Mai Kudouna Ibounai ida Do Umui Gwauatao Heheni

1, 2. Dahaka dainai mai emu kudouna ibounai ida ma haida edia dika gwauatao karana, oi manadalaia be namo?

BAIBEL ese Iehova ena lalohadai kara dika dekenai ia herevalaia. Bona ita ia hadibaia bema ita kara dika, Iehova be dahaka do ia karaia. Baibel ese Iehova be mai ena ura ida eda dika ia gwauatao karana ia herevalaia danu. Vanegai ena stadi ai, Iehova ese Davida bona Manase edia dika ia gwauatao ena badina ita stadilaia. Idia be edia kara dika dainai idia sori bada, Iehova dekenai unai idia gwauraia hedinarai, bona edia lalona idia hadaia unai kara do idia karaia lou lasi. Idia helalo-kerehai momokani dainai, Iehova ese ia lalonamo henidia lou.

² Hari, mai iseda kudouna ibounai ida ma haida edia dika ita gwauatao karana, do ita stadilaia. Bema Manase ena kara dika dainai emu varavara ta ia mase, dahaka do oi karaia? Manase ena dika do oi gwauatao, a? Hari, tanobada ai kara dika, dagedage, bona sibona laloa bada karana be bada. To, dahaka dainai dika gwauatao karana ita manadalaia be namo? Bema oi be ma haida ese idia kara dika henia, dahaka ese oi ia durua diba emu badu oi biagua, Iehova ena ura dalanai oi kara henidia, bona mai emu kudouna ibounai ida edia dika oi gwauatao totona?

DIKA ITA GWAUATAO ENA BADINA

3-5. (a) Ma haida edia dika ita gwauatao ena badina ita lalopararalaia totona, Iesu be edena sivarai ia gwauraia? (b) Unai sivarai amo dahaka point badana ita dibaia?

³ Tadikaka taihu eiava murimuri taudia ese ita idia habadua neganai, mai eda kudouna ibounai ida edia dika ita gwauatao be namo. Unai bamona ita karaia neganai, eda ruma bese, turadia, ma haida bona Iehova ida maino ai do ita noho. Baibel ia hahedinaraia, herevana nega hida haida ese ita idia habadua, to edia dika ita gwauatao be namo. Iesu ese king amo moni bada ia abitorehai hesiai tauna ena sivarai ia herevalaia, bona ita ia durua haida edia dika ita gwauatao ena badina ita lalopararalaia totona.

⁴ Unai hesiai tauna ese ia abitorehai monina be bada herea dainai, ia be dina 60 milioni do ia gaukara unai moni ibounai ia haloua totona. King ese ena abitorehai ia gwauatao, bona ia hamaoroa davana do ia haloua lasi. Unai murinai, hesiai tauna be ia lao bona hesiai tauna ma ta ia davaria. Unai hesiai tauna iharuana be hesiai tauna ginigunana amo moni ia abitorehai, bona dina 100 sibona do ia gaukara unai moni ibounai ia haloua totona. Hesiai tauna ginigunana be dahaka do ia karaia? Ia ura lasi hesiai tauna iharuana ena abitorehai ia gwauatao, to ia hamaoroa ena moni ibounai do ia haloua. Hesiai tauna iharuana ia noinoi, nega sisina do ia henia ena abitorehai ia haloua totona, to hesiai tauna ginigunana ese dibura ruma ai ia atoa. King be hesiai tauna ginigunana dekenai ia badu, ia gwau: “‘Oi lau hebogahisi henia hegeregerena, . . . emu bamona oi hebogahisi henia be namo, ani?’ Unai dainai king be ia badu dikadika bona dibura naria taudia dekenai unai tauna ia henia, bona dibura ai do ia noho ela bona ena abitorehai ibounai ia haloua.”​—⁠Mat. 18:21-34.

⁵ Unai sivarai amo dahaka ita dibaia? Ita dibaia gauna be, Iehova be iseda dika do ia gwauatao lasi, bema mai eda kudouna ibounai ida ma haida edia dika ita gwauatao lasi. (Mat. 18:35) Ita be goevadae lasi taudia dainai nega momo ita kara dika. Bona ita hegeregere lasi Iehova ena taravatu ibounai ita badinaia goevagoeva totona. To, ia be mai ena ura ida eda dika ia gwauatao, bona toana be kerere ta ita karaia lasi bamona. Unai dainai, bema ita ura Iehova ena turana ai ita lao, ma haida edia dika ita gwauatao be namo. Iesu be Ororo Harorona ai unai ia herevalaia, ia gwau: “Bema taunimanima edia dika umui gwauatao, emui guba Tamana ese emui kerere danu do ia gwauatao, to bema taunimanima edia dika umui gwauatao lasi, emui guba Tamana ese emui dika danu do ia gwauatao lasi.”​—⁠Mat. 6:14, 15.

