Iehova Ena Lohia Siahuna Abia Isi Karana Laloa
“Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”—SAL. 83:18.
1, 2. (a) Taunimanima ibounai dekenai dahaka be mai anina bada? (b) Dahaka dainai Iehova ena lohia siahuna ita abia isi be mai anina bada?
HARI inai negai, taunimanima momo be moni idia laloa bada. Idia ura bada moni momo idia haboua eiava idia dekenai ia noho moni idia dogoatao. Ma haida be edia famili, helt, eiava idia ura hagugurua gaudia idia laloa bada.
2 To, mai anina bada gauna be ita ura Iehova ena lohia siahuna ita abia isi. Namona be ita naria namonamo, dika unai ita laloa maragi. Unai be edena bamona ia vara diba? Reana dina ta ta ai ita karaia gaudia dekenai ita bisi bada eiava sibona iseda hekwakwanai ita laloa momo dainai, Dirava ena lohia siahuna abia isi karana ita laloa maragi. To, bema ita ura dikadika Iehova ena lohia siahuna ita abia isi, iseda mauri ai ita davaria hekwakwanai ita hanaidia diba, bona Iehova kahirakahira do ita lao.
DAHAKA DAINAI IA BE MAI ANINA BADA?
3. Dirava ena lohia dalana dainai, Satani be dahaka ia gwau?
3 Satani Diabolo ese ena kara amo Iehova ena lohia siahuna ena maoro ia hepapahuahulaia. Ia gwau Dirava ena lohia dalana be dika bona taunimanima amo gau namodia ia hunia. Danu ia gwau, taunimanima be sibodia idia lohiaia neganai, do idia moale. (Gen. 3:1-5) Ma danu, ia gwau taunimanima ta be Dirava ia badinaia noho diba lasi. Bema mauri ia auka momokani, idia ese Iehova ena lohia dalana do idia dadaraia. (Iobu 2:4, 5) Unai dainai Iehova ese nega ia henia, unai amo taunimanima dekenai idia vara gaudia amo do ia hamomokania, Iena lohia dalana sibona be maoro.
4. Dahaka dainai Iehova ena lohia siahuna dainai ia vara hepapahuahuna idia hamaoromaoroa be namo?
4 Iehova ia diba Diabolo ena samania herevadia be koikoi. Vadaeni dahaka dainai Dirava ese Satani dekenai nega ia henia iena hereva ia hamomokania totona? Badina guba bona tanobada taudia dekenai unai be mai anina bada. (Salamo 83:18 duahia.) Tau bona hahine ginigunana ese Iehova ena lohia dalana idia dadaraia, bona unai nega amo momo be unai idia karaia danu. Unai dainai reana taunimanima haida do idia laloa Diabolo ena hereva be momokani. Oibe, idaunegai ia vara hepapahuahuna be idia do hamaoromaoroa lasi dainai, maino bona lalotamona be lasi. To Iehova ese ena lohia siahuna ena maoro ia hamomokania murinai, taunimanima ibounai be iena lohia dalana namona henunai do idia noho ela bona hanaihanai. Iunives ibounai dekenai maino do ia noho.—Efe. 1:9, 10.
5. Edena dala ai Dirava ena lohia siahuna dainai ia vara hepapahuahuana ita durua diba?
5 Dirava ena lohia siahuna be do idia abia isi, bona Satani bona taunimanima edia lohia dalana be do ia moru. Oibe, Dirava be iena Mesia Basileiana amo do ia lohia, bona abidadama taudia ese do idia hamomokania, taunimanima be Dirava ena lohia dalana idia badinaia diba. (Isa. 45:23, 24) Oi ura Iehova ena lohia dalana idia abia isi abidadama taudia huanai oi noho, a? Oibe! Iseda abidadama ia goada noho totona, namona be Iehova ena lohia siahuna ita abia isi, unai be mai anina bada.
LOHIA SIAHUNA ABIA ISI KARANA—HAHEMAURI KARANA IA HEREAIA
6. Iehova ena lohia siahuna abia isi karana be mai anina bada, a?
6 Matamanai ita herevalaia bamona, Iehova ena lohia siahuna abia isi karana be mai anina bada. Unai ese siboda eda ura ia hereaia momokani. Unai ena anina be iseda hahemauri karana be gau badana lasi eiava Iehova be ita ia laloa bada lasi, a? Lasi! Dahaka dainai?
