Karoa 6

Inai Hepapahuahu amo Ita Siri Diba Lasi

1, 2. (a) Satani ese Eden lalonai dahaka hepapahuahu ia havaraia? (b) Iena hereva ese edena bamona unai hepapahuahu ia hahedinaraia?

TAUNIMANIMA idia davaria hepapahuahu badana amo oi siri diba lasi. Oiemu kara unai hepapahuahu lalonai be mai anina bada oiemu mauri hanaihanai helarona dekenai. Eden lalonai gwau-edeede karana ia vara neganai, unai hepapahuahu ia vara. Unai nega ai Satani be Heva ia nanadaia: “Momokani, uma gabu ena au huahua ta ania lasi taravatu Dirava ese ia atoa o lasi?” Heva ia haere Dirava ese au tamona ia taravatua, ia gwau: “Unai au ena huahua umui ania lasi, . . . umui mase garina.” Bena Satani ese Iehova ia samania, ia gwau Iehova be koikoi tauna. Ma ia gwau bema Heva bona Adamu ese Dirava idia kamonai henia lasi do idia mase lasi. Satani ia gwau Dirava ese ia havaraia taudia amo gau namona ta​—⁠sibona edia mauri lalonai taravatu idia atoa dibana​—⁠ia koua. Satani ia gwau: “Dirava be inai bamona ia hereva badina ia diba, umui ania neganai aonega do umui davaria, bona Dirava hegeregere do umui noho, kara namona bona kara dikana do umui diba.”​—⁠Genese 3:​1-5.

² Satani ena hereva ena anina be, taunimanima ese Dirava ena taravatu idia kamonai henia neganai lasi to sibona edia dala idia abia hidi neganai, namo do idia abia. Unai amo Dirava ena lohia dalana ia henanadailaia. Dirava be guba bona tanobada edia lohia badana, eiava idia ia lohiaia be maoro, ena hepapahuahu badana ia vara. Inai henanadai ia havaraia: Edena lohia dalana ese taunimanima dekenai namo ia havaraia, Iehova ena lohia dalana eiava taunimanima sibona edia lohia dalana? Iehova ese maoromaoro Adamu bona Heva ia hamasea diba, to unai ese lohia siahuna hepapahuahulaia karana do ia hamaoromaoroa lasi. Dirava ese taunimanima dekenai nega bada ia henia karana amo, ia hahedinaraia iena lohia dalana bona iena taravatu idia dadaraia dainai dahaka do ia vara.

3. Satani ese edena hepapahuahu iharuana ia havaraia?

³ Satani ese Eden sibona lalonai Iehova ena lohia siahuna ena maoro ia dagedage henia lasi. Ma haida ese Iehova idia badinaia karana ia henanadailaia danu. Unai be hepapahuahu iharuana ai ia lao. Ia ese Adamu bona Heva edia natudia bona Dirava ena lauma natudia ibounai, Iehova ia lalokau bada vara guna Natuna danu, edia badinaia karana ia henanadailaia. Hegeregere, Iobu ena negai Satani ia gwau Iehova idia tomadiho henia taudia be Dirava bona ena lohia dalana idia lalokau henia dainai lasi, to sibona edia namo idia tahua dainai, unai idia karaia. Ia gwau hisihisi idia davaria neganai, idia ibounai ese idia sibona edia ura do idia tahua.​—⁠Iobu 2:​1-6; Apokalupo 12:⁠10.

Histori ese Ia Hahedinaraia Gauna

4, 5. Taunimanima ese sibona edia raka dalana idia naria karana dekenai, histori ese dahaka ia hahedinaraia?

⁴ Lohia siahuna hepapahuahulaia karana lalonai mai anina bada gauna be inai: Dirava ese taunimanima ia havaraia lasi iena lohia siahuna idia dadaraia bena do idia kwalimu totona. Iena kara maoromaoro taravatudia idia badinaia be gau badana bona unai amo namo do idia davaria. Peroveta tauna Ieremia ese unai ia abia dae, ia gwau: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho. Lohiabada e, oiemu bese taudia do oi matakani henia.” (Ieremia 10:​23, 24) Unai dainai Dirava ena Hereva ese ita ia hagoadaia: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi.” (Aonega Herevadia 3:⁠5) Taunimanima idia mauri noho totona Dirava ese guba bona tanobada idia biagua taravatudia henunai idia ia atoa, unai hegeregerena, Dirava ese kara maoromaoro taravatudia ia atoa danu, bona bema unai idia badinaia mai lalo-tamona ida do idia noho diba.

