Emui Natudia Hadibaia

Paulo Ena Taihuna Ena Natuna Merona​—⁠Ena Vavana Ia Hamauria

APOSETOLO Paulo ena bese haida be Iesu ena murinai idia raka; idia oi diba, a?a​​—⁠ Idia be iena taihuna bona ena natuna merona. Unai mero be ena vavana Paulo ia hamauria! Unai mero bona ena sinana edia ladana ita diba lasi, to unai mero ese ia karaia karana ena sivarai ita diba. Oi ura unai sivarai oi kamonai, a?​​—⁠

Paulo be ena misinari laolao ihatoina ia haorea bona ia giroa lou Ierusalema ai ia noho. Reana unai be lagani 56 C.E. Unai negai Paulo idia dogoatao idia kota henia totona. To, Paulo idia inai henia taudia be kota idia ura lasi, to idia ura Paulo ia mase! Unai dainai, palani idia karaia tatau 40 bamona be dala ai do idia naria, Paulo idia alaia totona.

To Paulo ena taihuna ena natuna be unai ia kamonai. Ia karaia gauna oi diba, a?​​—⁠Ia be Paulo dekenai ia lao bona ia hadibaia. Maoromaoro Paulo be ami opesa ta ia hamaoroa: “Inai mero be tuari biaguna dekenai oi hakaua lao, badina ia be mai ena hereva ta.” Unai opesa ese mero be tuari biaguna, Klaudio Lusia, dekenai ia hakaua lao bona ia hamaoroa unai mero be mai ena hereva badana ta. Klaudio ese unai mero ena imana ia abia ia hakaua siri, bona unai mero ese gau ibounai be ia dekenai ia gwauraia hedinarai.

Klaudio ese unai mero ia hamaoroa ia gwau: “Hari oi hereva lau dekenai gaudia, tau ta dekenai oi hamaoroa lasi.” Bena ia ese opesa rua ia boiria bona ia hamaorodia tuari taudia 200, hosi guia taudia 70, bona io idia dogoatao taudia 200 do idia abia hegaegae, Kaisarea dekenai idia raka lao totona. Hanuaboi 9 o’klok ai, unai tatau 470 be Paulo idia hakaua lao Kaisarea dekenai, bona idia ese Paulo be Roma ena Gavana Feliki dekenai idia henia. Klaudio be revareva ta amo Feliki dekenai Paulo alaia palanina ena sivarai ia gwauraia hedinarai.

Unai dainai, Iuda taudia be Kaisarea dekenai do idia lao bona kota vairanai Paulo samania herevana do idia gwauraia hedinarai. To, Paulo be kerere ta ia karaia lasi dainai, edia samania hereva hamomokania dalana ta be lasi. Danu lagani rua Paulo be dibura ruma ai ia noho be maoro lasi. Paulo ia noinoi iena kota be Roma ai do idia karaia be namo, unai dainai unuseniai ia idia siaia lao.​​—⁠Kara 23:⁠16–​24:27; 25:​8-​12.

Paulo ena taihuna ena natuna merona ena sivarai amo dahaka ita dibaia?​​—⁠ Mai gari lasi ida hereva momokanidia ita gwauraia hedinarai be namo, bona unai bamona ita karaia neganai haida ita hamauria diba. Ena be Iesu ia diba iena inai taudia be “ia idia alaia mase dalana idia tahua noho,” to ia be taunimanima dekenai Dirava ena Basileia ia harorolaia noho. Iesu ese ita ia hamaoroa unai bamona ita karaia totona. Unai gaukara ita karaia diba, a? Oibe, unai ita karaia diba bema ita gari lasi, Paulo ena taihuna ena natuna merona ia karaia bamona.​​—⁠Ioane 7:1; 15:13; Mataio 24:14; 28:​18-​20.

Paulo ese ena turana Timoteo ia hagoadaia, ia gwau: “Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.” (1 Timoteo 4:​16) Momokani, Paulo ena taihuna ena natuna merona be unai siri ena hereva​—⁠ena vavana ena hagoadaia hereva​—⁠ia badinaia. Oi danu be unai bamona do oi karaia, a?

[Footnote]

Henanadai:

○ Paulo ena varavara taudia haida be daidia, bona idia dekenai dahaka ita dibaia?

○ Paulo ena taihuna ena natuna be dahaka ia karaia Paulo ia hamauria totona?

○ Dahaka ita karaia diba Iesu ita badinaia totona, unai amo hari inai negai ma haida ita hamauria diba?