Karoa 7
Dirava ese Dika Ia Do Koua Lasi Karana amo Ita Dibaia Gauna
1, 2. (a) Bema Iehova ese maoromaoro gwau-edeede taudia be Eden dekenai ia hamasea, unai ena anina ita dekenai be edena bamona? (b) Iehova ese ita dekenai dahaka gau namodia ia hegaegaelaia?
BESE kwarana tauna Iakobo ia gwau: “Lauegu mauri lagani, . . . be momo lasi, bona mai hisihisi.” (Genese 47:9) Unai hegeregerena, Iobu ia gwau “iseda mauri dinadia be momo lasi, bona iseda hekwarahi be bada herea.” (Iobu 14:1) Idia bamona, ita momo ese mauri aukana, kara gageva, bona dika badadia danu ita davaria. To, ita vara be Dirava ena kara kererena ta lasi. Momokani, ita eda lalona bona tauanina be goevadae lasi bona iseda noho gabuna be Paradaiso lasi, Adamu bona Heva edia bamona. To bema Iehova ese edia gwau-edeede murinai maoromaoro idia ia hadikaia ore be edena bamona? Unai neganai, gorere, lalohisihisi, bona mase do idia vara lasi, to taunimanima danu be lasi. Do ita vara lasi. Mai ena hebogahisi ida, Dirava ese Adamu bona Heva dekenai nega ia henia natudia idia havaraia totona, herevana unai natudia ese kara dika idia abia hanai. Bona Iehova ese Keriso amo dala ia kehoa, Adamu ia haboioa gauna—mauri hanaihanai tanobada paradaisona dekenai—ita abia lou totona.—Ioane 10:10; Roma 5:12.
2 Iseda lalona ia hagoadaia helarona be Paradaiso lalonai do ita mauri hanaihanai diba, bona gorere, lalohisihisi, hisihisi, mase, bona kara dika taudia ese ita do idia hahisia lasi! (Aonega Herevadia 2:21, 22; Apokalupo 21:4, 5) To Baibel ena hereva amo ita diba, ena be iseda hahemauri be mai anina ita bona Iehova dekenai, to gau ma ta ena anina ese unai ia hereaia.
Iena Ladana Badana Dainai
3. Iehova ena ura tanobada bona taunimanima totona ia guguru lalonai dahaka be mai anina bada?
3 Dirava ena ura tanobada bona taunimanima totona ia guguru lalonai iena ladana be mai anina bada. Unai ladana, Iehova, ena anina be “Ia ese Ia Halaoa.” Unai dainai, ena ladana ese ia hahedinaraia ia be Guba bona Tanobada edia Lohia Badana, Palani Karaia Diravana, bona hereva momokani Diravana. Iehova ena dagi dainai, guba bona tanobada ibounai lalonai maino bona noho namo ia vara totona, iboudiai ese ena ladana bona ia hahedinaraia gaudia idia matauraia bona ia idia kamonai henia.
4. Iehova ena ura tanobada totona be dahaka?
4 Iehova ese Adamu bona Heva ia havaraia murinai, idia dekenai gaukara ia henia. Ia hahedinaraia goevagoeva ia ura idia ese tanobada do idia biagua—bena Paradaiso idia habadaia—sibona lasi, to ia ura edia natudia bona tubudia amo do idia hahonua. (Genese 1:28) Edia kara dika dainai unai ura be ia guguru lasi, a? Bema siahu ibounai Iehova ese ena ura tanobada bona taunimanima totona ia hagugurua diba lasi, unai ese ena ladana do ia hadikaia!
5. (a) Bema taunimanima ginigunadia ese kara namo bona kara dika hadibaia auna ena huahua idia ania, edena negai do idia mase? (b) Edena dala ai Iehova ese ena hereva Genese 2:17 dekenai ia hagugurua bona ena ura tanobada totona ia matauraia danu?
