Oi Totona Unai be Gaukara Hereadaena, A?

BEMA oi be bapatiso Keristani ta, Dirava lalokau henia karana ese oi ia doria iena ura oi karaia totona. Danu, hesiai gaukara be oiemu gaukara korikorina ai oi halaoa be namo. Badina Iesu Keriso ese ia murinai idia raka taudia ibounai dekenai oda ia henia, hahediba taudia halaoa gaukarana do idia karaia. (Mataio 28:​19, 20) Oibe, hari sibona emu mauri durua gaudia abia totona, reana moni gaukara oi karaia. To oi be Iesu murinai oi raka bona Iehova ena Witnes tauna ta dainai, gau ginigunana bona gau badana ta be oi be Keristani haroro tauna​​—⁠bona oiemu mauri lalonai Basileia harorolaia gaukarana oi atoa guna.​​—⁠Mataio 24:⁠14.

Reana mauri lagani 20 oi do abia lasi eiava oiemu mauri lagani be 20 bamona. Reana, oiemu mauri lalonai do oi karaia gaukarana be oi lalohadailaia vadaeni. Do oi karaia gauna oi laloa neganai, reana mai anina bada gauna be unai gaukara do oi moalelaia diba.

Denmark ai, Jørgen ese ia abia hidi dalana mani ita laloa. Jørgen ia gwau, “ia be mauri dalana namona, badina mai anina bada gaukarana do oi laloa guna diba.” Greece ai, mauri lagani 31 hahinena, Eva, ia gwau: “Lauegu turadia ida lauegu mauri lau hahegeregerea neganai, lauegu mauri bona gaukara be mai anina bada, bona lau moalelaia.” Edena bamona mauri dalana ese unai bamona moale ia havaraia? Edena dala ai unai bamona mauri do oi abia?

Dirava ese Unai Dala Ia Hahedinaraia, A?

Do oi karaia hanaihanai gaukara ta oi abia hidi be reana ia auka. Momokani, reana haida idia ura do idia karaia gaukarana be Dirava ese idia dekenai do ia hahedinaraia.

Mose be Midiana dekenai ia noho neganai, Iehova ese ia hamaoroa Aigupito dekenai do ia giroa lou bona Israel taudia be igui hesiai gaukara amo do ia hakaudia. (Esodo 3:​1-10) Dirava ena aneru be Gideona dekenai ia hedinarai, bona Israela taudia be hisihisi amo do ia hamauridia gaukarana ia abia. (Gunalaia Taudia 6:​11-14) Davida be mamoe ia naria neganai, Dirava ese Samuela ia hamaoroa Davida do ia horoa bona Israel ena king ai do ia lao. (1 Samuela 16:​1-13) Hari inai negai, ita be unai bamona daladia dekena amo ita ia hakaua lasi. Namona be unai gaudia ita laloa namonamo bona Dirava ese ia henia diba ena gaukaralaia dalana namona ita abia hidi.

Iehova ese hari inai negai Keristani matamata taudia totona, gaukara dekenai ia lao henia “iduara badana” ia kehoa. (1 Korinto 16:⁠9) Edena dala ai? Idia hanaia lagani 10 lalonai, tanobada ibounai ena Basileia harorolaia taudia be 2,125,000 amo ia bada daekau 6,000,000 mai kahana dekenai. Daidia ese Baibel, buka, buklet, magasin, bona pepapepa milioni momo idia karaia, lauma dalanai taunimanima idia durua bona tanobada ibounai dekenai sivarai namona idia harorolaia totona? Tanobada ibounai lalonai idia noho Betele famili taudia ese unai hahenamo idia moalelaia.

Mauri Namona

Betele ena anina be “Dirava ena Ruma,” bona Betele rumadia be Watch Tower Society ena hedikwota bona ena brens opesi dekenai volantia gaukara idia karaia Keristani taudia edia noho gabuna. (Genese 28:19) Hari inai negai Betele famili be idia heau namonamo bona ‘laloa kehoa dekenai edia ruma idia haginia’ bona Iehova ena lalokau dekenai idia haginia ruma besedia ida ita hahegeregerea.​​—⁠Aonega Herevadia 24:⁠3.