6. Dahaka dainai ma haida edia dika ita gwauatao be mai ena hekwarahi?

⁶ Reana oi abia dae ma haida edia dika ita gwauatao be namo, to danu oi mamia unai ita karaia be mai ena hekwarahi. Badina ita idia habadua neganai, ita badu bona lalohisihisi. Reana ita ura unai tauna be ena kara dainai idia panisia be namo, eiava ita ura iena dika davana ita henia. Reana ita badu dikadika dainai, ita mamia unai tauna ena dika do ita gwauatao lasi. Bema emu hemami be unai bamona, dahaka do oi karaia Iehova ena taravatu hegeregerena, mai emu kudouna ibounai ida ma haida edia dika oi gwauatao totona?

OI BADU ENA BADINA OI TAHUA NAMONAMO

7, 8. Bema ta ese oi ia habadua, dahaka ese oi do ia durua ena dika oi gwauatao totona?

⁷ Ta ese ita dekenai kerere ta ia karaia, eiava ita laloa ia be ita dekenai ia badu neganai, ita lalohisihisi bada, ani? Tau matamata ta be ia badu dikadika negana ta ia herevalaia. Ia gwau: ‘Ruma lau rakatania bona lau gwau, do lau giroa lasi. Unai be dina namona ta bona lau raka lao gabuna be mai ena hairai bona regerege be lasi. Unai gabu ai egu badu mamina ia ore. Ruma dekenai lau giroa lou bona egu kara dainai lau sori.’ Bema oi be unai tau bamona, emu badu oi biagua toho, do oi laloa maoromaoro bona kara kererena ta do oi karaia lasi.​—⁠Sal. 4:4; Aon. 14:29; Iam. 1:19, 20.

⁸ To, bema oi do lalohisihisi noho, dahaka oi karaia be namo? Namona be emu lalohisihisi ena badina oi laloa namonamo. Oi lalohisihisi badina oi laloa ia vara gauna be maoro lasi, a? Oi lalohisihisi badina oi mamia ta ese oi dekenai hemataurai lasi karana ia karaia, a? Eiava oi lalohisihisi badina oi laloa unai tauna ia ura momokani oi do ia habadua, a? Ia karaia karana be dika momokani, a? Bema emu lalohisihisi ena badina oi lalopararalaia, do oi diba edena hakaua herevadia ese oi idia durua, Iehova ena ura hegeregerena emu hekwakwanai oi hamaoromaoroa totona. (Aonega Herevadia 15:28; 17:27 duahia.) Idia vara gaudia oi laloa namonamo bona emu badu oi biagua neganai, unai ese oi ia durua oi ia habadua tauna ena dika oi gwauatao totona. Unai be mai ena hekwarahi, to Baibel ese oi do ia durua emu hemami oi lalopararalaia, bona Iehova bamona mai emu kudouna ibounai ida ena dika do oi gwauatao.​—⁠Heb. 4:12.

OI BADU HARAGA BE NAMO, A?

9, 10. (a) Ta ese oi ia habadua neganai, reana dahaka do oi karaia? (b) Edena dala ai ma haida edia dika oi gwauatao neganai do oi moale?

⁹ Kara idauidau dainai taunimanima idia badu diba. Hegeregere, motuka oi taria noho lalonai, motuka ma ta be kahirakahira oi ia bampaia. Dahaka do oi karaia? Taunimanima haida be do idia badu dikadika dainai, unai motuka ma ta ena draiva do idia botaia. To oi be Keristani tauna dainai, unai bamona do oi karaia lasi, ani?

¹⁰ Namona be oi laloa namonamo guna. Reana oi be motuka oi taria lalonai, kerere ta oi karaia danu badina gau ta ese emu matana ia veria. Eiava unai draiva ma ta ena motuka dekenai gau ta ia dika. Bema idia vara gaudia edia badina ita diba, ma haida ese idia karaia kerere dainai do ita badu eiava lalohisihisi lasi, to mai eda kudouna ibounai ida edia dika do ita gwauatao. Hadibaia Tauna 7:9 ia gwau: “Do oi badu haraga lasi. Bona bema badu be emu lalona dekenai oi dogoatao noho, inai be kavakava taudia edia kara.” Oibe, ita badu haraga lasi be namo. Nega haida ita laloa ma haida be idia ura momokani ita idia habadua. To idia be goevadae lasi taudia dainai, reana idia laloa namonamo lasi bona unai kerere idia karaia. Eiava ita ese idia karaia karana ita lalopararalaia lasi. Namona be oi laloatao, ena kara o ia gwauraia herevana ena badina ibounai be oi diba lasi. Unai dainai, unai tauna dekenai lalokau oi hahedinaraia bona ena dika oi gwauatao be namo. Unai bamona oi karaia neganai do oi moale.​—⁠1 Petero 4:8 duahia.

