Iesu be Haoda Tatau Dekenai Ia Hedinarai

Iesu be aposetolo taudia dekenai ia hedinarai bona nega sisina murinai, Petero be haoda totona Galilea Gohuna dekenai ia lao. Toma, Iamesi, Ioane, bona hahediba taudia ma haida be ia ida idia lao. Hanuaboi ibounai idia haoda, to gwarume ta idia abia lasi.

Daba momokani ai, idia itaia tau ta be kone ai ia gini. Idia dekenai ia boiboi: ‘Gwarume haida umui abia, a?’ Idia haere: “Lasi!” Bena unai tauna ia gwau: “Bouti ena idiba kahanai reke umui negea.” Unai idia karaia neganai, idia hegeregere lasi reke idia abia isi totona badina gwarume be momo herea. Maoromaoro Ioane ia laloparara unai tauna be Iesu bona ia gwau: “Ia be Lohiabada!” Karaharaga, Petero be ranu dekenai ia paudobi bona ia nahu lao. Hahediba taudia haida be bouti amo idia badinaia.

Kone dekenai idia ginidae neganai, lahi gida latanai beredi bona gwarume idia itaia. Iesu ese gwarume haida ia noia. Bena ia gwau: ‘Umui mai bona aniani.’

Idia aniani murinai, Iesu ese Petero ia nanadaia: ‘Lau eiava inai gwarume oi lalokau henia bada?’ Petero ia gwau: ‘Oibe, Lohiabada, oi diba oi lau lalokau henia.’ Iesu ia gwau: ‘Lauegu mamoe natudia oi ubua.’ Iesu ia henanadai lou: ‘Petero e, lau oi lalokau henia, a?’ Petero ia gwau: ‘Lohiabada e, oi diba oi lau lalokau henia.’ Iesu ia gwau: “Lauegu mamoe natudia oi naria.” Nega ihatoina Iesu ia henanadai. Bona Petero ia lalohisihisi. Ia gwau: ‘Lohiabada e, oi be gau ibounai oi diba. Oi diba oi lau lalokau henia.’ Iesu ia gwau: “Lauegu mamoe natudia oi ubua.” Bena Petero ia hamaoroa: “Lau oi badinaia noho.”