Idia Raka Maoromaoro Dainai Davana Namona Idia Davaria
IEHOVA ese ena abidadama hesiai taudia ia hanamodia bona davana namona ia henidia. Dirava ese ena ura do ia hagugurua totona, reana idia naria daudau, to iena hahenamo idia davaria neganai, idia moale bada!
Lagani tausen rua gunanai bamona, unai ia hedinarai goevagoeva Arona ena bese taudia, Iuda hahelaga tauna Sekaria bona ena adavana, Elisabeta, edia sivarai lalonai. Dirava ia gwauhamata, ia gwau bema Israel taudia be mai edia abidadama danu ena hesiai gaukara do idia karaia, ia ese natudia momo do ia henidia. Ia gwau natudia be harihari gaudia. (Levitiko 26:9; Salamo 127:3) To, Sekaria bona Elisabeta be natudia lasi, bona idia buruka vadaeni.—Luka 1:1-7.
Baibel lalonai ia gwau Sekaria bona Elisabeta “ruaosi be kara maoromaoro taudia Dirava ena vairana dekenai, [Iehova] ena taravatu bona ena hereva ibounai idia badinaia momokani.” (Luka 1:6) Idia ese Dirava idia lalokau henia bada dainai, kara maoromaoro dalana idia badinaia bona iena taravatu idia badinadia be metau gauna lasi.—1 Ioane 5:3.
Idia Diba Lasi Do Idia Mai Hahenamodia
Namona be lagani 3 B.C.E. ena gara lou negana ena dokona eiava siahu negana ia matamaia negana ita laloa, Heroda Badana be Iudea hanua ia lohiaia, bona ia be edia pavapava. Dina ta ai, hahelaga tauna Sekaria be Ierusalem dubuna ena Helaga gabuna dekenai ia vareai. Taunimanima be dubu murimurina ai idia guriguri noho neganai, ia ese golo patana latanai muramura mai bonana namona ia gabua. Dina ta ta edia hahelaga gaukara iboudiai amo reana unai gaukara ia helaga momokani, boubou gauna idia henia murinai unai muramura idia gabua. Ena mauri ibounai lalonai hahelaga tauna be reana nega tamona sibona unai gaukara ia karaia diba.
Sekaria ia itaia gauna dainai ia hoa. Iehova ena aneru ta be muramura atoa patana ena idibana kahana dekenai ia gini! Unai hahelaga buruka tauna ia lalo-hekwarahi bona ia gari. To unai aneru ia gwau: “Sekaria, oi gari lasi, Dirava ese oiemu guriguri ia kamonai vadaeni. Oiemu adavana Elisabeta ese oiemu natuna ta do ia abia, iena ladana do oi hatoa Ioane.” Oibe, Iehova ese Elisabeta bona Sekaria edia guriguri goada karana ia kamonai henia.—Luka 1:8-13.
Unai aneru ma ia gwau: “Do umui moale bada herea, taunimanima momo danu, ia be do ia vara dainai, do idia moale. Badina be [Iehova] ena vairana dekenai ia be do tau badana ta. Ia be uaina eiava kekero muramura do ia inua lasi, bona ena sinana bogana dekenai ia noho neganai Lauma Helaga ese do ia abia.” Ena mauri ibounai lalonai Ioane be Nasiri tauna bona Dirava ena lauma helaga ese ia hahonua. Unai aneru ma ia gwau: ‘Ia ese Israel taudia momo do ia hakaudia lou Iehova edia Dirava dekenai. Ia be Dirava ena hesiai tauna do ia lao, mai goadana bona mai siahuna, Elia peroveta tauna ena kara hegeregerena. Ia ese tamadia edia lalona do ia hagiroa, vadaeni edia natudia danu do idia noho hebou mai laloa tamona. Kamonai lasi taudia dekenai aonega do ia henidia, abidadama taudia do idia lao. Iehova totona bese taudia do ia abidia hegaegae.’—Luka 1:14-17.
Sekaria ia henanadai, ia gwau: “Inai be edena bamona do lau diba? Lau be buruka tauna, egu adavana danu ia buruka vadaeni.” Aneru ia haere, ia gwau: “Lau be Gabriela, lau be Dirava ena vairana dekenai lau gini. Dirava ese lau ia siaia, oi dekenai lau hereva, bona oi dekenai inai sivarai namona lau hamaoroa totona. To egu hereva namona oi hamomokania lasi. Unai dainai oiemu uduna do ia koua, oi be do oi hereva diba lasi, ela bona lauegu hereva gaudia ibounai do idia vara. Lauegu hereva gaudia be edia nega korikori dekenai do idia vara momokani.” Sekaria be dubu ena helaga gabuna amo ia raka lasi neganai, ia hereva diba lasi, bona taunimanima idia diba ia ese hoa gauna ta ia itaia. Ena lalohadai do ia hahedinaraia totona, toa amo eiava imana ia gaukaralaia ia hadibadia totona. Ena gaukara dinadia idia ore neganai, sibona ena hanua dekenai ia giroa lao.—Luka 1:18-23.
