Taunimanima Haoda Henia Hesiai Gaukarana
“Iesu ese Simona dekenai ia hamaoroa ia gwau, ‘Oi gari lasi, inai murinai be do oi haoda, taunimanima do oi abia.’ ”—LUKA 5:10.
1, 2. (a) Idau negai ia mai hari, haoda gaukara ena anina be edena bada? (b) Guna, lagani tausen rua bamona, taunimanima ese idia karaia haoda gaukara matamatana be dahaka?
LAGANI tausen momo lalonai, aniani abia totona taunimanima be davara, gohu, bona sinavai dekenai idia haoda. Idau negai Aigupito dekenai, Naila sinavai amo taunimanima ubua totona gwarume idia abia be heduru bada. Mose ena nega lalonai, Naila sinavai ena ranu be rara ai ia lao neganai, Aigupito taudia idia hekwarahi bada badina ranu ia dika sibona lasi, to gwarume idia mase dainai aniani dekenai idia dabu. Gabeai, Sinai dekenai, Iehova ese Israel dekenai Taravatu ia henia neganai, ia hamaorodia gwarume haida idia ania diba, to ma haida be idia ania diba lasi badina idia be miro gaudia dainai. Unai ese ia hahedinaraia Israel taudia be Gwauhamata Tanona dekenai idia vareai neganai, idia be gwarume do idia ania diba, unai dainai idia haida be haoda taudia.—Esodo 7:20, 21; Levitiko 11:9-12.
2 To, guna, lagani tausen rua bamona, taunimanima ese haoda gaukara ma ta idia karaia hamatamaia. Lauma dalanai idia haoda bona unai haoda gaukara be haoda taudia sibona ia durua lasi, to gwarume ia durua danu! Hari inai negai, unai bamona haoda gaukarana idia do karaia noho, bona tanobada ibounai dekenai taunimanima milion momo ia durudia bada herea.
“Taunimanima Do Oi Abia”
3, 4. Iesu Keriso ena hereva idia ura bada kamonai henia haoda taudia rua be daidia?
3 Lagani 29 C.E. ai, Ioane Bapatiso ese Ioridane sinavai dekenai, lauma dalanai unai haoda gaukarana do ia hamatamaia Tauna ia bapatiso henia; unai tau be Iesu. Pura haida murinai, Ioane ese ena hahediba taudia rua dekenai Iesu ia duduia, bona ia gwau: “Umui itaia, Dirava ena Mamoe Natuna be inai.” Unai hahediba tauna ta ena ladana be Andrea, bona kara haraga ena kakana Simona Petero ia hamaoroa: “Ai be Mesia ai davaria vadaeni”! Andrea bona Simona be haoda taudia.—Ioane 1:35, 36, 40, 41; Mataio 4:18, 19.
4 Nega sisina daudau murinai, Iesu be Galilea Gohuna badinai, Petro bona Andrea edia noho gabuna kahirakahira unai, taunimanima momo ia haroro henidia. Ia ese taunimanima ia hamaorodia, ia gwau: “Emui lalona umui giroa, badina be Guba Basileia kahirakahira ia mai vadaeni.” (Mataio 4:13, 17) Reana Petro bona Andrea idia ura dikadika iena hereva idia kamonai henia. To, reana, idia diba lasi Iesu ena hereva dainai gabeai edia mauri dalana do idia haidaua momokani. Danu, hari inai negai, Iesu ena hereva bona ena kara be mai anina bada ita ibounai dekenai.
5. Haoda tauna Petro ese Iesu ia durua dalana be dahaka?
5 Ita duahia, ia gwau: “Dina ta Genesareta gohu kone dekenai Iesu ia gini neganai taunimanima momo ia dekenai idia gini hegegea, Dirava ena hereva kamonai totona. Ia ese vanagi rua ia itaia, kone ena badinai idia gini noho. Vanagi taudia be kone dekenai edia reke idia hanamoa.” (Luka 5:1, 2) Unai nega lalonai, haoda taudia be hanuaboi kahanai edia haoda gaukara idia karaia, bona unai taudia be hanuaboi dekenai idia haoda dainai edia reke idia hagoevaia. Iesu ia laloa taunimanima hutuma do ia haroro henidia namonamo totona, namona be edia vanagi ia gaukaralaia. “Iesu ese Simona ena vanagi dekenai ia guia. Ia ese Simona ia hamaoroa vanagi be sisina do ia doria lao kone dekena amo. Vadaeni vanagi dekenai ia helai diho, taunimanima momo dekenai ia hadibaia.”—Luka 5:3.
