Emu Ruma Bese be Edena Bamona Idia Moale Diba?

1. Ruma bese ia moale totona, dahaka dainai tau bona hahine be dala maorona ai idia headava be gau badana?

Baibel be “moale Diravana ena hairai sivarai namona” amo ia honu. (1 Timoteo 1:11) Unai moale Diravana ia ura famili ibounai idia moale. Ia ese headava ia hamatamaia. Famili ia moale totona, gau badana be tau bona hahine be dala maorona ai idia headava, badina unai ese idia bona edia natudia do ia gimaia. Keristani taudia ese edia tano o gavamani ena taravatu hegeregerena, edia headava idia rejista be namo.​—Luka 2:1, 4, 5 duahia.

Dirava ese headava be edena bamona ia laloa? Ia ura tau tamona be hahine tamona ia adavaia neganai, do idia parara lasi be namo. Iehova ia ura lasi headava taudia idia heudahanai. (Heberu 13:4) Iehova ese headava hadokoa karana (divorce) ia inai henia. (Malaki 2:16) To, bema Keristani tauna ta ena adavana ia heudahanai, bona ena headava ia hadokoa bona hahine ma ta ia adavaia, Dirava ena matanai, unai Keristani tauna ena abia hidi be kerere lasi.​—Mataio 19:3-6, 9 duahia.

2. Headava taudia be edena bamona do idia hereva bona kara heheni be namo?

Iehova ese tau bona hahine ia havaraia, headava maduna idauidau idia huaia hebou totona. (Genese 2:18) Namona be famili ena kwarana ese ena ruma bese do ia ubua, naria, bona idia dekenai Dirava ena sivarai do ia hadibaia. Tau ese ena adavana ia lalokau henia totona, sibona ena ura gaudia haida ia dadaraia be namo. Headava taudia idia lalokau heheni bona hemataurai heheni be namo. Ena be headava taudia be goevadae lasi, to edia headava lalonai moale ia noho totona, gau badana be idia ta ta edia dika idia gwauatao.​—Efeso 4:31, 32; 5:22-25, 33; 1 Petero 3:7 duahia.

3. Hekwakwanai idia vara neganai, emu adavana oi rakatania be maoro, a?

Bema headava lalonai hekwakwanai ia vara, namona be oi bona emu adavana be mai lalokau ida unai hekwakwanai umui hamaoromaoroa. (1 Korinto 13:4, 5) Vaia, headava ibounai lalonai, hekwakwanai do idia vara, to Baibel ia gwau, ta ese adavana ia rakatania be taravatu.​—1 Korinto 7:10-13 duahia.

4. Natudia e, Dirava ia ura dahaka oi karaia?

Iehova ia ura oi moale. Ia ese oi ia hadibaia, edena bamona emu matamata negana oi gaukaralaia namonamo. Ia ura emu tama sina edia mauri ai idia vara gaudia bona edia sisiba amo aonega oi davaria. (Kolose 3:20) Danu, Iehova ia ura Ia bona Iena Natuna dainai oi karaia gaudia o karadia oi moalelaia.​—Hadibaia Tauna 11:9–12:1; Mataio 19:13-15; 21:15, 16 duahia.

5. Tama sina e, edena dala ai emu natudia ese moale idia davaria diba?

Namona be oi gaukara goada emu natudia edia dabu gaudia oi henia totona, hegeregere aniani, ruma, bona dabua. (1 Timoteo 5:8) To, natudia idia moale totona, namona be oi hadibaia Dirava idia lalokau henia bona dibaia. (Efeso 6:4) Oi ese Iehova oi lalokau henia neganai, emu natudia danu be Iehova do idia lalokau henia. Dirava ena Hereva amo emu natudia oi hadibaia neganai, natudia edia laloa dalana danu do ia namo.​—Deuteronomi 6:4-7; Aonega Herevadia 22:6 duahia.

Natudia oi hagoadaia bona tanikiu henidia neganai, unai ese idia do ia durua. Danu, natudia ese matahakani idia abia be mai anina bada. Unai ese idia do ia gimaia, edia moale do ia hadikaia karadia idia karaia lasi totona. (Aonega Herevadia 22:15) To, natudia oi matahakani henia neganai, idia oi gwau henia lasi o kara auka henia lasi.​—Kolose 3:21 duahia.

Iehova ena Witnes taudia edia buka haida ese tama sina bona natudia ia durua diba. Unai buka lalodiai, Baibel siri idia noho danu.​—Salamo 19:7, 11 duahia.