5 Iehova ese Adamu bona Heva ia hadibaia, bema ia idia kamonai henia lasi bona kara namo bona kara dika hadibaia au ena huahua idia ania, idia “ania dina dekenai” do idia mase. (Genese 2:17) Iehova ese ena hereva hegeregerena idia kara dika dinana ai, idia ia hereva henia bona ia gwau do idia mase. Dirava ena vairanai, Adamu bona Heva be unai dina ai idia mase. To, Iehova ese ena ura tanobada dekenai ia hagugurua totona, dala ia kehoa idia do mase momokani lasi neganai ruma bese do idia havaraia. To, Dirava ena vairanai lagani 1,000 be dina tamona bamona dainai, Adamu ena mauri lagani be 930 ia abia bena ia mase neganai, ita gwau diba unai ibounai be “dina” ta lalonai ia vara. (2 Petero 3:8; Genese 5:3-5) Unai dala ai, Iehova ese ena hereva, idia do ia panisia negana ena hereva, ia hamomokania bona ena ura tanobada totona be edia mase ese ia koua lasi. To nega sisina lalonai, goevadae lasi taudia, kara dika taudia danu, be idia mauri noho diba.
6, 7. (a) Esodo 9:15, 16 ena hereva hegeregerena, Iehova ese kara dika taudia ia do haorea lasi ena badina be dahaka? (b) Farao ena negai, Iehova ena siahu be edena bamona ia hedinarai, bona edena bamona Iena ladana idia diba? (c) Inai tanobada dikana ia hadikaia ore neganai, dahaka do ia vara?
6 Mose ena negai Iehova ese Aigupito ena lohia dekenai ia gwauraia herevana danu be Dirava ese kara dika taudia ia do haorea lasi ena badina ia hahedinaraia. Farao be Israela taudia ese Aigupito idia rakatania dalana ia koua neganai, Iehova ese maoromaoro ia hamasea lasi. Unai tano dekenai Hisihisi Ten ia mailaia, bona idia ese hoa dalanai Iehova ena siahu idia hahedinaraia. Iehova ese hisihisi namba seven ia gwauraia neganai, Farao ia hamaoroa ia bona ena taunimanima be tanobada amo Ia kokia haraga diba. To Iehova ia gwau: “Inai totona oi dekenai mauri lau henia vadaeni: Lauegu siahu dohore oi itaia, vadaeni tanobada taudia ibounai ese lauegu ladana dohore idia matauraia totona.”—Esodo 9:15, 16.
7 Iehova ese Israela taudia ia hamauria neganai, iena ladana be gabu momo herea dekenai idia diba. (Iosua 2:1, 9-11) Hari inai negai, kahirakahira lagani 3,500 murinai, taunimanima ese unai nega ai ia karaia gaudia idia do laloatao noho. Unai ese ena ladana Iehova sibona lasi, to unai ladana ia abia Tauna ena sivarai momokanina ia gwauraia. Unai dainai, iboudiai idia diba Iehova be iena gwauhamata hagugurua Diravana bona iena hesiai taudia durua totona kara ta ia karaia. (Iosua 23:14) Unai ese ia hahedinaraia, iena siahu badana dainai, gau ta lasi ese ena ura ia koua diba. (Isaia 14:24, 27) Unai dainai ita diba momokani, daudau lasi murinai, iena kamonai hesiai taudia hamauria totona Satani ena tanobada dikana ibounai do ia hadikaia ore. Unai siahu ibounai hahedinaraia karana bona Iehova ena ladana dekenai ia mailaia hairaina be do idia laloaboio lasi. Ia mailaia hahenamo be do idia noho ela bona hanaihanai.—Esekiela 38:23; Apokalupo 19:1, 2.
‘Iena Aonega be Edena Bamona Ita Tahua Diba?’
