Lalo-Metau ena Hekwakwanai Oi Hanaia Diba

LOLA ia gwau: “Lau ia hametaua bada gauna be lau be helaro lasi hegeregerena bona lau hemarai badina lau laloa Iehova ena hesiai tauna ta be unai mamina ia abia be namo lasi.” Ia lalo-metau Keristen tauna be inai lalohadai kerere do ia hanaia guna be namo. Lola be ma ia gwau: “Lauegu lalona dekenai lau sibona lau botaia bamona karana lau rakatania neganai, bona dala lau tahua lau gorere lasi totona, lau ese lalo-metau karana lau hanaia toho diba.” Oibe, namo lasi oi lalo-metau dainai oi laloa Dirava ena vairana dekenai oi manoka.

Reana lalo-metau ia vara badina be tauanina ia gaukara namonamo lasi dainai. Lagani 1915 lalonai, taunimanima be idia do diba lasi lalo-metau ia vara badina nega momo tauanina ia gorere dainai, The Watch Tower magasin ia gwau: “Taunimanima iboudiai be nega haida edia lalona ia metau, eiava idia laloa idia sibodia idia noho bona idia lalo-metau . . . Unai lalo-metau ia bada bema tauanina ia gorere.” Unai dainai, bema lalo-metau oi negea diba lasi, namona be doketa tauna dekenai oi lao. Bema unai lalo-metau ia bada, reana oi lao diba lalo-metau gorere ia hanamoa diba momo doketa tauna ta dekenai.

Nega haida reana lalo-metau ia vara to tauanina ia gorere lasi, namo lasi ita laloa Dirava ena hesiai tauna ta be do ia lalohisihisi diba lasi eiava do ia manoka diba lasi. Oi laloa Hana be abidadama hahinena, to ia “lalohisihisi bona ia tai momo.” (1 Samuel 1:​7, 10) Nehemia danu be “dina momo ia tai bona ia lalohisihisi” bona “ena kudou ia lalo-metau.” (Nehemia 1:4; 2:2) Iobu be iena mauri dekenai ia hesiku bona ia laloa Dirava ese ia negea vadaeni. (Iobu 10:1; 29:​2, 4, 5) Pavapava David ia laloa iena mauri siahuna ia ore ia lao bona iena kudou ia manoka bamona. (Salamo 143:4) Bona aposetolo Paulo ia gwau nega haida ena mamina ia dika bona ia ‘gari’ bona ia ‘moru’ eiava ‘ena lalona ia metau.’​—2 Korinto 4:9; 7:​5, 6.

Ena be idia iboudiai be Dirava ena abidadama taudia, to nega haida idia lalohisihisi badina hekwarahi idauidau dainai, gari idauidau dainai, eiava manoka idauidau dainai. To, Dirava ese ia negedia lasi eiava iena lauma helaga idia dekena amo ia kokia lasi. Idia lalo-metau lasi idia be lauma dalana dekenai idia manoka dainai. David ia lalo-metau neganai, guriguri dekenai ia noinoi: “Emu hesiai tauna ena lalona oi hamoalea.” Dirava ese David ia durua ‘hekwakwanai dinana’ lalonai bona nega ia lao murinai, ia durua ia moale totona. (Salamo 86:​1, 4, 7) Unai hegeregerena, Iehova be hari inai nega lalonai iena hesiai taudia do ia durudia danu.

Lalo-metau ia vara neganai ta ia hamomokania diba lasi unai bamona tauna be lauma dalana dekenai eiava darana dekenai ia manoka. Unai dainai, namo lasi lalo-metau ia abia Keristen tauna ia hemarai bona ia herevalaia lasi. To, namona be gau ta ia karaia unai gorere ia hanaia totona. Unai be dahaka?