6, 7. Haoda gaukarana dekenai Iesu be dahaka hoa karana ia karaia, bona murinai iena hereva haoda gaukarana dekenai be dahaka?
6 Iesu ese taunimanima momo ia hadibaia, to unai sibona lasi, ena ura ma ta danu ia noho. “Iena hereva ia hadokoa, vadaeni ia ese Simona dekenai ia hamaoroa, ia gwau: ‘Dobu kahana dekenai ita lao, emui reke do umui atoa diho, gwarume do umui abia totona.’ ” Inai umui laloa, unai haoda taudia be hanuaboi ibounai dekenai idia haoda vadaeni. Ita hoa lasi Petro ia haere henia, ia gwau: “Egu biaguna e, ai be ai hekwarahi mase ia mai daba ia rere, gwarume ta ai abia lasi, to oiemu hereva dainai reke be do ai atoa diho.” Unai idia karaia neganai dahaka ia vara? “Vadaeni idia atoa diho, gwarume momo herea idia abia. Edia reke be kahirakahira ia darea. Vadaeni idia boiboi, edia turana vanagi ta dekena amo do idia mai durua henia totona. Idia mai, vadaeni vanagi ruaosi idia honu, kahirakahira idia mutu.”—Luka 5:4-7.
7 Iesu ese hoa karana ta ia karaia unai. Hanuaboi ibounai lalonai unai gabu dekenai gwarume idia noho lasi; to hari gwarume momo herea idia noho. Unai hoa karana dainai Petro ena lalona ia hamarerea bada. “Simona Petero ese unai kara ia itaia, vadaeni Iesu ena aena badinai ia tui diho, ia gwau: ‘Lohiabada e, lau dekena amo do oi raka siri, badina lau be dika tauna.’ Badina be ia bona ena turana ibounai idia hoa dikadika, unai gwarume idia abia dainai. Simona bona idia haoda hebou taudia danu, Iakobo bona Ioane, Sebedeo ena natuna, idia hoa.” Iesu ese Petro ena lalo-hekwarahi ia haorea bena Petro ena mauri do ia haidaua herevana ia gwauraia. Ia gwau: “Oi gari lasi, inai murinai be do oi haoda, taunimanima do oi abia.”—Luka 5:8-10.
Taunimanima Haoda Henia Gaukarana
8. Iesu ese moni gaukara idia karaia haoda taudia hani ia boiridia neganai ‘taunimanima idia haoda henia’ totona, idia be dahaka idia karaia?
8 Iesu ese taunimanima bona gwarume ia hahegeregeredia, bona unai manau haoda tauna ia hamaoroa namona be ena moni gaukara ia rakatania bona haoda gaukara badana do ia karaia—taunimanima do ia haoda henia gaukarana unai. Petro bona ena tadina Andrea ese Iesu ena hereva idia abia dae. “Vadaeni nega tamona idia ese edia reke idia rakatania, iena murinai idia raka.” (Mataio 4:18-20) Murinai Iesu ese Iakobo bona Ioane ia boiboi henidia, idia be edia vanagi dekenai edia reke idia hanamoa. Iesu ese idia danu ia boiridia taunimanima do idia haoda henia totona. Dahaka idia karaia? “Nega tamona idia ese vanagi bona edia tamana idia rakatania, iena murina dekenai idia raka.” (Mataio 4:21, 22) Iesu be aonega dalanai taunimanima ia haoda henia. Unai nega lalonai, taunimanima hani ia abia.
9, 10. Petro bona ena turadia idia hahedinaraia abidadama karana be dahaka, bona lauma dalanai idia haoda totona, Iesu be edena dala amo idia ia hadibaia?
