Basileia Sivaraina Namba 34
Dahaka Dainai Mauri be Hekwakwanai amo Ia Honu?
Hekwakwanai lasi paradaisona ia vara diba, a?
HEKWAKWANAI BADADIA IDIA DIKA IDIA LAO—DAHAKA DAINAI?
Vaia taunimanima be hanaihanai mai edia hekwakwanai. Ena be momo idia laloa saiens ese ia havaraia gaudia matamatadia amo do idia hanaidia, to hekwakwanai badadia idia dika noho.
Taravatu Utua Karadia: Momo be dala ai idia raka eiava sibodia edia ruma ai idia noho neganai idia gari. Vanegai lagani ta ai, Europe tanona ta dekenai, taunimanima toi toi amo ta ta be taravatu utua taudia amo dika ia abia.
Tanobada: Hodahoda, tano, bona ranu hamiroa karana be ia bada herea momokani. Idia tubu noho tanodia ai, taunimanima 4 4 amo ta ta be ranu namona idia abia diba lasi.
Ogogami: Hari, idia ogogami bona hitolo taudia be momo herea. Tano haida dekenai taunimanima iboudiai amo 90 pesen mai kahana be idia ogogami; tanobada hegegemadai ai, idia gaukara diba taudia iboudiai amo 30 pesen, taunimanima 800 milioni bamona, be gaukara lasi eiava edia gaukara monina be hegeregere lasi—bona unai namba ia bada noho.
Hitolo: Ena be oiemu aniani be hegeregere, to taunimanima milioni momo edia be hegeregere lasi. Idia tubu namonamo lasi tanodia ai, taunimanima 13 milioni, momo be natu, be hitolo dainai idia mase.
Tuari: Taunimanima tausen momo herea be vanegai bese bona orea idauidau edia tuari heheni karadia ai idia mase. Bona lagani 1900 amo ema bona hari, tuari dainai idia mase taudia edia namba be milioni handred ta ia hanaia momokani.
Ma Hekwakwanai Haida: To unai hekwakwanai sibodia lasi; ruma bese idia parara momo, headava lasi kekeni momo be natuna idia abia, ruma lasi hekwakwanaina ia bada noho, drag ania kava karana ia bada, bona mata-bodaga karadia idia habadaia. Idia vara momokani gaudia hegeregerena, guna U.S. gavamani tauna ta ia gwau: “Toa momo herea amo ia hedinarai . . . taunimanima edia kara ia dika rohoroho.” Vanegai, lagani 30 lalodiai, United States ena taunimanima edia namba be 41 pesen amo ia bada daekau, to taravatu utua karadia mai dagedage ida be 560 pesen amo ia bada daekau haraga, natuna havaraia kava be 400 pesen amo, headava hadokoa be 300 pesen amo, bona mauri lagani 13 ia lao 19 taudia huanai sibona hamasea karana be 200 pesen amo ia bada. Tano ma haida dekenai danu be unai bamona.
Dahaka Dainai Hekwakwanai Idia Bada Daekau?
Ita ia Havaraia Tauna dekenai haere ia noho. Iena Hereva ese inai hekwakwanai negana ia gwauraia ‘nega ena dokona, metau dikadia do idia vara’ negana. (2 Timoteo 3:1) Dahaka ena nega dokona? Baibel be “tanobada dokona” ia herevalaia.—Mataio 24:3.
Hari inai nega ai idia bada noho hekwakwanaidia ese ia hahedinaraia inai nega ena dokona ia kahirakahira, anina be kara dikadia bona idia karaia taudia edia dokona danu. (Mataio 24:3-14; 2 Timoteo 3:1-5; Apokalupo 12:7-12) Daudau lasi Dirava be kara ta do ia karaia bona hari inai nega ena hekwakwanai ibounai do ia haorea vaitani.—Ieremia 25:31-33; Apokalupo 19:11-21.
INAI TANOBADA ENA TOMADIHO OREADIA IDIA HEGEREGERE LASI
Inai tanobada ena tomadiho oreadia ese inai nega ena hekwakwanai idia haoredia lasi to ma haida idia havaraia. Tuari lalodiai Katolik be Katolik idia alaia, Protestan be Protestan idia alaia—milioni momo idia alaia heheni. Vanegai, Katolik taudia momo idia noho tanona, Rwanda ai, taunimanima tausen momo herea be sibodia idia alaia heheni! (Foto itaia)
Iesu be ipidi eiava kaia amo do ia tuari bona iena murinai idia raka taudia do ia alaia badina idia be iena bese taudia lasi, a? Lasi momokani! Baibel ia gwau, “Dirava ia lalokau henia tauna ese iena tadikakana danu do ia lalokau henia.” (1 Ioane 4:20, 21) Inai tanobada ena tomadiho oreadia be unai idia karaia lasi. “Idia gwau Dirava idia diba, to edia kara dekena amo idia ese Dirava idia negea.”—Tito 1:16.
