Duahia Taudia Edia Henanadai
“Siahu Ibounai Diravana ena . . . tuari” Aramagedono be dahaka, bona unai negai dahaka do ia vara?—Apokalupo 16:14, 16.
Ita gwau diba, Aramagedono tuarina be tanobada hegegemadai do ia vara tuarina, bona unai nega ai Iehova ese ia abia hidi King, Iesu Keriso, ese Dirava ena inai taudia do ia haorea. Baibel ia gwau Dirava ena inai taudia, “tanobada edia king ibounai” bona “lauma dikadia” be do idia haboua “Siahu Ibounai Diravana ena Dina Badana ai idia tuari hebou totona. Unai lauma dikadia ese king ibounai idia haboua gabu ta dekenai. Inai gabu ena ladana Heberu gado dekenai be Aramagedono.”—Apokalupo 16:14, 16.
Unai king taudia do idia haboua gabuna be gabu korikorina lasi. Baibel haida ai inai hereva “Aramagedono” ena anina be Megido Ororona. (Apokalupo 16:16) Guna ororo ta dekenai unai ladana idia henia lasi. Unai dainai, “tanobada ena king taudia mai edia tuari oreadia” be gabu korikorina ta dekenai idia haboua diba lasi. (Apokalupo 19:19) To, unai “gabu” ese politikol oreadia bona edia durua taudia dekenai do ia vara gauna ia hahedinaraia. Idia be do idia haboua Iehova bona “King ibounai edia King, bona lohia ibounai edia Lohia,” Iesu Keriso bona ena “guba ena tuari oreadia” ida idia tuari totona.—Apokalupo 19:14, 16.
Inai hereva Aramagedono be idaunegai Israela ena siti ta ladana Megido ia haheitalaia. Megido be Karamele Ororona ena ist kahana dekenai ia noho, nega momo bisinesi idia karaia taudia bona ami oreadia be unai gabu dekenai idia raka hanai. Bona unuseniai tuari badadia momo idia karaia danu. Hegeregere, “Megido ranu gabuna kahirakahira dekenai” Israela ena hahemaoro tauna Baraki ese Kanana ena ami jeneral Sisera ena tuari oreana ia halusia. (Gunalaia Taudia 4:12-24; 5:19, 20) Danu, hahemaoro tauna Gideona ese Megido ai Midiana taudia ia halusia. (Gunalaia Taudia 7:1-22) Unai dainai Baibel ese Megido be ia mai noho tuari ida idia hahegeregerea neganai, ita ia hadibaia Dirava ese iena Natuna amo, ia idia inai henia taudia ibounai do ia haorea.
Unai murinai dahaka do ia vara? Aramagedono tuarina ese tanobada dekenai idia vara kara gageva bona gwau-edeede kara dikadia ibounai do ia kokia. Bena nega namo herea do ia vara. (Apokalupo 21:1-4) Dirava ena Basileia henunai, tanobada be paradaiso ai do ia lao bona unuseniai kara maoromaoro taudia sibona do idia noho ela bona hanaihanai.—Salamo 37:29.