⁵ Ia hedinarai goevagoeva, Dirava ia diba taunimanima ese iena lohia siahuna idia dadaraia neganai, do idia kwalimu lasi. Taunimanima ese Dirava ena lohia dalana idia dadaraia neganai, politikol, moni gaukaralaia, bona tomadiho daladia idauidau idia havaraia. Unai dala idauidau dainai taunimanima idia hepapahuahu hanaihanai, bona unai ese dagedage, tuari, bona mase ia havaraia. “Taunimanima haida ese ma haida idia biagua noho, bona idia hisihisi henidia noho.” (Hadibaia Tauna 8:⁠9) Unai be taunimanima edia histori ibounai lalonai ia vara. Dirava ena Hereva ia peroveta hegeregerena, “kara dika taudia bona koikoi taudia ese edia kara dika bona edia koikoi do idia habadaia.” (2 Timoteo 3:13) Bona vanegai laganidia 100 lalonai, taunimanima ese saiens bona bisinesi daladia namodia momo idia haginia negana lalonai, dika badadia idia vara danu. Ieremia 10:23 ena hereva ia guguru momokani​—⁠Dirava ese taunimanima ia havaraia lasi sibona edia raka dalana idia abia hidi totona.

6. Dirava ese daudau lasi murinai taunimanima edia lohia dalana be edena bamona do ia haorea?

⁶ Taunimanima ese Dirava ena lohia siahuna idia dadaraia karana dainai idia vara gaudia dikadia idia hamomokania vaitani, taunimanima edia lohia dalana ia kwalimu diba lasi. Dirava ena lohia dalana sibona ese moale, lalo-tamona, gorere lasi tauanina, bona mauri ia mailaia diba. Bona Dirava ena Hereva ia hahedinaraia, Iehova ese taunimanima edia lohia dalana ia haheaukalaia negana be kahirakahira do ia ore. (Mataio 24:​3-14; 2 Timoteo 3:​1-5) Daudau lasi murinai, Dirava ese taunimanima edia kara do ia hadokoa bona tanobada do ia lohiaia matamaia. Baibel ena peroveta herevana ia gwau: “Unai basileia namba 4 [hari idia lohia taunimanima edia gavamani] ena nega lalonai, guba ena Dirava ese basileia ta do ia haginia [guba dekenai], inai basileia be do idia hadikaia diba lasi ela bona hanaihanai. . . . Bese ta ese do ia halusia diba lasi [taunimanima ese tanobada do idia lohiaia lou lasi]. Bona unai basileia ese [hari idia noho] basileia ibounai do ia hamakohia, bona haorea momokani, bona ia sibona do ia noho ela bona hanaihanai.”​—⁠Daniela 2:⁠44.

Dirava Ena Tanobada Matamatana Dekenai Roho Mauri Karana

7. Dirava ena lohia siahuna ese taunimanima edia lohia siahuna ia haorea neganai, daidia do idia roho mauri?

⁷ Dirava ena lohia siahuna ese taunimanima edia lohia siahuna ia haorea neganai, daidia do idia roho mauri? Baibel ia haere: “Kara maoromaoro taudia [Dirava ena lohia siahuna idia abia isi taudia], be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia [Dirava ena lohia siahuna idia abia isi lasi taudia] be tano dekena amo, Dirava ese do ia abidia siri.” (Aonega Herevadia 2:​21, 22) Unai hegeregerena, salamo torea tauna ia gwau: “Nega daudau lasi lalonai kara dika taudia do idia ore. . . . Kara maoromaoro taudia ese, Dirava ia henidia tano dekenai do idia noho ela bona hanaihanai.”​—⁠Salamo 37:​10, 29.

8. Edena dala ai Dirava ese ena lohia siahuna ena maoro do ia hamomokania?

⁸ Dirava ese Satani ena tanobada ia hadikaia ore murinai, Iena tanobada matamatana do ia havaraia, bona lagani tausen momo lalonai taunimanima idia hahisia dagedage, tuari, ogogami, hisihisi, gorere, bona mase do ia haorea momokani. Baibel ese dala namo hereana ai Dirava idia kamonai henia taudia do idia abia hahenamo ia herevalaia, ia gwau: “Ia [Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:​3, 4) Dirava be Keriso ese ia lohiaia guba Basileia gavamanina amo do ia hamomokania ia be iseda Siahu Bada Lohiana be maoro.​—⁠Roma 16:20; 2 Petero 3:​10-13; Apokalupo 20:​1-6.

