Iesu amo Dika Gwauatao Karana Ia Dibaia

1. Dahaka ese Petero dekenai lalohisihisi bada ia havaraia?

PETERO bona Iesu be ta ta idia raraia negana be Petero ese ia laloaboio diba lasi. Petero ese Iesu dekenai lalohisihisi toana ia itaia, a? Unai ita diba lasi; to Baibel ia gwau “Lohiabada ia giroa bona Petero ia itaia.” (Luka 22:61) To Iesu ese Petero ia itaia neganai, Petero ia laloparara ia be kerere badana ta ia karaia. Petero ia diba ia karaia karana be Iesu ese ia perovetalaia vadaeni; ena be ia gwau unai do ia karaia lasi, to ia dekenai unai ia guguru—ena Biaguna ia diba lasi herevana ia gwauraia. Petero be ia lalohisihisi bada, reana iena mauri lalonai unai dina ai ia vara gauna ia laloaboio diba lasi.

2. Petero be dahaka ia dibaia be namo? Bona iena sivarai amo edena dala ai heduru ita abia diba?

² To, Petero ia lalomanoka lasi. Ia be abidadama goada tauna dainai, dala ia noho iena kerere ia hamaoromaoroa bona Iesu amo mai anina bada gaudia ia dibaia. Unai be dika gwauatao karana. Ita ta ta ese unai kara ita dibaia totona, namona be Petero ese dika gwauatao karana ia dibaia dalana ita itaia.

Petero be Gau Momo Do Ia Dibaia

3, 4. (a) Petero be Iesu dekenai dahaka henanadai ia henia, bona Petero be reana dahaka ia laloa? (b) Edena dala ai Iesu ia hahedinaraia Petero be unai nega ai idia noho taudia edia lalohadai ia abia?

³ Hua siks gunanai Petero be ena gabu Kaperanauma ai Iesu dekenai ia lao bona ia nanadaia: “Lohiabada e, egu tadikaka be lau dekenai ia kara dika neganai, nega hida ena dika do lau gwauatao? Nega 7, a?” Petero ia laloa ia be kara namona ia karaia. Badina unai negai tomadiho gunalaia taudia ese taunimanima idia hadibaia nega toi sibona dika idia gwauatao diba! To Iesu ia gwau: “Nega 7 lasi to nega 77.”​—Mat. 18:21, 22.

⁴ Iesu ia gwauraia hereva ena anina be, Petero ese ta ena kara dika be buka ta ai do ia torea noho, a? Lasi; Iesu ena hereva, nega 77 ena anina be, lalokau dainai ta ena kara dika gwauatao karana be hetoana lasi. (1 Kor. 13:4, 5) Iesu ese ia hahedinaraia Petero be iena negai idia noho taudia momo edia lalohadai ia abia, idia be kara auka taudia bona ta ena kerere idia gwauatao lasi, hegeregere buka ta ai idia torea bamona. To, Dirava idia ura tohotohoa taudia ese haida edia kara dika idia gwauatao loulou be namo.​—1 Ioane 1:7-9 duahia.

5. Edena negai do ita diba dika gwauatao karana be gau badana?

⁵ Petero be Iesu ida ia hepapahuahu lasi. To Iesu ena hereva ese iena kudouna ia hamarerea, a? Kerere ita karaia neganai, do ita laloparara dika gwauatao karana be mai anina bada. Unai dainai, Iesu ena mase negana ia kahirakahira noho lalonai, idia vara gaudia mani ita laloa. Unai nega aukadia lalonai, Petero be kerere momo ia karaia dainai, Iesu ese ia gwauatao be namo.

Iesu ese Nega Momo Petero Ena Dika Ia Gwauatao

6. Iesu be ena aposetolo taudia dekenai manau karana ia hadibaia neganai, Petero be dahaka ia karaia? To Iesu ese edena bamona ia kara henia?

