“Lau Abia Dae”

1. Mareta ena lalohisihisi bona ena badina herevalaia.

MARETA be ena lalona ena matana amo ena tadikaka idia guria gabuna ena nadi kohua ia itaia diba, bona unai kohua be nadi amo idia koua. Iena lalohisihisi ena bada be unai nadi metauna bamona. Ia abia dae lasi ena lalokau tadikaka Lasaro be ia mase vadaeni. Bona dina foa lalonai, momo idia taitai, vadivadi taudia idia mai bona hebogahisi herevadia idia gwauraia.

2, 3. (a) Mareta be Iesu ia itaia neganai, dahaka hemami ia abia? (b) Mareta ia gwauraia mai anina bada hereva amo dahaka ita dibaia?

² Hari Mareta ena vairanai ia gini tauna be Lasaro ese ia laloa bada tauna. Mareta ese Iesu ia itaia neganai ia lalohisihisi bada, badina ia sibona be ia hegeregere ena tadikaka ia hamauria totona, to Lasaro ia mase vadaeni. Hari Iesu be Betania ena taoni maragina ena murimuri ai Mareta ida ia noho dainai, Mareta be goada ia abia. Unai nega kwadogina ai unuseniai ia noho neganai, Iesu ena kara namodia bona hebogahisi karana ese Mareta ia hagoadaia. Iesu ese ia dekenai henanadai haida ia henia, unai amo ena abidadama toreisi lou dekenai do ia goada. Unai herevahereva lalonai Mareta ese mai anina bada hereva ta ia gwauraia: “Oibe Lohiabada, lau abia dae oi be Keriso, Dirava ena Natuna, tanobada dekenai do ia mai tauna.”​—Ioa. 11:27.

³ Unai hereva ese ia hahedinaraia, Mareta be abidadama goada hahinena. Baibel ai Mareta ena sivarai be momo lasi, to unai ese ita ia durua iseda abidadama ita hagoadaia totona. Unai ita diba totona, Baibel ai Mareta ena sivarai ginigunana ita itaia.

“Gau Momo Dainai Oi Lalohekwarahi”

4. Edena dala ai Mareta ena famili be idia idau, bona edia hetura karana Iesu ida be edena bamona?

⁴ Hua haida gunanai, Lasaro ia mauri noho bona ia gorere lasi neganai, Betania ai edia ruma dekenai vadivadi tauna, Iesu Keriso unai, idia abia dae. Ena be Lasaro, Mareta bona Maria be idia bada vadaeni, to ruma tamona ai idia noho. Tahua gaukara idia karaia taudia idia gwau, idia toi amo reana Mareta be kakana, badina ia ese vadivadi taudia ia naria bona nega haida ena ladana idia gwauraia guna. (Ioa. 11:5) Bona ita diba lasi bema idia headava, to idia be Iesu ena tura namodia ai idia lao. Iesu be Iudea dekenai haroro gaukara ia karaia neganai, nega momo ia idia dagedage henia. Unai bamona negadia ai ena tura namodia edia ruma ai ia noho. Oibe, edia maino bona heduru heheni karana ia laloa bada.

5, 6. Dahaka dainai Iesu ia vadivadi neganai Mareta ia bisi? (b) Iesu be edia ruma dekenai ia noho neganai Maria be dahaka ia karaia?

⁵ Mareta be heabidae karana ia hahedinaraia totona ruma ai gaukara momo ia karaia. Ia gaukara goada bona ia bisi bada. Iesu ia vadivadi neganai unai bamona ia karaia danu. Karaharaga Iesu bona ia idia bamoa taudia totona aniani momo ia hegaegaelaia. Unai negai, heabidae karana be mai anina bada. Vadivadi tauna ia ginidae neganai, idia kisi henia, ena sandolo idia kokia, iena aena idia huria bona ena kwarana latanai dehoro mai ena bonana namona do idia bubua. (Luka 7:44-47 duahia.) Danu, nega momo edia vadivadi taudia totona unai bamona idia karaia, noho gabuna bona aniani namodia idia hegaegaelaia.

