Kara Dika Taudia ese Edia Kara Idia Haidaua Diba, A?

BEMA taunimanima ibounai ese kara namodia idia karaia be namo herea, ani?— To ta be nega ibounai kara namodia ia karaia lasi. Ena be ita ura kara namodia ita karaia, to ita ibounai be nega haida kara dika ita karaia ena badina oi diba, a?— Badina ita ibounai be mai kara dika ida ita vara. To taunimanima haida be kara dikadia momo idia karaia. Ma haida idia ura henia lasi bona idia hahisidia. Oi laloa edia kara idia haidaua bona kara namodia idia karaia diba, a?—

Stefano dekenai nadi idia negea taudia edia kouti ia naria tau matamatana mani oi itaia. Iena Heberu ladana be Saulo, to ena Roma ladana be Paulo. Stefano, Hadibaia Tauna Badana ena hahediba tauna idia hamasea neganai, ia moale. Saulo ese unai kara dikadia ia karaia ena badina mani ita itaia.

Saulo be Iuda tomadiho ta ladana Farisea taudia edia orea tauna ta. Farisea taudia be Dirava ena Hereva idia diba, to edia tomadiho gunalaia taudia haida edia hahediba herevadia idia kamonai henia. Unai dainai Saulo ese kara dikadia ia karaia.

Ierusalema dekenai Stefano idia dogoatao neganai, Saulo ia noho. Stefano be kota dekenai idia laohaia, unuseniai Farisea taudia haida be diadi taudia. Ena be Stefano idia gwauraia dika, to ia gari lasi. Diadi taudia dekenai Iehova Dirava bona Iesu ia harorolaia.

To unai diadi taudia be idia kamonai gaudia idia ura henia lasi. Iesu ena sivarai momo idia diba vadaeni. Momokani, Iesu idia hamasea bona nega daudau lasi murinai unai ia vara! To gabeai, Iehova ese guba dekenai Iesu ia abia daekau. Diadi taudia be edia kara idia haidaua lasi, to Iesu ena hahediba taudia idia tuari henia.

Diadi taudia ese Stefano idia dogoatao bona hanua murimuri dekenai idia abia lao. Idia botaia auka dainai tano dekenai ia moru bona nadi amo idia hodoa. Bona laulau dekenai oi itaia bamona, Saulo ese unai ibounai ia itaia. Ia laloa Stefano idia alaia be maoro.

Saulo ese unai bamona lalohadai ia abia ena badina oi diba, a?— Saulo ena mauri ibounai lalonai ia be Farisea tauna, bona ia abia dae Farisea taudia edia hahediba herevadia be maoro. Unai taudia edia haheitalai ia tohotohoa.​—Kara 7:​54-​60.

Stefano idia hamasea murinai, Saulo be dahaka ia karaia?— Ia ura Iesu ena hahediba taudia oredia ia haorea! Edia ruma dekenai ia vareai bona tatau bona hahine ia veridia raka-lasi. Bena dibura rumadia dekenai ia koudia. Hahediba taudia momo ese Ierusalema idia rakatania, to Iesu harorolaia karana idia hadokoa lasi.—Kara 8:​1-4.

Unai dainai Saulo ese Iesu ena hahediba taudia ia inai henidia momokani. Vadaeni Hahelagaia Tauna Badana Kaiapa dekenai ia lao bona gwaumaoro ia abia Damaseko ai idia noho Keristani taudia ia dogoatao totona. Saulo ia ura dibura taudia bamona Ierusalema dekenai ia abidia lao bena do ia panisidia. To Damaseko ia lao henia noho lalonai, hoa gauna ta ia vara.

Guba amo diari ta ia hedinarai bona gado ta ia gwau: “Saulo e, Saulo e, badina dahaka lau dekenai oi dagedage noho?” Unai be Iesu ena gadona guba amo ia hereva! Unai diari bada dainai Saulo ia matakepulu, bona ia ida idia lao taudia ese Saulo be imana amo idia hakaua lao Damaseko dekenai.

Dina toi murinai Iesu be matahanai ta amo ena hahediba tauna Anania dekenai ia hedinarai. Iesu ese Anania ia hamaoroa Saulo do ia vadivadi henia, ena matana do ia hanamoa bona do ia hereva henia. Anania be Saulo ia hereva henia neganai, Saulo ese Iesu ena sivarai momokani ia abia dae. Bena ena matana ia namo lou. Iena mauri ibounai ia haidaua bona Dirava ena kamonai hesiai tauna ai ia lao.—Kara 9:​1-​22.

