Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w96 9/15 rau 3-7
  • Tomadiho Iboudiai ese Dirava Idia Hamoalea, A?

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Tomadiho Iboudiai ese Dirava Idia Hamoalea, A?
  • 1996 Gima Kohorona Iehova Ena Basileia Ia Harorolaia
  • Sinado maragidia
  • Inai Bamona Atikol
  • Edia Huahua amo Idia Diba
  • Naria Namonamo
  • Edia Huahua Oi Tahua Namonamo
  • Kara Ena Nega
  • Dirava Ia Abia Dae Tomadiho Dalana
    Baibel be Dahaka ia Hadibaia?
  • Tomadiho Koikoi be Kahirakahira Do Ia Ore!
    Hereva ta, Tanobada Ibounai Totona Tomadiho Koikoi be Kahirakahira Do Ia Ore!
  • Tomadiho Maorona Oi Davaria Vadaeni A?
    1994 Gima Kohorona Iehova Ena Basileia Ia Harorolaia
  • Oi emu Tomadiho be mai Anina Bada
    Mauri Hanaihanai Paradaiso Lalonai
Ma Haida Itaia
1996 Gima Kohorona Iehova Ena Basileia Ia Harorolaia
w96 9/15 rau 3-7

Tomadiho Iboudiai ese Dirava Idia Hamoalea, A?

Oi laloa tomadiho iboudiai ese Dirava idia hamoalea, a? Reana oi diba tomadiho iboudiai ese dala haida ai, taunimanima idia hagoadaia idia kara namo totona. To unai sibona ia hegeregere Dirava hamoalea totona, a?

HAIDA idia gwau, ‘Mai emu momokani ida oi tomadiho henia, bona Dirava do ia moale. Tomadiho ibounai idia namo.’ Hegeregere, Bahai Faith tomadihona ese unai lalohadai dainai tanobada tomadiho badadia 9 ia abia dae ena hahediba herevadia lalonai. Unai tomadiho oreana ia laloa unai tomadiho iboudiai be Dirava amo bona idia be hereva momokani ena kahana idauidau. Unai ia maoro diba, a?

Ma danu, inai be mai maoro ida oi nanadaia: Tomadiho ese Dirava ia hamoalea diba, bema ena memba taudia ia hagania taunimanima idia loaloa gabudia dekenai nerve gas do idia atoa, momo idia hamasea totona. Tomadiho oreana ta, Japan ai, be unai bamona kara dainai idia samania. Eiava, Dirava ese tomadiho ta ia moalelaia, bema ia dainai ena memba taudia ese sibona idia hamasea, a? Lagani haida gunanai, tomadiho gunalaia tauna Jim Jones idia badinaia taudia dekenai unai ia vara.

Nega gunadia ita laloa neganai, ita henanadai diba, Tomadiho ese Dirava idia hamoalea bema tuari idia havaraia, hegeregere lagani 1618 ia lao 1648 lalonai, Lagani 30 Tuarina dekenai ia vara bamona, a? Buka ta ladana The Universal History of the World ia gwau, unai Katolik taudia bona Protestan taudia edia tomadiho tuarina “ena dika ese Europe besedia edia tuari momo herea edia dika ia hanaia.”

Lagani 1096 ia lao 1270 lalonai, tomadiho Kruseid tuaridia dainai rara bada idia bubua. Hegeregere, Kruseid ginigunana lalonai, idia gwauraia Keristani kruseid taudia ese Jerusalem dekenai idia noho Muslim bona Iuda taudia idia hamasea ore.

Inkwisisen lalonai dahaka ia vara, mani oi laloa danu, ia be lagani 1229 ai ia matamaia bona ena daudau be lagani 600 bamona. Tomadiho gunalaia taudia edia oda amo taunimanima tausen momo idia hahisia bada herea, bona lahi dekenai idia araia mase. Ena buka Vicars of Christ​—The Dark Side of the Papacy lalonai, Peter De Rosa ia gwau: “Pope ena ladanai, [inkwisisen taudia] ese taunimanima idia dagedage henia bona edia lalona idia hadikaia. Guna, taunimanima idia noho negana ibounai lalonai, unai bamona kara dikadia idia vara lasi.” De Rosa ese Spain lalonai ia noho Dominica inkwisisen tauna Torquemada ia herevalaia: “Lagani 1483 ai iena dagi idia henia, bena lagani 15 lalonai ia lohia mai dagedage bada ida. Ia hamasea taudia edia namba be 114,000 ma haida bona idia edia amo 10,220 be lahi lalonai idia araia.”