⁶ Mareta bona Maria be Iesu ena vadivadi totona idia bisi. Momo idia laloa Maria be mai ura bada ida diba ia abia, to ruma ai gaukara ia karaia danu. To, Iesu ia ginidae neganai, iena gaukara ia rakatania. Iesu ia laloa unai be nega namona hadibaia totona, bona unai bamona ia karaia matamaia! Iesu be unai nega ai idia noho tomadiho gunalaia taudia bamona lasi, to ia ese hahine ia matauraia bona idia dekenai Dirava ena Basileia ia hadibaia, unai be ena haroro gaukara ena hereva badana. Maria be unai nega ia laloa bada dainai, Iesu ena aena badinai ia helai bona hereva ibounai ia kamonai namonamo.

7, 8. Dahaka dainai Mareta ia moale lasi, bona edena bamona iena hemami ia hahedinaraia?

⁷ Mareta ena moale lasi toana ita laloa diba. Iena vadivadi taudia totona aniani momo ia hegaegaelaia, gaukara momo ia karaia dainai ia lalohekwarahi. Gaukara totona ia lao mai neganai, ia itaia ena taihuna ia helai noho bona gau ta ia karaia lasi. Mareta be unai negai badu toana ia hahedinaraia, a? Reana. Badina ia sibona ese gaukara ibounai ia karaia be hegeregere lasi!

⁸ Mareta be ena badu ia biagua lasi bona Iesu ena hereva ia utua, ia gwau: “Lohiabada e, egu tadina ese lau ia rakatania bona lau sibona lau gaukara noho, unai oi itaia, a? Oi hamaoroa do ia mai bona lau ia durua.” (Luka 10:40) Inai be hereva goadana. Gado haida ai iena henanadai be inai bamona idia hahanaia: “Lohiabada e, inai oi laloa danu . . . ?” Bena Iesu ia noia Maria do ia hamaoroa do ia giroa lou ena gaukara ia karaia totona.

9, 10. (a) Iesu be edena bamona Mareta ia haere henia? (b) Edena bamona ita diba Iesu be Mareta ena gaukara ia laloa bada?

⁹ Iesu ena haere dainai reana Mareta ia hoa, Baibel ai unai sivarai idia duahia taudia momo idia hoa danu. Iesu be mai gado namo ida ia gwau: “Mareta e, Mareta e, oi be gau momo dainai oi lalohekwarahi. To, gau haida o tamona sibona be hegeregere. Maria ese gau namona ia abia hidi, bona ia amo do ita kokia lasi.” (Luka 10:41, 42) Iesu ena hereva anina be dahaka? Mareta be kohu ia laloa bada, a? Mareta ese aniani namona ia hegaegaelaia karana ena hekwarahi be Iesu ese ia laloa lasi, a?

¹⁰ Lasi. Iesu ia itaia Mareta be lalokau dainai unai gaukara ia karaia. Danu ia dekenai heabidae karana hahedinaraia totona idia karaia gaudia be kerere lasi. Guna Mataio ese ia hegaegaelaia “aria badana ta” dekenai ia lao danu. (Luka 5:29) Iesu be Mareta ese ia hegaegaelaia aniani ia herevalaia lasi, to Mareta ese ia laloa bada gaudia ia herevalaia. Ia be aniani momo hegaegaelaia karana ia laloa bada dainai, mai anina bada gauna ia reaia. Unai be dahaka?

11, 12. Edena dala ai Iesu be mai gado namo ida Mareta ia hamaoromaoroa?

¹¹ Iesu, Iehova Dirava ena Natuna korikorina be Mareta ena ruma ai ia noho, hereva momokani ia hadibaia totona. Hegaegae karana bona aniani sisina be namo, to hereva momokani dibaia karana be mai anina bada. Iesu ia hebogahisi badina Mareta be ena abidadama hagoadaia nega namona ia reaia, to iena abia hidi ia koua lasi.a Danu ia maoro lasi Mareta ese Iesu ia hamaoroa Maria do ia hadibaia Mareta ia durua totona. Badina unai kara dainai Maria be mai anina bada gauna ia reaia diba.

