Karoa 8

Mase ena Anina be Dahaka?

OI EMU lalokau tauna ta ia mase neganai, oi lalo-hisihisi bada bona oi emu darana ia doko. Unai dainai reana oi be inai bamona oi henanadai: Tau ta ia mase neganai ia be edena bamona? Gabu ta dekenai ia mauri noho eiava? Mauri taudia be mase taudia danu do idia hedavari lou diba tanobada dekenai a?

² Unai henanadai edia haere abia totona, namona be Adam ena mase ita laloa. Ia kara dika neganai, Dirava ese ia hamaoroa, ia gwau: “Tano dekenai do oi giroa lou, badina be tano dekena amo oi mai. Oi be tano dekenai karaia gauna, bona tano dekenai do oi giroa lou.” (Genese 3:19, HM) Anina be Dirava ese Adam tano ena kahu amo ia do karaia lasi neganai, Adam ia noho lasi. Unai dainai, Adam ia mase murinai danu ia noho lasi.

³ Anina be mauri be idau bona mase be idau. Bible ese unai ia hahedinaraia, Kohelete 9:5, 10 dekenai. Unai siri idia gwau: “Badina mauri taudia idia diba do idia mase; to mase taudia be gau ta idia diba lasi, davana danu be nega ta do idia abia lasi, badina be taunimanima ese idia laloaboio. Emu imana ia davaria gaukarana oi karaia mai emu goada ibounai danu, badina be oi lao henia gabuna, mase taudia edia gabu, lalonai gaukara ta, lalohadai ta, lalo-parara ta, bona aonega ta be lasi.”

⁴ Anina be mase taudia be gau ta idia diba lasi bona gau ta ena mamina idia abia diba lasi. Gau ta idia laloa diba lasi, Bible ena hereva bamona: “Lohia taudia oi abidadama henidia lasi, taunimanima ena natuna danu oi abidadama henia lasi, ia be hahemauri dalana lasi. Ena lauma ia lasi neganai, ena tano dekenai ia giroa lou; unai dina dekenai ena lalohadai idia ore.” (Salamo 146:3, 4) Ta ia mauri noho lalonai, ia hahodi noho dainai ia be mai ena lauma, to ia mase neganai unai lauma ia “lasi” bona ia ore unai. Bena mase tauna ia laloa diba lasi dainai, gau ta ia kamonai diba lasi, ia itaia diba lasi, ia daua toho diba lasi, ia bonaia diba lasi bona ia mamia diba lasi. Bible ese ia hahedinaraia mase taudia be gau ta idia diba lasi.

MAURI GAUDIA EDIA LAUMA BE DAHAKA?

⁵ Taunimanima edia mase be animal edia mase hegeregerena. Iboudiai be gau ta idia diba lasi. Bible ia gwau: “Ta ia mase hegeregerena, ma ta danu ia mase; iboudiai edia lauma be tamona, unai dainai taunimanima ese animal idia hanaia lasi; iboudiai be anina lasi. Iboudiai be gabu tamona dekenai idia lao. Iboudiai be kahu amo, bona iboudiai be kahu dekenai do idia giroa lou.” (Kohelete 3:19, 20) Animal bona taunimanima be “lauma” tamona dainai idia mauri noho. Unai “lauma” be idia dekenamo ia lasi neganai, taunimanima bona animal be tano dekenai idia giroa lou.