To momokani, Kerisendom ena tomadiho oreadia sibona lasi ese rara idia bubua. Ena toretore Pensées lalonai, French aonega tauna Blaise Pascal ia gwau: “Taunimanima be tomadiho lalohadai dainai dika idia karaia neganai, edia kara idia hagugurua vaitani bona mai moale ida idia karaia, gau ma ta dainai unai bamona ia vara lasi.”

Edia Huahua amo Idia Diba

Dirava ese tomadiho ia abia dae be gau tamona dainai lasi. Ia ese tomadiho ia abia dae totona, namona be unai tomadiho ena hadibaia herevadia bona ena kara idauidau be ena Hereva momokani, Baibel hegeregerena. (Salamo 119:160; Ioane 17:17) Dirava ese ia lalo-namo henia tomadihona ese ia havaraia huahua be Iehova Dirava ena mauri taravatudia hegeregerena be gau badana.

Ororo dekenai ia haroro neganai, Iesu Keriso ese ia hahedinaraia peroveta taudia do idia koikoi idia gwau idia be Dirava ena gaukara idia karaia. Iesu ia gwau: “Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona. Edia huahua dekena amo do umui diba idia be namo o dika. Au ginigini ese vain ena anina ia atoa lasi, bona ava ginigini be fig huahua ena anina ia atoa lasi. Oibe, bona au namona ena huahua be ia namo, to au dikana ena huahua be ia dika. Au namona ese huahua dika ia havaraia diba lasi, bona au dikana ese huahua namo ia havaraia diba lasi. Au ibounai huahua namona idia havaraia lasi gaudia be do idia utua, lahi dekenai do idia negea. Unai dainai peroveta koikoi taudia edia kara dekena amo idia do umui diba.” (Mataio 7:15-20) Unai hereva ese ia hahedinaraia lauma dalanai ita noga noho be namo. Reana ita laloa Dirava bona Keriso ese tomadiho gunalaia tauna ta eiava tomadiho oreana ta idia abia dae, to ita kerere diba.

Naria Namonamo

Ena be tomadiho ta ia gwau Dirava ese ia lalo-namo henia bona ena haroro taudia ese Baibel ena siri haida idia duahia, to unai ese ia hamomokania lasi Dirava ese ia moalelaia. Reana ena gunalaia taudia ese hoa karadia idia karaia bona unai dainai toana be Dirava ese idia ia gaukaralaia. To reana ia be do tomadiho koikoi, Dirava ese ia abia dae huahua ia havaraia lasi. Aigupito ena meamea haroro taudia ese hoa karadia idia karaia diba, to Dirava ena lalo-namo idia abia lasi momokani.​—Esodo 7:​8-​22.

Hari inai negai be guna bamona, tomadiho momo be taunimanima edia lalohadai bona hahediba herevadia idia abia isi, Dirava ia gwauraia hereva momokani idia badinaia lasi. Unai dainai inai Baibel ena sisiba be mai anina bada: “Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taunimanima edia kara, bona tanobada idia gunalaia lauma dikadia dekena amo idia mai, Keriso dekena amo lasi.”​—Kolose 2:8.

Huahua namona bona huahua dikana ia herevalaia murinai, Iesu ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai. Unai Dirava ena Kota Dina ia ginidae neganai, taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua, bona oiemu ladana dekenai hoa kara momo ai karaia, ani?’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ”​—Mataio 7:21-23.

Edia Huahua Oi Tahua Namonamo

Unai dainai, gau badana be tomadiho ta ese ia havaraia huahua ita laloa guna, bena gabeai do ita diba Dirava ese unai tomadiho ia abia dae, eiava lasi. Hegeregere, unai tomadiho be politikol karadia lalonai ia vareai, a? Bema unai bamona, Iamesi 4:4 ai idia torea herevana oi itaia: “Bema umui ura tanobada danu umui turana karaia neganai, inai be umui ese Dirava umui tuari henia noho?” Ma danu, Iesu be ia murinai idia raka momokani taudia ia gwauraia: “Idia be tanobada ena lasi, lau hegeregerena, lau be tanobada ena lasi.” (Ioane 17:16) Dirava ena matana ai tomadiho maorona be inai tanobada ena politikol karadia lalonai ia vareai lasi, badina ita itaia diba lasi lauma aneruna, Satani Diabolo, “ese tanobada taudia ibounai ia gunalaia noho.” (1 Ioane 5:19) To idau, Dirava ia lalo-namo henia tomadihona ese Iesu Keriso henunai ia noho Dirava ena Basileia ia badinaia bona unai guba gavamani ena sivarai namona ia harorolaia.​—Mareko 13:10.