¹² Unai dainai Iesu be mai gado namo ida Mareta ia hamaoromaoroa, bona Mareta ena badu ia koua totona, mai manau ida ena ladana be nega rua ia gwauraia. Bona Iesu ese ia hamaoroa ‘gau momo dainai ia lalohekwarahi’ lasi be namo. Aniani sisina sibona be hegeregere badina Dirava ena hereva kamonai karana be mai anina bada. Oibe, Maria ese “gau namona” ia abia hidi, unai be Iesu amo diba abia karana, bona Iesu ese unai do ia koua lasi!

13. Iesu ese Mareta ia hamaoromaoroa dalana amo dahaka ita dibaia?

¹³ Unai ruma dekenai ia vara gauna amo hari inai negai Keriso murinai idia raka taudia be gau momo idia dibaia. Namo lasi gau ta ese ita ia koua “Dirava dibaia totona.” (Mat. 5:3) Mareta ena heabidae, gaukara goada karana ita ura tohotohoa, to namo lasi ‘gau momo dainai ita lalohekwarahi’ bena mai anina bada gaudia ita reaia. Iseda tadikaka taihu ida ita hebamo ena badina be aniani ita hegaegaelaia bona aniani momo ita abia totona lasi, to ita ura iseda abidadama amo ta ta ita hagoadaia. (Roma 1:11, 12 duahia.) Herevana aniani be sisina sibona, to unai be nega namona ta ta ita hagoadaia totona.

Tadikaka Lalokauna Ia Mase Bona Ia Toreisi Lou

14. Dahaka dainai ita diba Mareta be sisiba abia dae karana dekenai haheitalai namona?

¹⁴ Mareta be Iesu ena sisiba ia abia dae bona diba ia abia, a? Oibe. Aposetolo Ioane ese Mareta ena tadikaka ena sivarai ia herevalaia, ia gwau: “Iesu ese Mareta, Maria, bona Lasaro ia lalokau henia.” (Ioa. 11:5) Iesu be Betania ia vadivadi henia negana amo, hua haida ia hanaia vadaeni. Mareta be Iesu ena sisiba dainai ia lalohisihisi eiava badu lasi. Mareta be unai sisiba ia abia dae. Unai kara ese ita dekenai abidadama ena haheitalai namona ia hahedinaraia. Oibe, ita ibounai be nega ta ta ai sisiba ita abia be namo, ani?

15, 16. (a) Mareta ena tadikaka be ia gorere neganai, Mareta be dahaka ia karaia? (b) Dahaka dainai Mareta bona Maria edia helaro ia boio?

¹⁵ Mareta be ena tadikaka ia gorere dainai, ia naria totona ia bisi bada. Ia ese gau ibounai ia karaia Lasaro ia durua ia namo lou totona. To, Lasaro ena gorere ia bada ia lao. Hora momo lalonai, iena taihudia be ia badinai idia noho bona ia idia naria. Mareta be nega momo iena tadikaka ena vairana ia itaia, bona lagani momo lalonai idia karaia hebou gaudia bona edia moale bona lalohisihisi negadia ia laloa lou!

¹⁶ Mareta bona Maria be idia itaia Lasaro be do ia namo lou lasi neganai, hereva idia siaia Iesu ia mai totona. Iesu ia haroro noho gabuna ena daudau be dina rua ena raka bamona. Edia hereva be inai: “Lohiabada e, kamonai! Oi lalokau henia tauna be ia gorere.” (Ioa. 11:1, 3) Idia diba Iesu ese edia tadikaka ia lalokau henia, bona idia abidadama ia ese kara ta do ia karaia, iena turana ia durua totona. Idia laloa Lasaro ia do mase lasi lalonai, Iesu do ia ginidae, a? Bema oibe, idia laloa gauna be ia vara lasi. Lasaro ia mase vadaeni.

17. Dahaka ese Mareta dekenai daradara ia havaraia? Bona ia kamonai Iesu be taoni kahirakahira ia mai noho neganai, dahaka ia karaia?

