Hahetoho Ia Davaria, to Badinaia Karana Ia Hahedinaraia

1, 2. Kaperanauma ai, Iesu ia haroro lalonai, Petero ena ura badana be dahaka, to dahaka ia vara?

PETERO be Iesu ena hereva idia kamonai taudia edia vairana ia itaia. Idia be Kaperanauma ena sinagoga lalonai idia hebou. Unai be Petero ena hanua, Galilea Gohuna ena not kahanai; iena haoda bisinesi, turadia, varavara bona bisinesi idia karaia hebou taudia momo be unuseniai idia noho. Petero ia ura ena hanua taudia do idia diba Iesu be Mesia, bona Dirava ena Basileia sivaraina be hahediba tauna hereadaena amo do idia kamonai dainai do idia moale. To unai dina ai unai ia vara lasi.

² Momo be Iesu ena hereva idia abia dae lasi. Haida be idia maumau, bona Iesu ena hereva dekenai idia lalotamona lasi. To, Petero be Iesu ena hahediba taudia haida edia kara dainai ia laloa momo. Guna idia moale badina gau matamata idia dibaia bona hereva momokani idia lalopararalaia. To hari, idia moale lasi bona idia badu. Haida idia gwau idia be Iesu ena hereva dekenai idia hoa. Ma haida idia ura lasi kamonai dainai, sinagoga idia rakatania—Iesu murinai idia raka lou lasi.​—Ioane 6:60, 66 duahia.

3. Petero be ena abidadama ese ia durua dainai dahaka ia karaia?

³ Petero bona aposetolo taudia dekenai unai be nega aukana. Petero be unai dina ai, Iesu ese ia gwauraia hereva ena anina ia lalopararalaia namonamo lasi. Danu ia itaia taunimanima ese Iesu ena hereva dekenai lalohadai kererena idia abia dainai idia badu. Petero be dahaka ia karaia? Unai be nega ginigunana lasi ena Biaguna badinaia karana dekenai hahetoho ia vara; bona nega ginigabena lasi. Petero be hahetoho lalonai badinaia karana ia hahedinaraia totona, ena abidadama ese ia durua dalana mani ita itaia.

Haida be Iesu Idia Rakatania, to Petero be Iesu Ia Badinaia Noho

4, 5. Edena dala ai Iesu be taunimanima edia ura ia badinaia lasi?

⁴ Petero be nega momo Iesu ena kara dainai ia hoa. Nega momo ena Biaguna ena kara bona ena hereva be taunimanima idia laloa dalana hegeregerena lasi. Dina ta gunanai, Iesu ese hoa dalanai taunimanima tausen momo ia ubua. Unai dainai idia ura ia be edia king ai idia halaoa. To idia daradara badina ia raka oho sibona, bona ena hahediba taudia ia hamaoroa bouti idia guia bona Kaperanauma dekenai idia hanaia totona. Hanuaboi ai, ena hahediba taudia be bouti amo Galilea Gohuna idia hanaia neganai, idia hoa bada, badina Iesu be lai gubana lalonai ranu latanai ia raka mai. Unai neganai abidadama karana dekenai Petero be mai anina bada gauna ia dibaia.

⁵ Daba ai, idia itaia hutuma be bouti amo idia mai vadaeni. To, unai taunimanima be Iesu ese hoa dalanai aniani momo ia havaraia dalana idia ura itaia, to hereva momokani kamonai totona idia mai lasi. Idia be tauanina gaudia idia laloa dainai Iesu ese ia gwau henia. (Ioa. 6:25-27) Kaperanauma ena sinagoga lalonai taunimanima be unai idia do herevalaia noho, to Iesu be edia ura ia badinaia lasi, ia be mai anina bada hereva momokani ia hadibaia.