Emu Mamina Oi Gwauraia Hedinarai

Namona be ena mamina ma tau ta dekenai ia herevalaia. Hereva Lada-isidia 12:25 ia gwau: “Lalo-hekwarahi ese tau ta ia hametaua noho, to hereva namona ese ia hamoalea.” Ma taunimanima ta be oiemu kudou ia hametaua gauna ia diba lasi bema oi herevalaia lasi. Bema hebogahisi tauna dekenai emu mamina oi herevalaia diba, reana do oi diba ma haida danu be unai bamona mamina bona hekwakwanai idia abia. Danu, bema oiemu mamina dikana be hereva amo oi gwauraia hedinarai neganai unai mamina dikana oi kokia diba, badina kudou ia durua unai hisihisi ia hahedinaraia totona, namo lasi oi hunia. Unai dainai, namona be lalo-metau taudia be edia adavana dekenai, tamana sinana dekenai, eiava hebogahisi bona lauma dalana ai ia goada turana ta dekenai ena mamina dikana ia herevalaia be namo.​—Galatia 6:1.

Marie ena hekwakwanai kahana ta be ia lalo-metau badina ia ese iena lalohisihisi ia hunia. Ia gwau: “Lagani momo lalodiai, egu mamina lau hahedinaraia lasi. Ma haida idia diba lasi mamina dikana lau abia.” To Marie be elda tauna ta kongregesen dekenai ena mamina dikana ia herevalaia. Elda tauna be lalo-parara henanadai amo iena kudou dekena amo iena lalo-hekwarahi ia ‘veria daekau’, bona ia durua sibona ena kara ia diba namonamo totona. (Hereva Lada-isidia 20:5) Iena hereva namodia, Bible siri amo, ese ia hagoadaia. Marie ia gwau: “Unai neganai, lauegu lalo-metau ia havaraia mamina dikana lau hanaia totona heduru lau abia.”

Unai dainai bema ta ena “lalona be tano gagaena bamona” bona ia ese ia lalo-parara elda tauna ta ia hereva henia neganai, lauma dalana dekenai ia hagoadaia “ranu” ia abia diba. (Isaia 32:​1, 2; Salamo 143:6) Lauma dalana dekenai mai lalo-parara danu sisiba ia henia tauna be reana oi ia durua diba bona do oi diba dahaka oi karaia emu mamina dikana do oi kokia totona. (Hereva Lada-isidia 24:6) To emu mamina dikana ma ta oi hadibaia sibona be hegeregere lasi.

Oiemu Kara ena Namo Oi Laloa

Helaro lasi bamona ena mamina be lalo-metau ia havaraia gauna badana. Reana idia maragi neganai idia moale lasi dainai, Keristen taudia haida be sibodia idia gwauraidia namo lasi. To, ena be guna haida ese ena tauanina eiava ena lalona idia hadikaia, eiava ta ese ia doria bona ia gagaia dainai ena lalona ia hisihisi noho, unai ese unai ta ena namo ia hadikaia diba lasi. Unai dainai, namona be oi sibona oiemu namo oi laloa maoromaoro. Aposetolo Paulo ia gwau: “Umui ta ta sibona do umui habadaia lasi, to emui kara umui laloa, Dirava ese umui dekenai abidadama ia henia hegeregerena.” (Roma 12:3) Oi naria namonamo oi hekokoroku garina, to namona be oi naria namonamo oi manau kava garina danu. Dirava danu idia turana taudia be taunimanima namodia, idia ia ura henidia bada, badina ia ese unai taudia ia abia hidi “iena bese” totona. Unai be dagi namo herea!​—Malaki 3:17; Hagai 2:7.

Danu, Keristen gaukara dekenai ‘Dirava ida ita gaukara hebou’ bona hahediba taudia ita karaia neganai unai be gaukara ena maduna namo hereana. (1 Korinto 3:9; Mataio 28:​19, 20) Lalo-metau idia abia Keristen taudia momo idia diba unai gaukara ese sibodia laloa namo karana ia habadaia. Marie ia gwau: “Lau be Keristen hahine ai lau lao murinai, lau do laloa noho lau be hegeregere lasi.” To, haroro gaukara dekenai ia haheauka noho, bona dina ta ena harana ia dika hahine matamatana ta ia davaria, ia ura ta ese ia hadibaia Bible ena sivarai ia diba totona. Marie ia gwau: “Bema ta ese unai hahine ia hadibaia metairametaira, do ia diba.” Bona ia gwau: “Lauegu nega bada lau atoa lau durua totona, unai dainai lau sibona egu mamina dikana lau laloaboio. Lau durua be namo, bona lau diba lau durua diba Iehova ena goada dainai. Ia bapatiso neganai unai ese lau ia hagoadaia bada herea. Lauegu mamina ia namo ia lao, bona lau ia hametaua momokani gauna ia ore.” Momokani “taunimanima ranu amo ia dairia tauna be ranu amo do idia dairia danu”!​—Hereva Lada-isidia 11:25.