7, 8. Iehova ena lohia siahuna abia isi karana ena namo be dahaka?
7 Iehova be taunimanima ibounai ia lalokau henia bona ia laloa bada. Unai dainai iena Natuna ia henia, unai amo mauri hanaihanai ita abia diba. (Ioa. 3:16; 1 Ioa. 4:9) Bema Iehova ese ena gwauhamata idauidau ia hagugurua lasi, Diabolo do ia gwau Dirava be koikoi tauna, taunimanima amo gau namodia ia hunia, bona ena lohia dalana be dika. Danu, gwau-edeede taudia be mai hevaseha ida do idia gwau: “Ia gwauhamata do ia mai bona noho, to ia be edeseni? Emai sene taudia be mase lalonai idia mahuta negana amo ema bona hari, gau ta ia idau lasi, Dirava ese gau ibounai ia havaraia negana hegeregerena.” (2 Pet. 3:3, 4) To, Iehova ese iena lohia siahuna ia abia isi negana ai, kamonai taudia ibounai be hahemauri do idia abia! (Isaia 55:10, 11 duahia.) Danu, Iehova be mai lalokau ida do ia lohia. Unai dainai ita abia dae momokani, ia ese ena abidadama hesiai taudia do ia lalokau henia bona laloa bada.—Eso. 34:6.
8 Momokani, Iehova ena lohia siahuna abia isi karana be mai anina bada, to namo lasi ita laloa ia ese iseda hahemauri karana ia laloa maragi. To unai ese ita ia durua Iehova ena lohia siahuna bona iseda hahemauri karana ita lalohadailaia namonamo totona. Unai be mai anina bada, bema ita ura Iehova ena kara maoromaoro lohia dalana ita durua.
IOBU ESE ENA LALOHADAI IA HAIDAUA DALANA
9. Satani be Iobu dainai dahaka ia gwau? (Laulau ginigunana herevalaia.)
9 Lalohadai maorona ita abia ena badina be Iobu bukana ese ia hahedinaraia namonamo, unai Baibel bukana be idia torea buka ginigunana. Unai buka ai, Satani ia gwau bema Iobu be hisihisi badana ia abia, ia ese Dirava do ia dadaraia. Danu, Satani ese Dirava ia hamaoroa Iobu do ia hahisia. To, Iehova be unai ia karaia lasi, ia ese Satani dekenai maoro ia henia Iobu ia hahisia totona, ia gwau: “Iena gau ibounai be oiemu imana dekenai lau atoa.” (Iobu 1:7-12 duahia.) Daudau lasi, Iobu ena hesiai taudia, ena natudia, bona ena animal ibounai idia mase. Satani be unai ia karaia unai amo Iobu ia laloa Dirava ese ia dekenai unai dika ia havaraia. (Iobu 1:13-19) Gabeai, ia ese gorere dika hereana amo Iobu ia hahisia. (Iobu 2:7) Danu, Iobu ena adavana bona tura koikoidia toi ese ia hahisia herevadia idia gwauraia neganai, iena lalona ia hisihisi bada.—Iobu 2:9; 3:11; 16:2.
10. (a) Iobu ese edena dala ai ia hahedinaraia ia be Dirava ia badinaia? (b) Dahaka dainai Dirava ese ena lalohadai ia hamaoromaoroa?
10 Dahaka ia vara? Iobu ese Dirava ia dadaraia lasi, unai amo ia hahedinaraia Satani ena hereva be koikoi. (Iobu 27:5) To, Iobu be lalohadai maorona ia abia lasi. Ia ese sibona ena kara ia gwauraia maoromaoro, bona ia davaria hisihisi ena badina ia henanadailaia danu. (Iobu 7:20; 13:24) Reana Iobu ena hemami ita lalopararalaia. To Dirava ese iena lalohadai ia hamaoromaoroa. Iehova be ia dekenai dahaka ia gwau?
11, 12. Edena dala ai Iehova ese Iobu ia durua, bona Iobu be dahaka ia karaia?