⁶ Unai hanuaboi be mai anina bada, badina unai be Iesu ena hanuaboi ginigabena. Iesu ia ura ena aposetolo taudia dekenai gau momo ia hadibaia—hegeregere, manau karana. Iesu be manau karana ia haheitalaia totona, ena aposetolo taudia edia aena ia huria, unai be hesiai taudia edia gaukara. Matamanai, Petero be Iesu ese ia karaia karana dainai ia daradara. Bena ia ura lasi Iesu ese iena aena ia huria. To gabeai Iesu ia hamaoroa iena aena do ia huria sibona lasi, to ena imana bona kwarana danu! Iesu be ia badu lasi, to mai manau ida ia karaia karana ena namo bona ena badina ia herevalaia.​—Ioa. 13:1-17.

7, 8. (a) Edena dala ma haida ai Petero ese Iesu ena haheauka karana ia tohoa? (b) Edena dala ai Iesu ese kara namodia bona dika gwauatao karana ia hahedinaraia noho?

⁷ Danu daudau lasi murinai, Petero ese Iesu ena haheauka karana ia tohoa. Aposetolo taudia be sibona edia huanai daika be bada idia hepapahuahulaia, bona Petero be unai hekokoroku karana lalonai ia vareai danu. To Iesu be mai manau ida edia kerere ia hamaoromaoroa bona edia kara namodia dainai hanamodia; mai abidadama ida edia Biaguna idia badinaia. To Iesu ia peroveta, idia ibounai ese ia do idia rakatania. Petero ia gwau Iesu do ia rakatania lasi, herevana do ia mase. Iesu ia peroveta, ia do idia hamasea hanuaboina ai kokoroku be nega rua ia do tai lasi neganai, Petero be nega toi do ia gwau ena Biaguna ia diba lasi. Petero ia gwau, herevana aposetolo taudia haida ese Iesu do idia rakatania, to unai bamona do ia karaia lasi!​—Mat. 26:31-35; Mar. 14:27-31; Luka 22:24-28; Ioa. 13:36-38

⁸ Iesu be Petero ena kara dainai ia hesiku, a? Momokani, unai nega aukadia lalonai, Iesu be ena goevadae lasi aposetolo taudia edia kara namodia sibona ia laloa bada. Iesu ia diba Petero be ia do ia rakatania, to ia gwau: “Oi dainai lau guriguri goadagoada emu abidadama ia manoka lasi totona. Bona oi, oi helalo-kerehai murinai, emu tadikaka do oi hagoadaia.” (Luka 22:32) Iesu ia diba Petero be ena kerere do ia hamaoromaoroa bona Dirava ena hesiai gaukara do ia karaia lou. Iesu ese kara dika gwauatao karana ia hahedinaraia namo herea!

9, 10. (a) Getesemane umana ai, Petero be dahaka sisiba ia abia be namo? (b) Petero ena kara amo dahaka ita dibaia?

⁹ Getesemane umana ai, nega momo Iesu ese Petero ena kerere ia hamaoromaoroa. Iesu ese Petero, Iamesi bona Ioane ia hamaoroa, do ia guriguri negana ai idia gima noho be namo. Iesu ia lalohisihisi bada bona ia ura heduru ia abia, to Petero bona ma haida be idia mahuta loulou. Iesu be ena hereva amo ia hahedinaraia edia dika ia gwauatao bona edia hemami ia lalopararalaia, ia gwau: “Momokani, lalona be ia ura, to tauanina be ia manoka.”​—Mar. 14:32-41.

¹⁰ Daudau lasi murinai, hutuma be mai edia diari gaudia, kaia bona au ida idia ginidae. Unai nega ai aposetolo taudia be mai aonega ida idia kara be gau badana. To, Petero be kara ta ia karaia haraga, kaia ia abia bona hahelaga tauna badana ena hesiai tauna, Malako, ena taiana ia utua oho. Iesu be mai manau ida Petero ena kerere ia hamaoromaoroa, unai hesiai tauna ena taiana ia hanamoa, bona Baibel ena hakaua herevana, dagedage lasi karana ia herevalaia. Iesu murinai idia raka taudia dekenai unai hakaua herevana be mai anina bada. (Mat. 26:47-55; Luka 22:47-51; Ioa. 18:10, 11) Petero ena kerere momo be iena Biaguna ese ia gwauatao. Petero ena sivarai ese ita ia hadibaia nega momo kerere ita karaia. (Iamesi 3:2 duahia.) Dina ta ta ai, ita ura Dirava ese iseda dika ia gwauatao. To, Iesu idia dogoatao hanuaboina ai Petero dekenai gau momo do idia vara. Ia be kerere badana ta do ia karaia.

