“Oi Lao Gabuna Dekenai Do Lau Lao”

1, 2. (a) Ruta bona Naomi edia laolao bona idia davaria lalohisihisi ena metau oi herevalaia. (b) Edena dala ai Ruta ena laolao be Naomi ena amo ia idau?

RUTA be Moaba ena dala dekenai Naomi badinai ia raka bona lai bada ia toa noho. Unai hahine rua be dala ai sibona idia raka lao. Mani oi piksaia, Ruta ia itaia dina ia diho noho dainai ia laloa, bema ia bona ena ravana hahine totona hanuaboi ai do idia mahuta gabuna ta do ia tahua. Ruta be Naomi ia lalokau henia bada bona ia naria totona gau ibounai ia karaia.

² Idia ruaosi be mai edia lalometau. Naomi be lagani momo lalonai ia vabu, to vanegai sibona ena natuna memero rua, Kiliona bona Malona idia mase dainai ia lalohisihisi bada. Ruta danu be ena adavana, Malona totona ia taitai noho. Ia bona Naomi be Israela ena taoni ta ladana Betelehema dekenai idia lao noho. Betelehema be Naomi ena gabu. To Ruta totona, unai be ia diba lasi gabuna, iena varavara, iena hanua, ena kastom karadia ibounai, ena dirava idauidau danu ia rakatania.​—Ruta 1:3-6 duahia.

3. Edena henanadai edia haere ese ita do idia durua Ruta ena abidadama karana ita tohotohoa totona?

³ Dahaka dainai unai hahine matamata be unai senisi badana ia karaia? Edena bamona Ruta be goada do ia abia, mauri matamata ia manadalaia bona Naomi do ia naria? Unai henanadai edia haere ita tahua lalonai, Moaba hahinena Ruta ena abidadama karana dekenai gau namodia momo do ita dibaia. (Maua ladana “Buka Maragina Namona” itaia danu.) To, mani unai hahine rua ese Betelehema ena dala daudauna ai idia raka noho ena badina ita herevalaia guna.

Mase ese Edia Famili ia Hapararaia

4, 5. (a) Naomi bona ena famili be dahaka dainai Moaba dekenai idia lao? (b) Moaba ai Naomi be dahaka hekwakwanai ia davaria?

⁴ Ruta be Moaba ai ia bada daekau. Moaba be tano maragina, Mase Davarana ena ist kahanai ia noho. Unai gabu ai ororo momo edia ataiai kahana be palaka, au haida idia tubu, bona koura dobudia idia noho. Ena be Israela dekenai doe ia vara noho, to “Moaba tano” be uma gabu karaia tano namona. Moaba dekenai idia lao neganai, Ruta be Malona bona ena famili ia hedavari henidia.​—Ruta 1:1.

⁵ Israela ai doe ia vara dainai, Naomi ena adavana, Elimeleka, ese ena adavana bona natudia memero rua ia abidia, Israela tanona idia rakatania bona Moaba tanona dekenai idia lao. Unuseniai, idau taudia bamona do idia noho. Unai laolao be reana idia ta ta edia abidadama ia tohoa, badina Israela taudia be Iehova ese ia makaia gabuna dekenai hanaihanai ia do idia tomadiho henia be namo. (Deu. 16:16, 17) Naomi ena abidadama be ia goada noho. To, iena adavana ia mase neganai ia daradoko momokani.​—Ruta 1:2, 3.

6, 7. (a) Dahaka dainai Naomi ena natudia memero be Moaba hahine idia adavaia neganai ia laloa momo? (b) Dahaka dainai Naomi ese ena ravana hahine ia kara namo henidia be haheitalai namona?

⁶ Naomi ena natudia memero ese Moaba hahine idia adavaia neganai, reana ia lalohisihisi lou. (Ruta 1:4) Ia diba iena bese kwarana, Aberahamo, be ia hekwarahi bada Iehova idia tomadiho henia taudia huanai ena natuna Isako ena adavana ia abia hidi totona. (Gen. 24:3, 4) Gabeai, Mose ena Taravatu ai Dirava ese Israela taudia ia hadibaia idau bese taudia edia natudia memero bona kekeni do idia adavaia lasi, badina Dirava ena taunimanima ese kaivakuku idia tomadiho henia garina.​—Deu. 7:3, 4.

