Tanobada Taudia be Tadikaka Bamona Do Idia Noho!
MISINARI tauna be West Africa dekenai ia ginidae matamaia neganai tomadiho ena hebouhebou gunika kahana dekenai ia lao. Unuseniai ruma bese ta ia lao henidia neganai, edia lagani rua merona be ia tai matamaia, ia tai kava bamona.
Misinari tauna be unai mero ia hamoalea toho neganai, ia tai lolo. Misinari tauna ese mero sinana dekenai ia gwau: “Dahaka dainai ia tai?” Mai hemarai danu ia haere, ia gwau: “Lau laloa oi dainai ia tai. Emu kopina dainai ia gari. Guna tau kurokuro ta ia itaia lasi.”
Ita maragi negana amo ita diba taunimanima edia kopina idia idau. To gabeai bese idauna dadaraia karana ia vara. Natudia ese taunimanima badadia, hegeregere edia tamana bona sinana, edia kara idia tohotohoa. Sikuli dekenai idia lao neganai edia tisa, edia turadia, bona sikuli memero kekeni edia kara idia tohotohoa.
Nega sisina daudau lalonai United States dekenai unai kara idia tahua, bona idia davaria natudia edia lagani idia 12 neganai, edia lalohadai bona kara idau gado taudia, bese idau taudia, bona idau tomadiho taudia dekenai be edia hanua taudia edia lalohadai hegeregeredia. Idia bada momokani neganai edia lalohadai idia dekenai ia auka vadaeni.
Iehova Ena Witness Taudia Idia Idau
Hari inai tanobada dekenai, bese idauna dadaraia karana be ia bada herea, to ia hedinarai goevagoeva Iehova ena Witness taudia edia kara be ia idau. Tanobada ibounai dekenai taunimanima idia diba Witness taudia bese iboudiai amo idia tura heheni namonamo. Lagani ta ta iboudiai hebouhebou badadia idia karaia neganai, edia kara idia raraia taudia dekenai unai ia hedinarai goevagoeva.
Haheitalai ta be inai, States-Item niuspepa lalonai Witness taudia edia hebouhebou badana United States ena south kahana dekenai ena sivarai inai bamona ia gwauraia: “Natudia bona taunimanima badadia, kopi korema bona kopi kurokuro Iehova ena Witness taudia be Louisiana Superdome dekenai idia mai hebouhebou idia karaia totona, bona idia iboudiai be bese tamona taudia bamona, bona idia helai hegaegae . . . diba idia abia bona idia kara namo heheni totona. . . . Iehova ena Witness taudia dekenai . . . bese idauna lalo-dika henia karana be hekwakwanai gauna lasi.”
Witness taudia edia hebouhebou ta South Africa dekenai, Xhosa bese hahinena ta ia gwau: “South Africa dekenai bese idauidau taudia be lalo-tamona dekenai idia noho be hoa gauna. Lau itaia dubu dekenai bese idauidau taudia be unai bamona idia karaia lasi.”
Vadivadi taudia North bona South America bona Europe dekena amo be Witness taudia edia hebouhebou badadia Asia bona South Pacific dekenai idia mai neganai, sivarai ta ia gwau “vadivadi taudia bona idia abia dae taudia idia lalo-dika heheni lasi.”
Vadaeni, tanobada ibounai dekenai Iehova ena Witness taudia milion milion edia kara be ia idau herea, idia lalo-tamona momokani bona bese idau taudia idia lalo-dika henia lasi. Keristen lalokau karana ese idia ia hatamonaia. Iesu ia gwau unai bamona do ia vara, ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”—Ioane 13:35.
Momokani, tanobada hegegemadai Iehova ena Witness taudia be ruma bese tamona bamona idia noho! Iesu ena hereva Mataio 23:8 dekenai idia abia dae momokani, ia gwau: “Umui ibounai be tadikaka.” Hari inai nega lalonai bese idauna bona idau gado taudia idia parara bona idia inai heheni, bona unai kara ese bese iboudiai ia hadikaia.—Korinto Ginigunana 1:10; 1 Ioane 3:10-12; 4:20, 21; 5:2, 3.
Lalo-Tamona Abia Dalana
Iehova ena Witness taudia be unai lalo-tamona idia abia badina edia Kingdom Hall dekenai Bible dekena amo idia hadibaia bona sibona edia rumai Bible idia stadilaia dainai. Idia be Paulo ia gwauraia Tesalonika Keristen taudia bamona, ia gwau: “Dirava ena hereva ai mailaia neganai, umui kamonai henia bona umui abia dae. Oibe, umui abia dae momokani, taunimanima edia hereva bamona lasi, to Dirava ena hereva momokani bamona. Badina be Dirava ese umui abidadama taudia emui lalona dekenai ia gaukara noho.”—1 Tesalonika 2:13.
Unai dainai, Witness taudia ese Bible ena hereva idia abia dae, bona idia hekwarahi noho Dirava ena lalohadai karana idia tohotohoa totona. Lauma helaga siahuna henunai Keristen aposetolo Paulo ia torea herevana idia abia dae, ia gwau: “Hari lau diba momokani Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.”—Kara 10:34, 35.
Unai hereva hegeregerena, Iesu ese ena hahediba taudia ia hadibaia “bese ibounai” dekenai hahediba taudia ai do idia halaodia totona. (Mataio 28:19) Unai dainai, Iehova ena Witness taudia ese kara maoromaoro idia ura henia taudia, bese bona gado iboudiai amo, idia tahua, bona bese ta idia dadaraia lasi. Bona mauri dala idau bona bese idau taudia idia hebou tamona neganai idia tomadiho totona, idia gaukara hebou totona, bona moale karana idia karaia hebou totona, edia lalohadai be tanobada taudia bamona lasi. Ta ese ma ta ia laloa bada bona idia helalokau heheni.