Petero Ena Kerere Badana

11, 12. (a) Iesu idia dogoatao murinai, edena dala ai Petero ese gari lasi karana ia hahedinaraia? (b) Edena dala ai Petero ena kara be sibona ese ia gwauraia gauna hegeregerena lasi?

¹¹ Iesu be hutuma ia hamaoroa bema idia be ia idia tahua, namona be ena aposetolo taudia idia siaia. Hutuma be Iesu idia dogoatao neganai, Petero be gau ta ia karaia diba lasi. Bena ia bona aposetolo taudia ese Iesu idia rakatania.

¹² Petero bona Ioane be Hahelaga Tauna Badana Ana ena ruma kahirakahira idia gini, unuseniai Iesu idia abia lao idia nanadaia totona. Hutuma ese Iesu be gabu ma ta dekenai idia abia lao neganai, Petero bona Ioane be edia murinai idia raka, to “daudau amo.” (Mat. 26:58; Ioa. 18:12, 13) Petero be mai gari lasi ida hutuma murinai ia raka. Hutuma be tuari kaia bona au idia dogoatao, bona Petero be idia ta ia haberoa vadaeni. To, iniseniai Petero be guna ena Biaguna dekenai ia gwauraia lalokau be ia do hahedinaraia lasi, ia gwau; herevana dahaka do ia vara, mai ena ura ida ena Biaguna ida do ia mase.​—Mar. 14:31.

13. Keriso badinaia dalana tamona be dahaka?

¹³ Petero bamona, hari inai negai momo be “daudau amo” Keriso idia badinaia, unai amo ta ese idia ia itaia lasi. To gabeai Petero ia gwau, Keriso badinaia dalana tamona be ia kahirakahira ita noho, gau ibounai dekenai iena kara ita tohotohoa, herevana dahaka ia vara.​—1 Petero 2:21 duahia.

14. Iesu idia kota henia neganai, Petero be dahaka ia karaia noho?

¹⁴ Petero be Iesu idia dogoatao taudia edia murinai ia raka lao, ela bona Ierusalema ena ruma badana ta ena geiti badinai ia ginidae. Unai be Kaiapa ena ruma, ia be taga tauna bona siahu bada hahelaga tauna badana. Unai bamona rumadia be nega momo ariara ai idia haginia, bona vairana kahanai geiti ia noho. Petero be geiti ai ia ginidae neganai, geiti naria taudia ese ia idia koua. Ioane be hahelaga tauna ia diba dainai geiti lalonai ia vareai vadaeni, to ia giroa lou bona geiti naria kekeni ia hadibaia Petero ia vareai totona. Toana be Petero be Ioane kahirakahira ia noho lasi; bona danu ia be ruma lalonai ia vareai lasi ena Biaguna badinai ia gini totona. Ia be ariara dekenai ia noho, unuseniai hesiai taudia haida be keru dainai lahi badinai idia gini, bona ia be Iesu idia samania koikoi taudia idia raka vareai bona raka-lasi ia itaia noho.​—Mar. 14:54-57; Ioa. 18:15, 16, 18.

15, 16. Iesu ese ia gwauraia peroveta herevana, Petero ese nega toi do ia gwau Iesu ia diba lasi ia guguru dalana herevalaia.

