be ia ese ita ia boiria, ai Iuda taudia sibona lasi, to umui Iuda lasi taudia danu.”—Roma 9:14-24.
9 Iehova ese Genese 3:15 dekenai idia torea peroveta herevana ia halasia negana amo, Satana bona ena garana be “ia badu henia gaudia,” bona “do idia mase ore” gaudia. Unai nega daudau lalonai Iehova ia haheauka noho. Kara dika taudia ese iena dala idia kirikirilaia; ena hesiai taudia idia dagedage henidia, bona ena Natuna idia alaia mase. To Iehova ia haheauka dainai ena hesiai taudia ese noho hanaihanai hahenamo idia davaria. Guba taudia bona tanobada taudia ese idia itaia vadaeni, Dirava idia gwau-edeede henia taudia ese dika bada idia davaria. Danu, Iesu ena mase amo dala ia karaia, kamonai taudia ia hamauridia totona bona ‘Satani ena kara dika do ia haorea momokani totona.’—1 Ioane 3:8; Heb. 2:14, 15.
10 Iesu ia toreisi lou negana amo, lagani 1,900 bona ma haida lalodiai Iehova ese “ia badu henia gaudia” ia haheauka henidia noho. Badina be dahaka? Badina be ia ese hahine ena garana taudia ma haida ia hegaegaelaidia noho, Iesu Keriso danu ena guba Basileiana lalonai do idia lohia taudia unai. (Gal. 3:29) Inai taudia be 144,000, Dirava ese idia “ia karaia hegaegae vadaeni,” Paulo ena hereva bamona. Iuda taudia bogaragidia amo ia abidia hidi guna, inai orea lalonai idia vareai totona. Bena gabeai Samaria taudia, edia kopina idia utua taudia, be idia danu ia haboudia, bena dokonai idau bese taudia danu. Mai ena haheauka bada danu Iehova ese ena ura gauna ia karaia noho lalonai, ta ia doria lasi ena hesiai gaukara karaia totona, to ena lalokau karadia idia laloa bada dainai ena hesiai gaukara idia karaia taudia be ia ese ia hanamodia badabada. Hari inai guba oreana hegaegaelaia karana be kahirakahira do ia ore.
11 To daidia ese tanobada do idia noholaia? Dirava ena nega korikori ai taunimanima momo herea be mase amo do idia toreisi lou bena Basileia henunai tanobada do idia noholaia. Danu, Iehova ena haheauka dainai, lagani 1935 amo “hutuma bada herea” be bese iboudiai amo idia haboudia diba, hahemauri idia abia totona.—Apok. 7:9, 10; Ioane 10:16.
12 Inai ibounai lalonai Dirava ena kara be maoromaoro lasi, a? Lasi vaitani! Bema Iehova ese kara dika taudia, “ia badu henia gaudia,” ia hamasedia ore haraga lasi, badina be ia ura iena ura idia badinaia taudia dekenai hebogahisi do ia hahedinaraia, vadaeni, ta ese ia maumauraia be maoro lasi, ani? To idau, iena palani ena anina ia hedinarai neganai, ita be Iehova ena kara momo dekenai diba ita abia. Ita hoa ena kara idauidau idia hedinarai neganai—ena hahemaoro maoromaoro, ena hebogahisi, ena haheauka, ena aonega idauidau unai. Iehova ia kara mai ena aonega, unai amo ia hahedinaraia ela bona hanaihanai iena lohia dalana be hereadae. Aposetolo Paulo danu ita gwau: “Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba? Iena dala be daika ese do ia davaria diba?”—Roma 11:33.
ISEDA LALOKAU ITA HAHEDINARAIA DALANA
13 Taunimanima haida be hisihisi idia ania, badina be Dirava ese kara dika taudia ia haoredia lasi bona taunimanima ia hanamodia lou lasi ema bona hari. Dahaka ita laloa unai kara dekenai? Ita gwau unai hisihisi haheaukalaia karana amo dika be Iehova ena ladana amo do ita kokia bona do ita hahedinaraia Diabolo be koikoi tauna, a? Inai sisiba ese ita ia hagoadaia, unai bamona ita karaia totona: “Egu natuna e, oi aonega, bona lauegu kudouna oi hamoalea, lau ia gwau henia tauna do lau haere henia totona.” (Her. 27:11) Iehova ia gwau henia tauna, Satana, ia gwau bema taunimanima edia kohu ia boio eiava hisihisi idia ania, Dirava do idia samania bona do idia gwauraia dika. (Iobu 1:9-11; 2:4, 5) Bema hekwarahi idauidau lalodiai Dirava ita badinaia noho bona unai amo ita hahedinaraia Satana ena samani herevana be momokani lasi ita dekenai, vadaeni Iehova ena kudouna ita hamoalea unai. Ita diba momokani Iehova ese ena hesiai taudia ia hebogahisi henidia, bona bema ita badinaia noho, davana namona do ia henia ita dekenai, Iobu ia kara henia hegeregerena.—Iak. 5:11; Iobu 42:10-16.
