Dirava Amo Idia Mai Sivarai rua

Ita gwau diba Baibel be Dirava ena hereva. Iseda guba Tamana ese Baibel ia henia ita ia hadibaia totona. Lagani 2,000 mai kahana gunanai, aneru ta ese taunimanima haida dekenai mai anina bada sivarai rua ia abia lao. Unai aneru ena ladana be Gabriela, ia be ‘Dirava vairanai ia gini.’ (Luka 1:19) Edena bamona negadia ai unai aneru ese inai mai anina bada sivaraidia ia gwauraia?

Lagani 3 B.C.E. bamona ai unai ia vara. Gabriela ese sivarai ginigunana be edeseniai ia gwauraia? Iudea ena ororo gabudia, reana Ierusalema kahirakahira ai, Iehova ena hahelaga tauna ta ladana Sekaraia be unuseniai ia noho. Ia bona ena adavana, Elisabeta, be idia buruka vadaeni, bona idia be natudia lasi. Vadaeni Sekaraia ena nega ia ginidae, Ierusalema dekenai, Dirava ena dubu ai hahelaga tauna ena gaukara ia karaia totona. Sekaraia be dubu helaga lalonai ia noho neganai, Gabriela be bonana namo muramura patana badinai Sekaraia dekenai ia hedinarai.

Unai nega ai, Sekaraia ia gari bada. To, aneru ia gwau: “Sekaraia e, oi gari lasi, badina Dirava ese emu noinoi ia kamonai vadaeni, bona emu adavana Elisabeta be emu natuna mero ta do ia havaraia, bona ena ladana do oi hatoa Ioane.” Danu, Gabriela ia gwau “Iehova vairanai ia be ladana badana do ia abia” bona “Iehova totona taunimanima do ia abia hegaegae.”​—Luka 1:13-17.

To Sekaraia ese unai ia hamomokania lasi. Dahaka dainai? Badina ia bona Elisabeta be idia buruka vadaeni. Unai dainai, Gabriela ese ia hamaoroa: “Oi be do oi hereva lasi ela bona inai gaudia ibounai idia vara, badina egu hereva oi abia dae lasi.”​—Luka 1:20.

Unai nega lalonai, dubu murimuri dekenai idia naria taudia be idia laloa, dahaka dainai Sekaraia be dubu helaga lalonai ia noho daudau. To ia raka-lasi neganai, ia hereva diba lasi. Sekaraia be ena imana amo saini ia karaia sibona. Unai ese ia hamomokania, dubu helaga lalonai ia be gau idauna ta ia itaia.

Sekaraia be dubu helaga dekenai ena hesiai gaukara ia karaia ore murinai, ena ruma dekenai ia giroa lou. Bena gabeai Elisabeta ia rogorogo! Hua 5 lalonai, Elisabeta be ruma dekenai ia noho, bona ena natuna ena vara negana ia naria.

Gabeai, Gabriela be nega iharuana ia hedinarai lou. Daika dekenai? Ia headava lasi kekeni, ladana Maria dekenai ia hedinarai. Ia be Ierusalema ena not kahana ena hanua, Galilea, ena siti ladana Nasareta dekenai ia noho. Aneru be dahaka ia gwau? Ia gwau: “Dirava ese oi ia lalonamo henia.” Gabriela ese Maria ma ia hamaoroa: “Kamonai! Oi be do oi rogorogo bona natuna mero ta do oi havaraia bona iena ladana do oi hatoa Iesu.” Gabriela ma ia gwau: “Ia be hairai bada do ia abia bona do idia gwauraia Ataiai Momokani Diravana ena Natuna, . . . bona Iakobo ena bese do ia lohiaia ela bona hanaihanai, bona ena Basileia be do ia doko lasi.”​—Luka 1:30-33.

Reana ita gwau diba Gabriela be ia moale bada herea, badina unai sivarai rua ia gwauraia hedinarai. Ioane bona Iesu edia sivarai ma haida ita duahia neganai, unai sivarai rua be mai anina bada ena badina do ita lalopararalaia.