Kahana 11
Tanobada Matamatana Ena Badina be Hari Ia Karaia Noho
1, 2. Hari inai negai, Baibel ena peroveta herevana ta be edena bamona ia momokani?
HOA gauna ma ta be inai: Hari inai negai, Satana ena tanobada gunana ia dika ia lao noho lalonai, Dirava ese ena tanobada matamatana ena badina ia karaia noho. Taunimanima be bese iboudiai amo ia gogodia noho bona tanobada matamatana besena ena badina ai ia halaodia noho. Petero Iharuana 3:13 ai, Baibel ese unai bese matamatana na “tanobada matamata” ia gwauraia.
2 Baibel be ma ia gwau: “Dina gabedia ai [hari ita noho negana lalonai] . . . , bese momo do idia lao, do idia gwau: ‘Umui mai, Iehova ena ororo [iena tomadiho momokani] dekenai do ita daekau, . . . ia ese ena kara ita do ia hadibalaia, bona ita be ena dala ai do ita raka.’ ”—Isaia 2:2, 3.
3. (a) Isaia ena hereva be daidia dekediai ia momokani? (b) Apokalupo bukana ese unai edena bamona ia gwauraia?
3 Unai peroveta herevana be hari ia momokani, ‘Dirava ena kara’ idia abia dae bona ‘ena dala ai idia raka’ taudia dekediai. Baibel ia gwau, unai maino ura henia taudia be “hutuma bada herea . . . bese idauidau, iduhu idauidau, hanua idauidau, bona gado idauidau amo.” Tanobada ibounai lalonai, tadikaka bamona idia ese Dirava ena hesiai gaukarana idia karaia mai edia lalo-tamona ida. Baibel be ma ia gwau: “Inai taudia be hisihisi badana amo idia mai.” Anina be, inai nega dikana ena dokona amo do idia roho mauri.—Apokalupo 7:9, 14, NW; Mataio 24:3.
Orea Korikorina ta Bese Iboudiai Lalodiai
4, 5. Dahaka dainai tanobada ibounai lalonai Iehova ena Witness taudia be tadikaka bamona idia noho diba?
4 Iehova ena Witness taudia milion milion edia helaro be mauri hanaihanai do idia abia Dirava ena tanobada matamatana lalonai. Dina dina iboudiai Dirava ena taravatu idia badinadia toho, unai amo idia hahedinaraia edia lalodia idia hegeregere iena lohia dalana do idia badinaia, hari inai negai, bona tanobada matamatana lalonai danu. Herevana idia be edena bese taudia, Dirava ese ena Hereva lalonai ia gwauraidia taravatudia idia badinadia. Unai dainai bese iboudiai lalodiai idia be orea korikorina ta, tanobada matamatana besena, Dirava ese ia havaraia besena unai.—Isaia 54:13; Mataio 22:37, 38; Ioane 15:9, 14.
5 Iehova ena Witness taudia idia gwau lasi sibodia edia aonega amo inai orea idia haginia. Idia diba, Dirava ese ena taravatu idia badinadia taudia na ena lauma mai siahuna amo ia kara henidia dainai, inai orea lalonai idia noho. (Kara 5:29, 32; Galatia 5:22, 23) Iesu ena hereva hegeregerena, “taunimanima ese do idia karaia diba lasi gaudia be Dirava ese do ia karaia diba.” (Luka 18:27) Guba bona tanobada ia karadia Diravana ese tanobada matamatana besena danu ia havaraia.
6. Dahaka dainai Iehova ena Witness taudia edia orea be hoa gauna ita gwauraia be maoro?
6 Iehova ese tanobada matamatana do ia lohiaia dalana be ia hedinarai vadaeni; tanobada matamatana ena badina ia havaraia dalana ese ia hahedinaraia. Iena Witness taudia dekediai ia karaia karana be hoa karana ta. Tanobada ibounai lalonai orea korikorina ta ai ia halaodia, bona edia orea lalonai idia be tadikaka bamona idia noho. Bese idauidau edia ura idauidau bona tomadiho daladia idauidau dainai idia parara diba lasi. Ena be Witness taudia milion milion be tano 200 mai kahana ai idia noho, to idia lalo-tamona. Edia orea be idau vaitani, badina be Dirava ese ia haginia; gunaguna amo ema bona hari, orea ma ta be ia ida ia hegeregere lasi.—Isaia 43:10, 11, 21; Kara 10:34, 35; Galatia 3:28.