To, lalo-metau taudia momo be metau bada ia huaia Keristen hahine ta bamona idia laloa. Ia gwau: “Ena be ruma lau hagoevaia, lau nadunadu bona taunimanima lau abia dae totona lau gaukara momo, to hanaihanai egu gaukara lau gwauraia dika.” Unai bamona kara be ia kerere badina sibona gwauraia namo karana ia koua. Namona be oi laloatao iseda Dirava be mai ena hebogahisi bona “iseda kerere ia laloa hanaihanai lasi.” (Salamo 103:​8-10, 14) Iehova be kara maoromaoro gaukaralaia dalana ia diba momo to ita diba momo lasi. Bema ia be iseda kerere ia laloa hanaihanai lasi bona ia haheauka diba, namona be ita danu ia bamona ita karaia, ani?

Ita ibounai be mai iseda kerere bona kara dika. To, ita be mai iseda goada danu. Aposetolo Paulo ia laloa lasi hanaihanai iena gaukara ibounai dekenai ia goevadae. Ia gwau: “Sedira lauegu hereva be mamina lasi, to lauegu diba be maragi lasi.” Ena be taunimanima vairadiai ia hereva dalana ia namo momokani lasi, to Paulo ia laloa lasi ia be hegeregere lasi. (2 Korinto 11:6) Unai hegeregerena, lalo-metau idia abia taudia be edia kara namodia do idia laloa momo be namo.

“Aonega be manau taudia dekenai” eiava sibodia edia kerere bona manoka idia hunia lasi taudia dekenai. (Hereva Lada-isidia 11:2) Ita ibounai iseda kara be idauidau, iseda noho idia idauidau, iseda goada idia idauidau bona iseda diba be idauidau. Mai emu kudou ibounai ida Iehova oi hesiai henia neganai, bona emu goada hegeregerena oi karaia neganai, do ia moale. (Mareko 12:​30-33) Dirava be nega ibounai ia dekenai idia tomadiho henia namonamo taudia edia gaukara ia moalelaia. Leora be Keristen hahine bona iena lalo-metau karana ia hanaia, ia gwau: “Lauegu gaukara be haida hegeregeredia lasi, hegeregere haroro gaukara dekenai hereva lau do karaia namonamo lasi. To lau karaia toho. Egu diba hegeregerena lau gaukara badabada.”

Kerere Neganai bona Hepapahuahu Neganai

To, edena bamona bema oi kerere bada? Reana Pavapava David ia abia mamina bamona oi abia, ia be ‘dina ibounai lalonai ia lalohisihisi’ badina ia kerere, eiava ia kara dika dainai. To lalohisihisi mamina oi abia neganai reana unai anina be Dirava ese gwauatao diba lasi kererena oi do karaia vadaeni lasi! (Salamo 38:​3-6, 8) Bema ta ese ena kerere dainai ia hemarai reana unai ese ia hahedinaraia unai kerere tauna be kudou namo bona lalona ena mamina ia namo tauna. Unai dainai unai hemarai mamina be edena bamona ia hanaia diba? Dirava ena gwauatao abia totona oi noia vadaeni bona kara ta oi karaia unai kerere oi hamaoromaoroa totona, a? (2 Korinto 7:​9-11) Bema unai bamona oi karaia, namona be oi abidadama hebogahisi Tauna dekenai, ia be dala badana dekenai unai kerere do ia gwauatao diba, bona namona be emu lalona oi hadaia do oi kerere lou lasi totona. (Isaia 55:7) Bema sisiba oi abia, ‘oi manoka lasi oi ia sisiba henia neganai, badina Iehova ese ia lalokau henia tauna ia sisiba henia.’ (Heberu 12:​5, 6) Unai bamona sisiba ese ia raka kerere mamoe ena raka dalana ia hamaoromaoroa. Unai sisiba ese unai tau ena namo ia hadikaia lasi.