‘EMU MAINO DO OI ABIA LOU’

11. Herevana haroro gaukara ai taunimanima idia badu, to dahaka ita karaia be namo?

¹¹ Haroro gaukara ai ruma tauna be oi dekenai ia badu neganai, edena dala ai emu badu oi biagua diba? Iesu be haroro taudia 70 ia siaia neganai, ia hamaorodia idia vareai rumadia lalonai inai do idia gwauraia: “Maino do ia noho inai ruma dekenai.” Ma ia gwau: “Bema maino ia ura henia tauna ta ia noho lasi, emui maino be do umui abia lou. To bema maino ia ura henia tauna ta ia noho, emui maino be ia latanai do ia noho.” (Luka 10:1, 5, 6) Taunimanima be sivarai namona idia abia dae neganai ita moale, badina hahenamo do idia abia. To, nega haida idia badu. Unai neganai dahaka do ita karaia? Iesu ia gwau maino karana ita hahedinaraia be namo. Unai amo herevana ruma tauna ese edena dala ai ita ia kara henia, to mai maino ida iena ruma do ita rakatania. Bema ruma tauna ena kara dainai ita badu, vadaeni Iesu ese ia herevalaia maino be ita dekenai do ia noho lasi.

12. Efeso 4:31, 32 hegeregerena, dahaka ita karaia be namo?

¹² Haroro gaukara sibona ai lasi, to gabu idauidau ai maino ita hahedinaraia be namo. Momokani, haida edia dika ita gwauatao diba. To, namo lasi ita gwau idia karaia karana be dika lasi, eiava ma haida ia hahisia lasi. Unai be lalohadai kererena. To, haida edia dika ita gwauatao anina be, edia dika ita laloaboio bona ita badu henidia noho lasi. Emu kudouna ai maino ia noho be namo. Taunimanima haida be nega ibounai idia dekenai idia vara gau dikadia idia laloa momo dainai, edia kudouna ai maino ia noho lasi. Namo lasi emu badu karana ese oi ia biagua. Bema haida oi badu henidia noho, do oi moale lasi, unai dainai edia dika oi gwauatao be namo!​—⁠Efeso 4:31, 32 duahia.

IEHOVA IA URA HENIA KARADIA OI KARAIA

13. (a) Edena dala ai Keristani tauna ese “lahi gidadia,” be ena inai tauna ena kwarana ai ia haboua? (b) Bema ita ia badu henia tauna dekenai ita manau, dahaka ia vara diba?

¹³ Nega haida reana murimuri tauna ta ese oi do ia habadua. To, ia oi durua diba Baibel ena hadibaia herevadia ia diba totona. Paulo ia gwau: “‘Bema emu inai tauna ia hitolo, aniani oi henia, bema ia ranu mase, ranu oi henia, badina unai bamona oi karaia neganai, oi ese lahi gidadia be iena kwarana ai oi haboua bamona.’ Namo lasi dika ese oi ia halusia, to namona be kara namo amo dika oi halusia noho.” (Roma 12:20, 21) Ena be taunimanima ese oi idia badu henia, to bema oi manau, unai ese idia do ia durua edia kara idia haidaua, bona hemataurai idia hahedinaraia totona. Bema oi ia badu henia tauna dekenai hebogahisi bona laloparara oi hahedinaraia, unai ese ia do ia durua Baibel ena hereva ma haida ia dibaia totona. Herevana dahaka ia vara, to ruma tauna ese emu manau bona hebogahisi karana do ia laloa noho.​—⁠1 Pet. 2:12; 3:16.