Betele dekenai ia noho ruma bese bamona hemamina be edena bamona idia herevalaia? Estonia Betele famili dekenai ia noho mauri lagani 25 taihuna ta ia gwau: “Nega ibounai Iehova ena turadia huanai lau noho mamina lau moalelaia. Betele ai, unai be mai anina bada gauna lau dekenai.”​​—⁠Salamo 15:​1, 2.

Tanobada ibounai dekenai, hari taunimanima 19,500 ese Betele gaukara ena hahenamo idia moalelaia. (Salamo 110:⁠3) United States ai, Betele dekenai idia noho taudia 46 pesen edia mauri laganidia be 19 ia lao 29 huanai. Isaia bamona, idia gwau: “Lau be inai, do lau lao! Lau do oi siaia!” (Isaia 6:⁠8) Isaia​​—⁠Iehova dekenai iena mauri ia gwauhamata henia vadaeni tauna​​—⁠be gaukara ma haida karaia totona ia volantia. Unai ena anina be gau namodia haida do ia dadaraia. Betele gaukara idia karaia taudia be edia ruma bona edia gabu, bona sinadia, tamadia, tadikaka, taihu, bona turadia idia rakatania danu. “Sivarai Namona” dainai unai gaudia be mai edia ura ida idia dadaraia.​​—⁠Mareko 10:​29, 30.

Betele dekenai lauma dalanai hahenamo idia abia! Russia Betele famili ena taihu matamata ta ia gwau: “Siboda eda ura ita dadaraia amo, gau momo do ita dibaia bona ita do idia durua tanobada matamatana dekenai do ita noho totona. Lau gwau diba Iehova ia henia hahenamo idauidau ese lau dadaraia gaudia ia hereaia momokani.”​​—⁠Malaki 3:⁠10.

Betele Maurina

Betele maurina be edena bamona? Betele famili taudia be mai laloa tamona ida idia gwau Betele maurina be idia ia hanamoa, edia ura gaudia ia henia, bona idia ia hamoalea. Jens, ena mauri lagani be 43 tauna, be Betele gaukara ia moalelaia. Dahaka dainai? Ia gwau: “Badina ai mamia ai be ma haida danu ai hekwarahi bada mai anina bada gaukarana ai karaia totona. Iehova ena gaukara ena bada bona ena anina lau mamia diba.”

Monday ia lao Saturday ai, Betele gaukara be daba tomadiho hebouna amo idia hamatamaia. Baibel idia herevalaia, bona ia manada vadaeni elda ta ese ia gunalaia. Monday adorahi ai, famili be hora ta lalonai Baibel idia stadilaia Gima Kohorona ena heduru amo, bena nega haida, unai murinai Betele famili ia durua herevana ta, Baibel ena sinado ta amo, idia abia.

Ta be Betele dekenai ia lao neganai, dahaka ia vara? Betele taudia matamatadia be Betele maurina idia dibaia totona, idia lo tadikaka ese hereva haida, Betele gaukara idauidau idia gwauraia hedinarai herevadia unai, idia henia. Lagani ginigunana ena pura haida lalonai, Betele famili tauna matamatana be ena diba Baibel dekenai ia habadaia totona, pura ta ta ai sikuli do ia abia. Idia vareai taudia matamatadia ese Baibel duahiduahi program idauna ta idia moalelaia. Famili taudia matamatadia be edia Betele gaukara laganina ginigunana lalonai, Baibel ibounai idia duahia.