6. Iesu ese dahaka haheitalai ia herevalaia, bona idia kamonai taudia be dahaka idia karaia?

⁶ Iesu ia ura lasi taunimanima be aniani totona ia dekenai do idia mai, to ia ura do idia diba Dirava ese taunimanima dekenai mauri hanaihanai do ia henia, bema idia ese Iesu ena boubou gauna idia abia dae bona ia idia badinaia. Unai dainai haheitalai ta ia henia. Mose ena nega lalonai, guba amo mana, beredi unai, ia diho, laulau dalanai ia gwau ia be unai hegeregerena. Haida idia maumau neganai, anina bada haheitalai ma ta ia gwauraia. Ia gwau, mauri abia totona, iena tauanina do idia ania bona ena rara do idia inua be namo. Unai hereva idia kamonai neganai momo idia badu. Haida idia gwau: “Inai be hereva namona lasi! Ai ura lasi ai kamonai.” Iesu ena hahediba taudia momo be ia idia rakatania.a—Ioa. 6:48-60, 66.

7, 8. (a) Petero be Iesu dekenai dahaka ia do lalopararalaia lasi? (b) Iesu be ena aposetolo taudia dekenai ia henanadai neganai, Petero ena haere be dahaka?

⁷ Petero be dahaka do ia karaia? Ia danu be reana Iesu ena hereva dekenai ia daradara. Ia do laloparara lasi, Iesu ese Dirava ena ura ia hagugurua totona do ia mase be namo. Unai dina ai, lalorua hahediba taudia ese Iesu idia rakatania. Petero be unai bamona do ia karaia danu, a? Lasi. Mai anina bada karana ta dainai Petero be unai bamona ia karaia lasi. Unai be dahaka?

⁸ Iesu ia giroa ena aposetolo taudia dekenai bona ia gwau: “Umui danu umui ura lao, a?” (Ioa. 6:67) Herevana Iesu be idia ibounai 12 ia hereva henia, to Petero sibona ia haere. Nega momo unai bamona ia karaia. Idia ibounai amo Petero ena mauri lagani be reana bada bona ia be hereva haraga tauna. Bema ia be mai ena hereva ta, maoromaoro ia gwauraia sibona. To hari, Petero be ia laloa noho hereva namona ta ia gwauraia, ia gwau: “Lohiabada e, daika dekenai do ai lao? Mauri hanaihanai herevadia be oi amo idia mai.”​—Ioa. 6:68.

9. Petero ese edena dala ai Iesu badinaia karana ia hahedinaraia?

⁹ Unai hereva be emu kudouna ia hamarerea, ani? Petero be Iesu ia abidadama henia dainai, unai ese ia durua mai anina bada kara ta ia hahedinaraia totona, unai be badinaia karana. Petero ia laloparara, Iehova ese ia henia Hahemauri Tauna tamona sibona be Iesu. Bona Dirava ena Basileia sivaraina ia hadibaia karana amo, taunimanima be hahemauri idia abia diba. Petero be Iesu ena hereva haida dekenai ia daradara, to ia diba bema ia ura Dirava ena lalonamo bona mauri hanaihanai ena hahenamo ia abia, dala tamona be Iesu sibona.

10. Hari, ita be edena bamona Petero ena badinaia karana ita tohotohoa diba?

¹⁰ Oi danu be unai bamona oi laloa, a? Madi, hari taunimanima momo idia gwau Iesu idia lalokau henia, to ia idia badinaia lasi. Mai momokani ida, Keriso ita badinaia anina be Iesu ena hahediba herevadia ita badinaia, Petero hegeregerena. Iena hahediba herevadia edia anina korikori ita dibaia bona ita badinaia be namo. Ena be ita hoa badina ena hereva be iseda lalohadai amo ia idau, eiava iseda ura hegeregerena lasi. Iseda badinaia karana sibona amo mauri hanaihanai ita abia diba, Iesu ia ura unai ita karaia.​—Salamo 97:10 duahia.