⁶ Taunimanima haida idia gwau animal be taunimanima danu idia hegeregere lasi, badina be taunimanima be mai edia lauma to animal be lasi, to ita davaria vadaeni lauma anina be mauri siahuna, taunimanima bona animal edia tau-anina lalodiai ia noho siahuna unai. Idia hahodi dainai unai siahu ia gaukara noho. Taunimanima bona animal idia mauri noho totona, lauma bona laga idia abia be namo. Iobu 34:14, 15 ia gwau: “Bema [Dirava] ese tau ta ia laloa, bema unai tauna ena lauma bona laga ia abia sibona dekenai, hidio ibounai do ia mase hebou, bona tanobada tauna be tano ena kahu dekenai do ia giroa lou.” Dirava ese tau ginigunana “tano ena kahu” amo ia karaia neganai, ena tau-anina hamauria totona unai mauri siahuna be ena tau-anina ibounai lalonai ia atoa. Inai hereva, “lauma,” anina be unai mauri siahuna. To Adam ena tau-anina ibounai ia mauri noho totona, hodahoda ia abia be namo. Unai dainai, Dirava ese “mauri lagana” ena uduna matudia lalodiai ia hiriria vareai. Bena Adam ena baragi (hahodi gaudia) idia gaukara matamaia, bona unai dainai ena mauri siahuna ia gaukara noho.—Genese 2:7.

⁷ Unai be beibi haida idia vara negana bamona. Ena be mauri be beibi lalonai ia noho, to ia hahodi matamaia lasi dainai, doketa ese ena kunu ia pataia, ia hahodi matamaia totona. Unai hegeregerena, Adam ena tau-anina ibounai ia mauri noho totona, ia hahodi be gau badana.

⁸ Taunimanima ena lauma, ena mauri siahuna unai, be guba dekenai idia noho laumadia bamona lasi. Taunimanima ena lauma, ena mauri siahuna unai, be lauma tauna lasi, bona taunimanima idia karaia diba gaudia be ia karaia diba lasi. Ia be reidio ena bateri edia siahu bamona. Bateri be mai edia siahu neganai reidio ia boiboi diba, to bema edia siahu ia ore, reidio ia boiboi lasi. Unai hegeregerena, tau ta ia mase neganai, ena lauma, ena mauri siahuna unai, be ia doko, bona unai dainai mase tauna ia hereva diba lasi, ia laloa diba lasi, kara ta danu ia karaia diba lasi.

⁹ To Bible ia gwau: “Tano ena kahu be tano dekenai ia giroa lou, bona lauma sibona ia giroa lou Dirava momokanina dekenai, ia henia tauna unai.” (Kohelete 12:7) Vadaeni, unai hereva ena anina be dahaka? Iseda mauri siahuna be tanobada ia rakatania lasi, guba padana amo ia daekau lasi Dirava dekenai, lasi, to lauma be Dirava dekenai ia giroa lou, anina be gabeai mauri ita abia lou dalana tamona be Dirava ese do ia henia. Dirava sibona ese lauma, mauri siahuna unai, ia henia lou diba, ita mauri lou totona. (Salamo 104:29, 30) Vadaeni, inai hereva ibounai ita diba neganai, iseda gari ia ore, bona ita diba aria o sene karadia ma haida amo mase taudia ita durudia diba lasi.—2 Samuel 12:21-23.

LASARO—DINA 4 IA MASE VADAENI TAUNA

¹⁰ Lasaro, dina 4 ia mase vadaeni tauna, ena sivarai ese ita ia hadibaia mase taudia be edena bamona. Iesu ese ena hahediba taudia ia hamaorodia, ia gwau: “Iseda turana Lasaro be ia mahuta noho, to lau lao, do lau haoa.” To idia haere, idia gwau: “Lohiabada e, bema ia mahuta be do ia namo lou.” Unai dainai, Iesu ese ia hamaorodia goevagoeva, ia gwau: “Lasaro be ia mase vadaeni.” Dahaka dainai Iesu ia gwau Lasaro ia mahuta noho, ia mase vadaeni neganai? Haere mani ita tahua namonamo.

¹¹ Iesu be Lasaro ena hanua kahirakahira ia ginidae neganai, Lasaro ena taihuna Mareta ia lao, ia danu idia hedavari. Bena idia ruaosi mai taunimanima momo danu be Lasaro ena mase gurina dekenai idia lao. Nadi matuna lalonai idia guria vadaeni bona nadi amo idia koua vadaeni. Iesu ia gwau: “Nadi umui kokia.” To Mareta ia gwau: “Lohiabada e, ia bodaga vadaeni, badina be dina 4 ia mase vadaeni.” To nadi idia kokia, bena Iesu ia boiboi, ia gwau: “Lasaro e, oi mai murimuri dekenai.” Vadaeni ia raka lasi mai ena mauri danu.—Ioane 11:11-44, HM.