Dirava ena Orea Taudia Dibadia Dalana
7. Iesu ia gwau dahaka ese iena hahediba taudia momokanidia do ia hahedinaraidia?
7 Dahaka danu ese ia hamomokania Dirava ese idia na iena tanobada matamatana ena badina ai ia halaodia? Daidia ese Iesu ena hereva Ioane 13:34, 35 ai idia badinaia? Ia gwau: “Taravatu matamatana lau henia umui dekenai inai bamona, umui ta ta dekenai umui lalokau henia. . . . Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” Iehova ena Witness taudia ese Iesu ena hereva idia abia dae bona idia badinaia. Baibel ena hahegani hegeregerena, idia ‘ta ta idia lalokau henia mai edia lalona ibounai.’ (1 Petero 4:8) Idia “noho hebou namo herea, mai laloa tamona danu.” (Kolose 3:14) Edia lalokau ese ia guidia hebou, tanobada hegegemadai ai.
8. Ioane Ginigunana 3:10-12 ese Dirava ena orea taudia edena bamona ia hahedinaraidia?
8 Danu, 1 Ioane 3:10-12 ia gwau: “Iena tadikakana ia lalokau henia lasi tauna be Dirava ena natuna lasi. Hamatamaia nega dekena amo ia mai bona harihari umui kamonai hadibaia hereva be inai: ibounai ta ta dekenai do ita lalokau henia. Kain ena kara bamona do ita karaia lasi, ia be Satani ena tau, bona ia ese iena tadina Abela ia alaia mase.” Unai dainai Dirava ena orea taudia idia dagedage lasi bona idia ala-ala lasi, to tadikaka bamona idia noho, tanobada hegegemadai ai.
Edia Toana Ma Ta
9, 10. (a) Dina gabedia ai, Dirava ena hesiai taudia edia gaukara korikori be dahaka? (b) Iehova ena Witness taudia ese Mataio 24:14 edena bamona idia hamomokania?
9 Dirava ena hesiai taudia edia toana ma ta amo ita dibadia. Tanobada dokona ia perovetalaia neganai, Iesu ese gau momo ia herevalaidia, do idia hahedinaraia hari inai nega be dina gabedia. (Kahana 9 itaia.) Unai gau badana ta be Mataio 24:14 ai ia ese ia gwauraia, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”
10 Unai peroveta herevana idia hamomokania be ita itaia ani? Dina gabedia be lagani 1914 lalonai idia matamaia negana amo ema bona hari, tanobada ibounai dekenai, Iehova ena Witness taudia milion milion ese Dirava ena Basileia ena sivarai namona be taunimanima edia ruma ta ta ai idia harorolaia, Iesu ena hahegani hegeregerena. (Mataio 10:7, 12; Kara 20:20) Edia gaukara dainai inai buklet oi abia, badina be idia ese danu buka bona buklet bona magasin, Dirava ena Basileia idia gwauraia gaudia, bilion bilion idia karadia bona idia halasidia. Tanobada ibounai dekenai, idia mo sibodia be ruma ta ruma ta ai Dirava ena Basileia idia harorolaia, ani? Bona Mareko 13:10 ese ia hahedinaraia inai haroro bona hadibaia gaukarana do idia karaia “guna,” dokona ia do ginidae lasi neganai.
Samani Herevana Badana Iharuana be Idia ese Idia Haerelaia
11. Iehova ena Witness taudia ese Dirava ena lohia siahuna idia abia dae dainai, dahaka danu dekenai idia kwalimu?
11 Guna Satana ia gwau taunimanima do ia tohodia neganai Dirava do idia badinaia diba lasi, to Iehova ena Witness taudia ese Dirava ena taravatu idia badinadia noho dainai, unai samani herevana badana iharuana be idia ese idia haerelaia. (Iobu 2:1-5) Idia be bese idauidau iboudiai amo, bona edia orea lalonai idia hahedinaraia Dirava ena lohia siahuna idia badinaia. Ena be idia be goevadae lasi taudia, to Satana ese ia tohodia noho lalonai Dirava idia badinaia noho.
12. Edia abidadama dainai, Witness taudia ese daidia idia tohotohodia?
12 Hari inai negai, Iehova ena Witness taudia milion milion ese idia hahedinaraia Dirava idia badinaia, nega gunadia ai idia noho witness taudia hegeregeredia. Unai idaunegai taudia haida be inai: Abel, Noa, Iobu, Abraham, Sara, Isaak, Iakob, Debora, Ruta, David, bona Daniel. (Heberu, karoa 11) Baibel ia gwau: “Abidadama dalana ita dekenai idia ese idia hedinaraia vadaeni.” (Heberu 12:1) Idia bona Iesu ena hahediba taudia danu ese Dirava idia badinaia. Bona Iesu ese unai kara ai idia iboudiai ia hereadia, badina be ia ese Dirava ia badinaia goevagoeva.