11 Dirava ese Iobu dekenai ia gwauraia herevadia be Iobu bukana ena karoa ibounai 4 lalonai idia noho, unai be karoa 38 ia lao 41 ai. To unai karoa lalodiai, Dirava ese Iobu dekenai ena hisihisi ena badina ia gwauraia lasi. Iehova be unai badina dainai Iobu ia hereva henia lasi, badina bema unai ia karaia, unai be hegeregere ia ura sibona ena kara ena maoro ia hamomokania. To Iehova ia ura Iobu ia durua, unai amo do ia laloparara Dirava be taunimanima ibounai ia hereaia. Bona Iobu ia durua unai amo ia dekenai ia vara gauna do ia laloa sibona lasi, to mai anina bada gauna do ia laloa. (Iobu 38:18-21 duahia.) Oibe, Iehova ena hereva ese Iobu ia durua lalohadai maorona ia abia totona.
12 Iobu be hahetoho badana ia haheaukalaia murinai, Iehova ese unai sisiba ia henia. Unai ese ia hahedinaraia Iehova be kara auka Diravana, a? Lasi, bona Iobu be unai bamona ia laloa lasi. Ena be Iobu ese unai hisihisi badana ia davaria, to ia ese Dirava ia hanamoa. Ia gwau: “Egu hereva gaudia ibounai dainai, lau be lau hemarai, bona harihari tano kahu, bona lahi kahu danu dekenai, lauegu lalona lau giroa momokani inai.” Iehova ese ia henia sisiba namona dainai Iobu be unai hereva ia gwauraia. (Iobu 42:1-6) Tau matamatana Elihu ese Iobu ia sisiba henia danu. (Iobu 32:5-10) Iobu ese Dirava ena sisiba ia abia dae bona ena lalohadai ia hamaoromaoroa murinai, Iehova ia hahedinaraia ia be Iobu ena abidadama karana dainai ia moale.—Iobu 42:7, 8.
13. Iobu ena hahetoho murinai, Iehova ena sisiba amo dahaka namo ia davaria?
13 Ena be Iobu be hahetoho ma haida ia davaria lasi, to Iehova ena sisiba amo namo ia davaria. Edena dala ai? “Lohiabada ese Iobu ena mauri ma ia hanamoa lou bada. Iena gorere ia ore murinai, iena noho be namo bada, to iena noho gunana be namo bada lasi.” Gabeai ia ese “natuna ma haida ia abia, ia be memero 7, bona kekeni toi edia tamana.” (Iobu 42:12-14) Momokani, Iobu be Satani ese ia hamasea natudia ia reaia bada. Bona nega sisina lalonai, ia dekenai idia vara gaudia be reana ia laloa lou. Ena be Iobu ese ia davaria hisihisina ena badina ia lalopararalaia sisina, to reana nega haida ia laloa dahaka dainai ia dekenai unai hisihisi idia vara. Iobu be unai bamona lalohadai ia abia neganai, ia ese Dirava ena sisiba ia laloa be namo. Bema unai ia karaia, lalohadai maorona do ia abia bona unai ese ia do ia hagoadaia.—Sal. 94:19.ftn.
Iseda hekwakwanai do ita laloa lasi, to Iehova ena lohia siahuna abia isi karana do ita laloa, a? (Paragraf 14 itaia)
14. Iobu ena sivarai amo dahaka ita dibaia?
14 Iobu ena sivarai amo, ita danu be lalohadai maorona ita abia diba bona unai ese ita do ia hagoadaia. Iehova ese Iobu bukana ia gimaia “ita hadibaia totona. . . . Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.” (Roma 15:4) Unai amo dahaka ita dibaia? Namo lasi sibona iseda mauri dekenai idia vara gaudia ita laloa bada dainai, Iehova ena lohia siahuna abia isi karana ita laloaboio. Iobu hegeregerena, iseda mauri ia auka neganai, namona be iseda abidadama ia goada noho, unai amo do ita hahedinaraia ita ura Iehova ena lohia siahuna ita abia isi.