9 Haoda tauna be ia abia gwarume ia hoihoilaidia ena mauri durua totona, to lauma dalanai ia haoda tauna be unai ia karaia diba lasi. Unai dainai, unai hahediba taudia be edia moni gaukara idia rakatania neganai Iesu murinai idia raka totona, idia ese abidadama bada karana idia hahedinaraia. Idia daradara lasi, idia diba lauma dalanai edia haoda gaukarana dekenai do idia kwalimu. Iesu ese gwarume lasi gabuna be gwarume momo gabunai ia halaoa. Unai hegeregerena, Israel besena dekenai edia reke idia atoa diho neganai, hahediba taudia idia diba, Dirava ena heduru amo, idia be taunimanima do idia abia. Unai nega lalonai lauma dalanai haoda gaukarana idia hamatamaia bona unai gaukara ia do noho ia mai hari inai nega lalonai, bona Iehova ese unai gaukara ia hanamoa dainai taunimanima momo ita abia.
10 Lagani rua bona hua haida lalodiai, Iesu ese ena hahediba taudia be taunimanima haoda henia dalana ia hadibaia. Nega ta ta ai, idia ia hadibaia dahaka do idia karaia bona ia vairanai idia ia siaia guna sibodia idia haroro totona. (Mataio 10:1-7; Luka 10:1-11) Iesu idia samania bona idia hamasea neganai, iena hahediba taudia edia lalona idia mase bamona. To, Iesu ia mase dainai taunimanima haoda henia gaukarana ia doko, a? Murinai idia vara gaudia ese unai henanadai idia haerelaia.
Taunimanima Idia Haoda Henia
11, 12. Ia toreisi lou murinai, haoda gaukara dekenai Iesu ese dahaka hoa karana ta ia karaia?
11 Ierusalem murimurinai Iesu ia mase bona ia toreisi lou murinai, hahediba taudia idia giroa lou Galilea dekenai. Nega ta ai, idia 7 be Galilea Gohuna kahirakahira dekenai idia noho hebou. Petro ia gwau do ia lao haoda, bona unai tatau 6 idia gwau do idia bamoa. Vaia, edia kara bamona, hanuaboi dekenai idia haoda. Oibe, edia reke idia atoa diho bona hanuaboi ibounai dekenai ia noho, to gwarume ta idia abia lasi. Bona daba ia rere neganai, tau ta be kone dekenai ia gini. Unai tau be kone dekena amo idia ia boiridia, ia gwau: “Lauegu natuna e, umui emui aniani ia noho, a?” Hahediba taudia idia haere, idia gwau: “Lasi.” Unai dainai, kone dekenai ia gini tauna ia hamaorodia, ia gwau: “ ‘Reke be vanagi ena idiba kahana dekenai umui negea diho, gwarume do umui abia.’ Unai dainai idia ese idia negea diho, vadaeni idia veria dae gwauraia, to idia be goada lasi, gwarume momo herea dainai.”—Ioane 21:5, 6.
12 Unai be hoa gauna momokani! Reana, unai neganai hahediba taudia be guna idia haoda bona Iesu ese ia karaia hoa karana idia laloatao, bona momokani idia ta ia diba kone dekenai ia gini tauna be Iesu. “Iesu ena lalokau diba tahua tauna ese Simona Petero ia hamaoroa, ia gwau: ‘Lohiabada unai.’ Simona Petero be ena gaukara totona ena dabua ia kokia, to unai hereva ia kamonai neganai, ena dabua ma ia kwatua lou, vadaeni gohu dekenai ia paudobi. To diba tahua taudia orena be vanagi maragina dekenai idia mai, inai reke danu, gwarume dekenai ia honu gauna, idia veria daekau, badina kone be ia daudau lasi, 100 mita bamona.”—Ioane 21:7, 8.
