Helaro Namona Mase Taudia Totona be Ia Noho, A?

Idaunegai tauna Iobu ia henanadai: “Bema tau ta ia mase, ia be do ia mauri lou, a?” (Iobu 14:14) Reana oi danu be unai bamona oi henanadai vadaeni. Emu lalokau taudia, idia mase vadaeni taudia, be nega namo hereana lalonai tanobada dekenai do oi hedavari henidia lou diba​—bema unai oi diba, do oi moale bada, ani?

Vadaeni, Baibel ia gwauhamata: “Aiemai mase taudia be do idia mauri lou, . . . do idia toreisi lou.” Ma ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—Isaia 26:19; Salamo 37:29.

Unai gwauhamata ita abia dae momokani totona, namona be inai henanadai badadia haida ita haerelaia: Dahaka dainai taunimanima idia mase? Mase taudia be edeseniai? Bona edena bamona ita diba momokani do idia mauri lou?

Mase, Bona Iena Anina Ita Dekenai

Baibel ese ia hahedinaraia, matamana neganai Dirava ena palani be taunimanima do idia mase lasi. Ia ese tau bona hahine ginigunadia, Adamu bona Heva, be tanobada paradaiso ta ladana Eden lalonai ia atodia, ia hamaoroa natudia do idia havaraia bona tanobada ibounai be Paradaiso ai do idia halaoa. Iena oda idia utua negana sibona ai do idia mase.​—Genese 1:28; 2:​15-17.

Dirava ena hebogahisi idia laloa bada lasi dainai, Adamu bona Heva ese ena oda idia utua, bena ia panisidia. Adamu ia hamaoroa: “Oi be tano dekena amo karaia gauna, bona tano dekenai do oi giroa lou.” (Genese 3:19) Dirava ese Adamu ia do havaraia lasi neganai, ia noho lasi; ia be tano kahuna sibona. Bona ena kara dika dainai Dirava ese kahu ai ia halaoa lou.

Unai dainai mase lalonai mauri be lasi. Baibel ese edia idau ia hahedinaraia, ia gwau: “Kara dika ena davana be mase, to Dirava ena harihari gauna . . . be mauri hanaihanai.” (Roma 6:23) Baibel be ma ia gwau: “Mauri taudia idia diba do idia mase; to mase taudia be gau ta idia diba lasi.” (Hadibaia Tauna 9:5) Baibel ia gwau, taunimanima ta ia mase neganai, “tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.”​—Salamo 146:​3, 4.

To, badina be dahaka ita ibounai be Adamu bona Heva edia kerere dainai ita mase? Badina ita ibounai be Adamu ia kara dika murinai ita vara, unai dainai ita ibounai ese ia amo kara dika bona mase ita abia. Baibel ia gwau: “Tau tamona [Adamu] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia.”​—Roma 5:12; Iobu 14:4.

Haida idia laloa, taunimanima be mai edia mase diba lasi laumana bona mase amo mauri idauna lalonai ia vareai. To Baibel ese unai ia hamomokania lasi; ia hahedinaraia taunimanima edia mase be animal edia mase hegeregerena, ia gwau: “Taunimanima edia mauri dalana ese boroma edia mauri dalana ia hereaia lasi, . . . Idia ibounai be gabu tamona dekenai idia lao noho, tano ena kahu. Idia ruaosi be kahu dekena amo idia mai, bona idia ruaosi be kahu dekenai do idia giroa lou.”​—Hadibaia Tauna 3:​19, 20.

Taunimanima Do Idia Mauri Lou Dalana

Kara dika bona mase be tanobada ai idia vareai murinai, Dirava ia hahedinaraia, mase taudia do ia hatoredia isi, do idia mauri lou totona. Baibel ia gwau: “Aberahamo ia daradara lasi, ia laloa, ‘Bema Isako ia mase, Dirava be mai ena siahu do ia hatorea isi lou.’ ” (Heberu 11:​17-19) Aberahamo be unai bamona ia laloa be maoro, badina Baibel ia gwau Siahu Ibounai Diravana be “mase taudia edia Dirava lasi, to mauri taudia edia, badina taunimanima ibounai be ia dainai idia mauri.”​—Luka 20:​37, 38.