Unai hadibaia gaukara ibounai ena namo be dahaka? Hong Kong Betele famili dekenai ia noho mauri lagani 33 tauna, Joshua, ia gwau: “Betele ese lauegu laloa bada karana Iehova dekenai ia hagoadaia momokani. Kahirakahira edia mauri ibounai lalonai Iehova idia hesiai henia bona idia manada vadaeni tadikakadia lau bamoa diba. Lau ese lauma gaudia edia program lau moalelaia, hegeregere daba tomadiho hebouna bona famili Gima Kohorona Stadi. Ma danu, lau be kohu be bada lasi mauri dalana namona lau ura henia. Unai ese lalo-hekwarahi kava karana amo lau ia hakaua siri. Lau ese danu Keristani dalanai gau hamaoromaoroa dalana lau dibaia, bona hanaihanai namo ia havaraia.”

Betele famili taudia be edia nega bada bona goada be edia volantia gaukarana dekenai idia haorea. Unai be, Betele dekenai idia abia gaukarana do idia naria totona edia tauanina ena goada bona edia diba do idia gaukaralaia. Gau badadia idauidau idia karaia. Haida be printa masini idia gaukaralaia eiava buka karaia gabuna dekenai idia gaukara, bona idia karaia buka be kongregesen momo dekenai idia siaia lao. Haida be kisini, aniani gabuna, eiava dabua idia huria gabuna dekenai idia gaukara. Gaukara ma haida be hagoevaia gaukara, uma naria gaukara, konstraksen gaukara, bona ma haida. Haida be unai dipatmen edia kohu naria maduna idia abia. Haida be gorere durua gaukarana eiava opesi gaukara idia karaia. Betele gaukara ibounai be mai edia hekwarahi to moale bada idia havaraia. Betele dekenai idia karaia gaukara be gaukara taudia ia hamoalea badina Basileia gaukara ia durua bona Dirava idia lalokau henia dainai idia karaia.

Betele famili taudia idia siaia kongregesen idauidau dekenai bona unuseniai edia gaukara ena namo idia mamia. Idia ese kongregesen heboudia lao henia karana bona haroro gaukara idia moalelaia. Unai dainai, Betele famili taudia bona edia kongregesen lalonai idia noho tadikaka bona taihu huanai lalokau goadana ia noho.​​—⁠Mareko 10:​29, 30.

Britain Betele famili lalonai ia noho taihu ta, Rita, ia gwau: “Kongregesen lau tanikiu henia bada! Hebou dekenai lau noho bona haroro gaukara lau karaia neganai, lau lalokau henia tadikaka, taihu, natudia, bona burukadia lau itaia bona egu abidadama ia hagoadaia! Herevana dahaka ia vara, to idia be unuseniai idia noho. Unai ese lau ia durua egu Betele gaukara lau goadalaia noho totona.”

Betele maurina ibounai be gaukara, hebou, haroro gaukara bona stadi sibodia lasi. Famili be laga-ani negadia danu idia moalelaia. Nega ta ta ai, “Famili Negana” program idia moalelaia, bona tauanina dalanai bona lauma dalanai idia ia hagoadaia. Unai nega ese dala ia kehoa momo ese edia diba idauidau idia hahedinaraia bona Betele ai idia gaukara taudia edia hagoadaia sivaraidia do idia dibaia totona. Vadivadi heheni karana namona ese moale bona namo ia havaraia danu. Moale karadia karaia gabudia haida idia abia, bona sibona edia duahiduahi bona stadi karana totona laiberi idia noho. Bona aniani teibolo dekenai herevahereva namonamo karana be mai anina bada gauna danu.

Estonia Betele famili tauna, Tom, ia gwau: “Blok ta Betele amo be davara, bona kahirakahira be au mai hairaidia idia gini, unuseniai lau bona egu adavana be raka loaloa kwadogina ai moalelaia. Nega haida lau be kongregesen bona Betele turadia ida golf, hoki, bona tenis gadara ai karaia danu. Bona siahu negana ai, aiemai baisikele amo ai loaloa.”

Oi Hegeregere Totona, Dahaka Do Oi Karaia?

