Bema Ita Mase, Dahaka Do Ia Vara?

REANA oi diba vadaeni, hari taunimanima idia buruka, idia gorere bona idia mase. Natudia haida danu idia mase. Mase eiava mase tauna dainai oi gari be namo, a?— Bema ita mase, ia vara gauna oi diba, a?—

Hari ita mauri noho taudia ta be ia mase bona ia toreisi lou lasi ita dekenai unai ia gwauraia totona. To Iesu, Hadibaia Tauna Badana be tanobada dekenai ia noho neganai, unai bamona tauna ta ia noho. Iena sivarai duahia karana amo mase taudia dekenai ia vara gauna ita dibaia diba. Unai tauna be Iesu ena turana ta bona ia be Ierusalema kahirakahira ia noho hanua maragina ta, Betania dekenai ia noho. Iena ladana be Lasaro bona iena taihudia edia ladadia be Mareta bona Maria. Baibel ese ia vara gauna ia herevalaia dalana mani ita itaia.

Dina ta Lasaro be ia gorere bada. Unai nega ai, Iesu be gabu daudauna dekenai ia noho. Unai dainai Mareta bona Maria ese tau ta idia siaia Iesu do ia hadibaia edia tadikaka Lasaro be ia gorere. Unai bamona idia karaia badina idia diba Iesu ese edia tadikaka ia hanamoa diba. Iesu be doketa lasi, to Dirava amo siahu ia abia gorere idauidau ia hanamoa totona.​—Mataio 15:​30, 31.

To, Iesu be Lasaro itaia totona ia do lao lasi neganai, Lasaro ena gorere ia bada momokani bena ia mase. To Iesu ese ena hahediba taudia ia hamaoroa Lasaro be ia mahuta bona do ia lao ia hanogaia totona. Hahediba taudia be Iesu ena hereva ena anina idia lalo-pararalaia lasi. Unai dainai Iesu ia gwau: “Lasaro be ia mase vadaeni.” Unai ese mase dekenai dahaka ia hahedinaraia?— Oibe, mase be mahuta bamona. Ia mase tauna ia mahuta boio momokani dainai ia nihi lasi.

Iesu be Mareta bona Maria vadivadi henia totona ia lao. Unai ruma bese taudia edia turadia momo idia ginidae vadaeni. Idia mai taihudia idia hagoadaia totona badina edia tadikakana ia mase. Mareta be Iesu ena mai sivaraina ia kamonai neganai, ia lao ia hedavari henia totona. Gabeai Maria danu ia lao. Ia hebogahisi bada dainai ia taitai bona ena aena badinai ia goru diho. Maria ida idia lao turadia haida danu idia taitai.

Hadibaia Tauna Badana be Lasaro ena guria gabuna totona ia henanadai. Unai dainai idia ese Lasaro ena guria gabuna dekenai Iesu idia hakaua lao. Iesu ese idia taitai taudia ibounai ia itaia neganai, ia tai danu. Ita lalokau henia tauna ta ia mase neganai ita mamia hisihisina ia diba.

Nadi ta be kohua vairanai ia noho, unai dainai Iesu ia gwau: “Nadi umui kokia.” Idia karaia be namo, a?— Mareta ia laloa unai be lalohadai namona lasi. Ia gwau: “Lohiabada e, ia bodaga vadaeni, badina be dina 4 ia mase vadaeni.”

To Iesu be ia dekenai ia gwau: “Edena bamona? Oi lau hamaoroa guna, ani, bema oi abidadama henia, be Dirava ena hairaina do oi itaia?” Iesu ena hereva ena anina be Mareta do ia itaia gauna ese Dirava do ia hanamoa. Iesu be dahaka do ia karaia? Nadi idia kokia neganai, Iesu be Iehova dekenai ia guriguri badabada. Bena Iesu ia boiboi ia gwau: “Lasaro e, oi mai murimuri dekenai.” Do ia raka-lasi, a? Unai ia karaia diba, a?—

Ia mahuta noho tauna ta oi hanogaia diba, a?— Oibe, bema oi boiboi do ia noga. To mase dekenai ia mahuta noho tauna ta oi hanogaia diba, a?— Lasi. Ena be oi boiboi badabada, to ia mase tauna be do ia kamonai lasi. Oi, lau eiava tanobada dekenai ia noho tauna ta ese mase tauna ia hanogaia diba lasi.