8. Paulo ese ita ia hagoadaia dahaka ita laloa totona?
8 Aposetolo Paulo ese Roma taudia ia tore henia neganai, inai henanadai ia gwauraia: “Dirava ena kara be maoromaoro lasi, a?” Bona mai goada ida ia haere: “Lasi momokani.” Bena Dirava ena hebogahisi ia herevalaia bona Iehova ena hereva, Farao be maoromaoro ia hamasea lasi ena badina ia gwauraia. Paulo ia hahedinaraia danu, ita taunimanima be uro karaia tauna ena imana dekenai ia noho raro bamona. Bena ia gwau: “Dirava danu ese unai bamona ia karaia vadaeni. Ia ura be iena badu bona iena siahu do ia hedinaraia. Unai dainai ia ese ia badu henia gaudia dekenai ia haheauka henia ela bona do idia mase ore. Bona ia ura danu iena hairai badana do ia hedinaraia. Ia ese inai hairaina haida ia henia vadaeni ita dekenai. Oibe, mai bogahisihisi danu ia ese ita ia karaia hegaegae vadaeni, iena hairaina do ita abia totona. Badina be ia ese ita ia boiria, ai Iuda taudia sibona lasi, to umui Iuda lasi taudia danu.”—Roma 9:14-24.
9. (a) Daidia be Iehova ese “ia badu henia gaudia”? (b) Dahaka dainai Iehova ese iena inai taudia dekenai haheauka bada ia hahedinaraia, bona ia idia lalokau henia taudia ese dahaka namo do idia abia?
9 Eden lalonai gwau-edeede ia vara negana amo, Iehova bona ena taravatu idia dagedage henia taudia ibounai be “ia badu henia gaudia.” Unai nega amo ema bona hari, Iehova ese haheauka ia hahedinaraia. Kara dika taudia ese ena dala idia kirikirilaia, iena hesiai taudia idia dagedage henia, bona iena Natuna idia hamasea danu. Iehova ese ena badu ia dogoatao bena nega ia henia, iboudiai ese Dirava gwau-edeede henia bona taunimanima be sibona idia lohia karadia amo, ia vara dika bada idia itaia totona. Unai nega lalonai danu, Iesu ena mase ese dala ia kehoa, kamonai taudia hamauria totona bona “Satani ena kara dika do ia haorea momokani totona.”—1 Ioane 3:8; Heberu 2:14, 15.
10. Dahaka dainai idia hanaia laganidia 1,900 lalonai Iehova ese kara dika taudia ia haheauka henidia noho?
10 Iesu ena toreisi lou murinai, lagani 1,900 mai kahana lalonai Iehova ese “ia badu henia gaudia” ia haheauka henidia noho, idia ia do hadikaia ore lasi. Dahaka dainai? Badina ta be, ia ese Iesu Keriso ida guba Basileia lalonai do idia vareai taudia ia hegaegaelaia. Edia namba be 144,000, bona idia be aposetolo Paulo ia gwauraia ‘hairai ia henia taudia.’ Guna, Iuda taudia dekena amo haida ia boiria unai guba oreana taudia ai idia lao totona. Gabeai, Dirava ese Idau Bese taudia ia boiria. Iehova ese unai taudia ia doria lasi ia idia hesiai henia totona. To mai lalokau ida ia karaia gaudia idia laloa bada taudia amo haida dekenai ia henia hahenamo be iena Natuna ida guba Basileia lalonai do idia lohia. Unai guba oreana hegaegaelaia karana be kahirakahira do ia ore.—Luka 22:29; Apokalupo 14:1-4.
11. (a) Edena orea taudia ese hari Iehova ena haheauka dainai namo idia davaria? (b) Edena dala ai mase taudia ese namo do idia davaria?
11 To tanobada do idia noholaia taudia be edena bamona? Iehova ena haheauka dainai, bese iboudiai amo ‘hutuma bada herea’ ia haboua diba danu. Hari edia namba be milioni haida. Iehova ese ia gwauhamata, unai tanobada oreana be inai tanobada dikana ena dokona amo do idia roho mauri bona edia helaro be tanobada paradaisona lalonai do idia noho ela bona hanaihanai. (Apokalupo 7:9, 10; Salamo 37:29; Ioane 10:16) Dirava ese ia abia hidi negana ai, mase taudia hutuma do ia hatoreaisi lou bona idia dekenai dala ia kehoa, guba Basileia ena henunai tanobada ai do idia noho totona. Kara 24:15 dekenai Dirava ena Hereva ia peroveta: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”—Ioane 5:28, 29.
