Taunimanima Haoda Henia Taudia Ai Idia lao

Nasareta taudia idia ura Iesu idia hamasea dainai, ia be Kaperanauma dekenai ia lao, unai be Galilea Gohuna kahirakahira, idia gwauraia danu “Genesareta gohuna.” (Luka 5:1) Unai ese Isaia bukana ai ia noho peroveta herevana ia hagugurua, ia gwau gohu badinai idia noho Galilea taudia ese diari badana do idia itaia.​—Isaia 9:1, 2.

Oibe, Galilea ai Iesu be ia haroro, ia gwau “guba Basileia be ia kahirakahira vadaeni.” (Mataio 4:17) Iesu ese ena hahediba taudia 4 ia davaria. Idia be guna ia idia bamoa, to Iesu ida Iudea amo idia giroa neganai, edia haoda bisinesi dekenai idia giroa. (Ioane 1:35-42) To hari Iesu idia bamoa hanaihanai be namo, unai amo idia ia treinia diba, badina gabeai ia noho lasi neganai idia ese unai gaukara do idia karaia.

Iesu be kone dekenai ia raka lao neganai, Simona Petero mai ena tadikaka Andrea, bona edia bamodia ia itaia, edia reke idia huria noho. Iesu ia lao, Petero ena bouti dekenai ia guia, bona ia noia kone amo do idia lao daudau sisina. Unai idia karaia murinai, Iesu ia helai bona kone dekenai idia haboua taudia dekenai Basileia ena hereva momokanidia ia hadibaia matamaia.

Gabeai, Iesu be Petero dekenai ia gwau: “Dobu kahana dekenai ita lao bona emui reke umui atoa diho, gwarume abia totona.” Petero ia gwau: “Hadibaia Tauna e, hanuaboi ibounai ai hekwarahi bada to gau ta ai abia lasi, to oi hereva dainai reke do lau atoa diho.”​—Luka 5:4, 5.

Reke idia atoa diho neganai, gwarume momo herea idia abia bona edia reke idia hedare matamaia! Karaharaga, edia turadia bouti ma ta dekenai idia boiria, heduru totona. To unai bouti rua be gwarume amo idia honu dainai, idia mutu matamaia. Petero be unai ia itaia neganai, Iesu vairanai ia tui diho, bona ia gwau: “Lohiabada e, lau amo oi siri, badina lau be kara dika tauna.” Iesu ia gwau: “Oi gari lasi. Hari nega amo oi be taunimanima do oi haoda henia.”​—Luka 5:8, 10.

Iesu ese Petero bona Andrea ia hamaoroa: “Lau murinai umui mai, bona umui be taunimanima haoda henia taudia ai do lau halaoa.” (Mataio 4:19) Bena Iesu ese haoda taudia ma rua ia boiria, idia be Sebedeo ena natudia Iamesi bona Ioane. Idia danu be mai ura ida Iesu idia badinaia. Vadaeni idia 4 be edia haoda bisinesi idia rakatania, bena Iesu ena ful-taim hahediba taudia ginigunadia ai idia lao.