Ma Haida ese Ita Idia Hereaia

LAU diba do oi abia dae ma haida ese oi bona lau idia hereaia, eiava edia goada be bada herea. Oi laloa daika ese ita ia hereaia?— Iehova Dirava. Iena Natuna, Hadibaia Tauna Badana be edena bamona? Ia ese ita ia hereaia, a?— Oibe, ia ese ita ia hereaia.

Iesu be guna Dirava ida guba dekenai ia noho. Ia be lauma Natuna, eiava aneru. Dirava ese aneru eiava lauma natudia ma haida ia havaraia, a?— Oibe, idia milioni momo ia havaraia. Unai aneru ese ita idia hereaia bona edia goada be bada herea.​—Heberu 1:7; Daniela 7:​10.

Maria ia hereva henia aneru ena ladana oi laloatao, a?— Ia be Gabriela. Ia ese Maria ia hamaoroa do ia havaraia beibi be Dirava ena Natuna. Dirava ese ena lauma Natuna ena mauri be Maria ena bogana lalonai ia atoa, unai amo Iesu be tanobada dekenai beibi ta bamona ia vara diba.​—Luka 1:​26, 27.

Unai hoa karana oi abia dae, a? Oi abia dae Iesu be guna Dirava ida guba dekenai ia noho, a?— Iesu ia gwau ia be guna guba dekenai ia noho. Iesu be edena dala ai unai bamona gaudia ia dibaia? Ia mero neganai, reana Maria be ia dekenai Gabriela ese ia gwauraia herevana ia hamaoroa. Danu, reana Iosepa ese Iesu ia hamaoroa ena Tamana korikorina be Dirava.

Iesu be bapatiso ia abia neganai, Dirava be guba amo ia hereva, ia gwau: “Inai be lauegu Natuna.” (Mataio 3:​17) Bona ia do mase lasi hanuaboina ai, Iesu ia guriguri, ia gwau: “Egu Tamana e, harihari oiemu hairai dekena amo do oi hanamoa lau dekenai, tanobada do ia vara lasi neganai, oiemu vairana dekenai lau abia hairaina.” (Ioane 17:5) Oibe, Iesu ia noinoi ia ura ia giroa lou Dirava ida guba dekenai do ia noho. Edena dala ai do ia giroa lou?— Bema Dirava ese Iesu be lauma tauna ta, eiava aneru ai ia halaoa lou.

Lau ura oi dekenai mai anina bada henanadai ta lau henia. Aneru ibounai be idia namo, a? Dahaka oi laloa?— Guna idia ibounai be idia namo. Badina Iehova ese idia ia havaraia, bona ia havaraia gaudia ibounai be idia namo. To gabeai aneru ta be aneru dikana ai ia lao. Unai be edena bamona ia vara?

Haere ita abia totona, namona be Dirava ese tau bona hahine ginigunadia, Adamu bona Heva, ia havaraia negana ita laloa. Taunimanima haida idia gwau edia sivarai be gori ta sibona. To Hadibaia Tauna Badana ia diba unai sivarai be momokani.

Dirava ese Adamu bona Heva ia havaraia neganai, ia ese idia be uma gabu mai hairaina ladana Eden dekenai ia atodia. Ia be loaloa gabuna, paradaiso ta. Natudia momo idia havaraia, bese badana ai idia lao bona paradaiso dekenai idia noho hanaihanai diba. To mai anina bada gauna ta idia dibaia be namo. Unai gauna be ita herevalaia vadaeni. Mani ita itaia bema unai gauna ita laloatao.

Iehova ese Adamu bona Heva ia hamaoroa uma gabu dekenai idia noho au ibounai edia huahua idia ania diba. To au tamona ena huahua do idia ania lasi. Bema idia ania, do ia vara gauna be Dirava ese idia dekenai ia gwauraia. Ia gwau: “Do oi mase momokani.” (Genese 2:​17) Unai dainai, Adamu bona Heva be dahaka idia dibaia be namo?—

Kamonai karana idia dibaia be namo. Oibe, edia mauri dekenai Iehova Dirava kamonai henia karana be mai anina bada! Adamu bona Heva idia gwau Ia idia kamonai henia sibona be hegeregere lasi. Namona be idia karaia gaudia amo unai idia hahedinaraia. Bema Dirava idia kamonai henia, idia hahedinaraia Ia idia lalokau henia bona idia ura Ia be edia Lohia Tauna. Bena Paradaiso dekenai idia mauri hanaihanai diba. To bema unai au ena huahua idia ania, unai ese dahaka ia hahedinaraia?—