¹⁷ Mareta bona Maria be edia taihuna totona idia taitai bona, ia guria totona idia hegaegae, danu Betania bona kahirakahira gabudia amo idia mai taudia idia naria. To Iesu ia mai ena sivarai ta idia kamonai lasi. Nega ia hanaia noho lalonai Mareta ia daradara matamaia. Lasaro ia mase bona dina foa murinai, Mareta ia kamonai Iesu be taoni kahirakahira dekenai ia noho. Unai nega ai, Mareta ese Maria ia hadibaia lasi to ia toreisi bona ia heau raka-lasi Iesu ia hedavari henia totona.​—Ioane 11:18-20 duahia.

18, 19. Mareta be dahaka helaro ia gwauraia bona dahaka dainai ena abidadama be ia goada momokani?

¹⁸ Mareta be iena Biaguna Iesu ia itaia neganai, dina haida lalonai ia bona Maria ese idia mamia lalohisihisi be ia dekenai ia gwauraia: “Lohiabada e, bema oi be iniseniai oi noho, egu taihuna be do ia mase lasi.” To Mareta ena helaro bona abidadama be idia goada noho. Ma ia gwau: “To hari danu lau diba, herevana Dirava amo dahaka oi noia, Dirava ese oi dekenai do ia henia.” Karaharaga Iesu ese ena abidadama ia hagoadaia totona ia gwau “Emu taihuna do ia toreisi lou.”​—Ioa. 11:21-23

¹⁹ Mareta ia laloa Iesu be vaira nega ai do ia vara toreisi lou ia herevalaia dainai, ia gwau: “Lau diba dina dokona ai do ia toreisi lou.” (Ioa. 11:24) Ena abidadama unai hahediba hereva dekenai be ia goada momokani. Iuda ena tomadiho gunalaia taudia, Sadukea taudia unai, be toreisi lou herevana idia abia dae lasi, to unai be Toretore Helagadia lalonai ia noho hahediba herevana. (Dan. 12:13; Mar. 12:18) Mareta ia diba, Iesu ese toreisi lou helarona ia herevalaia bona mase taudia haida ia hatorea isi lou danu, to idia amo Lasaro be idau, ia mase bona dina foa idia hanaia vadaeni. Ia diba lasi gabeai dahaka do ia vara.

20. Iesu ena hereva ena anina Ioane 11:25-27 ai, bona Mareta ena haere ena anina herevalaia.

²⁰ Momo be Iesu ese ia gwauraia herevana idia laloatao, ia gwau: “Toreisi lou be lau bona mauri be lau.” Oibe, Iehova Dirava ese ena Natuna dekenai siahu ia henia dainai, vaira negai tanobada ibounai dekenai toreisi lou do ia vara. Iesu ese Mareta ia nanadaia: “Unai oi abia dae, a?” Iena haere be inai karoa ena matamana ai ia noho. Mareta ia abidadama Iesu be Keriso o Mesia, be Iehova Dirava ena Natuna, bona idia peroveta ia be tanobada dekenai do ia mai.​—Ioa. 5:28, 29; Ioane 11:25-27 duahia.

21, 22. (a) Edena dala ai Iesu ese taitai taudia edia hemami ia laloa? (b) Lasaro ena toreisi lou karana herevalaia.

²¹ Iehova Dirava bona ena Natuna, Iesu Keriso be Mareta ena abidadama karana idia laloa bada, a? Gabeai, Mareta ia itaia gaudia ese unai do ia haerelaia. Karaharaga ena taihuna abia totona ia lao. Bena Mareta ia itaia Iesu be mai hebogahisi ida, Maria, ia, bona haida ia hereva henia. Danu ia itaia Iesu be mase ese ia havaraia lalohisihisi ia mamia bona ia tai. Ia kamonai Iesu ia gwau ena tadikaka idia guria gabuna amo nadi do idia kokia.​—Ioa. 11:28-39.