Idia Moale Ena Badina
Gwauhamata hereva hegeregerena, daudau lasi murinai, Elisabeta ia moale. Ia rogorogo, unai neganai gabani ena hemarai ia ore. Ena varavara hahinena, Maria, danu be ia moale, badina unai aneru tamona, Gabriela, be ia dekenai ia gwau: “Maria e, oi gari lasi, badina be oi dekenai Dirava ia moale vadaeni. Oi be do oi rogorogo, mero ta do oi abia, ena ladana do oi hatoa Iesu. Ia be do ia tau bada herea momokani, ia be Dirava Ataiai Momokani ena Natuna do idia gwauraia, [Iehova] Dirava ese ena tamana Davida ena king dagina do ia henia.” Maria ia ura “[Iehova] ena hesiai hahine” gaukarana ia karaia.—Luka 1:24-38.
Karaharaga Maria be Sekaria bona Elisabeta edia ruma dekenai ia lao, unai be siti ta, Iudea tanona ororo kahana dekenai. Maria be Elisabeta ia hanamoa neganai, Elisabeta ena bogana lalonai ena natuna ia marere. Dirava ena lauma helaga ena siahu henunai, Elisabeta ia hereva badabada, ia gwau: “Hahine ibounai huanai oi sibona be namo herea! Oi do oi havaraia merona danu be do namo bada herea! Lauegu namo be dahaka be lauegu Lohiabada ena sinana ese lau dekenai ia vadivadi inai? Be, oiemu hanamoa ena mamina lauegu taiana dekenai ia vareai neganai, lauegu natuna be egu bogana dekenai ia marere, mai moale danu. Abidadama hahinena e, oi namo vadaeni. Badina be [Iehova] dekena amo oi kamonai herevadia be do idia momokani.” Maria be mai moale danu ia haere henia. Maria be Elisabeta danu hua toi bamona ia noho.—Luka 1:39-56.
Ioane Ia Vara
Nega korikori dekenai buruka taudia Elisabeta bona Sekaria edia natuna merona ia vara. Dina namba 8 dekenai, mero ena kopina idia utua. Varavara taudia idia ura unai mero ladana idia hatoa Sekaria, to Elisabeta ia gwau: “Lasi, iena ladana be Ioane.” Ena adavana ia do hereva diba lasi, ia ese ena hahine ena hereva ia abia dae, a? Gau ta dekenai ia toretore, ia gwau: “Iena ladana be Ioane.” Unai neganai, Sekaria ena malana ia maoro, vadaeni ia hereva, Iehova ia hanamoa.—Luka 1:57-66.
Lauma helaga ena siahu ese ia hahonua, bona unai moale hahelaga tauna ese peroveta herevana ia gwauraia. Ia gwau idia gwauhamatalaia Hahemauri Tauna—‘David ena iduhu amo ia haginia hahemauri tauna’—be ia gini vadaeni, Abraham ia abia gwauhamatana hegeregerena, bona unai Garana be bese iboudiai do ia hanamodia. (Genese 22:15-18) Ia be Mesia ena dala ia lailaia dainai, Sekaria natuna be hoa dalana amo ia vara bona ia ese ‘Iehova ena vairana dekenai do ia raka, mauri dalana iena bese taudia dekenai do ia hadibadia totona.’ Lagani idia ore idia lao, bona Ioane ia tubu daekau bona ena tauanina bona ena lalona danu idia goada.—Luka 1:67-80.
Davana Bada Idia Abia
Sekaria bona Elisabeta edia abidadama bona edia haheauka karadia dainai idia be haheitalai namodia. Ena be idia naria daudau, to mai edia abidadama danu Iehova idia hesiai henia noho, bona idia buruka vadaeni neganai, hahenamo badana momokani idia davaria.
Oibe, Elisabeta bona Sekaria idia davaria hahenamo be bada herea momokani! Dirava ena lauma helaga ena siahu henunai, idia ruaosi be peroveta herevana idia gwauraia. Mesia ena dala ia lailaia tauna, Ioane Bapatiso, ena tamana bona sinana ai idia lao bona idia hadibaia be hahenamo badana. Danu, Dirava ese kara maoromaoro taudia ia gwauraidia. Unai hegeregerena, hari inai negai, bema taunimanima ese Dirava ena ura idia badinaia, kara maoromaoro taudia do ia gwauraidia danu, bona Iehova ena taravatu idia badinadia namonamo neganai, hahenamo momo do idia davaria.