Unai ese ia hahedinaraia Dirava ese idia dekenai ia henia gaudia idia moalelaia momokani lasi. Bema unuseniai oi noho, Dirava do oi kamonai henia, a?— Matamanai, Adamu bona Heva be unai idia karaia. To gabeai idia ia hereaia tauna ta ese Heva ia koia. Ena lalona ia veria Iehova ia gwau-edeede henia totona. Ia be daika?—

Baibel ia gwau gaigai ta ese Heva ia hereva henia. To oi diba gaigai be idia hereva diba lasi. Unai dainai edena dala ai ia hereva?— Toana be gaigai ia hereva bamona, to momokani unai be aneru ia hereva. Unai aneru be lalohadai kererena ia abia matamaia. Ia ura Adamu bona Heva ese ia do idia tomadiho henia. Ia ura idia ese ia do idia kamonai henia. Ia ura Dirava ena gabu ia abia.

Unai dainai unai aneru dikana ese Heva ena lalona dekenai lalohadai kererena ia atoa. Gaigai amo, Heva ia hamaoroa: ‘Dirava be oi dekenai hereva momokani ia gwauraia lasi. Bema inai au huahua oi ania do oi mase lasi. Dirava hegeregerena do oi aonega.’ Unai gadona ese ia gwauraia herevana do oi abia dae, a?—

Heva be Dirava ese ia dekenai ia henia lasi gauna ia ura henia matamaia. Dirava ese ia taravatua auna ena huahua ia ania. Bena Adamu ia henia. Adamu ese gaigai ena hereva ia abia dae lasi. To ena ura Heva ida ia noho totona be ia bada, to ena lalokau Dirava dekenai be ia bada lasi. Unai dainai au ena huahua ia ania danu.​—Genese 3:​1-6; 1 Timoteo 2:​14.

Unai dainai dahaka ia vara?— Adamu bona Heva be goevadae lasi taudia ai idia lao, idia buruka bona idia mase. Bona idia goevadae lasi dainai, edia natudia ibounai idia goevadae lasi danu bona idia buruka bona idia mase. Dirava ia koikoi lasi! Oibe, idia mauri totona, Dirava idia kamonai henia be gau badana. (Roma 5:​12) Baibel ia gwau Heva ia koia aneruna ena ladana be Satani Diabolo, bona aneru dikadia ai idia lao aneru ma haida idia gwauraia lauma dikadia.​—Iamesi 2:​19; Apokalupo 12:9.

Oi diba dahaka dainai Dirava ese ia havaraia aneru namona be aneru dikana ai ia lao?— Badina gau dikadia ia laloa matamaia. Ia ura Ladana Badana ia abia. Ia diba Dirava ese Adamu bona Heva ia hamaoroa natudia do idia havaraia, bona ia ura idia ibounai ese ia do idia tomadiho henia. Diabolo ia ura taunimanima ibounai ese Iehova idia gwau-edeede henia. Unai dainai ia ura iseda lalona dekenai lalohadai kereredia ia atoa.​—Iamesi 1:​13-​15.

Diabolo ia gwau ta ese Dirava ia lalokau henia lasi. Ia gwau oi bona lau ese Dirava ita lalokau henia lasi bona ita ura lasi Dirava ese ia gwauraia gaudia ita karaia. Ia gwau gau ibounai be iseda ura hegeregerena idia heau namonamo neganai Dirava ita kamonai henia. Diabolo ena hereva be momokani, a? Ita be unai bamona, a?

Hadibaia Tauna Badana ia gwau Diabolo be koikoi tauna! Iesu be Dirava ia kamonai henia, unai amo ia hamomokania Dirava ia lalokau henia momokani. Nega namodia sibona ai Dirava ia kamonai henia lasi. To nega ibounai ia karaia, herevana taunimanima ma haida ese ia idia kara auka henia. Dirava ia abidadama henia ela bona ia mase. Unai dainai Dirava ese ia hamauria lou, do ia mauri hanaihanai totona.

Unai dainai, oi laloa daika be iseda inai henia tauna badana?— Oibe, ia be Satani Diabolo. Ia oi itaia diba, a?— Lasi! To ita diba ia noho bona ia ese ita ia hereaia bona ena siahu be bada. To, daika ese Diabolo ia hereaia?— Iehova Dirava. Unai dainai ita diba Dirava ese ita ia gimaia diba.