Elisabeta be mai Ena Beibi

Ierusalema ena magu idia haginia bona lagani 400 mai kahana ia hanaia murinai, hahelaga tauna Sekaraia bona ena adavana Elisabeta be Ierusalema siti kahirakahira idia noho. Idia be lagani momo idia headava to idia be natudia lasi. Dina ta, Sekaraia be dubu helaga ai bonana namo muramura ia gabua lalonai aneru Gabriela ia hedinarai. Sekaraia be ia gari, to Gabriela ia gwau: ‘Oi gari lasi. Iehova amo sivarai namona lau abia mai. Emu adavana Elisabeta be natuna mero ta do ia havaraia, ena ladana be Ioane. Iehova ese Ioane ia abia hidi spesel gaukara ta totona.’ Sekaraia ia henanadai: ‘Edena bamona emu hereva do lau hamomokania? Lau bona egu adavana be ai buruka vadaeni.’ Gabriela ia gwau: ‘Dirava ese lau ia siaia oi dekenai inai sivarai lau gwauraia totona. To egu hereva oi abia dae lasi dainai, oi be do oi hereva lasi ela bona beibi ia vara.’

Sekaraia be dubu helaga lalonai ia noho daudau. Bena ia raka-lasi neganai, murimuri ai idia naria noho taudia idia ura diba dahaka ia vara. Sekaraia ia hereva diba lasi. Iena imana amo saini ia karaia. Bena taunimanima idia laloparara Sekaraia be Dirava amo sivarai ta ia abia.

Gabeai, Elisabeta ia rogorogo bona beibi mero ia havaraia, aneru ena hereva hegeregerena. Elisabeta ena turadia bona varavara be beibi itaia totona idia mai. Elisabeta dekenai idia moale bada. Elisabeta ia gwau: ‘Iena ladana be Ioane.’ Idia gwau: ‘Unai ladana Ioane be emu varavara ta ena ladana lasi. Iena tamana ena ladana Sekaraia umui hatoa.’ To Sekaraia be inai hereva ia torea: ‘Ioane be iena ladana.’ Unai nega ai, Sekaraia ia hereva matamaia lou! Iuda ena gabu ibounai dekenai beibi ena sivarai idia kamonai, bona taunimanima idia laloa: ‘Inai natuna be edena bamona tauna ai do ia lao?’

Bena Sekaraia be lauma helaga amo ia honu. Ia peroveta: ‘Iehova hanamoa. Aberahamo dekenai ia gwauhamata, hamauria tauna, Mesia unai, do ia siaia ita ia hamauria totona. Ioane be peroveta tauna ai do ia lao, bona ia ese Mesia ena dala do ia hegaegaelaia.’

Spesel gauna ma ta be Elisabeta ena varavara ta, Maria dekenai ia vara. Karoa 69 ai unai do ita itaia.