Haida Edia Kara

9. (a) Iehova idia badinaia taudia ese edena bamona ena hereva idia laloa? (b) Edena dala ai Noa ese ena badinaia karana ia hamomokania, bona ena haheitalai ese edena bamona ita ia durua diba?

⁹ Histori ibounai lalonai, abidadama tatau bona hahine ese Iehova idia badinaia bona idia hamomokania ia be edia Siahu Bada Lohiana. Idia diba ia idia kamonai henia neganai, do idia mauri diba. Noa be unai bamona tauna. Unai dainai Dirava be Noa ia hamaoroa: “Mauri gaudia ibounai do lau haorea. . . . Lagatoi namona ta, au namodia dekenai do oi haginia.” Bona Noa ese Iehova ena hakaua dalana ia badinaia. Ena be Noa ese taunimanima oredia ia hadibaia, to guna bamona idia mauri noho, idia abia dae lasi gau badana ta do ia vara. To Noa ese lagatoi badana ia karaia bona Iehova ena kara maoromaoro daladia ia harorolaia goadagoada. Unai sivarai be ma ia gwau: “Noa ese unai bamona ia karaia, Dirava ena hereva ibounai hegeregere.”​—⁠Genese 6:​13-22; Heberu 11:7; 2 Petero 2:⁠5.

10. (a) Edena dala ai Aberahamo bona Sara ese Iehova ena lohia siahuna idia abia isi? (b) Aberahamo bona Sara edia haheitalai ese edena bamona ita idia durua diba?

¹⁰ Aberahamo bona Sara danu be haheitalai namodia Iehova ena lohia siahuna abia isi karana dekenai, badina iena hahegani iboudiai idia badinaia. Idia be Kaledea taudia edia kohu bada hanuana Uru dekenai idia noho. To Iehova ese Aberahamo ia hagania tano ma ta, ia diba lasi tanona, dekenai ia lao neganai, “Aberamo ia lao, Dirava ena oda hegeregere.” Ita laloa diba Sara ena mauri ia namo​—⁠ia be mai ena ruma, turadia, bona varavara. To, Iehova bona Aberahamo edia siahu henunai ia noho bona Kanana tanona dekenai ia lao, herevana ia diba lasi unuseniai ena mauri be do edena bamona.​—⁠Genese 11:31–12:4; Kara 7:​2-4.

11. (a) Edena bamona nega lalonai Mose ese Iehova ena lohia siahuna ia abia isi? (b) Edena dala ai Mose ena haheitalai ese ita ia durua diba?

¹¹ Mose be Iehova ena lohia siahuna ia abia isi tauna ma ta. Bona nega aukana lalonai​—⁠Aigupito ena Farao ena vairanai​—⁠unai ia karaia. Bona Mose ese sibona ena namo ia laloa bada lasi. Ia laloa ia hereva namonamo diba lasi. To Iehova ia kamonai henia. Iehova ese ia hagoadaia bona ena kakana Arona ese ia durua lalonai, Mose ese lalo-auka tauna Farao dekenai Iehova ena hereva ia gwauraia loulou. Israela taudia haida danu ese Mose idia maumauraia bada. To, Mose ese Iehova amo ia abia hahegani iboudiai ia badinaia mai kamonai ida, bona ena kara dainai, Israela be Aigupito amo ia roho mauri.​—⁠Esodo 7:6; 12:​50, 51; Heberu 11:​24-27.

12. (a) Dahaka ese ia hahedinaraia Iehova ita badinaia totona idia torea taravatu sibona ita badinaia be hegeregere lasi? (b) Unai bamona badinaia karana ita laloa bada dainai, edena bamona ita ia durua 1 Ioane 2:15 ena hereva ita badinaia totona?

¹² Iehova idia badinaia taudia idia laloa lasi, idia torea taravatu sibona idia badinaia be hegeregere. Potifara ena adavana ese heudahanai totona Iosepa ia veria neganai, Dirava ena taravatu heudahanai dekenai idia do torea lasi. To, Iosepa be Iehova ese Eden lalonai ia hamatamaia headava dalana ia diba. Ia diba tau ma ta ena adavana ida mahuta hebou karana be Dirava ese ia moalelaia lasi. Iosepa ia ura lasi Aigupito taudia edia kara ia tohotohoa bona unai amo Dirava ena haheauka ena bada ia tohoa. Dirava ese taunimanima ia kara henia daladia ia lalohadailaia bena Dirava ena ura gaudia ia badinaia namonamo, unai amo Iehova ena dala ia abia isi.​—⁠Genese 39:​7-12; Salamo 77:​11, 12.