Ena be ita sibona iseda kudou ese ita ia hahemaoro henia, to namo lasi ita laloa Iehova ese ita ia hahemaoro henia vadaeni. “Unai dekena amo Dirava ena vairanai do ita gini diba, mai laloa maoromaoro danu. Bema iseda lalona ese ita idia kota henia noho, Dirava vairanai do ita laloa hekwarahi lasi. Badina be iseda lalona ena diba be Dirava ena diba ese ia hanaia, bona gau ibounai ia diba.” (1 Ioane 3:​19, 20) Iehova be iseda kerere bona kara dika mo sibona ia itaia lasi. Ia be iseda noho ena hekwarahi, iseda mauri dalana, iseda ura bona ita ia veria gaudia ia diba. Iena diba ia bada dainai iseda kerere ia gwauatao totona ita guriguri henia neganai, ia kamonai diba, mai hebogahisi danu, David ena guriguri ia kamonai henia hegeregerena.

Bema ma taunimanima haida danu ita hepapahuahu neganai, bona ita ura idia be ita idia moale henia noho dainai ita hekwarahi momo, ita sibona ena namo ita hadikaia diba, reana ita laloa idia be ita idia dadaraia. Ia be mai ena kara dika dainai, reana ma Keristen ta be oi dekenai ia hereva neganai oi laloa ia hebogahisi lasi eiava oi ia ura hahisia. To, hepapahuahu momo idia ore diba bema unai tauna dekenai oi lao bona oi hadibaia iena hereva ese oi ia hahisia. (Mataio 5:​23, 24 oi hahegeregerea.) Danu, Solomon be sisiba ia henia: “Taunimanima edia hereva idauidau dekenai oiemu kudouna oi henia lasi.” Badina be dahaka? “Badina be oiemu kudouna lalonai oi diba, nega momo oi danu, oibe oi sibona, ese taunimanima haida oi gwauraia dika danu.” (Kohelete 7: 21, 22) Namo lasi oi laloa kerere, hegeregere oi laloa oiemu kara do goevadae eiava emu kara dika ma taunimanima haida dekenai do idia goevadae badina ita ibounai be kara dika taudia. Kara haraga ma taunimanima haida dekenai oi boga-auka bona edia kerere oi laloaboio.​—Kolose 3:13.

Ma danu, ena be haida ese oi idia lalokau henia eiava lasi, to unai ese oiemu namo ia hamomokania lasi. “Taunimanima ese” Keriso “idia dadaraia” bona ‘taunimanima edia matana dekenai’ ia be anina lasi tauna bamona. (Isaia 53:3; Sekaria 11:13) Unai ese ia ena namo karana ia hadikaia eiava Dirava ena lalohadai ia dekenai ia hadikaia, a? Lasi, ena be ita goevadae, Iesu hegeregerena, to do ita be taunimanima iboudiai do ita hamoaledia diba lasi.

Haheauka Totona Oi Goada

Nega haida, ena be ita hekwarahi bada lalo-metau bada karana ita hanaia totona, to iseda lalo-metau ia do noho. Lalo-metau ena hisihisi ia bada dainai reana Keristen haida be Iona bamona idia laloa, ia gwau: “Lau mauri be hegeregere lasi, lau mase be namo.” (Iona 4:​1-3) To, iena hisihisi bada ia noho hanaihanai lasi. Gabeai ia hanaia. Unai dainai, bema oiemu lalo-metau ese oiemu mauri ia hadikaia bona oi laloa oi haheaukalaia diba lasi, namona be inai oi laloatao, Paulo ia gwau hisihisi be “do ia noho nega daudau lasi.” (2 Korinto 4:​8, 9, 16-18) Do ia ore! Hekwakwanai iboudiai edia hanaia dalana ia noho. Iehova ia gwauhamata, ia gwau: “Idia hisihisi taudia edia kudou do lau hagoadaia lou.”​—Isaia 57:15.