12. (a) Iehova ese kara dika ia haheaukalaia karana amo dahaka ita dibaia? (b) Iehova ese unai ibounai ia karaia dalana dainai, emu hemami be edena bamona?
12 Unai ibounai lalonai kara gageva ta ia noho, a? Lasi, badina Dirava ese kara dika taudia, eiava “ia badu henia gaudia,” ia do hadikaia ore lasi lalonai, ma haida ia hebogahisi henia, iena ura hegeregerena. Unai ese ia hahedinaraia iena hebogahisi bona lalokau be bada. Danu, Iehova ena ura ia guguru dalana ita itaia neganai, ena kara momo ita dibaia. Unai dala amo idia hedinarai karadia—iena kota maoromaoro, iena hebogahisi, iena haheauka, bona iena aonega bada—dainai ita hoa. Guba bona tanobada ena lohia siahuna—ia lohia be maoro—ena hepapahuahu ia hamaoromaoroa dalana ese hanaihanai do ia hamomokania iena lohia dalana be hereadae. Aposetolo Paulo hegeregerena ita gwau: “Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba? Iena dala be daika ese do ia davaria diba?”—Roma 11:33.
Iseda Badinaia Karana Ita Hahedinaraia Dalana
13. Hisihisi ita davaria neganai, dahaka totona dala ia kehoa, bona dahaka ese ita do ia durua aonega dalana ita badinaia totona?
13 Dirava ena hesiai taudia momo be edia mauri lalonai hisihisi idia davaria. Hisihisi idia davaria noho ena badina be Dirava ese kara dika taudia ia do hadikaia ore lasi bona taunimanima ia do hanamoa lou lasi. Unai dainai do ita badu, a? Eiava ita laloa, unai bamona negadia ese dala idia kehoa, Diabolo be koikoi tauna ita hamomokania totona, a? Unai bamona ita karaia totona goada ita abia bema inai noinoi herevana ita laloatao: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” (Aonega Herevadia 27:11) Satani, Iehova ia gwauraia kerere tauna, ia gwau bema taunimanima ese edia kohu idia haboioa eiava hisihisi idia davaria, do idia gwau unai be Dirava ena kerere, bona ena ladana do idia hadikaia momokani. (Iobu 1:9-11; 2:4, 5) Iehova ena kudouna ita hamoalea, bema dika ita davaria neganai ia ita badinaia noho bona unai amo ita hahedinaraia Satani ena hereva be koikoi.
14. Bema hahetoho ita davaria neganai Iehova dekenai ita tabekau, dahaka namo do ita abia?
14 Bema hahetoho ita davaria neganai Iehova dekenai ita tabekau, kara namodia do ita habadaia diba. Hegeregere, Iesu ese ia haheaukalaia hisihisi gaudia dainai, “kamonai” karana be guna ia diba lasi dalana amo ia dibaia. Ita davaria hahetoho amo gau haida ita dibaia danu, hegeregere gini goada, haheauka, bona Iehova ena kara maoromaoro daladia laloa bada karana ita habadaia diba.—Heberu 5:8, 9; 12:11; Iamesi 1:2-4.
15. Hisihisi ita haheaukalaia neganai, ma haida be dahaka namo idia abia?
15 Ma haida ese iseda kara do idia itaia. Bema kara maoromaoro ita ura henia dainai idia vara hisihisi ita haheaukalaia, idia haida do idia lalo-parara hari inai negai Keristani taudia momokanidia be daidia. Bona ita ida idia tomadiho hebou neganai, mauri hanaihanai do idia davaria diba. (Mataio 25:34-36, 40, 46) Iehova bona ena Natuna idia ura taunimanima dekenai unai dala idia kehoa.