13. Edena dala ai (a) Iobu ese, bona (b) Heberu taudia toi ese, idia hamomokania Diabolo be koikoi tauna?

¹³ Ena be Iehova idia diba namonamo taudia ese hahetoho badadia idia davaria, to Iehova idia dadaraia lasi. Satani ia gwau, bema Iobu ese ena kohu bada ia haboioa eiava bema ia gorere, ia danu​—⁠unai Iehova ese ia gwauraia namo tauna​—⁠ese Dirava do ia rakatania. To Iobu ese ia hamomokania Diabolo be koikoi tauna, herevana Iobu ia diba lasi dahaka dainai unai dika ibounai ia davaria. (Iobu 2:​9, 10) Lagani handred momo murinai, Satani ese ena lalohadai ia do hamomokania toho dainai, Babulonia ena king mai ena badu bada ia veria, Heberu matamata taudia toi ia hamaoroa, bema idia be ia haginia kaivakuku vairanai idia tomadiho lasi, lahi siahuna lalonai do idia mase. King ese idia ia doria do idia abia hidi, ena hahegani idia kamonai henia eiava Iehova ena taravatu kaivakuku tomadiho henia karana dekenai idia kamonai henia, bona unai neganai idia hahedinaraia goevagoeva idia ese Iehova idia tomadiho henia bona ia be edia Siahu Bada Lohiana. Idia dekenai sibona edia mauri lasi, to Dirava badinaia karana be mai anina bada!​—⁠Daniela 3:​14-18.

14. Edena dala ai ita goevadae lasi taudia ese ita hamomokania diba Iehova ita badinaia momokani?

¹⁴ Unai bamona haheitalai dainai do ita laloa, goevadae taudia sibona ese Iehova idia badinaia diba bona bema ta ese kerere ia karaia do ia hegeregere lasi, a? Lasi momokani! Baibel ese ita ia hamaoroa nega haida Mose ia kara kerere. Ena be Iehova ia moale lasi, to Mose ia dadaraia lasi. Iesu Keriso ena aposetolo taudia be mai edia manoka danu. Iehova ia diba kara dika ita abia hanai dainai ita goevadae lasi, bona bema mai eda ura ida ena ura ita dadaraia lasi, ita do ia abia dae. Bema manoka ta dainai kerere ita karaia, gau badana be mai momokani ida ita helalo-kerehai bona unai kerere ita karaia noho lasi. Unai dala amo ita hahedinaraia Iehova ia gwauraia namo gaudia ita ura henia momokani bona ia gwauraia dika gaudia ita inai henia. Iesu ena kara dika ena davana karaia boubouna ita abidadama henia dainai, Dirava vairanai ita goeva.​—⁠Amosa 5:15; Kara 3:19; Heberu 9:⁠14.

15. (a) Taunimanima iboudiai amo daika sibona ese Dirava ia badinaia goevagoeva, bona unai ese dahaka ia hamomokania? (b) Iesu ena kara ese edena bamona ita ia durua?

¹⁵ To, taunimanima ese Iehova ena lohia siahuna idia kamonai henia goevagoeva diba lasi, a? Lagani 4,000 bamona lalonai unai henanadai ena haere be “hunia gauna badana” bamona. (1 Timoteo 3:16) Ena be Dirava ese Adamu ia havaraia neganai Adamu ia goevadae, to Dirava badinaia karana dekenai haheitalai namona ia karaia lasi. Daika ese unai ia karaia diba? Iena kara dika natudia amo ta lasi. Unai ia karaia tauna tamona be Iesu Keriso. (Heberu 4:15) Iesu ena kara ese ia hamomokania Adamu, nega namo herea ai ia noho tauna, ese Dirava ia badinaia goevagoeva diba bema ia ura unai ia karaia. Kerere be Dirava ena havaraia gaukarana lalonai lasi. Unai dainai, ita ura Dirava ena taravatu kamonai henia sibona lalonai lasi, to Guba bona Tanobada ena Lohia Badana Iehova ita badinaia lalonai danu, Iesu Keriso ena haheitalai ita tohotohoa.​—⁠Deuteronomi 32:​4, 5.

