Idia Kamonai Dainai Idia Mauri

IESU KERISO be Iuda taudia ese Ierusalema ena dubu ai idia karaia karadia ena dokona ia gwauraia guna. Edena negai unai dika do ia vara be ia gwauraia lasi. To, unai dika ia do vara lasi neganai, do idia vara guna gaudia ia herevalaia. Ia ese ena diba tahua taudia ia hamaorodia, do idia gima noho bona dika gabuna idia rakatania be namo.

Iesu ia gwau: “Tuari orea ese Ierusalema do idia koua hagegea do umui itaia, vadaeni do umui diba, iena dokona ia kahirakahira vadaeni.” Ma ia gwau: “Gau dika rohorohona, gabu ia hadikaia gauna, Dubu Helaga ena lalonai ia gini dohore umui itaia. . . . Unai neganai Iudea dekenai idia noho taudia be ororo dekenai do idia heau lao.” Iesu ese iena diba tahua taudia ia hamaorodia edia kohu abia totona idia giroa lou lasi be namo. Bema idia ura mauri idia davaria, idia heau haraga be gau badana.​—Luka 21:​20, 21; Mataio 24:​15, 16.

Lagani 66 C.E. ai, Cestius Gallus be nega daudau ia noho gwau-edeede karana haorea totona Roma tuari taudia ia gunalaia, Ierusalema ia tuari henia totona. Hanua lalonai ia vareai bona dubu ia koua hegege. Hanua lalonai heiriheiri ia vara. Idia gima noho taudia idia itaia diba, dika badana be kahirakahira do ia vara. To, Ierusalema do idia heautania diba, a? Hoa dalanai, Cestius Gallus be ena tuari taudia danu Ierusalema idia rakatania haraga. Idia gwau-edeede Iuda taudia ese Roma tuari taudia idia lulua lao. To, inai be nega namona Ierusalema bona Iuda ibounai idia heautania totona!

Lagani 67 C.E. ai, Vespasian bona ena natuna Titus edia hakaua henunai, Roma tuari taudia idia giroa lou. Tano taudia ibounai idia tuari. Lagani 70 C.E. ena matamana kahanai, Roma taudia ese au mai matadia amo magu idia karaia, Ierusalema idia koua hegege. Heau mauri daladia ibounai idia koua. (Luka 19:​43, 44) Hanua taudia idia heiriheiri bona ala-ala heheni. Taunimanima oredia be Roma taudia ese idia hamasea eiava igui hesiai taudia ai idia halaoa. Hanua bona ena dubu idia hadikaia ore momokani. Aposetolo edia negai ia noho Iuda taudia edia histori torea tauna Josephus ia gwau, Iuda taudia milioni ta mai kahana ese hisihisi idia ania bona idia mase. Unai dubu idia haginia lou lasi.

Bema lagani 70 C.E. ai Keristani taudia be Ierusalema dekenai idia noho, reana unai hanua taudia ibounai bamona do idia hamasea eiava hesiai taudia ai do idia halaoa. To, idaunegai histori torea taudia idia gwau, Keristani taudia be Dirava ena sisiba idia badinaia bona Ierusalema bona Iuda ibounai idia heautania, Ioridane Sinavaina ena ist kahanai idia noho ororodia dekenai idia lao. Haida be Pela, Perea ena provinsi dekenai idia noho. Idia ese Iuda idia rakatania bona idia giroa lou lasi. Iesu ena sisiba idia kamonai henia dainai idia mauri.

Oi Abidadama Henia Diba Taudia Edia Sisiba Oi Kamonai Henia, A?

Taunimanima momo be idia kamonai gau haida do idia vara, to idia vara lasi dainai gabeai idia be unai bamona sisiba idia laloa bada lasi. To, sisiba kamonai henia karana ese oi ia hamauria diba.

Lagani 1975 ai, China dekenai, taunimanima idia hadibaia tano mareremarere be do ia vara. Siti naria taudia ese kara ta idia karaia. Taunimanima idia kamonai. Tausen momo idia mase lasi.

April 1991 ai, Philippines dekenai, Mount Pinatubo kahirakahira idia noho hanua taudia idia gwau, unai ororo amo kwalahu bona lahi idia raka-lasi. Hua rua lalonai Philippine Institute of Volcanology and Seismology ena saiens taudia ese unai ororo idia stadilaia murinai, idia gwau unai volkeino be do ia pou. Karaharaga, taunimanima 35,000 bamona ese unai gabu idia rakatania. June 15 ai, unai volkeino ia pou bona kahu bada herea ia negea daekau kiubit kilomita 8 bamona, bena hanua daudaudia dekenai idia moru diho. Kamonai karana dainai taunimanima tausen momo idia mauri.

Baibel ia gwau inai tanobada ena dokona be ia kahirakahira. Hari, ita be nega ena dokona lalonai ita noho. Dokona negana ia kahirakahira lalonai oi gima noho, a? Unai dika gabuna amo oi siri totona kara ta oi karaia noho, a? Karaharaga lalohadaina oi abia, bona ma haida oi hadibaia kara ta idia karaia totona, a?

[Picture on page 20]

Mount Pinatubo amo volkeino ena kahu idia raka-lasi neganai, sisiba idia kamonai henia taudia momo idia roho mauri

[Picture on page 21]

Lagani 70 C.E. ai Ierusalema idia hadikaia neganai, Iesu ena hereva idia badinaia Keristani taudia idia mase lasi