Ruma Tauna Ena Vairana Toana Itaia Karana amo Idia Oi Laloa Bada
1 Dala ai eiava ruma-ta-ruma-ta ai ita haroro neganai, taunimanima ita do hereva henidia lasi neganai, edia vairana toana ita itaia guna. Unai nega ai, edia vairana toana amo ita itaia diba bema idia ura iseda hereva idia kamonai eiava lasi. Unai hegeregerena, idia danu be iseda toana amo gau momo idia dibaia diba. Hahine ta be Witnes ta ena vadivadi ia herevalaia neganai, ia gwau: “Ena kiri toana amo lau laloatao gauna be ena lalomaino. Unai ese egu lalona ia veria.” Unai amo dala ia kehoa, unai hahine ese sivarai namona ia kamonai totona.
2 Dala gaukara eiava taunimanima idia noho gabudia dekenai ita haroro neganai, taunimanima edia vairana toana ita itaia be namo, unai ese dala ia kehoa idia ita haroro henia totona. Tadikaka ta be ia vairanai idia mai taudia edia vairana toana ia itaia. Ia kiri henidia bena magasin ia hahedinaraia. Unai dala ia gaukaralaia dainai, taunimanima idauidau ia hereva henia bona buka momo ia hariharilaia.
3 Ma Haida Edia Hemami Laloa: Taunimanima edia vairana toana amo edia hemami ita dibaia diba. Hegeregere, bema ta be iseda hereva ia lalopararalaia lasi eiava ia abia dae lasi, nega momo ena vairana toana amo unai do ia hedinarai. Bema ia bisi eiava ia hesiku, unai danu be ena vairana toana amo ita itaia diba. Vadaeni, namona be iseda kiki herevana ita haidaua eiava ita hakwadogia. Bema ma haida edia hemami ita laloa, ita hahedinaraia idia ita laloa bada.
4 Mai Momokani Ida: Gabu haida ai, bema ta ena matana ita itaia bona ia ita hereva henia, ia hahedinaraia unai tauna ita laloa bada. Iesu ena hahediba taudia be ia idia nanadaia: “Be, daika be mauri do ia davaria?” Iesu ena haere dalana mani ita itaia, ia gwau: “Iesu ese idia dekenai ia itaia, ia gwau, ‘Taunimanima ese do idia karaia diba lasi, to Dirava ese gau ibounai be ia karaia diba.’ ” (Mat. 19:25, 26) Oibe, Iesu be idia ia itaia bona ia hereva henidia neganai, ia hahedinaraia mai momokani ida ia hereva. Unai hegeregerena, bema taunimanima edia vairana toana ita itaia, unai ese ita do ia durua mai momokani ida Basileia ena sivarai ita gwauraia totona.—2 Kor. 2:17; 1 Tes. 1:5.