Momokani, Betele dekenai lo Keristani taudia ese Iehova dekenai gaukara helagana idia henia bona tanobada ibounai dekenai edia abidadama tamona taudia totona idia gaukara. Betele famili ai idia lao taudia be taravatu haida idia badinaia be namo. Dahaka oi karaia be namo, bena do oi hegeregere Betele gaukara karaia totona?

Timoteo, aposetolo Paulo ida ia gaukara hebou tauna hegeregerena, Betele gaukara totona idia abia dae taudia be kongregesen dekenai idia be haheitalai namodia. (1 Timoteo 1:⁠1) Tadikaka “ibounai Lusitera bona Ikonio dekenai, idia gwau Timoteo be tau namona.” (Kara 16:⁠2) Ena be ia matamata, to Timoteo be Baibel bona hereva momokani ia diba namonamo. (2 Timoteo 3:​14, 15) Unai hegeregerena, Betele gaukara totona idia abia dae taudia be Baibel diba idia abia vadaeni taudia.

Betele famili taudia be sibodia edia ura dadaraia karana idia hahedinaraia be namo. Timoteo be sibona ena ura ia dadaraia bona mai ena ura ida Basileia ia atoa guna karana ia hahedinaraia goevagoeva dainai, Paulo ia gwau: “Lau dekenai ta ia noho lasi Timoteo hegeregerena, iena laloa bona lauegu laloa be tamona. Bona ia ura bada umui do ia durua. Badina be ibounai ese sibona edia gau idia tahua, to Iesu Keriso ena gau idia tahua lasi. To umui be Timoteo ena kara namona umui diba. Mero ese iena tamana ia durua bamona, ia ese lau ia durua vadaeni. Sivarai Namona dainai ai ruaosi ai gaukara hebou vadaeni.”​—⁠Filipi 2:​20-22.

Betele gaukara totona, lauma dalanai idia goada tatau bona hahine sibona idia hegeregere. Betele famili taudia be Baibel stadilaia, hebou lao henia bona haroro gaukara karaia hanaihanai, bona lo Keristani taudia edia hebamo amo lauma dalanai do idia tubu noho totona, Betele ese gau haida idia karaia. Unai amo Betele ai idia noho taudia idia durua Paulo ena sisiba idia badinaia totona: “Ia [Iesu Keriso] ida umui raka tamona noho, ia lalonai emui ramuna umui hadihoa bona sibona umui haginia noho bona abidadama dekenai umui marere lasi, umui idia hadibaia vadaeni bamona, tanikiu karana lalonai abidadama amo umui honu momokani.”​—⁠Kolose 2:​6, 7, NW.

Betele gaukara karaia namonamo totona, idia abia dae taudia be tauanina dalanai idia goada bona idia gorere lasi be namo. Bema ai gwauraia gaudia dekenai oi hegeregere, oiemu mauri lagani be 19 eiava 19 amo ia daekau, bona oi bapatiso bona lagani ta eiava ma haida idia ore vadaeni, oi ai hagoadaia Betele gaukara oi laloa.

Ita Ibounai be mai Eda Kahana Ta

Ita be Keristani taudia dainai, ita ibounai ita ura iseda mauri lalonai Basileia gaudia ita atoa guna bona mai eda kudouna ibounai ida Iehova ita hesiai henia. (Mataio 6:33; Kolose 3:23) Ita ese Betele dekenai idia gaukara taudia ita hagoadaia diba edia gaukara helagana do idia karaia noho totona. Bona namona be Betele gaukara totona idia hegeregere matamata tadikaka ita hagoadaia unai gaukara namo hereana idia tahua.