⁷ To, Malona bona Kiliona be Moaba hahine idia adavaia. Ena be Naomi be ia lalohisihisi eiava ia laloa momo, to ia ura mai hebogahisi bona lalokau ida ena ravana hahine Ruta bona Oropa ia kara henia. Reana iena ura be dina ta idia ruaosi danu be Iehova do idia tomadiho henia. Naomi ena hemami ita diba lasi, to ita itaia Ruta bona Oropa be ia idia lalokau henia bada. Dika idia davaria neganai, unai hetura namona ese idia ia durua. Madi, unai hahine rua be natudia idia do havaraia lasi lalonai, edia adavadia idia mase.​—Ruta 1:5.

8. Dahaka dainai Ruta ese Iehova ia ura henia?

⁸ Ruta ena adavana ia mase neganai, ena tomadiho karana ese ia hagoadaia, a? Reana lasi. Badina Moaba taudia be dirava momo idia tomadiho henia, bona edia dirava badana be Kemoso. (Num. 21:29) Edia tomadiho lalonai dagedage bona kara dika badadia idia karaia, hegeregere natudia idia bouboulaia. Unai nega ai taunimanima be unai bamona kara idia manadalaia. Malona o Naomi ese Ruta idia hadibaia Iehova, Israela edia Dirava be lalokau bona hebogahisi Diravana. Unai amo ia laloparara Iehova be mai lalokau ida ena taunimanima ia lohiaia, bona ia hagaria lasi. (Deuteronomi 6:5 duahia.) Malona ia mase neganai, Ruta be Naomi ia tura henia namonamo bona Naomi ese siahu ibounai Diravana, Iehova, iena hoa karadia bona mai lalokau bona hebogahisi ida taunimanima ia kara henia daladia ia herevalaia neganai, Ruta be mai ura ida ia kamonai.

9-11. (a) Naomi, Ruta bona Oropa be dahaka abia hidi idia karaia? (b) Naomi, Ruta bona Oropa dekenai idia vara hekwakwanai amo dahaka ita diba?

⁹ Naomi ia ura ena gabu ena sivarai ia kamonai. Dina ta, reana gabu daudau amo ia mai bisinesi tauna amo, ia kamonai Israela ai doe ia ore. Iehova be iena taunimanima ia laloa lou. Betelehema ena anina be, “Paraoa Rumana” dekenai paraoa ia momo lou. Unai dainai, Naomi be lalona ia hadaia ena hanua dekenai do ia giroa lou.​—Ruta 1:6.

¹⁰ Ruta bona Oropa be dahaka do idia karaia? (Ruta 1:7) Edia adavadia idia mase dainai idia toi be tura namodia ai idia lao. Ruta be Naomi ia ura henia badina ena kara namo bona Iehova abidadama henia karana ia itaia. Unai vabu toi be Iuda dekenai idia raka lao matamaia.

¹¹ Ruta ena sivarai ese ita ia hadibaia dika be kara maoromaoro bona kara dika taudia dekenai ia vara diba. (Had. 9:2, 11) Unai ese ita ia hadibaia metau badana ta ia vara neganai, ma haida dekenai hahegoada bona heduru ita tahua be aonega karana. Bona namona be Naomi ese ia tomadiho henia Diravana, Iehova dekenai idia tabekau taudia amo heduru do ita tahua.​—Aon. 17:17.

Ruta Ena Noho Hanaihanai Lalokauna

12, 13. Dahaka dainai Naomi ia ura Ruta bona Oropa be edia famili dekenai do idia giroa lou, bona unai hahine matamatadia edia hemami be edena bamona?

¹² Moaba idia rakatania bona idia raka lao noho neganai, Naomi be ma gau ta dainai ia laloa momo. Ia badinai idia raka hahine matamatadia rua ia laloa, bona iena natudia memero bona ia idia lalokau henia karana ia laloa. Ia ura lasi idia dekenai metau ma ta ia henia. Bema edia hanua idia rakatania bona ia ida idia lao, Betelehema dekenai idia totona dahaka do ia karaia?

¹³ Vadaeni, Naomi ia gwau: “Umui lao, umui ta ta emui sinana ena ruma dekenai umui giroa lou. Namona be Iehova ese umui dekenai lalokau ia hahedinaraia, lau bona emui adavadia, idia mase vadaeni taudia unai, dekenai umui hahedinaraia hegeregerena.” Danu ia gwau Iehova ese idia do ia hanamoa, adavadia matamata bona mauri matamata do ia henia. Baibel siri ia gwau: “Bena idia ia kisi henia bona idia tai badabada.” Ita laloparara Naomi be kara namo hahinena bona ma haida ia laloa bada dainai, Ruta bona Oropa ese ia idia ura henia bada. Unai dainai idia hereva noho: “Lasi, to ai be oi ida emu taunimanima dekenai do ai lao.”​—Ruta 1:8-10.

