Aramagedono

Anina: Greek gado herevana, Har Ma·ge·donʹ, be Heberu gado amo idia abia. Motu gado ai idia hahegeregerea neganai, “Aramagedono” idia torea. Inai hereva ena anina be, “Megido Ororona,” eiava “Tuari Oreadia Edia Hebou Ororona.” ‘Siahu Ibounai Dirava ena Dina Badana tuarina’ do idia tuarilaia gabuna ena ladana be Baibel ese ia hatoa Aramagedono, niuklia tuarina badana ta ena ladana be unai bamona ia hatoa lasi. (Apok. 16⁠:​14, 16) Ia be tanobada ena gabu korikori ta ena ladana lasi, to ia be tanobada ibounai dekenai do ia vara gauna ta ena ladana. Tanobada ena lohia taudia idia haboudia noho, Iehova bona iena Basileia, Iesu Keriso ena imana ai ia noho Basileiana, idia inai henidia totona. Idia inai henidia dainai, idia ese Iehova ena hesiai taudia, Dirava ena Basileia ena gwaukau taudia tanobada ibounai dekenai, do idia hadikadia toho.

Bema taunimanima ese niuklia tuarina amo tanobada idia hadikaia ore gwauraia, Dirava ese do ia koudia lasi, a?

Sal. 96:10: “Iehova na pavapava. Oibe, tanobada [Heberu gado te·velʹ; tanobada, taunimanima ese idia birulaia diba bona idia noholaia diba tanobadana kuboruna unai] vada e haginia, basine marere ela bona hanaihanai.”

Sal. 37:29: “Kara maoromaoro taudia ese tano bae abia, bae noholaia hanaihanai.”

Apok. 11:18: “Dirava diba lasi taudia idia badu dikadika. Badina be oi [Iehova] emu badu ena nega ia ginidae vadaeni. . . . Harihari be tanobada idia hadikaia vadaeni taudia do oi alaia ore.”

Aramagedono, Baibel ese ia gwauraia gauna, be dahaka?

Apok. 16:​14, 16: “Idia be lauma dikadia momokani, mai edia siahu hoa kara do idia karaia. Idia be tanobada edia king ibounai dekenai idia lao. Vadaeni unai king ibounai do idia haboua, Siahu Ibounai Diravana ena Dina Badana neganai do idia tuari hebou totona. Unai lauma dikadia ese king ibounai idia haboua gabu ta dekenai. Inai gabu ena ladana Heberu gado dekenai be Aramagedono.”

Aramagedono tuarina be Middle East sibona dekenai do idia tuarilaia, a?

Bese iboudiai edia lohia bona edia tuari oreadia do idia haboudia Dirava tuari henia totona

Apok. 16:14: “Idia be tanobada edia king ibounai dekenai idia lao. Vadaeni unai king ibounai do idia haboua, Siahu Ibounai Diravana ena Dina Badana neganai do idia tuari hebou totona.”

Apok. 19:19: “Dagedage gauna [taunimanima edia gavamani ibounai] bona tanobada ena king taudia mai edia tuari oreadia lau itaia. Idia haboua, unai hosi kurokuro latanai ia guia tauna mai ena tuari orea do idia tuari henia totona.”

Ier. 25:33: “Una dina ai, Iehova ese baine aladia mase taudia na tanobada dokona amo ela bona ma tanobada dokona bae hesiriu.”

Ena be unai tuari ena ladana idia hatoa Aramagedono, to ororo korikorina ta ladana Megido Ororona dekenai do ia vara lasi

Ororo korikorina ta ladana Megido Ororona be lasi; idaunegai Megido hanuana senuna mo sibona ia noho, ena atai be mita 21.

“Tanobada edia king ibounai” bona edia tuari oreadia be Esdraelon Taorana dekenai, Megido badibadinai, idia hebou diba lasi, badina ena bada be hegeregere lasi dainai. Unai taora ena lata be kilomita 32 bona mairiveina kahanai ena lababa be kilomita 29 bona dina ia diho kahanai ena lababa be maragi herea momokani.​—⁠The Geography of the Bible (New York, 1957), Denis Baly, p. 148.

Dirava ena tuari ena ladana idia hatoa Aramagedono be namo, badina be gunaguna tuari momo be Megido badibadinai ia noho taorana dekenai idia tuarilaidia. Idia lalodiai idia kwalimu oreadia idia kwalimu momokani

Unuseniai Iehova ese Hahemaoro Tauna Barak ia hakwalimua, Kanana ena tuari biaguna Sisera ese ia tuari henia neganai.​—⁠Hhem. 5:​19, 20; 4:​12-24.

Aigupito ena pavapava, Thutmose Ihatoina, ia gwau: “Bema tuari amo ta ese Megido ia abia, unai be hegeregere hanua badadia daha ta ia abidia bamona!”​—⁠Ancient Near Eastern Texts Relating to the Old Testament (Princeton, N.J.; 1969), edited by James Pritchard, p. 237.

Megido (anina be “Tuari Oreadia Edia Hebou”) amo inai ladana Aramagedono idia abia be maoro, badina be tanobada besedia iboudiai edia tuari oreadia bona edia lohia idia durudia taudia be unai tuari lalonai do idia vareai; ia be tanobada ibounai dekenai do ia vara gauna ta.

Daidia bona dahaka be Aramagedono ai do idia hadikadia ore?

Dan. 2:44: “Guba Diravana ese basileia ta baine haginia . . . Ia ese unu basileia iboudiai na baine hamakohidia sisisisi bona baine hadokodia, bena baine gini hanaihanai.”

