Duahia Taudia Edia Henanadai

Iehova ena Witness taudia ese vara dinadia idia hahelagaia lasi badina be idau negai unai kara be mai ena anina tomadiho gunana dekenai, a?

Vara dinadia hahelagaia karana be gari kava bona tomadiho koikoi dekena amo ia vara, to Iehova ena Witness taudia ese idia dadaraia be unai badina sibona dainai lasi, to ma badina haida dainai danu.

Gabu momo dekenai gunaguna idia karaia tomadiho kastom haida be tomadiho karana lasi hari inai negai. Hegeregere, gunaguna headava ena ima kwakikwaki rini be mai ena anina tomadiho dekenai, to gabu momo dekenai unai bamona idia laloa lasi hari. Unai dainai, Keristen momokani taudia be rini idia karaia idia headava vadaeni idia hahedinaraia totona. Unai bamona kara dekenai, namona be inai ita laloa: Harihari unai kara be tomadiho koikoi ena kara ta eiava lasi.​—“Duahia Taudia Edia Henanadai” February 1, 1973 bona October 15, 1991 Gima Kohorona magasin oi itaia.

Toretore momo ese idia hahedinaraia gunaguna vara dinadia idia hahelagaia badina unai be gari kava bona tomadiho karana dainai. The Encyclopedia Americana bukana, (1991 gauna) ia gwau: “Idau negai, Aigupito, Greece, Roma, bona Parasa taudia ese edia dirava, edia pavapava, bona edia lohia taudia edia vara dinadia idia hahelagaia.” Ia gwau Roma taudia ese Artemis bona Apolo edia vara dinadia idia hahelagaia. To, “ena be idau negai Israel besena taudia ese edia tatau edia lagani idia torea hedinarai, to gau ta lasi ese ia hamomokania idia be edia vara dinadia idia hahelagaia.”

Toretore ma haida lalodiai idia ese vara dinadia hahelagaia karana ia vara matamaia daladia idauidau idia hahedinaraia: ‘Gunaguna Europe dekenai vara dinadia edia pati idia karaia hamatamaia. Unai nega lalonai taunimanima idia laloa lauma namodia bona lauma dikadia idia noho. Taunimanima iboudiai be unai lauma garidia idia gari bona idia laloa ena vara dinana idia hahelagaia tauna do idia hadikaia, unai dainai idia laloa ena turadia bona varavara edia hanamoa herevadia bona ena varavara idia noho dainai unai dika idia laoahu. Idia laloa harihari gaudia henia karana be naria dalana danu. Idia aniani hebou karana ia naria bona unai be heduru lauma namodia edia hahenamo abia totona. Vadaeni, tau ta ena vara dinana dekenai pati idia karaia ena badina be unai tau ese dika ia abia garina bona lagani ena dina oredia lalonai namo do ia davaria totona.’​—Birthday Parties Around the World, 1967.

Danu, unai buka ese vara dinadia dekenai idia karaia kastom karadia haida idia vara dalana ia hahedinaraia. Hegeregere: “[Kandolo gaukaralaia] karana ena badina be gunaguna Greek bona Roma taudia edia lalohadai dainai, idia laloa kandolo lalonai meamea karana ia noho. Edia ura gaudia idia gurigurilaidia bona idia laloa kandolo ena lahi ese edia hereva be guba diravadia dekenai idia abia lao. Bena unai dirava ese idia dekenai hahenamo do idia siaia diho bona reana edia guriguri do idia haerelaidia.” Unai sivarai ma haida be Reasoning From the Scriptures buka ena rau 69 bona 70 dekenai oi davaria diba, Watchtower Bible and Tract Society of New York, Inc. ese unai buka idia printaia.

To, ita gwau lasi henanadai badana be gunaguna eiava hari taunimanima edia vara dinadia idia hahelagaia karana be tomadiho karana ta eiava lasi sibona, to ma gau haida ita ura diba. Idia lo Keristen taudia idia ura Bible ena hereva dainai idia hedinarai gaudia idia badinaia.

Idau negai, Dirava ena hesiai taudia ese taunimanima haida edia vara dinadia idia laloatao, unai dala amo idia be nega idia duahia diba. Bible ia gwau: “Noa ena mauri lagani be 600 neganai, . . . tanobada henunai ena ranu ia makohia bona ia daekau mai, bona guba ena matuna ibounai be idia kehoa.”​—Genese 5:32; 7:11; 11:​10-26.

Iesu ena hereva bamona, Dirava ena taunimanima dekenai, natudia idia vara negana be hahenamo bada gauna bona ia be moale negana. (Luka 1:​57, 58; 2:​9-14; Ioane 16:21) To, idia ese edia natudia edia vara dinadia idia hahelagaia lasi; idia be dina haida idia hahelagaia to vara dinadia idia hahelagaia lasi. (Ioane 10:​22, 23) Encyclopaedia Judaica ia gwau: “Iuda taudia edia sene karadia dekenai, vara dinadia hahelagaia karana idia diba lasi.” Customs and Traditions of Israel bukana ia gwau: “Vara dinadia hahelagaia karana be bese idaudia amo idia abia, badina Bible bona Talmud bukadia, bona gabeai Aonega Taudia edia toretore lalonai idia gwau lasi unai be Iuda taudia edia kastom. To idau, ia be idau negai Aigupito taudia edia kastom ta.”

Ita diba unai be momokani, badina Bible lalonai Aigupito taudia ese vara dinana ta idia hahelagaia sivaraina ia noho, to tomadiho momokani taudia ese unai kara idia abia dae lasi. Iosef be Aigupito dibura rumana ta lalonai ia noho neganai, pavapava Farao ena vara dinana idia hahelagaia. Reana unai dirava idauidau tomadiho henia taudia haida ese unai aria idia moalelaia, to unai aria dekenai Farao ena paraoa gabua oreana ena biaguna ena kwarana idia utua oho.​—Genese 40:​1-22.

Bible lalonai vara dinana ma ta ena hahelagaia karana ia gwauraia dika​—Heroda Badana ena natuna, Heroda Antipa, ena vara dinana idia hahelagaia neganai. Bible ese unai vara dinana ariana ia sivarailaia lasi hegeregere ia be kerere lasi moale karana ta bamona. To, ia hahedinaraia unai dina dekenai Ioane Bapatiso ena kwarana idia utua oho. Bena, “Ioane ena diba tahua taudia idia lao, iena tauanina idia guria. Vadaeni idia lao, Iesu idia hamaoroa,” bena Iesu ese “unai gabu ia rakatania, taunimanima idia noho lasi gabuna dekenai ia lao.” (Mataio 14:​6-13) Unai ia vara dainai, oi laloa unai diba tahua taudia bona Iesu be vara dinadia ariadia idia ura henia, a?

Vara dinadia hahelagaia karana ia vara matamaia dalana idia diba dainai, bona mai anina bada gauna be inai: Bible ena sivarai ese unai kara ena dika ia gwauraia hedinarai dainai, Iehova ena Witness taudia ese unai kara idia dadaraia ena badina be momo. Idia be inai tanobada ena kastom idia badinaia be anina lasi, badina lagani tamona lalonai dina idauidau momo idia abia hidi diba aniani namona idia moalelaia totona. Harihari gauna henia totona, idia naria lasi ela bona taunimanima ta ena vara dinana ia ginidae; edia ura negana lalonai harihari gaudia idia henia diba, bona edia ura bona edia lalokau dainai idia henia.​—Hereva Lada-isidia 17:8; Kohelete 2:24; Luka 6:38; Kara 9:​36, 39; 1 Korinto 16:​2, 3.