To Iesu be idau. Ia be Dirava amo siahu bada ia abia. Unai dainai Iesu ese Lasaro ia boiria neganai, hoa gauna ta ia vara. Dina 4 lalonai ia mase vadaeni tauna be kohua amo ia raka-lasi! Ia mauri lou! Ia hahodi, ia raka bona ia hereva lou diba! Oibe, Iesu ese mase amo Lasaro ia hatorea isi lou.​—Ioane 11:​1-​44.

Mani inai oi laloa: Lasaro ia mase neganai, ia dekenai dahaka ia vara? Iena kahana ta​—lauma—ese ena tauanina ia rakatania bona gabu ma ta dekenai ia lao, a? Lasaro ena souli be guba dekenai ia daekau, a? Ia be unai dina 4 ai Dirava bona ena aneru helagadia ida guba dekenai ia noho, a?—

Lasi, unai bamona ia vara lasi. Laloatao, Iesu ia gwau Lasaro ia mahuta noho. Oi mahuta neganai oi be edena bamona? Oi mahuta boio neganai, taunimanima ese idia karaia gaudia oi diba lasi, ani?— Bona oi noga neganai, hora hida oi mahuta oi diba lasi ela bona dina gauna oi itaia.

Mase taudia be unai bamona. Idia be gau ta idia diba lasi. Gau ta idia mamia lasi. Bona gaukara ta idia karaia lasi. Lasaro ia mase neganai, ia be unai bamona. Mase be ta ia mahuta boio bamona, gau ta ia laloatao lasi. Baibel ia gwau: “Mase taudia be gau ta idia diba lasi.”​—Hadibaia Tauna 9:​5, 10.

Mani inai oi laloa danu: Bema unai dina 4 ai Lasaro be guba dekenai ia noho, ia toreisi lou neganai unai do ia herevalaia, ani?— Bona bema ia be guba dekenai ia noho, Iesu ese unai gabu namona amo do ia boiria lou tanobada dekenai ia noho totona, a?— Lasi!

To, taunimanima momo idia gwau ita lalonai gau ta ia noho, bona tauanina ia mase murinai unai gauna ia mauri noho. Idia gwau Lasaro be gabu ma ta dekenai ia mauri noho. To Baibel be unai ia gwauraia lasi. Ia gwau Dirava ese tau ginigunana ia karaia neganai, ia lalonai mauri ena laga ia hiriria vareai bona ia “mauri.” Baibel ia gwau danu Adamu ia kara dika neganai, ia mase. Ia mase bona gau ta ia diba lasi. Kahu dekenai ia giroa badina ia be kahu amo ia karaia gauna. Baibel ma ia gwau Adamu ena natudia ibounai ese kara dika bona mase idia abia danu.​—Genese 2:7; 3:17-​19; Roma 5:​12.

Taunimanima haida be mase taudia dekenai idia gari. Gara gabuna kahirakahira dekenai idia lao lasi badina idia laloa mase taudia edia lauma ese idia do ia hadikaia. To mase tauna ese ia mauri noho tauna ia hadikaia diba, a?— Lasi, unai ia karaia diba lasi.

Taunimanima haida idia abia dae mase taudia be lauma taudia bamona idia giroa lou diba mauri taudia idia vadivadi henia totona. Unai dainai mase taudia totona aniani idia atoa. To unai bamona idia karaia taudia be Dirava ena hereva mase taudia totona idia abia dae lasi. Bema Dirava ena hereva ita abia dae, mase taudia dekenai do ita gari lasi. Bona bema iseda mauri dainai Iehova ita tanikiu henia, Dirava ia moalelaia gaudia karaia karana amo unai ita hahedinaraia.

To reana do oi laloa: ‘Dirava be idia mase vadaeni natudia do ia hatorea isi lou, a? Ia ura unai ia karaia, a?’ Karoa gabena dekenai unai do ita herevalaia.