Daika be Oiemu Dirava?

DAHAKA dainai inai henanadai, Daika be oiemu Dirava? be mai anina bada?— Badina taunimanima ese dirava momo idia tomadiho henia. (1 Korinto 8:5) Aposetolo Paulo be Iehova ena siahu amo ia raka diba lasi tauna ia hanamoa neganai, taunimanima idia gwau: “Dirava be taunimanima ena toana dekenai idia diho mai ita dekenai.” Taunimanima idia ura Paulo bona ena turana Banaba idia tomadiho henia. Paulo idia gwauraia Hereme bona Banaba be Dio, unai be dirava koikoidia edia ladana.

To Paulo bona Banaba ese taunimanima idia koua idia do idia tomadiho henia lasi. Taunimanima edia huanai idia heau lao bona idia gwau: “Inai anina lasi gaudia umui rakatania, bona do umui giroa mauri Dirava dekenai.” (Kara 14:​8-​15) Gau ibounai ia havaraia “mauri Dirava” be daika?— Oibe, ia be Iehova, ‘Ataiai Momokani Diravana, ese tanobada ia biagua noho.’ Iesu ese Iehova ia gwauraia “Dirava momokani tamona.” Unai dainai, daika sibona ita tomadiho henia be maoro?— Iehova sibona!—Salamo 83:18; Ioane 17:3; Apokalupo 4:​11.

Taunimanima momo ese dirava idauidau idia tomadiho henia to “Dirava momokani tamona” idia tomadiho henia lasi. Nega momo au, nadi, eiava auri amo idia karaia gaudia idia tomadiho henia. (Esodo 32:​4-7; Levitiko 26:1; Isaia 44:​14-​17) Danu nega haida taunimanima ese ladana bada idia abia tatau bona hahine idia hanamodia edia dirava bamona. Idia dekenai hairai ita henia be maoro, a?—

Saulo be aposetolo Paulo ai ia lao murinai, ia gwau: “Inai tanobada ena dirava ese edia lalona ia koua, dibura dekena amo.” (2 Korinto 4:4) Unai dirava be daika?— Oibe, Satani Diabolo! Satani ese taunimanima ia veridia taunimanima bona gau momo idia tomadiho henia totona.

Satani ese Iesu ia veria ia dekenai ia tui diho bona ia tomadiho henia totona neganai, Iesu be Satani dekenai dahaka ia gwau?— “Lohiabada oiemu Dirava do oi tomadiho henia, ia sibona dekenai hesiai gaukara do ia karaia.” (Mataio 4:​10) Unai dainai Iesu ese ia hahedinaraia goevagoeva Iehova sibona ita tomadiho henia be maoro. Unai idia diba tatau matamata haida mani ita laloa. Edia ladadia be Sataraka, Misaka bona Abetenigo.

Unai Heberu memerodia be Dirava ena Israela besena taudia bona Babulonia dekenai idia abia lao. Unuseniai king ta ladana Nebukanesa ese golo kaivakuku badana ta ia haginia. Dina ta oda ta ia henia, ia gwau miusiki idia gadaralaia neganai, ibounai be kaivakuku dekenai idia tui diho be namo. Ia gwau: ‘Do idia tui diho bona tomadiho henia lasi taudia ibounai be lahi siahu herea momokani lalonai do idia negea vareai.’ Bema unai nega ai oi noho dahaka do oi karaia?—

Nega momo Sataraka, Misaka bona Abetenigo be king ena oda ibounai idia badinaia. To kaivakuku dekenai tui diho karana idia dadaraia. Ena badina oi diba, a?— Badina Dirava ena taravatu ia gwau: ‘Idau dirava ta do umui abia lasi. Laulau ta do umui karaia lasi bona ia dekenai do umui tui diho lasi.’ (Esodo 20:​3-5) Unai dainai Sataraka, Misaka bona Abetenigo ese Iehova ena taravatu idia badinaia to king ena oda idia dadaraia.