²² Mareta ia gwau, Lasaro ia mase bona dina foa idia hanaia vadaeni dainai, hari ena tauanina be ia bonana. Iesu ia gwau: “Oi lau hamaoroa vadaeni, bema oi abidadama, Dirava ena hairai do oi itaia, ani?” Mareta be unai hereva ia abia dae bona Iehova Dirava ena hairai ia itaia. Unai gabu dekenai Dirava ese ena Natuna dekenai siahu ia henia Lasaro ia hamauria totona! Mani oi laloa, Mareta be unai nega ai idia vara gaudia ia laloatao, Iesu ia boiboi badabada ia gwau, “Lasaro e, oi raka-lasi”; bena nadi kohua amo regena idia kamonai, Lasaro be metairametaira ia raka-lasi, bona ia idia kumia dabua be ena tauanina ai ia do noho, bena Iesu ia gwau: “Dabua umui ruhaia bona do ia raka”; Mareta bona Maria be mai moale ida edia taihuna Lasaro dekenai idia heau lao bona ia idia rosia. (Ioane 11:40-44 duahia.) Mareta ena lalohisihisi be ia ore!

23. Iehova bona Iesu idia ura oi totona dahaka idia karaia, bona dahaka oi karaia be namo?

²³ Inai sivarai ese ia hahedinaraia mase taudia hatorea isi lou karana be lalohadai ta sibona lasi, to inai be Baibel ena hahediba herevana bona do ia vara momokani gauna. (Iobu 14:14, 15) Mareta, Maria bona Lasaro dekenai ia vara hegeregerena, Iehova bona ena Natuna idia ura abidadama taudia idia hanamoa. Danu, oi totona unai bamona hahenamo idia hegaegaelaia vadaeni, bema emu abidadama oi hagoadaia.

“Mareta ese Idia Ia Hesiai Henia”

24. Baibel ai Mareta ena sivarai ginigabena be dahaka?

²⁴ Baibel ese Mareta ena sivarai ma ta danu ia herevalaia. Unai be Iesu be tanobada ai ia noho ena wiki ginigabena ai ia vara. Iesu ia diba ia dekenai dagedage do idia vara dainai, iena turana ena ruma Betania dekenai ia lao. Unuseni amo kilomita 3 do ia raka lao Ierusalema dekenai. Iesu bona Lasaro be lepera tauna Simona ena ruma ai idia aniani, bona unuseniai Mareta ena sivarai ginigabena idia gwauraia: “Mareta ese idia ia hesiai henia.”​—Ioa. 12:2.

25. Dahaka dainai kongrigeisen lalonai Mareta bamona taihu idia noho be hahenamo?

²⁵ Vaia Mareta ena kara be unai bamona. Baibel ai ita itaia ia be ia ida idia noho taudia edia namo ia laloa bada dainai, idia totona ia gaukara goada. Hari kongrigeisen ai, Keriso murinai idia raka taudia huanai Mareta bamona hahinedia idia noho, edia gaukara idia hagugurua, bona idia be harihari bada taudia, hanaihanai edia abidadama be ma haida durua karana amo idia hahedinaraia. Mareta be unai sibona ia karaia noho, a? Reana oibe. Bema unai bamona, ia be mai aonega ida ia kara, badina unai ese ia do ia durua ia davaria hekwakwanai ia haheaukalaia totona.

26. Mareta ena abidadama ese edena dala ai Mareta ia durua?

²⁶ Dina haida murinai, Mareta be ena Biaguna lalokauna Iesu ena mase do ia haheaukalaia. Danu, Iesu do idia alaia taudia idia ura Lasaro danu idia hamasea, badina momo ese iena toreisi lou karana idia abidadama henia. (Ioane 12:9-11 duahia.) Bona gabeai, mase ese Mareta bona ena tadidia ia hapararaia. Ita diba lasi edena dala ai o edena nega ai unai ia vara, to inai ita diba: Mareta ena abidadama goadana ese ia ia durua ia haheauka ela bona dokona. Unai dainai hari Keristani taudia be Mareta ena abidadama idia tohotohoa be namo.