Oibe, Siahu Ibounai Diravana be mai ena siahu, ia abia hidi taudia do ia hatoredia isi lou, bona ia ura unai bamona do ia karaia. Iesu Keriso ia gwau: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni . . . do idia toreisi.”​—Ioane 5:​28, 29; Kara 24:15.

Nega sisina murinai, Iesu ese haida ia hedavari henia, mase tauna ta, vabu ta ena natuna tamona, be Nain hanuana amo idia huaia lao. Iesu be vabu ena lalohisihisi bada ia itaia neganai, ia hebogahisi henia. Unai dainai mase tauna ia hereva henia, ia gwau: “Uhau tauna e, . . . oi toreisi.” Bena mase tauna ia helai tore, bena Iesu ese ena sinana ia henia.​—Luka 7:​11-17.

Unai hegeregerena, Iesu be Iuda taudia edia dubu biaguna ta ladana Iairo ena ruma ai ia vareai neganai, moale bada ia vara. Unai tau ena lagani 12 natuna kekenina ia mase vadaeni. To Iesu be kekeni dekenai ia lao bona ia gwau: “Kekeni e, oi toreisi.” Vadaeni ia toreisi!​—Luka 8:​40-56.

Gabeai, Iesu ena turana Lasaro ia mase. Iesu be ena ruma ai ia ginidae neganai, Lasaro be dina 4 ia mase vadaeni. Ena taihuna Mareta ia gwau: “Lau diba dina gabeai, toreisi lou dinana neganai, do ia toreisi lou.” To Iesu be gara gabuna ia lao, ia oda henidia nadi do idia kokia, bena ia boiboi: “Lasaro e, oi mai murimuri dekenai.” Vadaeni Lasaro ia raka-lasi!​—Ioane 11:​11-44.

Mani inai oi laloa: Lasaro ia mase negana lalonai bema guba ena moale ia moalelaia eiava hel ena hisihisi ia hisihisilaia, ia toreisi lou murinai unai do ia herevalaia. To ia herevalaia lasi, badina be mase lalonai gau ta ia diba lasi bona gau ta ia mamia lasi. Bema Iesu ese ia hatorea isi lou lasi, unai bamona do ia noho ela bona “dina gabeai, toreisi lou dinana neganai, do ia toreisi lou.”

Momokani Iesu ese ia karaia hoa karadia be nega sisina sibona lalonai heduru idia henia, badina unai taudia idia mase lou. Unai lagani 1,900 gunanai ia karaia karadia ese idia hamomokania Dirava ena siahu amo mase taudia idia mauri lou diba. Iesu ena hoa karadia ese idia hahedinaraia Dirava ena Basileia henunai tanobada ai dahaka do ia vara badabada.

Emu Lalokau Tauna ta Ia Mase Neganai

Ena be toreisi lou herevana oi abia dae, to mase ia vara neganai reana oi lalohisihisi bada. Ena be Aberahamo ia abia dae ena adavana do ia mauri lou, to “ruma dekenai ia raka vareai, Sara totona ia tai.” (Genese 23:2) Bona Iesu be edena bamona? Lasaro ia mase neganai, ena “lalona ia hisihisi bada, mamina ia abia momokani,” bena “ia tai.” (Ioane 11:​33, 35) Vadaeni, emu lalokau tauna ta ia mase neganai, oi taitai be manoka karana lasi.

Natu ta ia mase neganai, ena sinana ia lalohisihisi bada. Baibel ese unai ia hahedinaraia. (2 King Taudia 4:27) Momokani, tama danu be edia natudia edia mase dainai idia lalohisihisi bada. King Davida ena natuna, Abesaloma ia mase neganai, ia gwau: “Bema oiemu gabuna dekenai lau mase be namo!”​—2 Samuela 18:33.

To, toreisi lou herevana oi abia dae dainai, do oi lalohisihisi hanaihanai lasi, helaro lasi taudia hegeregeredia. (1 Tesalonika 4:13) To guriguri amo Dirava kahirakahira oi lao, bena ia ese “oi do ia durua.”​—Salamo 55:22.

Baibel siridia be Hiri Motu Buka Helaga, Bible Society of Papua New Guinea ese ia karaia gauna amo.