Kahana 11
Dirava Idia Hamoalea Lasi Hahediba Herevadia Bona Kastom Karadia
Edena bamona hahediba herevadia bona kastom karadia be kerere? (1)
Keristani taudia do idia abia dae Dirava be Toi Tamona Diravana ta, a? (2)
Dahaka dainai Keristani taudia ese Kerisimasi, Ista, bona vara dinadia idia hahelagaia lasi? (3, 4)
Mase taudia ese mauri taudia idia hadikaia diba, a? (5) Iesu be korosi ta ai ia mase, a? (6) Dirava hamoalea be mai anina bada, a? (7)
1. Hahediba herevadia bona kastom karadia ibounai lasi be idia dika. To bema idia be tomadiho koikoi amo eiava Baibel ena hereva hegeregerena lasi, Dirava ese ia abidia dae lasi.—Mataio 15:6.
2. Toi Tamona Herevana: Iehova be Toi Tamona Diravana ta, a? Lasi! Iehova, Tamana unai, be “Dirava momokani tamona.” (Ioane 17:3; Mareko 12:29) Iesu be Iena vara guna Natuna, bona Iena henunai ia noho. (1 Korinto 11:3) Tamana ese iena Natuna ia hereaia. (Ioane 14:28) Lauma helaga be dirava ta lasi; ia be Dirava ena gaukara siahuna.—Genese 1:2; Kara 2:18.
3. Kerisimasi Bona Ista: Iesu be December 25 ai ia vara lasi. Ia be October 1 bamona ai ia vara, mamoe naria taudia be hanuaboi ai murimuri dekenai edia seri idia naria negana ta ai. (Luka 2:8-12) Iesu be Keristani taudia ia hagania lasi iena vara dinana do idia hahelagaia. Lasi, to ia hamaorodia iena mase idia laloatao. (Luka 22:19, 20) Kerisimasi bona ena kara idauidau be tomadiho koikoi gunadia amo idia mai. Ista karadia, hegeregere gatoi bona rabiti gaukaralaia danu be unai bamona. Keristani ginigunadia be Kerisimasi eiava Ista idia hahelagaia lasi; Keristani momokanidia hari inai negai danu ese idia hahelagaia lasi.
4. Vara dinadia: Baibel ese ia herevalaia vara dinadia moalelaia karadia rua sibona be Iehova idia tomadiho henia lasi taudia ese idia karaia. (Genese 40:20-22; Mareko 6:21, 22, 24-27) Keristani taudia ginigunadia be vara dinadia idia moalelaia lasi. Vara dinadia moalelaia karana be tomadiho koikoi gunadia edia amo ia mai. Keristani taudia korikori be lagani lalonai ma dina haida dekenai harihari gaudia idia henia bona idia moale hebou.
5. Mase Taudia Gari Henia: Mase taudia be gau ta idia karaia eiava mamia diba lasi. Ita durudia diba lasi bona ita idia hadikaia diba lasi. (Salamo 146:4; Hadibaia Tauna 9:5, 10) Soul ia mase diba; mase murinai ia mauri noho lasi. (Esekiela 18:4, NW) To nega haida aneru dikadia, edia ladana be demoni, idia koikoi bena taunimanima idia laloa idia be mase taudia edia lauma. Mase taudia gari henia eiava tomadiho henia karadia iboudiai be kerere.—Isaia 8:19.
6. Korosi: Iesu be korosi dekenai ia mase lasi. Ia be au ta ai ia mase. Greek herevana, Baibel momo ai idia hahanaia “korosi,” ena anina be au tamona sibona. Korosi ena toana be tomadiho koikoi gunadia amo ia mai. Korosi be Keristani ginigunadia ese idia gaukaralaia lasi eiava tomadiho henia lasi. Vadaeni, oi laloa tomadiho lalonai korosi ita gaukaralaia be maoro, a?—Deuteronomi 7:26; 1 Korinto 10:14.
7. Reana unai hahediba herevadia bona kastom karadia haida oi rakatania be auka herea. Reana emu varavara bona turadia ese emu lalona idia ania, oi abia dae lalohadaidia oi haidaua lasi totona. To Dirava hamoalea karana be mai anina bada, taunimanima hamoalea karana ena namo ia hereaia.—Aonega Herevadia 29:25; Mataio 10:36, 37.
[Picture on page 22]
Dirava be Toi Tamona Diravana lasi
[Picture on page 23]
Kerisimasi bona Ista be tomadiho koikoi gunadia amo idia mai
[Picture on page 23]
Mase taudia gari henia eiava tomadiho henia be badina lasi