Petero be Sisiba Ia Abia, to Iesu Ia Badinaia Noho

11. Iesu ese ia murinai idia raka taudia be edeseni ia hakaudia lao? (Futnout itaia danu.)

¹¹ Unai bisi negana ia ore bona daudau lasi, Iesu be ena aposetolo taudia bona hahediba taudia haida ida not kahana dekenai idia lao. Heremona Ororona ena atai kahana be sinou ese ia koua, unai be Gwauhamata Tanona ena not kahana dekenai ia noho. Nega haida Galilea Gohuna amo unai ororo idia itaia diba. Iesu bona ena hahediba taudia be Kaisarea Filipib kahirakahira idia noho hanuadia dekenai idia lao noho, bona Heremona Ororona idia itaia namonamo diba. Unai gabu hairaina dekenai, idia ese saut kahanai ia noho Gwauhamata Tanona idia itaia diba. Bona Iesu ese ia murinai idia raka taudia dekenai mai anina bada henanadai ta ia henia.

12, 13. (a) Dahaka dainai Iesu ia ura hutuma edia lalohadai do ia diba? (b) Edena dala ai Petero be ena hereva amo Iesu dekenai abidadama momokanina ia hahedinaraia?

¹² “Hutuma idia gwau lau be daika?” Iesu ia ura diba. Inai ita laloa diba, Petero be Iesu ena matana ia itaia amo iena Biaguna ena diba bada, iena siahu, bona hebogahisi karana ia mamia. Iesu ia ura taunimanima edia lalohadai ia dibaia, ia idia itaia bona ena hereva idia kamonai neganai, dahaka idia laloa. Iesu ena hahediba taudia ese iena henanadai idia haerelaia, bona momo ese Iesu dekenai idia abia lalohadai kereredia haida, idia herevalaia lou. To danu Iesu ia ura gau ma haida ia diba. Ia murinai idia raka taudia be unai lalohadai kereredia idia abia danu, a? Unai dainai Iesu ia gwau: “To umui, umui gwau lau be daika?”​—Luka 9:18-20.

¹³ Petero be ia haere haraga lou. Ia be idia laloa hereva badana ta ia gwauraia hedinarai: “Oi be Keriso, mauri Diravana ena Natuna.” Iesu be mai moale ida Petero ia hanamoa karana ita laloa diba. To Iesu ese Petero ia hadibaia, abidadama korikori taudia ese unai hereva momokani idia lalopararalaia, badina Iehova Dirava ese idia dekenai ia hahedinaraia, to taunimanima lasi. Petero be unai hereva momokani badana ia lalopararalaia vadaeni, Iehova ese unai gwauhamata Mesiana eiava Keriso ia hahedinaraia!​—Mataio 16:16, 17 duahia.

14. Dahaka mai anina bada gaukarana be Iesu ese Petero dekenai ia henia?

¹⁴ Inai Keriso be idaunegai idia perovetalaia tauna, ia be ruma haginia taudia ese idia dadaraia nadina. (Sal. 118:22; Luka 20:17) Iesu be unai peroveta herevana amo ia hahedinaraia, Iehova ese unai nadi ta latanai kongrigeisen do ia haginia, unai nadi, Petero ese ia gwauraia be Iesu. Bena unai kongrigeisen lalonai Iesu ese Petero dekenai mai anina bada gaukarana ia henia. Ia ese Petero dekenai gaukara ma haida ia henia, to siahu ia henia lasi aposetolo taudia ia biagua totona, tomadiho haida edia hahediba hereva bamona. Petero dekenai “guba Basileia ena ki” ia henia. (Mat. 16:19) Petero ia abia hahenamo badana be, Dirava ena Basileia lalonai do idia vareai orea idaudia toi dekenai helaro abia dalana ia kehoa—ginigunana be Iuda taudia, murinai Samaria taudia, bena Iuda lasi taudia.