Danu, Baibel ena taravatu, mauri ena goeva karadia dekenai, be idia badinaia momokani lasi, unai amo tanobada ibounai dekenai, goeva karana ena dika idia habadaia.
Iesu ia gwau, tomadiho koikoi be “edia huahua,” edia orea taudia idia karaia karadia unai, amo do umui dibaia. Bona ma ia gwau: “Au ibounai huahua namona idia havaraia lasi gaudia be do idia utua, lahi dekenai do idia negea.” (Mataio 7:15-20) Dirava ena Hereva ese ita ia hagania, huahua dikana ia havaraia bona unai dainai do idia hadikaia ore tomadihona amo ita heau siri.—Apokalupo 18:4.
Tomadiho Momokani Ia Hegeregere
Tomadiho momokani “ena huahua be ia namo,” bona namo hereana be lalokau. (Mataio 7:17; Ioane 13:34, 35) Edena Keristani tadikaka oreana mai edia lalo-tamona, tanobada hegegemadai ai, be unai bamona lalokau idia hahedinaraia? Daidia ese edia tomadiho taudia, eiava ma taunimanima idaudia danu alaia karana idia dadaraia vaitani?—1 Ioane 3:10-12.
Taunimanima be idia diba Iehova ena Witness taudia be unai huahua namona idia hahedinaraia badabada. Tanobada hegegemadai, tano 230 bona ma haida ai, ‘edia tuari kaia be idia makohia bona tano geia auri idia karaia.’ (Isaia 2:4) Iesu ena hahegani, tanobada ibounai dekenai “Sivarai Namona” harorolaia haheganina, idia badinaia amo idia hahedinaraia taunimanima idia lalokau henia. (Mataio 24:14) Idia ese Baibel ena taravatu mauri ena goeva karadia dekenai idia badinaia bona ena namo idia gwauraia hedinarai.—1 Korinto 6:9-11.
Tomadiho momokani ia hegeregere. Ia ese taunimanima be edia hekwakwanai hanamoa Tauna dekenai ia hakaudia lao. Kahirakahira unai Tauna ese tanobada matamata do ia havaraia. Unai Tauna be daika? (Rau ginigabena itaia.)
HEKWAKWANAI LASI PARADAISONA BE DO IA VARA
Bema oi be taunimanima idia abia hekwakwanai ibounai oi hanamoa diba, do oi hanamoa, a? Oibe, do oi karaia! Mai ena lalokau ida ita ia Havaraia Tauna, taunimanima edia hekwakwanai hanamoa siahuna bona aonegana ia dogoatao Tauna tamona, be unai do ia karaia diba lasi, a?
Baibel ese ia hahedinaraia Dirava be ena guba gavamani, Iesu ese ia lohiaia gauna, amo taunimanima edia dala do ia hamaoromaoroa. Tanobada ena mataganigani gavamanidia do ia “hamakohia.” (Daniela 2:44; Mataio 6:9, 10) Dahaka dainai? Salamo torea tauna be Dirava ia hereva henia neganai, inai haere ia henia: “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”—Salamo 83:18.
Inai tanobada ia ore neganai, haida do idia roho mauri, eiava? Baibel ia gwau, “Tanobada . . . be kahirakahira do ia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:17) Unai roho mauri taudia be edeseni do idia noho hanaihanai? Baibel be haere ia henia, ia gwau, “Kara maoromaoro taudia ese, Dirava ia henidia tano dekenai do idia noho ela bona hanaihanai.”—Salamo 37:9-11, 29; Aonega Herevadia 2:21, 22.
Dirava ena tanobada matamatana ai, “mase bona lalohisihisi, bona taitai, bona hisihisi be do idia ore momokani.” (Apokalupo 21:4) Taravatu utua karadia, ogogami, hitolo, gorere, taitai, eiava mase do idia ore! Mase taudia do idia mauri lou! Mase taudia dohore idia toreisi lou.” (Kara 24:15) Bona tanobada be paradaiso ai do ia lao momokani.—Isaia 35:1, 2; Luka 23:43.
Dirava ena tanobada matamatana ai do ita moale totona, dahaka ita karaia be namo? Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Kudou-namo taudia milioni momo tanobada ibounai dekenai be unai diba idia abia noho. Unai dainai, hari edia hekwakwanai idia haheaukalaidia diba. To mai anina bada gauna be, idia daradara lasi momokani, idia hamaoromaoroa diba lasi hekwakwanaidia be Dirava ena tanobada matamatana lalonai do idia namo vaitani.
[Picture Credit Line on page 2]
WHO photo by P. Almasy
[Picture Credit Line on page 3]
Jerden Bouman/Sipa Press