Lalometau Taudia Hagoadaia Herevadia

“Dirava ese ia karaia gaudia ibounai be idia hisihisi noho, . . . idia tai noho, guna, ia mai bona harihari.” (Roma 8:⁠22) Paulo ese lagani 1,900 gunanai unai hereva ia torea neganai, taunimanima ese hisihisi momo idia mamia. Momo idia lalometau. Unai dainai, Keristani taudia ia haganidia: “Lalometau taudia umui gado namo henidia bona umui hagoadaia.”​—⁠1 Tesalonika 5:​14, NW.

Hari inai negai, taunimanima momo idia lalometau bada. To unai ita hoalaia lasi, badina be Baibel ia gwau, hari inai nega be “nega ena dokona” bona “metau dikadia momo do idia vara.” (2 Timoteo 3:​1-5) Iesu Keriso ia gwau, nega dokonai “gari bada gaudia” do idia vara.​—⁠Luka 21:​7-11; Mataio 24:​3-14.

Nega daudau lalonai taunimanima idia lalohekwarahi, gari, o idia lalohisihisi neganai, nega momo idia lalometau. Reana ta ena lalokau tauna ta ia mase, ena headava ia hadokoa, ena moni gaukara ia haboioa, o nega daudau lalonai ia gorere neganai, ia lalometau. Ma haida idia lalometau, badina be idia laloa idia be anina lasi bona idia kwalimu diba lasi. Taunimanima ibounai ese lalohekwarahi idia davaria diba, to bema ta ia mamia ena lalohekwarahi hanaia dalana be lasi, reana do ia lalometau bada herea.

Idaunegai taudia danu be unai bamona. Iobu ese dika ia davaria bona ia gorere neganai, ia laloa Dirava ese ia rakatania, unai dainai ia gwau mauri ia inai henia. (Iobu 10:1; 29:​2, 4, 5) Iakobo ena lalona ia metau badina be ia laloa ena natuna ia mase; ia ura ia danu do ia mase. (Genese 37:​33-35) King Davida ese sibona ena kara dika badana ia lalohisihisilaia, ia gwau: “Dina ena hora ibounai lalonai lau tai noho, tai noho. Lau be lau manoka vadaeni.”​—⁠Salamo 38:​6, 8; 2 Korinto 7:​5, 6.

Hari inai negai, taunimanima momo idia lalometau badina be dina iboudiai gaukara bada idia karaia toho, to edia lalona bona edia tauanina edia goada be hegeregere lasi. Lalohekwarahi bona lalona hamanokaia gaudia sibona laloa karana ese tauanina ia hadikaia diba bona harana lalonai kemikol idauidau ia havaraia namonamo lasi dainai, lalometau ia havaraia.​—⁠Aonega Herevadia 14:30 itaia.

Heduru Namona

Gunaguna, Keristani tauna ta ladana Epafrodito ‘ena lalona ia hekwarahi bada, [iena turadia ese] iena gorere sivaraina idia kamonai dainai.’ Filipi amo ia idia siaia Roma dekenai, aposetolo Paulo do ia durua totona. Unuseniai gorere ia davaria, bona reana ia laloa ia ese edia ura ia hagugurua momokani lasi dainai idia laloa ia be hegeregere lasi. (Filipi 2:​25-27; 4:18) Vadaeni, Paulo ese edena bamona ia durua?

Epafrodito ena imana amo revareva ta ia siaia ena Filipi turadia dekenai, ia hamaorodia, ia gwau: “[Epafrodito] do umui abia dae, Lohiabada ena ladana dekenai, mai emui moale bada danu. Bona iena kara bamona idia karaia taudia ibounai do umui matauraia.” (Filipi 2:​28-30) Paulo ese Epafrodito ia hanamoa bada dainai, bona Filipi taudia ese idia abia dae mai edia lalokau ida dainai, unai ese iena lalometau ia hamaragia.

Momokani, Baibel ena sisiba, “lalometau taudia umui gado namo henidia,” be namo herea. Lalometau hahinena ta ia gwau: “Oi ura oi diba ma haida ese oi idia laloa. Oi ura ta ese oi ia hamaoroa ia gwau, ‘Emu hemami lau lalopararalaia; do oi namo lou.’ ”

Namona be lalometau tauna ese hebogahisi tauna ta dekenai do ia lao bona ena lalona ena mamina do ia herevalaia. Namona be unai tau ese lalometau tauna ena hereva ia kamonai namonamo. Namo lasi ia ese lalometau tauna ia hahemaoro henia, hegeregere ia gwau, ‘Unai bamona oi laloa be namo lasi’ eiava, ‘Unai be lalohadai kererena,’ badina be unai bamona herevadia ese ena lalometau do idia habadaia sibona.

Lalometau tauna be reana ia laloa ia be anina lasi. (Iona 4:⁠3) To ta be inai ia laloaboio lasi: Dirava ena lalohadai ia dekenai be gau badana. Ena be taunimanima ese Iesu Keriso idia “matauraia lasi” to Dirava ese ia lalonamo henia noho. (Isaia 53:⁠3) Dirava ese iena Natuna ia lalokau henia hegeregerena, ia ese oi danu ia lalokau henia.​—⁠Ioane 3:⁠16.

Iesu ese lalohisihisi taudia ia hebogahisi henidia bona ia durudia toho, unai amo idia diba idia be mai anina. (Mataio 9:36; 11:​28-30; 14:14) Ia gwau Dirava ese manu maragidia ia lalodia, “idia ta ia laloaboio lasi.” Unai dainai ena ura idia karaia toho taudia be ia ese ia lalodia bada! Iesu ia gwau: “Umui emui kwarana huina ibounai ia ese ia duahia ore.”​—⁠Luka 12:​6, 7.