14 Hahetoho badadia edia hisihisi ita ania neganai, bema Iehova dekenai ita tabekau, iseda kara namodia do ita goadalaia. Iesu be hisihisi ia ania neganai, unai hisihisi ese “Dirava kamonai henia dalana ia hadibaia,” unai dala idauna guna ia diba lasi. Hisihisi ese ita danu ia hadibaia diba—ita haheauka bona Iehova ena dala maoromaorodia ita laloa namonamo totona. Unai hadibaia karana do ita abia dae mai eda haheauka danu, eiava?—Heb. 5:8, 9; 12:11; Iak. 1:2-4.
15 Taunimanima ese iseda kara idia raraia. Bema hisihisi ita ania kara maoromaoro ita ura henia dainai, haida do idia lalo-parara Keriso ena “tadikaka” be daidia, bena ena “tadikaka” danu do idia tomadiho hebou dainai, mauri hanaihanai dalana dekenai do idia vareai. (Mat. 25:34-36, 40, 46) Iehova bona ena Natuna idia ura unai dala idia davaria. Ita danu be unai ita ura a? Ita durudia totona, hekwarahi o hisihisi do ita haheaukalaia, a?
16 Hekwarahi idauidau ita davaria neganai, bema ita gwau unai amo ita hahedinaraia diba Iehova ita badinaia bona ena ura hagugurua karana lalonai ahuna ita abia, unai be namo herea! Bema unai bamona ita karaia, ita hahedinaraia dala ita tahua noho, Dirava bona Keriso danu ita lalo-tamona totona, Iesu be Keristen momokani taudia iboudiai dainai ia guriguri hegeregerena.—Ioane 17:20, 21.
INAI HEREVALAIA LOU
● Ena be Iehova ese kara dika ia koua lasi, to edena bamona ia hahedinaraia sibona ena ladana ia matauraia bada?
● Dirava ese “ia badu henia gaudia” ia haheauka henidia noho; unai ese edena bamona dala ia kehoa, ena hebogahisi ita abia totona?
● Hisihisi ita ania negadiai, dahaka lalohadai ita abia be namo?
[Study Questions]
1. (a) Bema Iehova ese kamonai lasi taudia ruaosi Eden dekenai ia aladia mase haraga, anina be dahaka ita dekenai? (b) To Iehova be mai ena lalokau danu dala ia karaia, dahaka ita abia totona?
2. Dirava ese inai ibounai ia karaia, ita ia hamauria totona sibona a?
3. Iehova ese ena palani tanobada bona taunimanima totona ia hagugurua neganai, anina be dahaka?
4. Iena palani be dahaka?
5. (a) Genese 2:17 hegeregerena, kara namo bona kara dika hadibaia auna ena huahua ia ania tauna be edena negai do ia mase? (b) Iehova ese unai hereva edena bamona ia hamomokania, bona ena palani tanobada hahonua totona ia badinaia noho danu?
6, 7. (a) Esodo 9:15, 16 dekenai ia hereva bamona, dahaka dainai Iehova ese kara dika taudia ia hamasedia haraga lasi?
(b) Iehova ese Farao ia halusia neganai, Iena siahu be edena bamona ia hahedinaraia, bona Iena ladana be edena bamona ia hadibaia taunimanima dekenai? (c) Vadaeni, dahaka do ia vara inai nega dikana ena dokonai bona murinai?
8. Paulo ia ura ita be dahaka danu ita laloa namonamo?
9. (a) Dirava “ia badu henia gaudia,” “do idia mase ore” gaudia unai, be daidia? (b) Dahaka dainai, ena be Iehova idia inai henia, to ia haheauka henidia bada, bona ia idia lalokau henia taudia be dahaka davana namona do idia abia?
10. Dahaka dainai Iehova ese kara dika taudia ia haheauka henidia noho, hanaia lagani 1,900 lalodiai?
11. Edena orea idauna taudia danu be Iehova ena haheauka amo namo idia davaria hari?
12. (a) Unai dainai, dahaka ita diba Iehova dekenai? (b) Iehova be inai bamona ia karaia dainai, dahaka oi laloa ia dekenai?
13. (a) Hisihisi ita ania neganai, dala ita davaria dahaka ita karaia totona? (b) Dahaka ese ita do ia durua, mai iseda aonega danu ita kara totona?
14. Hahetoho ita hisihisilaia neganai, bema Iehova dekenai ita tabekau, unai ese ita edena bamona ia hadibaia?
15. Hisihisi o hekwarahi ita haheaukalaia noho lalonai, unai ese ma haida edena bamona ia durudia diba?
16. Bema iseda lalohadai hisihisi o hekwarahi haheaukalaia dekenai be maoro, daidia danu lalo-tamona ita tahua noho?