13. Iesu ese Satana ia herevalaia neganai, dahaka hereva momokanina ia gwauraia?
13 Unai ese Iesu ena hereva ia hamomokania; tomadiho gunalaia taudia ia hereva henidia neganai Satana ia herevalaia, ia gwau: “Umui be emui tamana Satani dekena amo umui mai, bona umui ura emui tamana ena ura dikadia do umui karaia. Hamatamaia nega dekena amo ia be alaia tauna, bona hereva momokani be ia badinaia lasi, badina iena lalona dekenai hereva momokani be lasi. Ia be hereva koikoi ia gwauraia, iena kara momokani be unai, badina ia be koikoi tauna, bona ia be koikoi ibounai edia tamana.”—Ioane 8:44.
Dahaka Oi Abia Hidi?
14. Hari inai negai, dahaka be tanobada matamatana ena badina dekenai ia vara?
14 Tanobada matamatana ena badina, Dirava ese Iehova ena Witness taudia edia orea lalonai ia karaia noho gauna, be ia goada ia lao noho. Lagani ta ta iboudiai taunimanima tausen tausen be diba maoro idia abia dainai, Dirava ena lohia dalana idia abia dae. Tanobada matamatana besena taudia ai idia lao, Dirava ena lohia siahuna idia hamomokania, bona Satana ena hereva idia hakoikoia.
15. Iseda nega lalonai, Iesu ese daidia ia hapararadia?
15 Dirava ena lohia dalana idia abia dae dainai, idia hegeregere, Iesu ese idia na iena “idiba kahana” ai do ia atodia, “mamoe” bona “nanigosi” ia hapararadia noho lalonai. Iesu ese dina gabedia ia perovetalaidia, ia gwau: “Bese ibounai iena vairana dekenai do ia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be ena idiba kahana dekenai do ia atoa, nanigosi be ena lauri kahana dekenai do ia atoa.” Mamoe be manau taudia, Keriso ena tadikaka idia bamodia bona idia durudia bona Dirava idia kamonai henia taudia unai. Nanigosi be Keriso ena tadikaka idia dadaraidia bona Dirava ena lohia dalana idia durua lasi taudia. Unai dainai, “idia be davana ia dika hanaihanai gabuna dekenai do idia lao. To kara maoromaoro taudia [mamoe unai] be mauri hanaihanai gabuna dekenai do idia lao.”—Mataio 25:31-46.
16. Bema oi ura Paradaiso dekenai do oi noho, dahaka do oi karaia be namo?
16 Momokani, Dirava ese ita ia laloa! Nega daudau lasi ia ese tanobada paradaisona namona do ia havaraia. Oi ura do oi noholaia a? Bema oi ura neganai, Iehova oi dibaia, bena emu diba hegeregerena oi karaia. “Iehova umui tahua, umui do davaria diba neganai. Umui boi henia, ia do kahirakahira neganai. Kara dika tauna ese ena dala do ia rakatania, bona kara gagevagageva tauna ese ena lalohadai do ia rakatanidia, Iehova do ia lou henia, bena ia ese do ia hebogahisi henia.”—Isaia 55:6, 7.
17. Dahaka dainai emu biaguna do oi abia hidi haraga be namo?
17 Nega be ia kwadogi. Inai tanobada gunana ena dokona be ia kahirakahira momokani. Dirava ena sisiba be inai: “Tanobada do umui ura henia lasi, bona tanobada ena gaudia danu do umui ura henia lasi. . . . Tanobada, mai ena gau dikadia, . . . be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:15-17.
18. Dahaka bema oi karaia, oi ese mauri Dirava ena tanobada matamatana namo hereana lalonai be do oi naria diba?
18 Hari inai negai Dirava ese ena orea taudia ia hadibadia noho; unai amo ia hahegaegaedia, tanobada matamatana lalonai do idia mauri hanaihanai totona. Oi ai noia goadagoada inai, Dirava do oi abia hidi emu Pavapava, bona ena ura hegeregerena taunimanima hamauridia gaukarana do oi durua. Iehova ena Witness taudia ida Baibel oi stadilaia, bena oi ia laloa bada bona hisihisi do ia haorea Diravana do oi dibaia. Inai dala amo oi danu be tanobada matamatana ena badina ena kahana ai do oi lao diba. Bena Dirava ena hahenamo bona mauri hanaihanai tanobada matamatana lalonai be do oi naria mai emu lalo-goada ida.
[Picture on page 31]
Iehova ena Witness Taudia be orea korikorina ta, bese iboudiai lalodiai
[Picture on page 32]
Dirava ese ena tanobada matamatana ena badina ia karaia noho