Paulo Ena Taihuna Ena Natuna Mero Ia Gari Lasi

Mero ta ese ena vavana ia hamauria sivaraina mani ita herevalaia. Unai mero ena vavana be aposetolo Paulo. Ita ese unai mero ena ladana ita diba lasi, to ita diba unai mero ese kara namona ta ia karaia. Oi ura ia karaia gauna oi diba, a?​—

Paulo be Ierusalema ena dibura ruma ai ia noho. Tuari taudia ese ia idia dogoatao badina ia be Iesu ia harorolaia. Tatau haida be Paulo idia inai henia dainai ia idia hamasea totona palani idia karaia. Idia gwau: ‘Namona be tuari biaguna do ita noia iena tuari taudia do ia hamaoroa Paulo be kota gabuna dekenai do idia hakaua lao. To, ita be dala dekenai do ita hunia, bena Paulo ia hanaia neganai do ita hamasea!’

Paulo ena taihuna ena natuna mero ese edia palani ia kamonai. Ia be dahaka do ia karaia? Paulo dekenai ia lao bona ia hadibaia. Maoromaoro Paulo ese unai mero ia hamaoroa, tuari biaguna dekenai gau ibounai do ia gwauraia hedinarai. Oi laloa unai mero be tuari biaguna ia hereva henia totona do ia gari, a?​— Oibe, badina tuari biaguna be ladana bada tauna. To, unai mero be mai gari lasi ida tuari biaguna ia hereva henia.

Unai tuari biaguna be ia diba vadaeni dahaka do ia karaia. Ia ese tuari taudia 500 bamona ia siaia Paulo idia gimaia totona! Ia hamaorodia unai hanuaboi ai Paulo be Kaisarea dekenai do idia abia lao. Paulo ia mase, a?​— Lasi, unai tatau dikadia ese ia idia alaia lasi! Edia palani ia guguru lasi.

Unai sivarai amo dahaka oi dibaia?​— Oi danu gari lasi karana oi hahedinaraia diba, Paulo ena taihuna ena natuna merona ia karaia bamona. Namona be mai gari lasi ida ma haida dekenai Iehova ita herevalaia. Oi be mai gari lasi ida Iehova oi herevalaia diba, a?​— Bema unai bamona oi karaia, oi ese ma ta oi hamauria diba.