16. Bema iseda lalohadai nega aukadia haheaukalaia karana dekenai ia maoro, daidia danu do ita lalo-tamona?
16 Nega aukadia ita davaria neganai, bema ita laloa unai ese dala idia kehoa Iehova badinaia karana ita hahedinaraia bona iena ura hagugurua karana ita durua totona, unai be namo herea! Unai bamona ita karaia karana amo ita hahedinaraia diba ita be Dirava bona Keriso ida ita lalo-tamona. Iesu ese Keristani taudia momokanidia totona Iehova ia guriguri henia, ia gwau: “Idia [ia idia badinaia hahediba taudia] sibona totona lau noinoi lasi, to edia hereva dekena amo lau do idia abidadama henia taudia totona danu lau noinoi oi dekenai. Egu Tamana e, lau ura idia ibounai be do idia tamona, oi be lauegu lalona dekenai oi noho, bona lau be oiemu lalona dekenai lau noho hegeregerena, idia danu iseda lalona dekenai do idia noho.”—Ioane 17:20, 21.
17. Bema Iehova ita badinaia noho, dahaka ita abia dae momokani diba?
17 Bema Iehova ita badinaia noho, davana namo hereana do ia henia. Iena Hereva ia gwau: “Do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba Lohiabada ena gaukara lalonai, emui hekwarahi be hekwarahi kava lasi momokani.” (1 Korinto 15:58) Danu, ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi.” (Heberu 6:10) Iamesi 5:11 ia gwau: “Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.” Iobu ia abia davana be dahaka? “Vadaeni Lohiabada ese Iobu ena mauri ma ia hanamoa lou bada. Iena gorere ia ore murinai, iena noho be namo bada, to iena noho gunana be namo bada lasi.” (Iobu 42:10-16) Oibe, “Dirava idia tahua taudia ibounai, be davana namona Dirava ese do ia henidia.” (Heberu 11:6) Bona ita naria noho davana be namo herea—mauri hanaihanai tanobada paradaisona dekenai!
18. Iseda lalona ai idia noho hisihisi idia havaraia gaudia dekenai dahaka do ia vara?
18 Idia hanaia laganidia tausen momo lalonai taunimanima dekenai idia vara dika ibounai be Dirava ena Basileia ena lohia siahuna ese do ia kokia. Unai nega ai do ita davaria moalena ese hari ita davaria hisihisi ibounai ia hereaia. Ita davaria hisihisi gunadia ese eda lalona do idia hahisia lasi. Tanobada matamatana lalonai taunimanima ese dina ta ta ai lalohadai namodia do idia laloa bona kara namodia idia karaia dainai, guna idia abia hisihisi be edia lalona amo do idia boio. Iehova ia gwau: “Lau ese tanobada matamata [kara maoromaoro taudia] bona guba matamata [taunimanima ia lohiaia guba Basileia matamatana] lau karaia noho, bona kara gunadia be do idia laloa lou lasi, do idia laloaboio momokani. Lau ese lau karaia gauna dainai do umui moale bada ela bona hanaihanai.” Oibe, Iehova ena tanobada matamatana lalonai, kara maoromaoro taudia do idia gwau diba: “Tanobada ena kahana ibounai, be idia laga-ani noho, mai maino danu idia noho. Idia ibounai ese mai moale danu ane idia abia noho.”—Isaia 14:7; 65:17, 18.
Riviu Henanadai
• Iehova ese dika ia do koua lasi lalonai, edena dala ai ia hahedinaraia ena ladana ia matauraia?
• Edena dala ai Dirava ese “ia badu henia gaudia” ia do hadikaia ore lasi dainai, ita danu ese ena hebogahisi ita abia?
• Hisihisi ita abia neganai, dahaka ita laloa be namo?
[Pictures on page 67]
Iehova ese “Iobu ena mauri ma ia hanamoa lou bada”