Kahana 10
Dirava ese Ia Inai Henia Karadia
Dirava ese ia gwauraia dika karadia be edena bamona oi laloa be namo? (1)
Edena bamona mahuta hebou karadia be maoro lasi? (2)
Keristani tauna ese inai kara be edena bamona ia laloa be namo: koikoi? (3) laki gadara? (3) henaohenao? (3) dagedage? (4) babalau? (5) inuinu kekero? (6)
Unai bamona kara edia igui lalona amo ta be edena bamona ia siri diba? (7)
1. Dirava ena hesiai taudia ese namo gaudia idia ura henia. To namona be dika gaudia inai henia karana idia manadalaia danu. (Salamo 97:10) Anina be Dirava ese ia inai henia karadia idia dadaraia. Unai kara haida be dahaka?
2. Heudahanai Bona Sihari Kava: Headava do lasi neganai mahuta hebou, heudahanai, animal ida mahuta hebou, ruma bese lalonai mahuta hebou, bona tatau be tatau ida bona hahine be hahine ida idia mahuta hebou karadia be Dirava kara dika henia karadia badadia. (Levitiko 18:6; Roma 1:26, 27; 1 Korinto 6:9, 10) Bema taunimanima rua be idia headava lasi to idia noho hebou, namona be idia parara o taravatu hegeregerena idia headava.—Heberu 13:4.
3. Koikoi, Laki Gadara, Henaohenao: Iehova Dirava ia koikoi diba lasi. (Tito 1:2) Namona be iena lalo-namo idia ura abia taudia idia koikoi lasi. (Aonega Herevadia 6:16-19; Kolose 3:9, 10) Laki gadara iboudiai lalonai mataganigani ia noho. Unai dainai Keristani taudia be laki gadara idauidau, hegeregere Lotto gadara, hosi dekenai beti atoa, bona bingo lalonai idia vareai lasi. (Efeso 5:3-5) Keristani taudia idia henaohenao lasi danu. Idia be haida ese idia henaoa kohudia idia hoia lasi, eiava gwaumaoro idia do abia lasi neganai gau ta idia abia kava lasi.—Esodo 20:15; Efeso 4:28.
4. Badu Dikadika, Dagedage: Badu biagua lasi karana dainai dagedage karadia idia vara diba. (Genese 4:5-8) Dagedage tauna be Dirava ena turana ai ia lao diba lasi. (Salamo 11:5, NW; Aonega Herevadia 22:24, 25) Ita ia kara dika henia tauna ena davana henia totona, ita kara dika henia be maoro lasi.—Aonega Herevadia 24:29; Roma 12:17-21.
5. Meamea Bona Babalau: Taunimanima haida be lauma edia siahu idia noia gorere idia hanamoa totona. Haida be meamea herevadia idia gwauraia edia inai taudia dekenai, idia hagoreredia eiava hamasedia totona. Unai kara be Satani ese ia havaradia. Unai dainai namona be Keristani taudia be unai kara ta lalonai idia vareai lasi. (Deuteronomi 18:9-13) Haida ese ita dekenai idia gwauraia meamea herevadia edia siahu koua dalana hereadaena be Iehova kahirakahira ai ita noho.—Aonega Herevadia 18:10.
6. Inuinu Kekero: Uaina, bia, eiava unai bamona inuinu gaudia sisina ita inua be kerere lasi. (Salamo 104:15; 1 Timoteo 5:23) To Iehova ena matana ai inuinu momo bona inuinu kekero be kerere. (1 Korinto 5:11-13; 1 Timoteo 3:8) Inuinu momo karana ese emu tauanina ia hadikaia diba bona emu ruma bese ia hadikaia diba. Oi ia hamanokaia diba bena hedibagani ma haida lalonai do oi moru.—Aonega Herevadia 23:20, 21, 29-35.
7. Dirava ese ia gwauraia dika karadia idia badinaia taudia be “Dirava ena Basileia dekenai do idia vareai diba lasi.” (Galatia 5:19-21) Bema Dirava oi lalokau henia momokani, unai kara edia igui amo do oi siri diba. (1 Ioane 5:3) Dirava ese ia gwauraia dika gaudia inai henia karana oi manadalaia. (Roma 12:9) Kara namodia idia karaia taudia oi bamoa. (Aonega Herevadia 13:20) Keristani taudia goadadia edia hebamo ese oi ia durua diba. (Iamesi 5:14) Kara hereadaena be guriguri amo Dirava ena heduru dekenai oi tabekau.—Filipi 4:6, 7, 13.
[Pictures on page 20, 21]
Dirava be inuinu kekero, henaohenao, laki gadara, bona dagedage karadia ia inai henia