15. Hahetoho negadiai ita haheauka neganai, dahaka namo ia vara?
15 Dahaka dainai iseda abidadama ita laloa dobu be gau badana? Badina ita davaria hahetoho idauidau be mai edia badina. Namo lasi ita laloa ita be hahetoho ita davaria badina Iehova be ita dekenai ia moale lasi. To, ita davaria hahetoho ese dala idia kehoa Dirava ena lohia siahuna ita abia isi totona. (Aon. 27:11) Ita haheauka neganai, ‘Dirava ia moale’ bona unai ese iseda abidadama ia hagoadaia. (Roma 5:3-5 duahia.) Iobu ena sivarai ese ia hahedinaraia “Iehova be lalokau bada bona hebogahisi Diravana.” (Iam. 5:11) Unai dainai bema Iehova ena lohia siahuna ita abia isi, ia ese ita dekenai davana namona do ia henia. Unai ita diba dainai ‘do ita hesiku lasi bona do ita moale.’—Kol. 1:11.
MAI ANINA BADA GAUNA LALOA NOHO
16. Dahaka dainai ita laloatao Iehova ena lohia siahuna abia isi karana be mai anina bada?
16 Momokani, Iehova ena lohia siahuna abia isi karana sibona ita laloa noho be mai ena hekwarahi. Nega haida iseda hekwakwanai ese ita idia hametaua diba. Bona hekwakwanai maragidia be hekwakwanai badadia ai do ita halaoa. Unai dainai nega aukadia ita davaria neganai, namona be nega ibounai ita laloatao Dirava ena lohia siahuna abia isi karana be mai anina bada.
17. Iehova ena gaukara dekenai ita bisi karana ese edena dala ai ita ia durua diba?
17 Iehova ena gaukara dekenai ita bisi bada neganai, mai anina bada gauna ita laloa noho diba. Hegeregere, taihu Renee be stroke gorerena ia abia, bona nega momo hisihisi bada ia mamia bona kensa gorerena ia abia danu. Hospital dekenai ia noho neganai, unuseniai idia gaukara taudia, gorere taudia ma haida, bona idia vadivadi taudia ia haroro henia. Nega ta Renee be wiki rua mai kahana hospital ai ia noho neganai, hora 80 lalonai ia haroro. Ena be Renee ia diba do ia mase, to ia ese Iehova ena lohia siahuna abia isi karana ia laloaboio lasi. Bona unai ese ia dekenai lalomaino ia henia.
18. Iehova ena lohia siahuna abia isi karana dekenai, Jennifer ena ekspiriens amo dahaka ita dibaia?
18 Ena be dina ta ta ai hekwakwanai idauidau ita davaria, to Iehova ena lohia siahuna abia isi karana ita laloa noho be mai anina bada. Taihu Jennifer be iena hanua dekenai ia lao totona, dina toi airport dekenai ia naria. Ia ura guia peleini ibounai idia lao diba lasi. Jennifer ia hesiku bada bona ia mamia ia be sibona ia noho. Unai dainai ia sibona ia hebogahisi henia matamaia diba. To Jennifer be unai ia laloa lasi, ia ese guriguri amo Iehova ena heduru ia noia, unai amo airport ai idia naria taudia dekenai sivarai namona ia harorolaia diba. Unai dainai dahaka ia vara? Taunimanima momo ia haroro henia bona pablikeisen momo ia hariharilaia. Ia gwau: “Ena be unai hekwakwanai lau davaria, to lau mamia Iehova ese lau ia hanamoa bona lau dekenai goada ia henia, unai amo iena ladana be dala maorona ai lau gwauraia hedinarai diba.” Oibe, ia ese Iehova ena ura ia laloa bada.
19. Iehova ena taunimanima ese iena lohia siahuna abia isi karana be edena bamona idia laloa?
19 Iehova ena taunimanima idia diba Iehova ena lohia siahuna abia isi karana be mai anina bada, unai dainai idia be tomadiho koikoi amo idia idau. Ita ese tomadiho momokani ita durua dainai, namona be ita ta ta ese Iehova ena lohia siahuna ita abia isi noho.
20. Ita ura bada Iehova ena lohia siahuna ita abia isi dainai, Iehova be edena bamona ia laloa?
20 Iehova ia diba ita ibounai ita ura bada iena lohia siahuna ita abia isi, unai dainai ia ita hesiai henia bona hahetoho idauidau ita haheaukalaia. (Sal. 18:25) Stadi gabena ai, ita ese Iehova ena lohia siahuna ita abia isi ena badina bona unai ita karaia dalana do ita herevalaia.