15. Dahaka dainai Petero ese Iesu ia gwau henia, bona dahaka hereva ia gwauraia?

¹⁵ Gabeai Iesu ia gwau, gau momo idia abia taudia be gau momo do idia henia lou, bona Petero dekenai unai hereva ia guguru. (Luka 12:48) Iesu ese Mesia dekenai do idia vara mai anina bada hereva momokanidia ia herevalaia, ia do idia hahisia, bona Ierusalema ai do ia mase herevana ia gwauraia. Petero be unai hereva dainai ia lalohekwarahi bada. Unai dainai Iesu ia hakaua siri bona ia gwau henia, ia gwau: “Lohiabada e, oi sibona oi hebogahisi henia. Oi dekenai unai do ia vara lasi.”​—Mat. 16:21, 22.

16. Edena dala ai Iesu ese Petero ia hamaoromaoroa, bona Iesu ena hereva amo dahaka sisiba ita dibaia?

¹⁶ Petero ia ura Iesu ia durua, badina Iesu ena haere dekenai ia hoa. Iesu ese Petero dekenai ena doruna ia henia, bona ena hahediba taudia ma haida ia itaia—reana edia lalohadai be Petero ena hegeregerena—bona ia gwau: “Satani e, egu murinai oi lao! Oi be hahekwakwanaia gauna lau dekenai, badina emu lalohadai be Dirava ena lalohadai lasi, to taunimanima edia.” (Mat. 16:23; Mar. 8:32, 33) Iesu ena sisiba ese ita ibounai ia durua. Taunimanima edia lalohadai ita abia dae totona be auka lasi, to Dirava ena lalohadai ita abia dae be auka. Ena be reana ita ura ta ita durua, to bema ita naria namonamo lasi ta ita koua diba Dirava ena ura ia karaia lasi, to Satani ena ura ia karaia diba. To Petero be dahaka ia karaia?

17. Iesu ese Petero ia hamaoroa, “egu murinai oi lao,” ena hereva ena anina be dahaka?

¹⁷ Reana Petero ia laloparara Iesu ia gwau lasi ia be Satani, Diabolo. Petero ia hereva henia dalana be Satani ia hereva henia dalana amo ia idau. Satani dekenai ia gwau: “Oi siri”; to Petero dekenai ia gwau: “Egu murinai oi lao.” (Mat. 4:10) Iesu ese unai aposetolo tauna dekenai gau namodia momo ia itaia, unai dainai Petero ia dadaraia lasi, to ena lalohadai kererena ia hamaoromaoroa. Namo lasi Petero be koua gauna bamona ena Biaguna ena vairanai, to ia murinai do ia lao, bona ia do ia badinaia ena hahediba tauna ta bamona.

18. Petero be edena dala ai Iesu badinaia karana ia hahedinaraia, bona edena dala ai ia ita tohotohoa diba?

¹⁸ Petero ia gwau-edeede, eiava ia badu, a? Lasi; to mai manau ida Iesu ena sisiba ia abia dae. Ia ese Iesu badinaia karana ia hahedinaraia lou. Keriso murinai idia raka taudia ibounai be nega ta ta ai sisiba do idia abia be namo. Bema mai manau ida ita abia dae sisiba amo diba ita abia, Iesu bona ena Tamana, Iehova Dirava, kahirakahira dekenai ita lao noho diba.​—Aonega Herevadia 4:13 duahia.

Badinaia Karana Ena Ahuna

19. Iesu be dahaka hereva idauna ta ia gwauraia, bona reana Petero be dahaka ia laloa?

¹⁹ Nega daudau lasi murinai Iesu ese hereva idauna ma ta ia gwauraia. Ia gwau: “Umui lau hamaoroa momokani, iniseniai idia gini taudia haida be do idia mase lasi ela bona taunimanima ena Natuna be ena Basileia lalonai do ia mai idia itaia guna.” (Mat. 16:28) Petero be unai hereva dainai ia daradara. Iesu ena hereva anina be dahaka? Petero be hari sibona sisiba ia abia dainai, reana ia laloa unai bamona hahenamo do ia abia be hegeregere lasi.