Apok. 19:​17, 18: “Aneru ta lau itaia, dina latanai ia gini. Ia boiboi badabada, guba ena atai dekenai idia roho manudia dekenai ia boiboi, ia gwau, ‘Umui mai, Dirava ena aria badana dekenai do umui haboua mai. King edia tauanina, bona tuari biagudia edia tauanina, bona tuari taudia edia tauanina, bona hosi edia tauanina, bona hosi dekenai idia guia taudia edia tauanina, bona taunimanima ibounai, ura kwalimu taudia bona hesiai mai guia taudia, badadia bona maragidia, edia tauanina do umui ania.’ ”

1 Ioane 2:​16, 17: “Tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”

Apok. 21:8: “Gari taudia, abidadama lasi taudia, kara bodaga taudia, taunimanima idia alaia taudia, lebulebu taudia, meamea taudia, kaivakuku idia tomadiho henia taudia, bona koikoi taudia ibounai, idia ibounai edia davana be dika. Idia be unai gohu, lahi bona salifa idia araia noho gabunai do idia lao. Inai be mase iharuana.”

Do idia mase hanaihanai a?

Mat. 25:46: “Idia [Keriso ena “tadikakana” idia kara namo henidia lasi taudia] be davana ia dika hanaihanai gabuna dekenai do idia lao.”

2 Tes. 1:​8, 9: “Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia . . . idia do ia haorea momokani, bona inai bamona do idia noho hanaihanai.”

Haida do idia roho mauri a?

Sef. 2:3: “Umui tano taumui mai manaumui ida, ena haheḡani o badinadiamu taumui, Iehova ba tahua! Kara maoromaoro ba tahua, lalo-manau ba tahua; bena reana ba hehuni diba, Iehova ena badu dinana ai.”

Roma 10:13: “Dirava ena ladana idia noinoi henia taudia ibounai be mauri do idia davaria.”

Sal. 37:34: “Iehova ba naria, iena dala ai ba raka, bena baine abimu dae, tano na bavabia oiemu; kara dika taudia ihabua-taridia danu ba itaia.”

Ioane 3:16: “Dirava ese . . . iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”

Apok. 7:​9, 10, 14, BH: “Na roha lao, hutuma bada-herea na itadia, asi iduahidia, bese idau-idau bona iduhu idau-idau bona hanua idau-idau bona gado idau-idau amo, ibouboudiai na terono vairanai bona Mamoe Natuna vairanai e gini, edia dabua na kukuro-kukuro, bona imadia na mai retadia. Idia na e lolo badabada, eto ‘Hahemauri na iseda Dirava, terono ai e helaimu Diravana, bona Mamoe Natuna, ediai’. . . . Ini na hisihisi badana amo vada ema.”

Aramagedono do ia vara neganai, dahaka do ia vara memero kekeni maragidia dekediai?

Baibel ese unai henanadai ia haerelaia goevagoeva lasi, bona ita hahemaoro henidia diba lasi. To, Baibel ese ia hahedinaraia Dirava ese Keristen taudia korikoridia edia natudia maragidia ia gwauraidia “helaga.” (1 Kor. 7⁠:14) Danu, ia hahedinaraia, gunaguna Dirava ese kara dika taudia ia hamasedia ore neganai, edia natudia danu ia hamasedia ore. (Num. 16⁠:​27, 32; Esek. 9⁠:⁠6) Dirava ia ura lasi ta do ia mase, unai dainai iena hesiai taudia ia siaidia tama sina mai natudia ida hadibadia totona. Namona be tama sina ese Dirava ena ura dalana dekenai idia raka, bena Dirava ese edia natudia do ia lalo-namo henidia, hari inai negai bona Aramagedono neganai danu.

Dirava ese kara dika taudia do ia hamasedia, anina be ena lalokau do ia negea, a?

2 Pet. 3:9: “Lohiabada [be] . . . umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”

Luka 18:​7, 8: “Dirava ese ia abia hidi taudia, hanuaboi bona dinai ia dekenai idia taitai taudia, idia dekenai idia badu taudia edia davana do ia henia lasi, a? Do ia durudia haraga lasi, a? Lau hamaoroa umui dekenai, edia davana do ia henia haraga idia dekenai.”

2 Tes. 1:6: “Dirava ese kara maoromaoro do ia karaia. Hisihisi umui [iena hesiai taudia] dekenai idia henia taudia dekenai be ia ese hisihisi do ia henidia.”

Aramagedono tuarina amo gini siri dalana ia noho, a?

2 Tes. 1:8: “Mai lahi siahu bada danu, Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia.”

Mat. 24:​37-39: “Noa ena nega bamona . . . Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao. Taunimanima ena Natuna do ia mai neganai danu unai bamona do ia vara.”

Mat. 12:30: “Lau dekenai ia laloa momo lasi tauna be lau dekenai ia heatu noho, bona lau ia durua lasi tauna mamoe haboua totona, be ia ese mamoe ia negedia kava, idia boio.”

Deuteronomi 30:​19, 20 itaia danu.

Daika ena siahu ese tanobada besedia ia doridia Dirava idia tuari henia totona?

Apok. 16:​13, 14: “Lauma dikadia toi, edia toana lau itaia be parapara bamona. Idia ese huala badana [Satana Diabolo; Apok. 12⁠:9] ena uduna dekena amo, bona dagedage gauna ena uduna dekena amo, bona peroveta koikoi tauna ena uduna dekena amo idia mai noho. Idia be lauma dikadia momokani, mai edia siahu hoa kara do idia karaia. Idia be tanobada edia king ibounai dekenai idia lao. Vadaeni unai king ibounai do idia haboua, Siahu Ibounai Diravana ena Dina Badana neganai do idia tuari hebou totona.”

Luka 4:​5, 6 be 1 Ioane 5:19 ida oi hahegeregerea, bona Kara 5:​38, 39 be 2 Sisiga 32:​1, 16, 17 ida oi hahegeregerea.