King be ia badu dikadika dainai, maoromaoro hereva ia siaia Heberu memero toi be ena vairana dekenai idia hakaua mai totona. Ia nanadaidia: ‘Momokani lau kamonai, lauegu dirava umui tomadiho henia lasi, a? Umui dekenai dala do lau kehoa lou. Miusiki ena regena umui kamonai neganai, umui tui diho bona lau haginia kaivakuku umui tomadiho henia. Bema umui tomadiho henia lasi, umui do idia negea inai lahi siahu herea lalonai. Edena dirava ese lauegu imana dekena amo umui ia hamauria diba?’

Unai memero matamatadia be dahaka do idia karaia? Bema unai be oi, dahaka do oi karaia?— King dekenai idia gwau: ‘Ai hesiai henia Diravana ese ai do ia hamauria diba. To bema lasi, oiemu dirava do ai hesiai henia lasi. Oiemu golo kaivakuku dekenai do ai tui diho lasi.’

King ia badu dikadika. Oda ia henia: ‘Lahi ena siahu ma do umui habadaia nega 7, guna umui hasiahua bamona lasi!’ Bena ena tatau goadadia ia hagania Sataraka, Misaka bona Abetenigo do idia kwatua bona lahi lalonai do idia negedia! Lahi be ia siahu momokani dainai ena siahu ese king ena tatau haida ia hamasedia! Heberu memero toi be edena bamona?

Sataraka, Misaka bona Abetenigo be lahi ena huana momokani dekenai idia moru diho. To gabeai idia gini! Dika ta idia davaria lasi. Bona varo ese ia guidia lasi. Unai be edena bamona ia vara diba?— King be lahi lalonai ia itaia, bona ia itaia gauna ese ia hagaria. Ia gwau: ‘Lahi lalonai tatau toi ita negea vareai, ani?’ Iena hesiai taudia idia haere: “King e, unai be momokani.”

Bena king ia gwau: ‘Itaia! Tatau 4 lau itaia lahi lalonai idia raka loaloa, bona lahi ese idia ia araia lasi.’ Oi diba unai tau namba 4 be daika?— Ia be Iehova ena aneru. Ia ese Heberu memero toi ia gimaia dainai dika ta idia davaria lasi.

King be unai ia itaia neganai, lahi kahirakahira ia lao bona ia gwau: “Sataraka, Misaka, Abetenigo e, Ataiai Momokani Dirava ena hesiai taudia e, lahi umui rakatania, umui mai.” Idia raka-lasi neganai, taunimanima idia itaia lahi ese idia ia araia lasi. Bona edia dabua amo lahi ena bonana be lasi. Bena king ia gwau: ‘Sataraka, Misaka bona Abetenigo edia Dirava do ita hanamoa, badina ia ese aneru ta ia siaia, iena hesiai taudia hamauria totona. Badina idau dirava ta idia tomadiho henia lasi, to edia Dirava tamona sibona.’—Daniela, karoa 3.

Unai nega ai ia vara sivaraina amo gau ta ita dibaia diba. Hari inai negai danu, taunimanima ese kaivakuku idia karaia idia tomadiho henia totona. Buka ta (The Encyclopedia Americana) ia gwau: “Satauro be helaga hegeregerena, pepe danu be helaga.” Kaivakuku be au, nadi, auri eiava dabua amo idia karaia diba. Iesu ena hahediba taudia ginigunadia ese Roma ena pavapava tomadiho henia karana ta idia karaia lasi, histori torea tauna Daniel P. Mannix ia gwau unai kara be “pepe hanamoa karana o bese badinaia gwauhamata herevana hegeregerena.”

Unai dainai oi laloa Dirava do ia moale bema kaivakuku ta be dabua, au, nadi eiava auri amo ita karaia, a?— Iehova ia hesiai henia tauna be unai bamona kaivakuku dekenai tomadiho karana ia karaia be maoro, a?— Sataraka, Misaka bona Abetenigo be unai bamona idia karaia lasi, bona Iehova be idia dekenai ia moale. Edena bamona edia haheitalai oi tohotohoa diba?—