Ita Ta Ta Eda Haere be Dahaka?

16. Dahaka dainai iseda lalohadai Iehova ena lohia siahuna dekenai ita gimaia hanaihanai be gau badana?

¹⁶ Hari inai negai ita ta ta be guba bona tanobada ena lohia siahuna hepapahuahulaia karana amo ita siri diba lasi. Bema ita hereva vadaeni ita be Iehova ena kahana dekenai ita gini, Satani ese ita ia tuari henia. Dala idauidau amo hahetoho ia havaraia, bona unai bamona do ia karaia noho ela bona inai tanobada dikana ena dokona. Namona be ita gima noho. (1 Petero 5:⁠8) Hepapahuahu badana, Iehova ena lohia siahuna dekenai, bona hepapahuahu iharuana, hahetoho lalonai Dirava badinaia noho karana dekenai, iseda kara ese do ia hahedinaraia ita be edena kahana ai ita gini. Bema ita laloa Dirava badinaia lasi karana be hegeregere badina tanobada dekenai momo ese unai idia laloa, dika do ita davaria. Iehova ita badinaia ena anina be iseda kara ibounai lalonai iena kara maoromaoro daladia ita badinaia.

17. Koikoi bona henaohenao karadia be daika amo idia mai dainai unai karadia ita dadaraia?

¹⁷ Hegeregere, “koikoi ibounai edia tamana” Satani ita tohotohoa diba lasi. (Ioane 8:44) Gau iboudiai lalonai ita kara momokani be gau badana. Satani ena tanobada ai, nega momo matamata taudia be edia tama sina dekenai idia koikoi. To Keristani matamata taudia be unai idia karaia lasi, bona unai amo idia hamomokania Satani be koikoi tauna, badina ia gwau Dirava ena taunimanima ese hahetoho idia davaria neganai Dirava badinaia karana do idia rakatania. (Iobu 1:​9-11; Aonega Herevadia 6:​16-19) Danu, bisinesi karadia haida ese idia hahedinaraia diba, ta be hereva momokani Diravana lasi to “koikoi iboudiai edia tamana” ena kahana ai ia gini. Unai karadia ita dadaraia. (Mika 6:​11, 12) Danu, henaohenao be maoro lasi, herevana ta ia dabu eiava kohu bada tauna amo ia henaohenao. (Aonega Herevadia 6:​30, 31; 1 Petero 4:15) Herevana ita noho gabuna dekenai momo idia henaohenao eiava ita henaoa gauna be maragi, to henaohenao karana ese Dirava ena taravatu ia utua.​—⁠Luka 16:10; Roma 12:2; Efeso 4:⁠28.

18. (a) Keriso ena Lagani 1,000 Lohia Negana ena dokonai, taunimanima iboudiai ese dahaka hahetoho do idia davaria? (b) Hari dahaka kara ita manadalaia be gau badana?

¹⁸ Keriso ena Lagani 1,000 Lohia Negana lalonai, Satani bona ena demoni be guri dobu masemase lalonai do idia noho, bona taunimanima dekenai idia be siahu lasi. Unai be namo herea! To unai lagani 1,000 edia dokonai, nega sisina lalonai idia ruhadia. Satani bona ia murinai idia raka taudia be Dirava ese ia hanamodia lou bona ia idia badinaia taudia do idia tuari henia. (Apokalupo 20:​7-10) Bema unai negana ai do ita mauri noho, guba bona tanobada ena lohia siahuna hepapahuahulaia karana lalonai iseda kara be do edena bamona? Unai nega ai taunimanima iboudiai do idia goevadae dainai, Dirava badinaia lasi karadia ibounai be mai edia ura ida idia karaia bona edia davana be mase hanaihanai. Gau badana be hari Iehova ia henia hahegani ibounai badinaia karana ita manadalaia, herevana iena Hereva amo eiava ena orea amo ia henidia! Unai ita karaia neganai, ita hahedinaraia mai momokani ida ia ita badinaia, badina ia be Guba bona Tanobada edia Lohia Badana.

Riviu Henanadai

• Edena hepapahuahu badana amo ita siri diba lasi? Edena bamona unai hepapahuahu lalonai ita vareai?

• Iehova idia badinaia idaunegai tatau bona hahine ese edena dala namo hereadia ai idia hamomokania Iehova idia badinaia?

• Dahaka dainai dina ta ta ai iseda kara amo Iehova ita matauraia be gau badana?