Dirava ese gavamani gwau-edeede karana ia durua tomadihona ia abia dae, a? Haere ita davaria haraga bema Paulo ena sisiba ita badinaia: “Oiemu taudia do oi hadibaia lou, idia ese gavana bona gavamani ena siahu taudia do idia kamonai henia. Edia oda hereva do idia badinaia, bona do idia naria hegaegae kara namodia ibounai do idia karaia totona.” (Tito 3:1) Momokani, Iesu ia hahedinaraia ena murinai idia raka taudia ese ‘Kaisara ena gaudia idia henia Kaisara dekenai, Dirava ena gaudia idia henia Dirava dekenai.’​—Mareko 12:17.

Reana tomadiho ta ese taunimanima ia hagoadaia tanobada besedia edia tuari lalonai idia vareai totona. Petero Ginigunana 3:​11 ese ita ia hagoadaia ‘maino do ita tahua’ bona ‘maino ena dala do ita badinaia noho.’ Tomadiho ta ese edena bamona Dirava ia hamoalea diba bema ena memba taudia edia lalona idia hegeregere, tano ma ta dekenai idia noho tomadiho tamona taudia be tuari lalonai do idia hamasea? Dirava ena lalo-namo ia abia tomadihona ena memba taudia ese iena kara badana​—lalokau​—idia hahedinaraia. Bona Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Unai lalokau be tanobada besedia edia tuari ese idia habadaia dagedage badu karana amo ia idau vaitani.

Tomadiho momokani ese tuari taudia be maino ura henia taudia ai ia halaoa. Inai hereva ese unai ia perovetalaia: “Idia ese edia tuari kaia be hama dekenai do idia makohia, bona unai makohia auri dekena amo, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.” (Isaia 2:4) Idia ese badu herevadia idia gwauraia lasi, to tomadiho momokani idia badinaia taudia ese inai oda idia kamonai henia: “Oiemu badibadinai tauna dekenai oi lalokau henia, oi sibona oi lalokau henia bamona.”—Mataio 22:39.

Tomadiho momokani idia badinaia taudia idia hekwarahi bada Iehova Dirava ena mauri taravatudia idia badinaia totona, matabodaga mauri dalana idia dadaraia. Dirava ena Hereva ia gwau: “Umui diba lasi, a, kara dika taudia be Dirava ena Basileia do idia davaria lasi? Umui sibona do umui koia lasi: Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia. O henaoa taudia, mataganigani taudia, kekero taudia, edia hereva dekenai haida idia hadikaia taudia, o haida edia gau idia dadia taudia. Inai bamona taudia ta lasi be Dirava ena Basileia do ia davaria diba. Umui haida be guna unai bamona umui karaia. To Dirava ese umui emui kara dika ia huria goeva vadaeni, ia ese helaga taudia umui ia halaoa vadaeni. Bona hari Dirava ena vairana dekenai umui be maoromaoro, Lohiabada Iesu Keriso dainai, bona Dirava ena Lauma dainai.”—1 Korinto 6:9-11.

Kara Ena Nega

Gau badana be tomadiho koikoi bona tomadiho momokani edia idau ita diba. Baibel ena Apokalupo bukana lalonai ia ese tanobada tomadiho basileiana ia gwauraia “Babulonia badana,” ariara hahinena ena laulau, bona “tanobada ena king ese ia danu matabodaga karadia idia karaia.” Ia be rara ia bubua bada bona ena imana dekenai golo kapusi ia dogoatao, ia “be iena matabodaga gau dika rohorohodia bona gau mirodia dekenai ia honu.” (Apokalupo 17:1-6) Ia dekenai Dirava ia abia dae gauna ta ia noho lasi.

Hari be kara ena nega. Iseda lalokau Havaraia Tauna ese Babulonia Badana lalonai idia do noho lalo-maoro taudia dekenai ia boiboi: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!”—Apokalupo 18:4.