Betele gaukara be lauma dalanai ta ia hamoalea diba mauri dalana ta​​—⁠reana unai be gaukara hereadaena oi totona. Nick dekenai unai be momokani, iena mauri lagani be 20 neganai Betele gaukara ia hamatamaia. Lagani 10 lalonai Betele gaukara ia karaia murinai, ia gwau: “Lau be hanaihanai Iehova ena hebogahisi karana dainai guriguri amo ia lau tanikiu henia. Dahaka gaudia ma haida totona do lau noia? Iniseniai, ai be Iehova idia hesiai henia mai edia goada ibounai ida abidadama Keristani taudia huanai ai noho.”

[Box/Picture on page 22]

ELDA BONA TAMA SINA BE DAHAKA IDIA KARAIA DIBA?

Elda bona loaloa naria taudia ese matamata taudia idia hagoadaia Betele gaukara totona aplikeisen idia siaia be namo. Vanegai, Betele famili ena matamata taudia dekenai henanadai haida idia henia, bona 34 pesen be edia Keristani gunalaia taudia ese idia hagoadaia dainai Betele gaukara idia tahua. Oibe, reana edia kongregesen taudia ese edia gaukara namona do idia reaia. To namona be inai ita laloatao, Lusitera bona Ikonio matamata taudia dekenai Timoteo be hebamo namona, to unai gabu edia elda taudia ese Paulo ida hesiai gaukara do ia karaia totona ia idia koua lasi. Idia gwau lasi Timoteo ese Paulo do ia bamoa neganai, kongregesen amo gau namona ta do ia boio.​—⁠1 Timoteo 4:⁠14.

Unai gauna dekenai, Keristani tama sina ese edia natudia dekenai lalohadai maorodia idia hahedinaraia be namo. Hari ai herevalaia vadaeni tahua karana ai, idia nanadaia taudia 40 pesen idia gwau edia tama sina ese idia hagoadaia Betele gaukarana dekenai idia vareai totona. Betele dekenai lagani haida ia gaukara taihuna ta ia gwau: “Lauegu tamana bona sinana edia Iehova hesiai henia gaukarana ese lau ia hagoadaia Betele gaukara lalonai do lau vareai totona. Edia haheitalai ful-taim haroro gaukarana dekenai lau itaia bona lau diba unai mauri hereadae bona mauri dalana namona do lau abia hidi.”

[Box on page 24]

BETELE GAUKARA IDIA LALOA BADA

“Lauegu gaukara Betele dekenai lau laloa bada. Unai lau moalelaia badina lau diba dina ibounai lalonai Iehova lau hesiai henia bona kerukeru, kerukeru ena murina dinana, bona murina dinadia lalonai unai bamona do lau karaia lou. Unai ese lau dekenai lalona ena hemami namona ia henia bona lalohadai namodia amo egu lalona ia hahonua.”

“Betele dekenai, oiemu nega bona oiemu goada ibounai be Iehova ena hesiai gaukara ai oi henia bona gau ma ta ese emu lalona ia veria lasi. Unai ese moale korikorina ia havaraia. To Iehova ena orea be dala idauna amo do oi itaia danu. Orea dekenai, emu mamina be gaukara badana idia karaia gabuna ai oi noho bona unai ese moale ia havaraia.”

“Betele gaukara be lau dekenai ia vara gauna hereadaena. Iniseniai hadibaia karana be ia doko lasi. Bona hadibaia karana be lau sibona ena namo totona lasi, to Iehova totona. Iniseniai lauegu gaukara be anina lasi gauna ai do ia lao lasi.”

“Betele dekenai lauegu diba lau gaukaralaia amo moale bona maino ena mamina lau abia, badina idia be Iehova bona tadikaka totona lau gaukaralaia.”

“Lauegu gaukara gunana dekenai noho namona bona moale lau davaria lasi. Lagani momo lalonai lau laloa tadikaka bona taihu ida do lau gaukara bona tadikaka bona taihu totona do lau gaukara be namo. Unai dainai Betele dekenai lau mai. Noho namona lau davaria badina lau diba lauegu hekwarahi ibounai be ma haida lauma dalanai do ia hanamoa bona Iehova dekenai moale do ia havaraia.”