20, 21. (a) Petero ia itaia matahanai mani herevalaia. (b) Matahanai lalonai idia herevahereva taudia edia hereva ese edena bamona Petero ena lalohadai ia hamaoromaoroa?

²⁰ Kahirakahira pura ta murinai, Iesu ese Iamesi, Ioane bona Petero be “ororo badana ta dekenai” ia hakaua daekau. Reana unai be Heremono Ororona, ena daudau be kilomita 25. Reana unai be hanuaboi badina tatau toi idia hekwarahi idia noga totona. To Iesu ia guriguri lalonai gau idauna ta ia vara, unai dainai idia noga.​—Mat. 17:1; Luka 9:28, 29, 32.

²¹ Edia vairanai Iesu ena toana ia idau. Iena vairana be ia diaridiari, dina ena diari bamona bona iena dabua danu be idia kurokuro momokani. Bena tatau rua be Iesu dekenai idia hedinarai, ta be Mose bamona bona ta be Elia bamona. Idia be “Iesu ese tanobada do ia rakatania dalana idia herevalaia, unai be kahirakahira Ierusalema dekenai do ia vara”—unai be ena mase bona toreisi lou. Unai ese ia hahedinaraia Petero be guna ia gwauraia herevana be kerere, badina Iesu be gabeai hisihisi bada do ia davaria!​—Luka 9:30, 31.

22, 23. (a) Edena bamona Petero be lalonamo bona ura bada karana ia hahedinaraia? (b) Petero, Iamesi, bona Ioane be unai hanuaboi ai dahaka hahenamo ma ta idia abia?

²² Unai matahanai idauna idia itaia neganai, Petero ia ura gau ta ia karaia—bona reana ia ura unai matahanai ia halataia. Toana be Mose bona Elia be Iesu idia rakatania gwauraia. Unai dainai Petero ia gwau: “Hadibaia Tauna e, ai moale iniseni ai noho! Mani palai ruma toi ai haginia, ta be oiemu, ma ta Mose ena, bona ma ta be Elia ena.” To, idia be Iehova ena hesiai taudia gunadia rua edia laulau sibona, idia be idaunegai idia mase dainai edia palai ruma ia karaia be anina lasi. Petero ia laloa namonamo lasi bona ia hereva. To ita be Petero ena lalonamo bona ura bada dainai ia ita lalokau henia, ani?​—Luka 9:33.

²³ Unai hanuaboi ai, Petero, Iamesi bona Ioane be hahenamo ma ta idia abia. Ororo ai ori ta ia hedinarai bona idia ia koua. Unai ori lalonai hereva ta idia kamonai—Iehova Dirava ena gadona! Ia gwau: “Inai be egu Natuna, lau ese lau abia hidi tauna. Ia umui kamonai henia.” Bena matahanai ia ore, bona idia be Iesu ida ororo ai idia noho.​—Luka 9:34-36.

24. (a) Matahanai ese edena dala ai Petero dekenai namo ia havaraia? (b) Hari ita ese edena dala ai unai matahanai amo namo ita davaria?

²⁴ Unai matahanai be harihari gauna hereadaena Petero dekenai, bona ita totona danu! Lagani momo murinai ia ese unai hanuaboi ai idia vara gaudia ia torea. Petero ese Iesu be guba dekenai King ai do ia lao ena hairai ia itaia. Unai hahenamo badana ia itaia dainai ia gwau: “Emai matana amo iena hairai ai itaia.” Unai matahanai ese Dirava ena peroveta herevadia momo ia hamomokania, bona unai ese Petero ena abidadama ia hagoadaia, badina gabeai hahetoho momo do ia davaria. (2 Petero 1:16-19 duahia.) Ita danu goada do ita abia, bema Petero hegeregerena, Iehova ese ita totona ia abia hidi Biaguna ita badinaia, ia amo diba ita abia, ena sisiba ita kamonai bona iseda kara ita hamaoromaoroa, bona nega ibounai mai manau ida ia murinai ita raka.