Hari oi diba dahaka dainai Saulo ese kara dikadia ia karaia?— Unai ia karaia badina ia dekenai hereva kererena idia hadibaia. Dirava idia kamonai henia lasi taudia ia badinaia. Bona ia badinaia taudia ese taunimanima edia lalohadai idia laloa bada to Dirava ena Hereva idia laloa maragi. To dahaka dainai Saulo ese ena mauri ia haidaua bona kara namodia ia karaia, ena be Farisea taudia haida ese Dirava idia tuari henia noho?— Badina Saulo ese hereva momokani ia ura henia. Unai dainai ia dekenai kara maorona idia hadibaia neganai, maoromaoro ia badinaia.

Oi diba Saulo be gabeai edena tauna ai ia lao?— Oibe, ia be aposetolo Paulo, Iesu ena aposetolo tauna ta ai ia lao. Bona laloaboio lasi, ma haida amo Paulo ese Baibel ena buka momo ia torea.

Saulo bamona taunimanima momo ese edia kara idia haidaua diba. To ia auka badina tau ta ia gaukara goada noho taunimanima ia veria kara dikadia idia karaia totona. Unai tauna oi diba, a?— Damaseko ia lao henia dalana dekenai Iesu be Saulo dekenai ia hedinarai neganai, unai tauna ia herevalaia. Unuseniai Iesu be guba amo Saulo ia hereva henia: ‘Oi lau siaia taunimanima edia matana oi kehoa totona, vadaeni dibura do idia rakatania, diari dekenai do idia mai bona Satani ena siahu do idia rakatania, bona Dirava dekenai do idia mai.’—Kara 26:​17, 18.

Oibe, Satani Diabolo ia ura taunimanima ibounai ia veria kara dikadia idia karaia totona. Nega haida kara maorona oi karaia be auka, a?— Ita ibounai ese unai ita mamia. Satani dainai ia auka. To badina ma ta dainai ia auka kara maorona ita karaia totona. Unai badina oi diba, a?— Badina ita be mai kara dika ida ita vara.

Unai kara dika dainai kara namo ita karaia be auka to kara dika ita karaia totona be auka lasi. Unai dainai, dahaka ita karaia be namo?— Oibe, namona be ita hekwarahi kara maorodia ita karaia totona. Bema unai bamona ita karaia, ita diba momokani ita ia lalokau henia tauna, Iesu, ese ita do ia durua.

Iesu be tanobada dekenai ia noho neganai, edia mauri idia haidaua kara dika taudia ia lalokau henidia. Ia diba ia auka bada herea edia mauri idia haidaua totona. Hegeregere, hahine haida be tatau momo danu idia mahuta hebou. Oibe, unai be dika. Baibel ese unai hahine ia gwauraia ariara, eiava sihari kava hahinedia.

Nega ta, unai bamona hahine ta ese Iesu ena sivarai ia kamonai, bona Iesu ia noho gabuna, Farisea tauna ena ruma dekenai ia lao. Iesu ena aena dekenai oela ia bubua bona ena mata ranu Iesu ena aena dekenai be ena huina amo ia dahua. Iena kara dika dainai ia sori bada, unai dainai Iesu ese iena dika ia gwauatao. To Farisea taudia idia laloa ena dika ia gwauatao lasi be namo.—Luka 7:​36-​50.

Iesu be Farisea taudia haida dekenai ia gwauraia herevana oi diba, a?— Ia gwau: “Sihari kava hahine ese umui idia gunalaia, Dirava ena Basileia do idia vareai guna.” (Mataio 21:31) Iesu be unai bamona ia hereva badina sihari kava hahinedia ese ia idia abidadama henia, bona edia kara dika idia rakatania. To Farisea taudia be Iesu ena hahediba taudia dekenai kara dika idia karaia noho.

Unai dainai bema Baibel ese ia hahedinaraia ita karaia karana be kerere, namona be iseda mauri ita haidaua. Bona bema Iehova ia ura ita karaia gauna ita dibaia neganai, namona be mai iseda ura ida ita karaia. Vadaeni Iehova be ita dainai do ia moale bona ita dekenai mauri hanaihanai do ia henia.