¹⁵ Lahi ena diari ai, geiti naria kekeni ese Petero ena toana ia itaia namonamo diba. Unai dainai Petero dekenai ia gwau: “Oi danu be Iesu, Galilea tauna, oi bamoa!” Petero ia hoa bona ia gwau Iesu ia diba lasi o ia hahedinaraia ia be ena hereva ia lalopararalaia lasi. Petero ia raka lao geiti badinai ia gini, ia ura lasi taunimanima ese ena toana do idia itaia, to kekeni ma ta ese ia itaia bona ia gwau: “Inai tau be guna Nasareta tauna Iesu ia bamoa.” Petero ia gwau: “Unai tauna lau diba lasi!” (Mat. 26:69-72; Mar. 14:66-68) Reana Petero be nega iharuana ia gwau Iesu ia diba lasi neganai, kokoroku ena boiboi ia kamonai, to gau momo ia vara dainai Iesu ese hora haida gunanai ia gwauraia peroveta herevana ia laloaboio.

¹⁶ Nega sisina murinai, Petero ia ura lasi taunimanima ese ia idia itaia. To ariara dekenai idia gini taudia haida be Petero dekenai idia raka lao. Idia ta be Petero ese ena taiana ia utua tauna Malako, ena varavara, ia be Petero dekenai ia gwau: “Lau be oi lau itaia, oi be uma gabu dekenai ia ida oi noho, ani?” Petero ia ura ia hahedinaraia edia hereva be koikoi. Unai dainai idia ia hamaoroa bema iena hereva be koikoi, dika do ia davaria. Unai be nega ihatoina Petero ia gwau Iesu ia diba lasi. Unai hereva ia gwauraia murinai kokoroku ia boiboi, unai be nega iharuana Petero be kokoroku ena boiboi ia kamonai.​—Ioa. 18:26, 27; Mar. 14:71, 72.

17, 18. (a) Petero ia laloparara ia gwau Iesu ia diba lasi neganai, dahaka ia karaia? (b) Petero be reana dahaka ia laloa?

¹⁷ Iesu be ruma amo ia raka-lasi bona dehe ai ia gini, unuseni amo ariara ia itaia diba. Unai nega ai, matamanai ita herevalaia bamona, ia ese Petero ia raraia. Petero ia laloparara ena Biaguna ia durua lasi, mani ena hemami oi laloa. Petero be ariara amo ia raka-lasi, bona ia karaia kerere dainai ia lalohisihisi bada. Ia be hua ena diari ai ia raka lao. Ia karaia kerere dainai ia tai dikadika.​—Mar. 14:72; Luka 22:61, 62.

¹⁸ Ta be unai bamona kerere badana ia karaia neganai, do ia laloa ena kerere be bada bona ta ese ia gwauatao diba lasi. Reana Petero be unai bamona ia laloa danu. To Iesu ese iena dika do ia gwauatao, a?

Petero Ena Kerere be Bada Dainai Iesu ese Ia Gwauatao Diba Lasi, A?

19. Petero be iena kerere ia laloa lou neganai, ena hemami be edena bamona? To, edena bamona ita diba unai ese ena lalona ia hamanokaia lasi?

¹⁹ Petero ia gwau Iesu ia diba lasi murinai, ia lalohisihisi ela bona daba ia rere. Bona unai dina ai idia vara gaudia ese ena lalohisihisi idia habadaia. Iesu be hora momo lalonai idia hahisia bena ia mase murinai, reana Petero be ena kara ia laloa lou neganai ia lalohisihisi bada! Reana ia laloa ia karaia karana ese Iesu ena lalona ia hahisia bada. Ena be Petero ia lalohisihisi bada, to unai ese ena lalona ia hamanokaia lasi. Unai ita diba badina Baibel ia gwau daudau lasi murinai Petero be ena tadikaka ia bamodia lou. (Luka 24:33) Iesu idia dogoatao hanuaboina ai reana aposetolo taudia ibounai be idia karaia karadia dainai idia lalohisihisi bada, bona ta ta idia hagoadaia.