Bema oi ura Dirava ia hamoalea tomadihona oi badinaia, namona be Iehova ena Witness taudia do oi diba namonamo. Ia noho lista ese edia hadibaia herevadia bona edia hamomokania Baibel siridia. Namona be oiemu Baibel amo oi tahua bona do oi itaia, bema Witness taudia edia hadibaia herevadia be Dirava ena Hereva hegeregerena, eiava. Namona be oi tahua edia tomadiho ese tomadiho momokani ia havaraia huahuana ia havaraia, eiava. Bema do oi davaria unai bamona ia karaia, oi be Dirava ia hamoalea tomadihona oi davaria unai.

[Box on page 5]

IEHOVA ENA WITNESS TAUDIA EDIA HADIBAIA HEREVADIA

HADIBAIA HEREVA BAIBEL SIRI

Dirava ena ladana be Iehova Esodo 6:3; Salamo 83:18

Baibel be Dirava ena Hereva Ioane 17:17; 2 Timoteo 3:​ 16, 17

Iesu Keriso be Dirava Mataio 3:​16, 17; Ioane 14:28

ena Natuna

Taunimanima be evolusen amo Genese 1:​27; 2:7

idia vara lasi to Dirava

ese ia havaraia

Taunimanima be tau ginigunana Roma 5:​12

ena kara dika dainai idia mase

Soul be mase dekenai ia ore Hadibaia Tauna 9:​5, 10; Esekiela 18:4

Hel be taunimanima iboudiai Iobu 14:13; Apokalupo 20:13

edia mase gabuna

Mase taudia edia helaro be Ioane 5:​28, 29; 11:25; Kara toreisi lou 24:15

Keriso ese iena tanobada Mataio 20:28; 1 Petero 2:​ maurina ia henia kamonai taudia 24;1 Ioane 2:​1, 2

edia mauri davana karaia totona

Keriso amo Iehova sibona ita Mataio 6:9; Ioane 14:​6, 13, guriguri henia 14

Baibel ena kara maoromaoro 1 Korinto 6:​9, 10

taravatudia ita badinaia be

gau badana

Tomadiho karadia lalonai Esodo 20:​4-6; 1 Korinto 10:14

kaivakuku ita gaukaralaia lasi

Meamea do ita dadaraia Deuteronomi 18:10-​12; Galatia 5:​19-​21

Tauanina lalonai rara ita Genese 9:​3, 4; Kara 15:28, 29

abia lasi

Iesu murinai idia raka momokani Ioane 15:19; 17:16; Iamesi 1:​ taudia be tanobada amo idia gini 27; 4:4

siri

Keristani taudia be sivarai Isaia 43:10-​12; Mataio 24:14; namona idia harorolaia 28:19, 20

Ranu lalonai bapatiso ita abia Mareko 1:​9, 10; Ioane 3:​22; be Dirava dekenai iseda mauri Kara 19:​4, 5

ita gwauhamatalaia ena toana

Tomadiho dagi ladadia Mataio 23:​8-​12

gaukaralaia karana be Baibel

ena hereva hegeregerena lasi

Ita be “dokona negana” ai ita Daniela 12:4; Mataio 24:​3-​14; noho 2 Timoteo 3:​1-5

Keriso be ita itaia diba Mataio 24:3; Ioane 14:19;

lasi dalanai ia giroa mai 1 Petero 3:​18

Satani be inai tanobada ena Ioane 12:31; 1 Ioane 5:​19

ita itaia diba lasi lohiana

Dirava ese hari tanobada dikana Daniela 2:​44; Apokalupo

do ia hadikaia ore 16:14, 16; 18:​1-8

Dirava ena Basileia Keriso Isaia 9:​6, 7; Daniela 7:​13,

henunai ese kara maoromaoro ai 14; Mataio 6:​10

tanobada do ia lohiaia

“Orea maragi” ese Keriso ida Luka 12:32; Apokalupo 14:​1-4; guba dekenai do idia lohia 20:4

Dirava ese ia lalo-namo henia Luka 23:43; Ioane 3:​16;

taudia oredia be mauri Apokalupo 21:​1-4

hanaihanai do idia abia

paradaiso tanobadana ai

[Picture on page 4]

Inkwisisen lalonai taunimanima tausen momo idia hamasea

[Picture on page 6]

Kruseid lalodiai rara bada idia bubua

[Picture on page 7]

Tomadiho momokanina be ena huahua namona amo do ita diba

    Hiri Motu Pablikeisen (1987-2025)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia