Gari Bona Daradara Karana Ia Hanaia

1-3. Dina ai Petero be dahaka ia itaia, bona hanuaboi ai ia dekenai dahaka ia vara?

PETERO be hanuaboi ai mai hekwarahi ida bouti ia kaloa bona gabu ia itaia. Bona Ist kahana amo ia itaia dina ena diari be metairametaira ia hedinarai noho. Hora momo ia kaloa dainai ena doruna bona pagana idia hisihisi. Galilea Gohuna ai lai bada ia toa dainai hurehure badadia ia havaraia. Haoda totona idia gaukaralaia bouti be hurehure ese ia botaia noho dainai, ranu ese Petero ia haparia. To ia do kaloa noho.

² Kone dekenai, Petero bona ena bamodia ese Iesu be sibona idia rakatania. Unai dina ai, idia itaia Iesu ese hutuma tausen momo be paraoa bona gwarume haida amo ia ubua. Unai dainai taunimanima ese Iesu be edia king ai idia ura halaoa totona ia idia tahua, to edia politikol karadia ia ura henia lasi. Danu ia ese ena murinai idia raka taudia ia hadibaia unai bamona politik karadia lalonai do idia vareai lasi. Aposetolo taudia ia hamaoroa bouti ai do idia guia bona unai gabu do idia rakatania, bona kone ena kahana ma ta dekenai do idia lao, to Iesu be hutuma ia rakatania bona ia sibona be ororo dekenai ia daekau lao ia guriguri totona.​—Mar. 6:35-45; Ioane 6:14-17 duahia.

³ Aposetolo taudia be hanuaboi lalonai bouti idia kaloa noho ela bona hua be west kahana dekenai metairametaira ia diho. To, idia be kilomita haida sibona idia kaloa. Lai ia toa noho bona hurehure badadia dainai idia herevahereva be auka. Bona Petero be reana gau haida ia lalohadailaia.

4. Petero be dahaka kara dainai ia hekwarahi bona ena haheitalai namona ita tohotohoa be namo?

⁴ Ia lalohadailaia gaudia be momo! Lagani rua idia hanaia vadaeni Petero be nega ginigunana ai Nasareta tauna Iesu ida ia hedavari. Gau momo ia dibaia vadaeni, to gau ma haida ia dibaia danu be namo. Mai ura ida unai ia karaia amo gari bona daradara karana ia hanaia diba. Unai dainai ita dekenai ia be haheitalai namona ita tohotohoa totona. Dahaka dainai?

“Ai be Mesia Ai Davaria Vadaeni”!

5, 6. Petero ena mauri be edena bamona?

⁵ Petero be Iesu ida ia hedavari negana ia laloaboio diba lasi. Iena tadikaka, Andrea ese ia dekenai sivarai namona ia gwauraia: “Ai be Mesia ai davaria vadaeni.” Unai hereva ese Petero ena mauri ia haidaua matamaia.​—Ioa. 1:41.

⁶ Petero be Kaperanauma dekenai ia noho, unai siti be Galilea Gohuna ena not kahana ai ia noho. Ia bona Andrea be Sebedeo ena natudia Iamesi bona Ioane ida gwarume hoihoilaia bisinesi idia karaia. Petero ida idia noho taudia be ena adavana, iena ravana hahine bona ena tadikaka Andrea. Petero be unai bamona ruma bese naria totona ia karaia haoda gaukarana be mai ena hekwarahi bada, ena goada bona diba do ia gaukaralaia danu. Hanuaboi momo lalonai unai gaukara idia karaia ita piksaia diba—bouti rua ai idia guia tatau be edia reke idia hadihoa bona idia veria daekau, gwarume idia abia totona. Danu dina ena hora ibounai lalonai gwarume do idia atoa hegaegae bona hoihoilaia, bona edia reke idia hanamoa bona hagoevaia.

7. Petero be dahaka sivarai ia kamonai, bona dahaka dainai unai be sivarai namona?

⁷ Baibel ia gwau, Andrea be Ioane Bapatiso ena hahediba tauna. Petero be mai ura ida ena tadikaka amo Ioane ese ia herevalaia sivarai ia kamonai. Dina ta ai, Andrea ia itaia Ioane be Iesu ia poinia bona ia gwau: “Itaia, Dirava ena Mamoe Natuna!” Maoromaoro Andrea be Iesu murinai ia raka matamaia bona mai ura ida Petero dekenai unai sivarai namona ia herevalaia, ia gwau: Mesia ia ginidae! (Ioa. 1:35-40) Lagani 4,000 bamona gunanai Eden umana ai ia vara hepapahuahu murinai, Iehova Dirava ia gwauhamata mai anina bada tauna ta do ia mai, ia ese taunimanima dekenai helaro korikorina do ia henia. (Gen. 3:15) Andrea be taunimanima do ia Hamauria Tauna, Mesia ida ia hedavari! Petero danu be karaharaga Iesu hedavari henia totona ia lao.

8. Iesu ese Petero dekenai ia henia ladana ena anina be dahaka, bona dahaka dainai taunimanima ese unai ladana dekenai idia do henanadai noho?

⁸ Unai nega ai, momo idia diba Petero ena ladana be Simona, o Simeona. To Iesu ese Petero ia itaia neganai ia gwau: “‘Oi be Simona, Ioane ena natuna. Oi do idia gwauraia Kepa’ (inai ladana Kepa anina be Petero).” (Ioa. 1:42) “Kepa” ena anina be “nadi.” Iesu be peroveta dalanai unai ia gwauraia. Ia itaia Petero be gabeai nadi bamona do ia ginigoada, bona marere lasi, Keriso ena murinai idia raka taudia huanai ia be gaukara badana do ia karaia. Petero be sibona dekenai unai bamona ia laloa, a? Lasi. Hari inai negai danu, Evanelia bukadia idia duahia taudia ese Petero be unai bamona idia laloa lasi. Haida idia gwau, Baibel ena sivarai lalonai Petero ena kara be nadi bamona lasi, ia ginigoada lasi, ia daradara.

9. Iehova bona ena Natuna be dahaka idia itaia, bona dahaka dainai? Oi laloa edia lalohadai ita abidadama henia be namo, a?

⁹ Petero be kerere ia karaia danu. Iesu be unai ia diba. To Iesu be ena Tamana, Iehova hegeregerena, hanaihanai taunimanima edia kara namodia ia itaia. Iesu ia diba Petero be mai ena kara namodia momo, bona ia ura Petero ia durua unai kara namodia ia hahedinaraia totona. Iehova bona ena Natuna be iseda kara namodia idia tahua. Reana do ita laloa idia ese iseda kara namodia idia itaia lasi. To, namona be edia lalohadai ita abidadama henia bona ita hahedinaraia, ita ura ma haida ese ita do idia hadibaia bona hamaoromaoroa Petero bamona.​—1 Ioane 3:19, 20 duahia.

“Oi Gari Lasi”

10. Petero be dahaka ia itaia, to ia giroa lou dahaka ia karaia totona?

¹⁰ Petero be haroro gaukara totona Iesu ia bamoa. Unai dainai Kana ai headava ena aria ta lalonai, Petero ia itaia Iesu ese hoa kara ginigunana ia karaia, ranu be wain ai ia halaoa. Mai anina bada gauna be, Iesu ese Dirava ena Basileia ena sivarai namona ia herevalaia neganai ia kamonai. To, ena gwarume hoihoilaia bisinesi dekenai ia giroa lou. Hua haida murinai, Petero be Iesu ida ia hedavari lou, bona Iesu ese Petero ia boiria ia ida haroro gaukara do idia karaia totona. Bona Petero be ena mauri ibounai lalonai unai do ia karaia.

11, 12. (a) Petero be hanuaboi ai, mai haheauka ida dahaka gaukara ia karaia? (b) Petero be Iesu ena hereva ia kamonai neganai dahaka ia laloa?

¹¹ Petero be hanuaboi ai gwarume ia abia lasi dainai ia lalohisihisi. Haoda taudia be reke idia atoa loulou to gwarume ta idia abia lasi. Unai dainai Petero be gwarume ia abia diba daladia idauidau ia tohoa, gwarume idia haboua gabudia dekenai idia lao danu. Unai negadia ai, haoda taudia momo hegeregerena ia ura ranu ia itaia namonamo, unai amo gwarume idia haboua gabuna ia itaia bona reke do ia atoa diba. To, unai ese lalohisihisi ia havaraia diba. Oibe, Petero be moale totona haoda gaukara ia karaia lasi, to unai amo ena famili be heduru idia abia. To, gwarume ta ia abia lasi bona kone dekenai ia ginidae. Iesu ia raka mai neganai Petero be reke ia hagoevaia noho.

¹² Hutuma be Iesu ena hereva idia kamonai namonamo totona ia idia hagegea. Unai dainai Iesu be Petero ena bouti ai ia guia bona ia noia kone amo do ia lao daudau sisina. Unai amo Iesu be hutuma ia hadibaia bona ena gadona idia kamonai namonamo. Petero be hereva ia kamonai namonamo, kone ai idia noho taudia hegeregerena. Iesu ese Dirava ena Basileia, iena haroro gaukara ena sinado badana, ia herevalaia neganai, Petero ia hesiku lasi unai ia kamonai totona. Unai helaro ena sivarai be tano ibounai dekenai harorolaia totona Keriso durua karana be hahenamo badana! To Petero be unai ia karaia diba, a? Edena dala ai ena ruma bese do ia naria? Reana Petero be hanuaboi ai gwarume tahua totona ia hekwarahi bada negana ia laloa lou.​—Luka 5:1-3.

13, 14. Iesu ese Petero totona dahaka hoa karana ia karaia bona Petero be edena bamona ia kara?

¹³ Iesu be ia hereva ore murinai, Petero ia hamaoroa: “Dobu kahana dekenai ita lao bona emui reke umui atoa diho, gwarume abia totona.” Petero be ia daradara momokani. Ia gwau: “Hadibaia Tauna e, hanuaboi ibounai ai hekwarahi bada to gau ta ai abia lasi, to oi hereva dainai reke do lau atoa diho.” Petero be hari sibona reke ia hagoevaia. Bona iena hereva amo ia hahedinaraia ia ura lasi reke do ia atoa diho lou, badina gwarume be inai bamona nega ai do ia davaria lasi! To, hereva ia badinaia, bona bouti iharuana ai idia noho taudia ia hadibaia idia mai totona.​—Luka 5:4, 5.

¹⁴ Petero be reke ia veria neganai, ia mamia reke ia metau. Mai daradara ida reke ia veria lalonai, ia itaia gwarume be momo herea! Bena heduru totona bouti iharuana ai idia noho taudia ia boiria mai. Idia itaia bouti tamona be hegeregere lasi unai gwarume ibounai idia hahonua totona. Bona bouti rua be gwarume amo idia hahonua, to gwarume be momo herea dainai, bouti idia mutu matamaia. Petero ia hoa bona ia laloa momo. Ia be guna Keriso ena hoa karadia ia itaia, to hari ia itaia gauna be ia do ia durua bada. Iesu be mai ena siahu reke lalonai gwarume ia haboua totona! Petero ia gari matamaia. Ia tui diho bona ia gwau: “Lohiabada e, lau amo oi siri, badina lau be kara dika tauna.” Edena dala ai do ia hamomokania ia be ia hegeregere, Dirava ese siahu ia henia hoa karana ia karaia Tauna ia bamoa totona?​—Luka 5:6-9 duahia.

15. Edena dala ai Iesu ese Petero ia hadibaia ia gari lasi bona ia daradara lasi totona?

¹⁵ Iesu be mai gado namo ida Petero ia hamaoroa: “Oi gari lasi. Hari nega amo oi be taunimanima do oi haoda henia.” (Luka 5:10, 11) Inai be daradara eiava gari negana lasi. Petero be ena haoda gaukara totona ia daradara, eiava ena kerere o ia karaia diba lasi gaudia dainai ia gari be badina lasi. Iesu be mai ena gaukara badana, unai gaukara ese taunimanima edia mauri do ia haidaua. Ia hesiai henia Diravana ese “kara dika do ia gwauatao momokani.” (Isa. 55:7) Namona be Petero ia daradara lasi badina Iehova ena heduru amo ia ese ena famili do ia durua bona haroro gaukara do ia karaia.​—Mat. 6:33.

16. Iesu ese Petero, Iamesi, bona Ioane ia boiria dainai dahaka idia karaia, bona dahaka dainai unai be abia hidi namona?

¹⁶ Petero, Iamesi bona Ioane be karaharaga Iesu ena hereva idia badinaia. “Bouti be kone dekenai idia abia giroa, bona gau ibounai idia rakatania bona ia murinai idia raka.” (Luka 5:11) Unai dala amo Petero ese Iesu bona Dirava ia abidadama henia. Petero be abia hidi namona ia karaia. Hari inai negai, idia daradara lasi bona idia gari lasi Keristani taudia be unai bamona abidadama karana idia hahedinaraia noho. Iehova ese ia idia abidadama henia taudia do ia naria.​—Sal. 22:4, 5.

“Dahaka Dainai Oi Daradara?”

17. Petero be Iesu ia hedavari henia bona lagani rua murinai, dahaka gaudia ia laloatao?

¹⁷ Petero be Iesu ia hedavari henia bona lagani rua bamona idia hanaia murinai, Galilea Gohuna ai lai ia toa noho hanuaboi ai, Petero be bouti ai ia guia, inai karoa ena paragraf ginigunana ese ia herevalaia bamona. Oibe, ia lalohadailaia gaudia ita diba lasi. Badina gau momo idia vara! Iesu ese Petero ena ravana hahine be gorere amo ia hanamoa. Ororo Harorona ia karaia. Iena hadibaia karana bona hoa karadia amo ia hahedinaraia loulou ia be Iehova ese ia Abia Hidi Tauna, Mesia unai. Hua idia hanaia lalonai, Petero be ena gari bona daradara karana ia ore ia lao. Danu aposetolo taudia 12 amo Petero be Iesu ese ia abia hidi aposetolo tauna ta! To, Petero be gabeai do ia diba iena gari bona daradara karana be ia do noho.

18, 19. (a) Petero be Galilea Gohuna ai ia itaia gauna herevalaia. (b) Iesu ese edena dala ai Petero ena noinoi ia hagugurua?

¹⁸ Daba momokani 3:00 a.m bamona bona dina ia daekau matamaia lalonai, Petero be gau ta ia itaia. Unai dainai karaharaga ia helai maoromaoro bona ena bara karana ia hadokoa. Unai be hurehure sibona eiava? Lasi, unai be tau ta! Oibe, davara latanai ia raka mai noho! Unai tauna ia raka mai kahirakahira, toana be edia bouti do ia hanaia. Hahediba taudia idia gari bona idia laloa, unai be dahaka. Unai tauna ia gwau: “Umui lalogoada! Inai be lau, umui gari lasi.” Unai be Iesu!​—Mat. 14:25-28.

¹⁹ Petero ia haere: “Lohiabada e, bema inai be oi, lau oi hamaoroa ranu latanai oi dekenai do lau raka mai.” Mai lalogoada ida ia hereva. Unai hoa karana idauna dainai ia moale bada, bona ia ura ena abidadama do ia hamomokania lou. Ia ura ranu latanai do ia raka danu. Mai gado namo ida Iesu ia gwau: “Oi mai!” Maoromaoro Petero be bouti amo davara latanai ia diho. Petero ena aena be ranu latanai ia atoa bona ia gini tore neganai, ena hemami mani oi laloa. Reana mai moale bada ida Iesu dekenai ia raka lao. To nega daudau lasi murinai, ena hemami ia idau.​—Mataio 14:29 duahia.

20. (a) Dahaka dainai Petero be Iesu ia itaia noho lasi, bona dahaka ia vara? (b) Iesu ese Petero dekenai dahaka leseni ia hadibaia?

²⁰ Petero ese Iesu sibona do ia itaia be namo. Iesu be Iehova ena siahu amo Petero ia durua hurehure latanai ia raka totona. Bona Iesu ese unai ia karaia badina Petero be ia dekenai ia abidadama. To gabeai Petero be Iesu ia itaia noho lasi. Baibel ia gwau: “Lai badana ia itaia dainai ia gari.” Hurehure badadia be bouti ia botaia, bona lai ese ranu ia abia isi. Petero be unai ia itaia neganai, ia gari. Reana ia laloa gohu lalonai do ia mutu bona maloa. Ena gari ia bada neganai, ena abidadama be ia maragi ia lao. Iena gini goada karana dainai Iesu ese inai ladana Nadi ia henia, to hari ia be nadi metauna bamona ia mutu noho badina ena abidadama ia goada lasi. Petero be nahu ia diba, to hari ia hegeregere lasi. Ia boiboi: “Lohiabada e, lau oi hamauria!” Maoromaoro Iesu ese ena imana ia dogoatao bona ia abia isi. Bena ranu latanai idia noho neganai, Petero dekenai mai anina bada leseni ia hadibaia, ia gwau: “Abidadama maragi tauna e, dahaka dainai oi daradara?”​—Mat. 14:30, 31.

21. Dahaka dainai daradara karana be mai ena dika, bona edena dala ai unai ita hanaia diba?

²¹ Inai hereva “oi daradara” be hereva maorona! Badina daradara karana be mai ena siahu bona dika bada ia havaraia diba. Bema unai kara ita hahedinaraia iseda abidadama bona hetura karana Dirava ida ia hadikaia diba. Unai kara dainai namona be ita gaukara goada. Edena dala ai unai ita karaia diba? Hanaihanai lalohadai maorona ita dogoatao. To bema ita idia hagaria gaudia, ita idia hamanokaia gaudia, bona iseda hetura karana Iehova bona ena Natuna ida idia hadikaia diba gaudia ita laloa noho, unai ese daradara karana do ia habadaia. To, bema hanaihanai Iehova bona ena Natuna ita laloa, ita totona guna idia karaia gau namodia, hari idia karaia noho gaudia, bona vaira negai do idia karaia gaudia ita laloa, iseda daradara karana do ia ore.

22. Dahaka dainai Petero ena abidadama ita tohotohoa be namo?

²² Petero be Iesu murinai ia lao bona bouti ai idia guia neganai, ia itaia lai badana be ia ore. Bona Galilea Gohuna be ia namo lou. Petero bona hahediba taudia ma haida idia gwau: “Momokani, oi be Dirava ena Natuna.” (Mat. 14:33) Daba ia rere neganai, toana be Petero ia moale bada herea. Hari ia diba, namo lasi gari karana dainai Iehova bona Iesu dekenai ia daradara. Momokani, namona be ena mauri ai gau momo do ia haidaua, Keristani tauna goadana ai do ia lao totona Iesu ena hereva hegeregerena. To iena lalona ia hadaia do ia gaukara goada noho totona. Oi be unai bamona oi ura karaia danu, a? Bema oibe, Petero ena abidadama oi tohotohoa be namo.