20. Petero ia karaia abia hidi maorona amo dahaka ita dibaia?

²⁰ Ita itaia Petero be abia hidi maorona ia karaia. Bema Dirava ena hesiai tauna ta ia moru, herevana ena dika be bada, to mai anina bada gauna be inai: Ena lalona ia hadaia ena kerere ia hamaoromaoroa totona. (Aonega Herevadia 24:16 duahia.) Ena be Petero ia lalohisihisi bada, to ena tadikaka ida ia hebou karana amo ia hahedinaraia ena abidadama be ia goada. Bema lalohisihisi dainai ta ia lalomanoka, reana ia laloa sibona do ia noho be namo, to unai ese dika ia havaraia diba. (Aon. 18:1) Aonega dalana be tadikaka taihu kahirakahira ita noho, unai amo goada do ita abia Dirava ita hesiai henia noho totona.​—Heb. 10:24, 25.

21. Petero be iena tadikaka ida ia noho dainai, dahaka sivarai ia kamonai?

²¹ Petero be ena tadikaka ida ia noho dainai, ia kamonai Iesu ena tauanina be guria gabuna dekenai ia noho lasi. Petero bona Ioane idia heau lao Iesu idia guria gabuna dekenai. Ioane be mero matamata dainai guria gabuna dekenai ia ginidae guna. Ia itaia iduara ia kehoa, to ia ura lasi raka vareai. To Petero, ena be ia laga tuna to ia be maoromaoro ia raka vareai. Bona ia itaia gau ta ia noho lasi!​—Ioa. 20:3-9.

22. Dahaka dainai Petero ena lalohisihisi bona daradara idia ore?

²² Petero ia abia dae momokani Iesu ia toreisi lou vadaeni, a? Matamanai unai ia abia dae lasi, ena be hahine haida idia gwau aneru be idia dekenai idia hedinarai bona idia hadibaia Iesu be mase amo ia toreisi lou vadaeni. (Luka 23:55–24:11) To adorahi ai, Petero ena lalohisihisi bona daradara ia ore. Iesu be ia mauri, hari ia be siahu bada lauma tauanina ia abia! Ena aposetolo taudia ibounai dekenai ia do hedinarai lasi neganai, gau ta ia karaia. Petero dekenai ia hedinarai guna. Unai dina ai aposetolo taudia idia gwau: “Momokani, Lohiabada be ia toreisi lou vadaeni bona Simona dekenai ia hedinarai!” (Luka 24:34) Unai hegeregerena, aposetolo Paulo be gabeai unai dina ai ia vara gauna ia herevalaia neganai, ia gwau Iesu be “Kepa dekenai ia hedinarai, bena aposetolo taudia 12 dekenai ia hedinarai.” (1 Kor. 15:5) Kepa bona Simona be Petero ena ladadia haida. Unai dina ai, Petero be sibona ia noho neganai, Iesu be ia dekenai ia hedinarai.

23. Dahaka dainai kara dika badadia idia karaia Keristani taudia ese Petero ena sivarai idia laloa be gau badana?

²³ Iesu bona Petero idia hedavari neganai idia vara gaudia be Baibel ese ia herevalaia lasi. To ita diba gauna be Petero ia itaia Lohiabada, ena lalokau tauna ia toreisi lou neganai ia moale bada, bona dala ia noho ena lalohisihisi do ia herevalaia bona ia helalo-kerehai totona. Petero ia ura Iesu ese ena dika do ia gwauatao. Ita diba Iesu be Petero ena dika ia gwauatao momokani. Hari inai negai kara dika badadia idia karaia Keristani taudia ese Petero ena sivarai idia laloa be gau badana. Namo lasi ita gwau Dirava ese iseda dika do ia gwauatao lasi. Iesu be ena Tamana, “kara dika ibounai do ia gwauatao momokani” Tauna, ena kara ia hahedinaraia.​—Isa. 55:7.

Gau Momo ese Idia Hamomokania Iesu be Petero Ena Dika Ia Gwauatao

24, 25. (a) Galilea Gohuna ai Petero be hanuaboi ai gwarume ia abia ena sivarai gwauraia. (b) Daba ai Iesu ese ia karaia hoa karana dainai Petero be dahaka ia karaia?