14. Ena be ta ese oi ia habadua, to dahaka dainai mai emu kudouna ibounai ida ena dika oi gwauatao be namo?

¹⁴ Taunimanima haida ita bamoa lasi be namo. Hegeregere, orea amo idia atoa siri taudia. Idia be kongrigeisen amo idia atoa siri, badina kara dika badana ta idia karaia bona idia helalo-kerehai lasi. Ena be gabeai ia helalo-kerehai to ia vara gauna dainai, reana do oi lalohisihisi noho. Bema oi dekenai unai bamona ia vara, namona be Iehova oi noia oi do ia durua, kerere tauna ena dika oi gwauatao totona. Unai be mai anina bada, badina kerere tauna ena lalohadai eiava hemami oi diba lasi, to Iehova sibona be unai ia diba. Ia be taunimanima ta ta edia hemami ia diba, bona kerere idia karaia taudia dekenai haheauka karana ia hahedinaraia. (Sal. 7:9; Aon. 17:3) Unai dainai Baibel ia gwau: “Tau ta ena dika davana umui haloua lasi. Dala umui tahua, taunimanima ibounai vairanai kara namodia umui karaia totona. Bema mai dalana bona bema umui karaia diba, taunimanima ibounai ida maino ai do umui noho. Lauegu lalokau taudia e, ta ena dika davana do umui haloua lasi, to Dirava dekenai umui rakatania, ia ese unai dika dekenai ena badu do ia hahedinaraia, badina Toretore Helagadia ia gwau: ‘Iehova ia gwau, dika ena davana be egu, lau ese davana do lau haloua.’” (Roma 12:17-19) Iehova ia diba gaudia ibounai ita diba lasi, unai dainai Baibel ia gwau, namo lasi ma haida ita hahemaoro henidia. (Mat. 7:1, 2) To ita diba momokani, Iehova be hahemaoro maoromaorona do ia karaia.

15. Dahaka ese ita ia durua ita ia habadua tauna ita badu henia noho lasi totona?

¹⁵ Bema oi ia habadua tauna ena dika oi gwauatao be auka, namona be oi laloatao, ia danu be goevadae lasi tauna. (Roma 3:23) Iehova be taunimanima ibounai ia hebogahisi henidia, badina idia ibounai be goevadae lasi taudia. Unai dainai, ita ia habadua tauna totona ita guriguri be namo. Unai bamona ita karaia neganai, eda badu mamina do ia ore. Haida ese ita idia habadua neganai, idia do ita badu henia noho lasi. Iesu ia gwau: “Emui inai taudia do umui lalokau henia noho bona umui idia dagedage henia taudia totona do umui guriguri noho.”​—⁠Mat. 5:44.

16, 17. Dahaka do oi karaia, bema elda taudia idia gwau kerere tauna be ia helalo-kerehai? Bona dahaka dainai?

¹⁶ Iehova ese kongrigeisen elda taudia dekenai maduna ia henia, do idia tahua kara dika tauna ia helalo-kerehai momokani eiava lasi. Elda taudia be Dirava ia diba gaudia ibounai idia diba lasi, to Baibel ena hereva bona lauma helaga ena heduru amo hahemaoro idia karaia. Unai dainai, heduru totona Iehova idia guriguri henia neganai, edia abia hidi be Iehova ena lalohadai hegeregerena idia karaia.​—⁠Mat. 18:18.

¹⁷ Unai bamona ia vara neganai, Dirava badinaia karana ita hahedinaraia be namo. Namona be Iehova ese hekwakwanai ia hamaoromaoroa dalana ita abidadama henia, bona elda edia abia hidi ita abia dae. Bema elda idia laloa kerere tauna be ia helalo-kerehai, oi be unai tauna ena dika do oi gwauatao bona lalokau henia noho, a? (2 Kor. 2:5-8) Reana oi dekenai do ia auka, bema kerere tauna ena kara ese oi o emu famili tauna ta ia hahisia. To, bema Iehova bona kongrigeisen lalonai hekwakwanai hamaoromaoroa dalana oi abidadama henia, oi ese kara maorona do oi karaia. Do oi hahedinaraia oi ura mai emu kudouna ibounai ida, ma haida edia dika oi gwauatao.​—⁠Aon. 3:5, 6.

18. Ma haida edia dika ita gwauatao neganai, dahaka hahenamo do ita davaria?

¹⁸ Ma haida edia dika ita gwauatao neganai, hahenamo momo do ita davaria. Ita badu lasi bona ita lalohisihisi lasi dainai, do ita moale. Danu unai ese ita ia durua, eda hetura karana ma haida ida ita hanamoa totona. To bema haida edia dika ita gwauatao lasi, do ita lalohisihisi bona ita gorere. Unai ese eda hetura karana ma haida ida do ia hadikaia. Haida edia dika gwauatao karana amo ita abia hahenamo badana be, eda hetura karana iseda guba Tamana, Iehova ida do ia goada.​—⁠Kolose 3:12-14 duahia.