Momokani, bema taunimanima ta ese nega daudau lalonai, bese idauna dadaraia karana ia manadalaia vadaeni, reana ena lalohadai unai kara dekenai do ia haidaua haraga diba lasi. To Witness tauna ta ai ia lao neganai, ia ese Keristen momokani ena “mauri matamata” ia karaia matamaia, bona ia hekwarahi bada ena lalohadai gunana ia negea totona. (Efeso 4:22-24) Bema bese idauna dadaraia karana ia manadalaia, do ia gwau lasi, ‘Lau tubu daekau lalonai unai kara lau manadalaia unai dainai lau karaia.’ Lasi, to ia hekwarahi bada ena lalohadai unai kara dekenai ia haidaua totona, bona “[Keristen] taudia ibounai do [ia] lalokau henia” totona.—1 Petero 2:17.
Bible Ena Peroveta Herevadia Idia Guguru Noho
Hari inai nega lalonai Iehova ena Witness taudia edia kara be mai anina bada. Oibe, Bible ese edia kara ia perovetalaia.
Mani Isaia 2:2-4 ena hereva oi laloa, ia ese “dina gabedia ai,” inai nega dikana ena “nega dokonai,” do idia vara gaudia ia perovetalaia. (2 Timoteo 3:1-5, 13) Isaia ena peroveta herevana ia hahedinaraia hari inai nega lalonai Iehova ena tomadiho momokanina do idia haginia, bona ‘bese iboudiai ese do idia lao henia. Bona taunimanima hutuma do idia lao bona do idia gwau: “Umui taunimanima e, umui mai, Iehova ena ororo dekenai do ita daekau, ia ese ena kara ita do ia hadibaia, bona ita be ena dala dekenai do ita raka.” ’
Isaia ese unai kara amo ia vara hoa karana ma ta ia perovetalaia danu, bona lagani 1900 ia mai hari tanobada ibounai dekenai Iehova ena Witness taudia ese unai kara idia karaia: “Idia ese edia tuari kaia do idia hodoa, tano geia auridia ai do idia halaoa, bona edia io do idia hodoa, au rigidia utua pakosidia ai do idia halaoa. Bese ta ese tuari kaia do idia abia isi lasi, bese ta hadikaia totona, bona tuari dalana do idia hadibaia lou lasi.”
Danu, Bible buka Apokalupo be hari inai nega lalonai do idia vara gaudia ia perovetalaia neganai, ia hahedinaraia taunimanima hutuma “bese idauidau, iduhu idauidau, kopina idauidau, bona gado idauidau” amo be tadikaka korikoridia bamona do idia hebou bona lalo-tamona dekenai Dirava ena hesiai gaukara do idia karaia.—Apokalupo 7:9, 15.
Unai be gori sivaraina lasi. Hari inai nega lalonai hutuma bada herea taudia bese idauidau, iduhu idauidau bona gado idauidau amo idia haboua noho. Harihari, tanobada ibounai dekenai taunimanima idia haboua bona tadikaka momokani taudia ai idia halaodia bona unai bamona do idia noho ela bona hanaihanai! Idia be tanobada matamata ena badina ai do idia lao. Kahirakahira, Dirava ese inai nega dikana do ia haorea, bena unai neganai unai lalo-tamona moale taudia ese ena gabu do idia abia. Iesu ia gwau unai lalo-tamona taudia be “tanobada do idia abia,” bona Dirava ena Basileia ena lohia siahuna henunai do idia noho ela bona hanaihanai.—Mataio 5:5; 6:9, 10; Salamo 37:10, 11, 28, 29, 37, 38.
Namona be oi ese unai kara oi hamomokania, ani? Ai moale bema Iehova ena Witness taudia edia Kingdom Hall dekenai oi lao bona do oi itaia unuseniai bese idauidau taudia be lalo-tamona dekenai idia noho. Eiava gabeai Witness taudia be oi dekenai idia vadivadi neganai, emu ruma dekenai idia oi abia dae, bona oi hamaorodia Bible dekena amo bese idauidau taudia danu idia lalo-tamona ena badina oi dekenai idia hahedinaraia totona. Danu, oi dekenai Bible ia gwauraia helaro namona do idia hahedinaraia, unai be tanobada matamatana lalonai taunimanima ibounai be bese tamona bamona do idia noho.
Siahu Ibounai Diravana, Iehova, ia gwauhamatalaia herevana do ia hagugurua, ia gwau tanobada dekenai taunimanima iboudiai be bese tamona bamona do idia noho. Ia gwau: “Lauegu uduna amo ia lao herevana be unai bamona do ia karaia. Lau dekenai do ia giroa mai kava lasi, to lau moalelaia gauna do ia hagugurua bona ia totona lau do ia karaia guguru, bona ia totona lau siaia gauna ena anina do ia havaraia momokani.”—Isaia 55:11.
Oi ai boiria Bible ena peroveta herevadia bona idia guguru vadaeni herevadia do oi tahua totona. Bema unai bamona do oi karaia, do oi itaia bese idauidau dekenai lalo-tamona karana ia vara diba bona gau ta ese ia koua diba lasi!
[Blurb on page 9]
Bible ese Iehova ena Witness taudia edia huanai ia vara gauna ia perovetalaia vadaeni
[Picture on page 10]
Iehova ena Witness taudia sibona edia huanai bese idauidau taudia idia lalo-tamona momokani