²⁴ Iesu be ena aposetolo taudia ia hamaoroa Galilea dekenai idia lao, bona unuseniai ia do idia hedavari henia. Idia ginidae neganai, Petero ia ura Galilea Gohuna dekenai ia lao gwarume ia abia totona. Aposetolo taudia ma haida be ia ida idia lao. Guna Petero be nega momo unai gohu dekenai ia lao. Petero be reke ia dogoatao bona hurehure ese bouti ia botaia ena regena ia kamonai neganai, guna ia karaia gaudia ia laloa bona unai ese ia hamoalea. Unai hanuaboi ai gwarume ta idia abia lasi.​—Mat. 26:32; Ioa. 21:1-3.

²⁵ To, daba ia rere neganai, tau ta be kone dekenai ia gini bona idia ia boiria reke be bouti ena kahana ma ta dekenai idia negea diho totona. Unai hereva idia badinaia bena gwarume 153 idia abia! Petero ia diba unai tauna be daika. Bouti amo ia diho bona kone dekenai ia nahu lao. Kone dekenai idia ginidae neganai, Iesu ese lahi ai ia gabua gwarume be idia dekenai ia henia idia ania totona. Ia be Petero ia hereva henia.​—Ioa. 21:4-14.

26, 27. (a) Iesu ese dala ia kehoa Petero be nega toi dahaka do ia hamomokania totona? (b) Iesu be dahaka ia karaia unai amo ia hamomokania Petero ena dika ia gwauatao?

²⁶ Iesu ese Petero ia nanadaia bema ia be ena Lohiabada ia lalokau henia eiava ena haoda gaukarana ia ura henia bada. Petero ena haoda gaukarana ese Iesu lalokau henia karana do ia hereaia, a? Petero be nega toi ia gwau ena Lohiabada ia diba lasi dainai, hari Iesu be dala ia kehoa Petero be nega toi ena turadia edia vairanai do ia hamomokania ia be Iesu ia lalokau henia. Petero be unai bamona ia karaia neganai, Iesu ese unai bamona lalokau do ia hahedinaraia dalana ia herevalaia: Petero be iena hesiai gaukara helagana do ia atoa guna, Keriso ena mamoe, iena kamonai hesiai taudia unai, do ia naria, hagoadaia bona ubua.​—Luka 22:32; Ioa. 21:15-17.

²⁷ Unai dala amo Iesu ese ia hamomokania Petero be ia bona ena Tamana totona gaukara momo do ia karaia. Petero be Keriso ena hakaua henunai kongrigeisen lalonai gaukara badana do ia karaia. Unai ese ia hahedinaraia goevagoeva Iesu be Petero ena dika ia gwauatao momokani! Oibe, Petero be unai hebogahisi karana ia mamia momokani, bona unai ese ia hagoadaia bada.

28. Edena dala ai Petero be ena ladana hegeregerena ia kara?

²⁸ Petero be mai abidadama ida lagani momo lalonai ena hesiai gaukara ia karaia. Ia ese ena tadikaka ia hagoadaia, Iesu ia do mase lasi hanuaboina ai ia hagania hegeregerena. Petero be mai manau bona haheauka ida Keriso idia badinaia taudia ia naria bona ubua. Simona be Iesu ese ia dekenai ia henia ladana, Petero o Nadi hegeregerena, ia gini goada bona kongrigeisen ia durua namonamo. Idia vara gau namodia momo be Petero ese ena revareva rua lalonai ia torea bona Baibel ai idia noho. Danu, unai revareva ese idia hahedinaraia Petero be Iesu ese ena dika ia gwauatao karana amo ia dibaia gaudia ia laloaboio lasi.​—1 Petero 3:8, 9; 4:8 duahia.

29. Edena dala ai Petero ena abidadama karana bona ena Biaguna ena hebogahisi karana ita tohotohoa diba?

²⁹ Ita danu be unai kara amo gau ta ita dibaia. Dina ta ta ai Dirava ita noia iseda kerere idauidau ia gwauatao totona, a? Ita abia dae Dirava be iseda dika ia gwauatao bona iena vairanai ita goeva lou, a? Bona ita ese ma haida edia dika ita gwauatao, a? Bema unai bamona ita karaia, ita be Petero ena abidadama karana bona Iesu ena hebogahisi karana ita tohotohoa.