¹² Mani inai oi laloa: Unai dina 4 lalodiai ia mase noho lalonai, Lasaro be edena bamona? Bema guba dekenai ia lao ia be tau namona dainai, do ia gwauraia hedinarai, to unai bamona ia hereva lasi. Lasi, badina be Lasaro ia mase momokani, Iesu ia hereva bamona. Vadaeni, badina be dahaka Iesu be guna ena hahediba taudia ia hamaorodia, ia gwau Lasaro ia mahuta sibona?

¹³ Iesu ia diba mase tauna Lasaro be gau ta ia diba lasi, Bible ia hereva bamona: “Mase taudia be gau ta idia diba lasi.” (Kohelete 9:5) To mauri tauna be ena mahuta amo idia haoa diba. Unai dainai, Iesu ese ia hahedinaraia gwauraia, Dirava ese ia henia siahuna amo ena turana Lasaro be mase amo do ia haoa diba.

¹⁴ Tau ta ia mahuta momokani neganai, gau ta ia laloatao diba lasi. Mase taudia danu be unai bamona. Idia be laloa diba lasi. Idia noho lasi. To iena nega korikori dekenai Dirava ese edia mauri davana ia karaia taudia be ia ese do ia hatoreaisi lou, idia mauri lou totona. (Ioane 5:28) Unai ita diba dainai, ita ura Dirava ia moale ita dekenai ani? Bema ita dekenai ia moale, bena ena be ita mase to ita do ia laloatao bona do ia hatoreaisi lou.—1 Tesalonika 4:13, 14.

[Study Questions]

1. Mase taudia dainai taunimanima be edena bamona idia henanadai?

2. Tau ginigunana, Adam, ia mase neganai, dahaka ia vara ia dekenai?

3. (a) Mase be dahaka? (b) Kohelete 9:5, 10 ese mase taudia edena bamona ia gwauraidia?

4. (a) Tau ta ia mase neganai ena laloa be edena bamona? (b) Dahaka dainai tau ta ia mase neganai ena hemami gaudia iboudiai idia doko?

5. (a) Bible be edena bamona ia hahedinaraia taunimanima edia mase bona animal edia mase be hegeregere? (b) Taunimanima bona animal ia hamauridia “laumana” be dahaka?

6. (a) Taunimanima idia mauri noho totona, dahaka gau rua idia abia be namo? (b) Unai gau rua edia anina oi gwauraia.

7. “Mauri ena laga” ena anina hahedinaraia totona, beibi haida dekenai ia vara gauna oi gwauraia.

8. (a) Taunimanima edia lauma, edia mauri siahuna unai, be aneru hegeregeredia a? (b) Edia lauma be dahaka danu ita hahegeregerea diba? (c) Taunimanima ta ia mase murinai ena lauma be kara ta ia karaia diba a?

9. (a) Inai hereva ‘lauma sibona ia giroa lou Dirava dekenai, ia henia tauna unai,’ anina be dahaka? (b) Hereva momokani ese ita edena bamona ia naria?

10. Ena be Lasaro ia mase vadaeni, to Iesu be dahaka ia gwau?

11. Iesu ese mase tauna Lasaro edena bamona ia durua?

12, 13. (a) Dahaka dainai ita diba momokani Lasaro ia mase neganai gau ta ia laloa diba lasi? (b) Dahaka dainai, ena be Lasaro ia mase vadaeni, to Iesu ia gwau ia mahuta?

14. Keriso ena mase taudia hatoreaisi siahuna ita diba dainai, dahaka ita karaia , be namo?

[Picture on page 76]

ADAM—tano amo ia karaia . . . tano dekenai ia giroa lou

[Picture on page 78]

Iesu ese do ia hatoreaisi lasi neganai Lasaro be edena bamona?