Kamonai Taudia Itaia

EDA matana ese lalohadai bona hemami idia hahedinaraia. Reana hoa bona gari idia hahedinaraia. Hebogahisi bona lalokau idia hahedinaraia diba. Nega haida, reana daradara eiava lalohisihisi idia hahedinaraia danu. Tau burukana ta ese ena tano taudia, hisihisi bada idia haheaukalaia taudia, ia herevalaia neganai, ia gwau: “Ai be emai matana amo ai herevahereva.”

Ma haida ese ita itaia noho gauna hegeregerena ita bona ita herevalaia gaudia idia laloa. Mauri daladia momo ai, taunimanima ese edia matana idia itaia taudia idia abidadama henia be auka lasi. To, ia hereva henia tauna ia itaia lasi to ena aena eiava gau ma ta ia itaia tauna ena kara momokani eiava ena diba idia daradaralaia. Bese ma haida lalodiai, matana itaia noho karana be kara namona lasi, to ia be dagedage bona heai henia karana bamona. Bona tau ta be hahine ta eiava hahine ta be tau ta ia hereva henia, eiava hanua lohiana eiava ladana bada tauna ma ta ia hereva henia neganai, unai mamina ia goada. Bona gabu ma haida ai, bema tau matamata ese lagani bada tauna ta ia hereva henia lalonai ena matana ia itaia, unai be hemataurai lasi karana.

To, ia hegeregere gabudia dekenai, ta dekenai mai anina bada herevana oi gwauraia neganai ena matana oi itaia karana ese emu hereva ena anina ia habadaia. Reana hereva henia tauna ena abidadama ia hahedinaraia. Iesu ena hahediba taudia idia hoa bada bona idia gwau, “Be, daika be mauri do ia davaria?” neganai, Iesu ena kara oi laloa. Baibel ia gwau: “Idia dekenai ia itaia, ia gwau, ‘Taunimanima ese do idia karaia diba lasi, to Dirava ese gau ibounai be ia karaia diba.’” (Mat. 19:​25, 26) Danu, Baibel ese ia hahedinaraia aposetolo Paulo ese kamonai taudia edia kara toana ia itaia namonamo. Nega ta Paulo ia hereva neganai, ena vara negana amo ia raka diba lasi tauna ta be unuseniai ia noho. Kara 14:​9, 10 ia gwau: “Inai tau ese Paulo ena hereva ia kamonai. Bona Paulo ese ia itaia noho, ma ia diba inai tau ena abidadama be hegeregere dainai, ia hanamoa diba. Vadaeni, Paulo ia hereva goada, ia gwau, ‘Oi toreisi, oi gini maoromaoro oiemu aena dekenai.’”

Haroro Gaukara Lalonai Oi Karaia Diba Gaudia. Haroro gaukara lalonai, mai lalo-moale ida taunimanima oi hereva henia. Bema hegeregere, umui ruaosi umui laloa bada gauna ta dekenai henanadai ta oi henia, hereva oi hamatamaia totona. Unai oi karaia neganai, ena matana oi itaia​—⁠eiava hemataurai dalana namona ai iena vairana oi itaia. Ena matana ese lalona ena moale idia hahedinaraia tauna ena kiri toana dainai ia idia ura henia. Unai ese kamonai tauna dekenai emu kara korikorina ia hahedinaraia, bona umui herevahereva lalonai ena lalona ia namo.

Ia hegeregere gabudia dekenai, ta ena matana ese idia hahedinaraia lalohadai oi itaia neganai, reana dahaka oi karaia be namo do oi itaia. Do oi itaia diba, unai tauna ia badu eiava ia ura lasi. Reana oi itaia, emu hereva ia lalo-pararalaia lasi. Nega momo oi itaia diba, bema ia ura oi karaharaga. Bona bema ia ura kamonai, do ia hedinarai danu. Reana ena matana ese idia hahedinaraia gaudia dainai oi diba namona be emu hereva oi haharagaia, dala oi karaia herevahereva lalonai ia vareai totona, emu hereva oi haorea, eiava oi hereva noho bona Baibel stadi dalana oi hahedinaraia.

Herevana oi haroro eiava Baibel stadi oi karaia, mai emu hemataurai ida oi hereva henia tauna ena matana oi itaia danu. To, namo lasi ia oi raraia daudau, badina unai ese hemarai ia havaraia diba. (2 Kin. 8:11) To oiemu kara hegeregerena, mai lalo-moale ida iena vairana oi itaia loulou. Tano momo dekenai, unai ese ia hahedinaraia mai momokani ida ia oi laloa bada. To momokani, Baibel eiava buka ma ta oi duahia neganai, emu matana be idia printaia gauna do idia itaia noho. To reana hereva ta ena anina oi ura habadaia dainai, nega sisina unai tauna do oi itaia. Bema nega ta ta ia oi itaia, iena lalohadai oi duahia gauna dekenai do oi itaia.