14, 15. (a) Oropa be dahaka gaudia dekenai ia giroa lou? (b) Naomi ese edena dala ai Ruta ia doria ia giroa lou totona?

¹⁴ To, Naomi ese edia hereva ia abia dae haraga lasi. Ia hereva goada ia gwau, ia be hegeregere lasi Israela ai idia ia naria totona, badina ia be adavana lasi ia do ia durua totona, natuna memero lasi idia adavaia totona, bona dala be lasi ia headava lou bona natudia ia havaraia totona. Ia hahedinaraia idia ia naria diba lasi dainai, ia lalohisihisi bada. Oropa be Naomi ena hereva ia lalopararalaia. Moaba dekenai ia be mai ena famili, sinana bona ena ruma ia noho. Unai dainai ia laloa Moaba dekenai do ia noho be namo. Bona mai hebogahisi bada ida Naomi ia kisi henia, ia bamahuta bona ia giroa lou.​—Ruta 1:11-14.

¹⁵ Ruta be edena bamona? Naomi ia gwauraia hereva be ia totona danu. To Baibel ia gwau: “Ruta ese Naomi ia badinaia noho.” Reana Naomi be dala dekenai ia raka lao noho neganai, ia itaia Ruta be ia murinai ia raka mai noho. Ia hereva auka henia, ia gwau: “Itaia, egu ravana ta be ena taunimanima bona ena dirava idauidau dekenai ia giroa lou. Namona be ia ida oi lao.” (Ruta 1:15) Naomi ena hereva ese ita dekenai mai anina bada gauna ta ia hahedinaraia. Oropa be ena taunimanima sibona dekenai ia giroa lou lasi, to “ena dirava idauidau” dekenai ia giroa lou danu. Ia be Kemoso bona dirava koikoidia ma haida tomadiho henia karana ia ura henia. Ruta danu be unai bamona, a?

16-18. (a) Ruta ese edena dala ai noho hanaihanai lalokauna ia hahedinaraia? (b) Ruta ena haheitalai amo dahaka ita dibaia? (Unai hahine rua edia laulau itaia danu.)

¹⁶ Ruta be dala ai Naomi ia hereva henia neganai, ena kudouna ai ia diba unai be abia hidi maorona. Naomi bona ia hesiai henia Diravana ia lalokau henia bada. Unai dainai, Ruta ia gwau: “Lau oi hamaoroa lasi oi lau rakatania totona. Lau be oi ida do lau lao. Badina oi lao gabuna dekenai do lau lao, bona hanuaboi oi mahuta gabuna ai do lau mahuta. Emu taunimanima be egu taunimanima, bona emu Dirava be egu Dirava. Oi mase gabuna ai do lau mase, bona unuseniai lau do idia guria. Mase sibona ese ita do ia hapararaia, to bema egu kara ta dainai ita parara, vadaeni namona be Iehova ese lau dekenai panisi metauna do ia henia.”​—Ruta 1:16, 17.

¹⁷ Ruta ena hereva be namo herea—ena be ia mase bona lagani 3,000 idia hanaia vadaeni, to taunimanima ese ena hereva idia laloatao. Ena hereva ese kara hereadaena ta, noho hanaihanai lalokauna unai, ia hahedinaraia goevagoeva. Ruta ese ia mamia lalokauna be ia goada dainai, herevana Naomi be edeseni ia lao, Ruta ese do ia bamoa. Mase sibona ese idia do ia hapararaia. Naomi ena taunimanima be ena taunimanima ai do idia lao, badina Ruta be ena lalona ia hadaia Moaba ai ia dibaia gaudia ibounai do ia rakatania—Moaba diravadia danu. Ruta be mai kudouna ibounai ida ia gwau ia ura Naomi ena Dirava, Iehova, be ena Dirava ai do ia halaoa.a To Oropa be unai bamona ia karaia lasi.

¹⁸ Vadaeni idia ruaosi sibona be Betelehema ia lao henia dala dekenai idia raka lao. Haida idia gwau, reana idia be wiki tamona bamona idia raka. Ita abia dae, ena be idia be mai edia lalohisihisi, to ta ta idia bamoa dainai goada idia abia.

19. Edena dala ai Ruta ena noho hanaihanai lalokauna be iseda famili, turadia, bona kongrigeisen lalonai ita hahedinaraia diba?

