Idia Goru Diho Lasi

King Nebukanesa be kaivakuku ena nihi ia abia murinai, Dura ena tano palakana ai golo amo kaivakuku badana ta ia haginia. Bona dagi bada taudia, Sataraka, Misaka, bona Abetenigo danu, ia boiridia mai kaivakuku vairanai idia haboua. King ia gwau: ‘Kibi, hap, bona fluti badana edia regena umui kamonai neganai, maoromaoro kaivakuku dekenai do umui goru diho! Ta ia goru diho lasi, ia be ia araia noho lahi badana lalonai do idia negea vareai.’ Heberu memero toi be kaivakuku vairanai do idia goru diho, eiava Iehova sibona do idia tomadiho henia?

Bena king ese oda ia henia miusiki idia gadaralaia totona. Taunimanima ibounai idia goru diho bona kaivakuku idia tomadiho henia, to Sataraka, Misaka, bona Abetenigo be unai idia karaia lasi. Tatau haida ese unai idia itaia bona king idia hamaoroa: ‘Unai Heberu memero toi idia ura lasi emu kaivakuku idia tomadiho henia.’ Nebukanesa ese ia boiridia mai bona ia gwau: ‘Umui dekenai nega lau henia, namona be kaivakuku umui tomadiho henia. Bema lasi, ia araia noho lahi lalonai umui do lau negea vareai. Dirava ma ta ia noho lasi lau amo umui do ia hamauria totona.’ Idia haere: ‘Unai do ai karaia lasi. Emai Dirava ese ai ia hamauria diba. To king e, bema ai ia hamauria lasi, emu kaivakuku do ai tomadiho henia lasi.’

Nebukanesa ia badu momokani. Ena hesiai taudia ia hamaoroa: ‘Lahi ena siahu be nega 7 amo umui habadaia!’ Bena ena tuari taudia ia oda henia: ‘Inai tatau umui kwatudia, bona negea vareai!’ Unai lahi ena siahu be bada herea dainai tuari taudia be idia lao kahirakahira neganai, maoromaoro idia mase. Heberu memero toi be lahi lalonai idia moru. To Nebukanesa be ia araia noho lahi ia itaia neganai, tatau 4 ia itaia, idia raka loaloa noho. Ia gari matamaia bona ena ofesa taudia ia nanadaia: ‘Ita be tatau toi sibona ita negea lahi lalonai, ani? Tatau 4 lau itaia, idia ta be aneru bamona!’

Nebukanesa be ia raka lao kahirakahira bona ia boiboi: ‘Ataiai Momokani Diravana ena hesiai taudia e, umui raka-lasi!’ Taunimanima ibounai idia itaia Sataraka, Misaka, bona Abetenigo be lahi huanai amo idia raka-lasi bona bero ta idia abia lasi neganai, idia hoa. Edia kopina, huina, bona dabua be lahi ese ia gabua lasi bona lahi ena bonana danu be lasi.

Nebukanesa ia gwau: ‘Sataraka, Misaka, bona Abetenigo edia Dirava hanamoa. Ia ese ena aneru ia siaia bona idia ia hamauria. Edia Dirava be dirava ma haida bamona lasi.’

Heberu memero toi bamona, emu lalona oi hadaia Iehova oi badinaia totona, a?