Bema oi hemarai dainai matamanai ta ena matana oi itaia be auka, oi hesiku lasi. Oi tohoa loulou neganai, ta ena matana oi itaia karana maorona do oi manadalaia, bona ma haida ida oi herevahereva karana ese ia havaraia anina namona do ia bada.

Pablik Tok Oi Henia Neganai. Baibel ia gwau Iesu ese ena Haroro Herevana Badana ia do hamatamaia lasi neganai, “iena diba tahua taudia dekenai ia itaia.” (Luka 6:20) Iena haheitalai amo diba oi abia. Bema hutuma vairanai oi hereva gwauraia, idia oi itaia bona sekeni haida oi naria bena oi hereva matamaia. Gabu momo dekenai unai oi karaia neganai, kamonai taudia haida edia matana oi itaia danu. Unai bamona oi naria sisina dainai, reana emu gari ia boio. Bona kamonai taudia ia durua emu vairana ese ia hahedinaraia lalohadai eiava hemami hegeregerena do idia laloa. Danu, unai ese kamonai taudia dekenai nega ia henia, idia helai namonamo bona emu hereva idia kamonai namonamo totona.

Emu hereva lalonai, kamonai taudia oi itaia. Hutuma sibona oi itaia lasi. Hutuma lalonai idia noho taunimanima ta ta oi itaia toho. Kahirakahira bese iboudiai dekenai, taunimanima idia laloa hereva henia tauna ese kamonai taudia edia matana ia itaia danu be namo.

Kamonai taudia oi itaia be kahana ta amo kahana ta dekenai emu matana oi negea karana sibona lasi. Mai hemataurai ida kamonai tauna ta ena matana oi itaia, bona bema ia hegeregere, sentens ta be ia dekenai oi gwauraia. Bena ma ta oi itaia, bona ia dekenai sentens ta eiava rua oi gwauraia. Nega daudau ta oi raraia lasi, ia hemarai garina, bona kamonai taudia ibounai amo haida sibona oi itaia lasi. Unai dala ai kamonai tauna ta murinai ma ta oi itaia, bona ta oi hereva henia neganai ena hemami oi itaia murinai ma ta oi itaia.

Namona be emu nouti be podium latanai, eiava emu Baibel lalonai idia noho, emu matana sibona oi hamarerea karana amo idia oi itaia diba totona. Bema emu nouti itaia totona emu kwarana ibounai oi atoa diho, unai ese kamonai taudia itaia karana ia hadikaia. Namona be nega hida bona edena negai emu nouti oi itaia karana oi laloa. Bema emu hereva ena anina bada kahana ta oi herevalaia neganai emu nouti oi itaia, kamonai taudia edia hemami be do oi itaia lasi bona emu hereva ena siahu do ia maragi. Unai hegeregerena, bema hanaihanai emu nouti oi itaia, kamonai taudia do oi itaia namonamo lasi.

Ta dekenai bolo oi negea neganai, do oi itaia bema ia gobea eiava. Emu hereva lalonai lalohadai ta ta be kamonai taudia dekenai oi “negea” gauna ta bamona. Edia kara​—⁠edia kwarana idia hamarerea, idia kiri, oi idia itaia namonamo​—⁠amo ia hedinarai bema unai idia “gobea” eiava. Kamonai taudia oi itaia namonamo karana amo oi diba bema emu lalohadai idia “gobea” eiava lasi.

Kongregesen dekenai oi duahiduahi lalonai, kamonai taudia oi itaia toho be namo, a? Bema kamonai taudia ese edia Baibel amo oi duahia kahana idia itaia noho, idia momo be do idia itaia lasi idia oi itaia eiava. To idia oi itaia karana ese emu duahiduahi ia hamauria bamona, badina edia hemami oi itaia. Bona bema kamonai tauna ta ese ena Baibel ia itaia lasi bona gau ma ta ia laloa, ia duahiduahi tauna ese ia itaia neganai reana ia duahia gauna do ia laloa lou. To momokani, nega sisina sibona idia oi itaia diba, bona namo lasi unai oi karaia dainai oi duahia kahana oi haboioa. Unai dainai, namona be emu imana dekenai Baibel oi dogoatao bona emu kwarana oi abia isi noho, emu aukina be kemena dekenai ia noho be namo lasi.

Nega haida, elda taudia be hebouhebou dekenai maniuskrip amo hereva idia henia totona. Unai idia karaia namonamo totona, idia manada, idia hegaegae namonamo, bona idia karaia loulou be namo. Momokani, maniuskrip idia gaukaralaia dainai kamonai taudia idia itaia momo lasi. To bema hereva henia tauna ia hegaegae namonamo, nega ta ta ai kamonai taudia ia itaia diba bona ia duahia kahana do ia haboioa lasi. Unai ia karaia dainai, kamonai taudia do idia kamonai noho bona ia gwauraia anina bada hadibaia herevadia amo namo idia davaria.