Pati Ibounai ese Dirava Idia Hamoalea, A?

PATI ta dekenai lao karana oi moalelaia, a?— Idia be moale negadia. Oi laloa Hadibaia Tauna Badana ia ura pati dekenai ita lao, a?— Ta ia headava neganai, ia bona ena hahediba taudia haida be unai pati dekenai idia lao. Iehova be “moale Diravana,” unai dainai pati namodia dekenai ita moale neganai ia moale.​—1 Timoteo 1:​11, NW; Ioane 2:​1-​11.

Inai buka ena rau 29 ai ita itaia, Iehova ese Davara Kakakakana ia hapararaia Israela taudia idia raka hanai totona. Unai sivarai oi laloatao, a?— Gabeai idia ane, mavaru bona Iehova idia tanikiu henia. Ia be pati ta bamona. Idia moale bada bona ita diba momokani Iehova ia moale danu.​—Esodo 15:​1, 20, 21.

Kahirakahira lagani 40 murinai, Israela taudia be pati badana ma ta dekenai idia lao. Unai nega ai Israela taudia idia boiria taudia be Iehova tomadiho henia taudia lasi. Momokani, idia be dirava ma haida idia tomadiho henia bona idia adavaia lasi taudia ida idia mahuta hebou danu. Oi laloa unai bamona pati dekenai oi lao be namo, a?— Iehova be Israela taudia dekenai ia moale lasi bona idia ia panisia.​—Numera 25:​1-9; 1 Korinto 10:8.

Baibel ese vara dinana laloatao totona idia karaia pati rua ia gwauraia. Idia ta dekenai Hadibaia Tauna Badana ena vara dinana idia moalelaia, a?— Lasi. Unai vara dinadia totona idia karaia pati rua be Iehova idia tomadiho henia lasi tatau totona. Pati ta be King Heroda Antipa totona. Ia ese Galilea ena distrik ia lohiaia neganai, Iesu be tanobada dekenai ia noho.

King Heroda be kara dikadia momo ia karaia. Iena kakana ena adavana ia adavaia. Iena ladana be Herodia. Dirava ena hesiai tauna Ioane Bapatiso ese Heroda ia hamaoroa ia karaia karana be kerere. Heroda be unai hereva dekenai ia moale lasi. Unai dainai Ioane be dibura ruma dekenai ia atoa.​—Luka 3:​19, 20.

Ioane be dibura ruma dekenai ia do noho neganai, Heroda ena vara dina moalelaia dinana ia ginidae. Heroda ese pati badana ta ia karaia. Ia ese ladana bada taudia momo ia boiria. Idia ibounai idia aniani, inuinu bona idia moale. Bena Herodia ena natuna kekeni ia vareai bona idia totona ia mavaru. Ibounai be iena mavaru idia moalelaia dainai, King Heroda ia ura ia dekenai harihari gauna namona ta ia henia. Ia dekenai ia gwau: “Dahaka gau oi noinoi lau dekenai, dohore lau henia oi dekenai. Bema lauegu basileia kahana oi noia danu, do lau henia oi dekenai.”

Dahaka do ia noia? Moni, dabua namodia, sibona ena ruma totona do ia noinoi, a? Kekeni ia diba lasi dahaka do ia gwau. Unai dainai ena sinana, Herodia, dekenai ia lao bona ia gwau: “Dahaka lau noinoi?”

Herodia ese Ioane Bapatiso ia badu henia momokani. Unai dainai ena natuna kekeni ia hamaoroa Ioane ena kwarana totona do ia noinoi. Kekeni be king dekenai ia giroa lou bona ia gwau: “Lauegu ura be harihari Ioane Bapatiso ena kwarana oi henia lau dekenai, mereki latanai.”