¹⁹ Tanobada ai taunimanima momo be idia lalohisihisi noho. Baibel ia gwau “nega aukadia do idia vara, unai ese taunimanima do idia hametaua bada,” ita be unai bamona negana ai ita noho dainai mase bona hekwakwanai idauidau ita davaria. (2 Tim. 3:1) Ruta amo ita dibaia karana be mai anina bada. Noho hanaihanai lalokauna—unai bamona lalokau be ta badinaia momokani karana, bona ia ura lasi ia do ia rakatania—inai tanobada diburana lalonai unai kara namona be mai ena siahu bada. Headava, famili, turadia huanai bona Keristani kongrigeisen lalonai, noho hanaihanai lalokauna ita hahedinaraia be namo. (1 Ioane 4:7, 8, 20 duahia.) Unai bamona lalokau karana ita hahedinaraia neganai, Ruta ena haheitalai namona ita tohotohoa noho.

Ruta Bona Naomi Betelehema Dekenai

20-22. (a) Moaba ai Naomi ena mauri be edena bamona? (b) Naomi be ena hekwakwanai dainai, dahaka lalohadai kererena ia abia? (Iamesi 1:13 itaia danu.)

²⁰ Oibe, noho hanaihanai lalokauna ita herevalaia sibona lasi, to kara amo ita hamomokania be mai anina bada. Ruta ese Naomi dekenai bona ia abia hidi Diravana Iehova dekenai noho hanaihanai lalokauna ia hahedinaraia diba dalana ia kehoa.

²¹ Dina haida lalonai idia raka, bena Betelehema dekenai idia ginidae, unai hanua be Ierusalema ena saut kahana ai ia noho, ena daudau be kilomita 10. Toana be unai taoni maragina dekenai momo be Naomi bona ena famili idia diba, unai dainai ibounai be Naomi ia giroa mai ena sivarai idia herevalaia noho. Hanua hahinedia ese ia idia raraia bona idia gwau, “Inai be Naomi, a?” Lagani momo Moaba ai ia noho, ena adavana bona natudia memero rua idia mase bona ena mauri ia auka, bona ena vairana toana amo unai ia hedinarai.​—Ruta 1:19.

²² Naomi ese lagani momo lalonai ia itaia lasi varavara hahinedia bona neiba taudia dekenai ena mauri aukana ena sivarai ia gwauraia. Ia hamaorodia ena ladana do idia gwauraia lasi Naomi, anina be “Moale Hahinena,” to ia do idia gwauraia Mara, anina be “Mamina Dika.” Naomi madi! Iobu hegeregerena, ia laloa Iehova Dirava ese ia dekenai dika ia mailaia.​—Ruta 1:20, 21; Iobu 2:10; 13:24-26.

23. Ruta be dahaka ia laloa matamaia bona edena dala ai Mose ena Taravatu ese ogogami taudia ia durua? (Futnout itaia danu.)

²³ Unai hahine rua be Betelehema ai idia noho, bena Ruta be ia bona Naomi naria dalana ia laloa matamaia. Iehova ese iena taunimanima dekenai ia henia Taravatu lalonai ogogami taudia durua ena hakaua herevana ta ia noho bona Naomi be unai ia dibaia. Ogogami taudia be uma dekenai idia lao diba bona aniani idia gogoa taudia ese idia rakatania aniani bona uma ena hetoana o kona ai idia noho aniani idia gogoa diba.b—Lev. 19:9, 10; Deu. 24:19-21.

24, 25. Ruta be Boasi ena uma dekenai ia lao neganai, dahaka ia karaia bona bali gogoa gaukarana be edena bamona ia karaia?

²⁴ Inai nega be bali gogoa negana, hari iseda kalenda ai unai be April, bona Ruta be uma dekenai ia lao bona do ia noinoi bema unuseniai aniani ia gogoa diba. Ruta ia diba lasi, ia be tano biaguna bona taga tauna Boasi ena uma gabu dekenai ia lao. Boasi be Naomi ena adavana, ia mase vadaeni tauna Elimeleka ena varavara. Taravatu hegeregerena Ruta be mai ena maoro aniani ia gogoa totona, to ia ese gaukara naria tau matamata amo gwaumaoro ia abia totona ia henanadai. Ia amo gwaumaoro ia abia neganai, maoromaoro Ruta ia gaukara matamaia.​—Ruta 1:22–2:3, 7.