Guriguri oi hadokoa lasi, ena be oi laloa reana oiemu guriguri be anina lasi. David ia noinoi, ia gwau: “Dirava e, lauegu taitai oi kamonai . . . lauegu kudou ia hetaha neganai. Mani lau oi hakaua lau atai ai ia noho nadina ta dekenai.” (Salamo 61:​1, 2) Dirava be edena dala ai ita ia hakaua bena sibona iseda goada dekenai ita laloa ita abia diba lasi goadana do ita abia? Eileen be lagani momo dekenai lalo-metau karana ia hanaia toho, ia gwau: “Iehova ia ura lasi lau hesiku. Unai ese lau ia durua badina lau diba, bema lau hekwarahi noho lau hanaia totona, ia be lau do ia durua noho. Bible ena hereva momokani lau diba dainai, lau mauri noho diba. Dala idauidau dekenai​—guriguri, haroro, hebou, buka, ruma bese, bona turadia ese lau idia durua​—Iehova ese lau ia hagoadaia noho dainai lau hekwarahi noho lau hanaia totona.”

Namona be unai gorere oi laloa ia be hegeregere oiemu abidadama ia tohoa gauna. Aposetolo Paulo ese ita ia hagoadaia noho, ia gwau: “Dirava be ia momokani. Ia ese umui do ia naria, emui goada ia hanaia hedibagani ese umui do ia pidia garina. Bona hedibagani neganai emui dala ta do ia kehoa. Vadaeni inai dala dekena amo unai hedibagani dekenai do umui kwalimu diba.” (1 Korinto 10:​13) Oibe, Dirava be oi dekenai “siahu badana” do ia henia oi be lalo-metau karana iboudiai oi haheaukalaia diba totona.​—2 Korinto 4:7.

Lalo-Metau Lasi Tanobada Matamatana!

Dirava ia gwauhamata, nega kahirakahira, iena guba Basileia amo ia ese tanobada idia hametaua gaudia iboudiai do ia kokidia. Iena Hereva ia gwau: “Badina lau ese guba matamatana bona tanobada matamatana lau karaia noho; gau gunadia do idia laloa lasi bona edia kudouna dekenai do idia vara lou lasi. To umui lalo-namo, umui moale hanaihanai lau karaia gaudia umui moalelaia.” (Isaia 65:​17, 18) Guna unai hereva idia guguru lagani 537 B.C.E. ai, idau negai Israel besena be edia tano dekenai idia giroa neganai. Iena bese be unai neganai inai ane idia abia: “Ita be nihi idia abia taudia bamona. Unai neganai iseda uduna be kiri amo ia honu, bona iseda malana ia boiboi mai moalena ida.” (Salamo 126:​1, 2) Nega kahirakahira, Dirava ena tanobada matamatana dekenai, unai peroveta hereva be do ia guguru lou dala namona dekenai!​—2 Petero 3:13; Apokalupo 21:​1-4.

Dirava ena Basileia (“guba matamatana”) henunai, kara maoromaoro tanobada taudia (“tanobada matamatana”) do idia goevadae edia lalona dekenai, edia tauanina dekenai, bona edia lauma dalana dekenai. Ita gwau lasi unai taudia be guna idia vara gaudia do idia laloaboio momokani, to unai neganai gau namodia momo do idia vara dainai unai gaudia sibona do idia moalelaia, guna idia vara gau dikadia do idia lalohisihisilaia loulou lasi. Daba ibounai idia toreisi neganai, darana ia goada, unai dina ena gaukara do ia ura henia​—do ia lalo-metau lasi!

Unai helaro dekenai ia abidadama momokani dainai, (guna ita herevalaia hahine) Lola, ia gwau: “Lau ia durua bada gauna be lau laloa noho Iehova ena Basileia ese inai hekwakwanai do ia kokia. Lau diba unai lalo-metau karana be do ia noho hanaihanai lasi.” Oibe, oi diba Dirava ese lalo-metau karana do ia kokia momokani!