King Heroda ia ura lasi Ioane ia hamasea badina ia diba Ioane be tau namona. To Heroda ia gwauhamata vadaeni, bona ia gari bema ena lalona ia haidaua idia noho taudia be dahaka do idia laloa. Unai dainai dibura ruma dekenai tau ta ia siaia Ioane ena kwarana utua totona. Daudau lasi unai tauna ia giroa mai. Ioane ena kwarana be mereki latanai ia atoa bona kekeni dekenai ia henia. Bena kekeni ese ena sinana dekenai ia henia.​—Mareko 6:​17-​29.

Baibel ese ia gwauraia vara dinana laloatao totona idia karaia pati ma ta danu be dika momokani. Ia be Aigupito ena king ta totona. Unai pati ai danu, king ese ta ena kwarana ia utua. Bena gabeai, unai tauna ena tauanina ia taua dae manu ese idia ania totona! (Genese 40:​19-​22) Oi laloa Dirava ese unai pati rua ia abia dae, a?— Bema unai negai oi noho, do oi ura unai pati dekenai oi lao, a?—

Ita diba Baibel dekenai idia noho sivarai ibounai be mai badina. Vara dinana laloatao totona idia karaia pati rua sibona ia herevalaia. Bona unai moale karadia ruaosi lalonai kara dikadia idia karaia. Unai dainai, oi laloa vara dinana laloatao totona idia karaia pati dekenai Dirava ena lalohadai be dahaka? Dirava ia ura vara dinadia ita moalelaia, a?—

Momokani hari unai bamona pati dekenai taunimanima ese tau ta ena kwarana idia utua lasi. To vara dinadia moalelaia karana be Dirava momokani idia tomadiho henia lasi taudia ese idia hamatamaia. Buka ta (The Catholic Encyclopedia) ese Baibel lalonai idia gwauraia vara dinana moalelaia karana be inai bamona ia gwauraia: “Kara dika taudia sibona . . . ese edia vara dinadia idia moalelaia bada.” Ita ura edia kara ita tohotohoa, a?—

Hadibaia Tauna Badana be edena bamona? Ena vara dinana ia moalelaia, a?— Lasi, Baibel ese Iesu ena vara dina laloatao totona idia karaia pati ta ia herevalaia lasi. Momokani, Iesu ena hahediba taudia ginigunadia ese ena vara dinana idia moalelaia lasi. Iesu ena vara dinana moalelaia totona, gabeai taunimanima ese December 25 idia abia hidi ena badina oi diba, a?—

Unai dina idia abia hidi badina, buka ta (The World Book Encyclopedia) ia gwau, “Roma taudia ese unai dina idia hahelagaia vadaeni, unai dina dekenai Saturn Ariana idia karaia, dina ena vara dinana moalelaia totona.” Unai dainai taunimanima ese dirava koikoi tomadiho henia taudia edia holide idia abia hidi, Iesu ena vara dinana idia moalelaia totona!

Iesu be December hua ai ia vara lasi ena badina oi diba, a?— Badina Baibel ia gwau Iesu ia vara neganai, mamoe naria taudia be hanuaboi ai murimuri dekenai idia noho. (Luka 2:​8-​12) December be keru bona medu negana dainai, murimuri ai unai bamona idia noho diba lasi.

Taunimanima momo idia diba Krismas be Iesu ena vara dinana lasi. Idia diba danu unai dina ai dirava koikoi tomadiho henia taudia ese Dirava ia moalelaia lasi karana idia karaia. To idia momo ese Krismas idia moalelaia. Idia ura bada pati idia karaia to Dirava ena lalohadai unai kara dekenai idia tahua lasi. To ita ura Iehova ita hamoalea, ani?—

Unai dainai pati ita karaia neganai, ita ura Iehova ena matanai idia be pati namodia. Lagani ta lalonai dina idauidau ai ita karaia diba. Mai anina bada dinana ta totona ita naria lasi. Aniani namodia haida ita ania bona moale gadara haida ita karaia diba. Oi ura unai oi karaia, a?— Reana emu tama sina ida oi herevahereva bona edia heduru amo pati ta oi hegaegaelaia diba. Unai be namo herea, ani?— To pati ta oi do palanilaia lasi neganai, oi ura do oi karaia pati be Dirava ese ia abia dae.