²⁵ Mani oi piksaia, Ruta be bali utua taudia murinai ia raka. Edia kaia amo bali idia utua neganai, idia hamorua o rakatania bali ia gogoa, ia kwatua hebou bena gabu tamona ai ia haboua, gabeai ia botaia totona. Bali gogoa gaukarana be metairametaira idia karaia, bona dina ia siahu neganai ia be mai ena hekwarahi. To, Ruta be ia gaukara noho, ena varahu ia dahua negana bona dina tubu aniani negana sibona ai “keruma” gabuna henunai ia laga-ani.

26, 27. Boasi be edena bamona tauna, bona edena dala ai Ruta ia kara henia?

²⁶ Ruta ia laloa ma haida ese ia do idia itaia lasi. To, Boasi ese ia itaia bona gaukara naria tauna ia nanadaia. Abidadama goada tauna, Boasi ese ena gaukara taudia dekenai ia gwau: “Iehova be umui ida ia noho.” Unai negai idia gaukara taudia haida be dina tamona sibona idia gaukara o idia haida be idau bese taudia. Bona ia dekenai unai hanamoa hereva tamona idia gwauraia danu. Iehova ia lalokau henia buruka tauna, Boasi, ese Ruta be iena natuna bamona ia kara henia.​—Ruta 2:4-7.

²⁷ Boasi ese Ruta ia boiria “lauegu natuna,” bona ia hamaoroa uma ma ta dekenai do ia lao lasi, to iena uma dekenai bali do ia gogoa bona iena hesiai kekeni kahirakahira do ia noho, unai amo gaukara tatau ese ia do idia kara auka henia lasi. Danu Boasi ese ia dekenai dina tubu aniani ia henia. (Ruta 2:8, 9, 14 duahia.) To mai anina bada gauna be ia ese Ruta ia hanamoa bona hagoadaia. Edena dala ai?

28, 29. (a) Ruta ena kara be edena bamona? (b) Iehova ese oi ia gimaia totona, edena bamona Ruta oi tohotohoa diba?

²⁸ Ruta ese Boasi ia nanadaia, dahaka dainai ia kara namo henia ena be ia be idau bese hahinena. Boasi ese ia hamaoroa, Ruta ese ena ravana hahinena Naomi, ia kara namo henia ena sivarai ibounai ia kamonai vadaeni. Toana be Naomi ese Betelehema hahine edia vairanai, ena lalokau ravana Ruta ia hanamoa bona Boasi be unai sivarai ia kamonai. Danu, ia diba Ruta be Iehova tomadiho henia karana ia abia dae, badina ia gwau: “Mani Iehova ese emu kara dainai oi ia hanamoa, bona namona be Iehova, Israela ena Dirava ese oi dekenai davana hereadaena ia henia, badina iena apena henunai hunia gabuna oi tahua.”​—Ruta 2:12.

²⁹ Unai hereva ese Ruta ia hagoadaia bada! Oibe, ia be Iehova Dirava ena apena henunai ia hunia, unai be hegeregere manu maragina be ena tamana o sinana ese ena apena henunai ia hunia. Ruta ese Boasi ena hahegoada herevadia dainai ia tanikiu henia. Bona ia gaukara ela bona adorahi momokani.​—Ruta 2:13, 17.

30, 31. Ruta ena gaukara dalana, laloa bada karana bona noho hanaihanai lalokauna dekenai dahaka ita dibaia?

³⁰ Ruta be abidadama karana dekenai haheitalai namona, badina hari ita be moni ena hekwakwanai ita davaria noho. Ia laloa lasi ia be vabu dainai haida ese ia totona gau ibounai do idia karaia, bona haida edia kara namo ia laloa bada. Ena be ia karaia gaukara be uma gaukara sibona, to ia hemarai lasi. Hora momo lalonai ia gaukara goadagoada, ia lalokau henia ravana hahinena ia naria totona. Ruta be sisiba ia abia dae bona ena gaukara gabuna ai sibona ia naria namonamo bona hebamo namona ia abia hidi. To mai anina bada gauna be, ena gimaia Tamana Iehova Dirava, ia laloaboio lasi.

³¹ Bema Ruta bamona noho hanaihanai lalokauna ita hahedinaraia, bona iena manau, gaukara goadagoada karana, bona Iehova ia dibaia dainai ia abia moalena ita tohotohoa, ma haida ese iseda abidadama do idia tohotohoa danu. To, edena dala ai Iehova ese Ruta bona Naomi edia dabu gaudia ia henia? Karoa 5 ai unai do ita herevalaia.