Momokani, sibona ena manoka ia lalohisihisilaia bada tauna be reana ia abia dae diba lasi Dirava ese ia laloa bada. Reana ia laloa ia hegeregere lasi Dirava ese do ia lalokau henia bona do ia naria. Baibel ia gwau, “iseda kudouna ese ita idia kota henia.” Dirava ia diba goevadae lasi taudia be idia lalomanoka diba bona sibodia unai bamona do idia samania. Unai dainai Iena Hereva ese idia ia hagoadaia, ia gwau: “Dirava ese gau ibounai ia diba, bona iena diba ese iseda kudouna ena diba ia hereaia momokani.”​—⁠1 Ioane 3:​19, 20.

Oibe, iseda lalokau guba Tamana ese iseda kara dika bona kerere sibona ia itaia lasi. Ia ese iseda noho dalana ibounai, iseda ura bona iseda lalohadai danu ia diba. Ia diba iseda tubudia edia amo kara dika, gorere, bona mase ita abia dainai ita hegeregere momokani lasi. Iseda kara ita lalohisihisilaia bada ese ia hamomokania ita ura lasi ita kara dika. Baibel ia gwau: ‘Mauri anina lasi ita davaria, sibona eda ura dainai lasi.’ Unai dainai Dirava ese iseda hekwarahi bona iseda manoka ia lalodia mai ena hebogahisi ida.​—⁠Roma 5:12; 8:⁠20.

Baibel ia gwau: “Lohiabada be mai ena bogahisihisi, . . . Dina ia daekau kahana, bona dina ia diho kahana be daudau herea. Unai daudauna hegeregerena be Dirava ese, iseda kara dika ita dekena amo ia kokidia lao vadaeni. Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” (Salamo 103:​8, 12, 14) Momokani, Iehova be ‘hebogahisi bona durua ibounai ia henia Diravana. Eda hisihisi ibounai lalonai ia ese ita ia durua noho.’​—⁠2 Korinto 1:​3, 4.

Lalometau taudia idia abia heduru badana be edia hebogahisi Diravana kahirakahira idia lao bona ‘edia laloa hekwarahi be Ia dekenai idia henia.’ Ia ese lalohisihisi taudia edia lalodia ia hagoadaia lou diba. (Salamo 55:22; Isaia 57:​15, NW ) Baibel ese ita ia hagoadaia ita guriguri totona, ia gwau: ‘Emui laloa hekwarahi gaudia ibounai be [Iehova] ena imana dekenai do umui atoa.’ (1 Petero 5:⁠7) Oibe, guriguri amo taunimanima be Dirava kahirakahira dekenai idia lao diba, bona ‘Dirava ena maino, taunimanima edia diba ia hanaia momokani’ mainona, idia abia diba.​—⁠Filipi 4:⁠6, 7; Salamo 16:​8, 9.

Bema ta ese ena mauri dalana ia haidaua, unai danu ese ia durua diba, ena lalometau do ia hanaia totona. Eksasais, aniani namona, hodahoda namona, mahuta namona, bona TV raraia momo lasi karana be mai anina bada. Hahine ta ese lalometau taudia ia hagoadaia idia raka totona. Lalometau hahine ta ia gwau: “Lau ura lasi lau raka,” to ia ia durua hahine ia gwau: “Do ita lao.” Ma ia gwau: “Ai be kilomita 6 ai raka. Ai lou mai neganai ena tauanina ia hesiku, to ena lalona ena mamina ia namo. Eksasais ena namo oi diba lasi ela bona oi karaia.”

To, taunimanima haida, ena be heduru idauidau idia tohodia, muramura danu, to edia lalometau idia hanaia diba lasi. Hahine ta ia gwau: “Heduru gaudia ibounai lau tohoa vadaeni, to egu lalona ia do metau herea.” Unai hegeregerena, nega momo matakepulu, taia kudima, bona aena dika taudia hanamoa totona be hegeregere lasi. To, Dirava ena Hereva duahia karana amo lalometau taudia ese goada bona helaro namona idia davaria diba; unai helaro be gorere bona hisihisi iboudiai do idia ore vaitani.​—⁠Roma 12:12; 15:⁠4.

Lalometau Do Ia Ore Negana

Iesu ese dina gabedia ai do idia vara gau dikadia ia gwauraia neganai, ia gwau: “Inai gaudia do idia vara hamatamaia neganai, be emui kwarana do umui abia isi. Badina be umui emui hamauria be ia kahirakahira vadaeni.” (Luka 21:28) Iesu be Dirava ena tanobada matamatana ai do idia roho mauri karana ia herevalaia, unuseniai Dirava ese ia “karaia gaudia be do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia, ma Dirava ese edia dala do ia kehoa, vadaeni kwalimu momokani do idia abia.”​—⁠Roma 8:⁠21.

Dirava ese guna taunimanima idia davaria metau idauidau amo do ia ruhaia neganai do idia moale bada, bona daba ibounai idia noga neganai, do idia lalometau lasi, do idia ura unai dina ena gaukara do idia karaia! Dirava ena gwauhamata be, “ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—⁠Apokalupo 21:​3, 4.

Baibel siridia be Hiri Motu Buka Helaga, Bible Society of Papua New Guinea ese ia karaia gauna amo, to bema New World Translation of the Holy Scriptures​—⁠With Reference amo ai hahanaia, edia murinai NW ai torea.