13. Iesu be guba dekenai ia daekau murinai, tanobada ibounai dekenai edena haoda gaukarana ia matamaia?
13 Unai hoa karana ena anina be dahaka? Ia hahedinaraia taunimanima haoda henia gaukarana ia do ore lasi. Unai ia hedinarai goevagoeva Iesu ese nega toi Petro—bona ia dekena amo hahediba taudia iboudiai—ia hamaorodia Iesu ena mamoe do idia ubua totona. (Ioane 21:15-17) Unai hereva amo Iesu ia hahedinaraia lauma aniani henia gaukarana ia noho do idia karaia totona. Ia do mase lasi neganai, ia peroveta, ia gwau: “Basileia ena Sivarai Namona be tanobada ibounai dekenai do idia harorolaia.” (Mataio 24:14) Iesu ena nega lalonai ia perovetalaia herevana be nega ginigunana ia guguru hamatamaia. Iena hahediba taudia idia hegaegae edia reke idia atoa diho taunimanima haoda henidia totona, bona unai reke idia veria daekau neganai do idia honu.—Mataio 28:19, 20.
14. Ierusalem idia do hadikaia ore lasi laganidia lalonai, Iesu ena hahediba taudia edia haoda gaukarana dekenai dahaka hahenamo idia abia?
14 Guba dekenai iena Tamana ena terona dekenai ia do daekau lasi neganai, Iesu ese ena hahediba taudia dekenai ia gwau: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:8) Pentekoste 33 C.E. ai, lauma helaga be hahediba taudia latanai ia diho neganai, tanobada ibounai dekenai lauma dalanai taunimanima haoda henia gaukarana ia matamaia. Pentekoste dinanai, taunimanima 3,000 idia abia, bona daudau lasi murinai, “idia abia dae taudia . . . be 5000 bamona.” (Kara 2:41; 4:4) Idia bada idia lao noho. Sivarai ia gwau: “Lohiabada idia abidadama henia taudia momo herea, tatau bona hahine idia dekenai idia haboua lao.” (Kara 5:14) Daudau lasi murinai, Samaria taudia ese sivarai namona idia abia dae, bona murinai kopina utua lasi Idau Bese taudia ese idia abia dae danu. (Kara 8:4-8; 10:24, 44-48) Lagani 27 bamona Pentekoste murinai, aposetolo Paulo be Kolose Keristen taudia dekenai revareva ta ia torea, ia gwau sivarai namona be “tanobada ibounai dekenai ai harorolaia vadaeni.” (Kolose 1:23) Ia hedinarai goevagoeva, Iesu ena hahediba taudia be Galilea dekenai sibona lasi to gabu daudau dekenai danu haoda gaukara idia karaia. Roma Basileia lalonai idia noho Iuda taudia dekenai edia reke idia atoa diho, bona ena be idia laloa Iuda lasi bese taudia momo do idia abia lasi, to edia reke be idia dekenai idia atoa diho danu. Bona edia reke idia veria daekau neganai idia honu. Keristen ginigunadia edia nega lalonai, Iesu ena peroveta herevana Mataio 24:14 dekenai ia guguru lagani 70 C.E. ia do ginidae lasi bona Ierusalem idia do hadikaia ore lasi neganai.
Taunimanima Haoda Henia “Lohiabada Ena Dina” Ai
15. Apokalupo bukana dekenai, edena haoda gaukarana ma ta ia perovetalaia, bona edena negai do ia guguru?
15 To, gaukara ia do ore lasi. Lagani 100 C.E. kahirakahira dekenai, Iehova ese Ioane, aposetolo tauna ginigabena dekenai matahanai ta ia henia, bona unai matahanai ese “Lohiabada ena dina” lalonai do idia vara gaudia ia hahedinaraia. (Apokalupo 1:1, 10) Do ia vara gauna badana ta be tanobada ibounai dekenai haroro gaukara do idia karaia. Ita duahia ia gwau: “Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia.” (Apokalupo 14:6) Aneru edia hakaua dalana amo, Dirava ena hesiai taudia ese Roma Basileia dekenai sibona lasi, to tanobada ibounai dekenai sivarai namona do idia harorolaia. Tanobada ibounai dekenai taunimanima haoda henia gaukarana do idia karaia, bona hari inai nega lalonai unai matahanai herevana ia guguru.
16, 17. Hari inai nega lalonai, lauma dalanai unai haoda gaukara be edena negai idia hamatamaia, bona Iehova ese edena bamona ia hanamoa?
16 Lagani 1,900 ia mai hari, unai haoda gaukarana amo gwarume momo idia abia, a? Guna, haoda taudia be momo lasi. Tanobada Ibounai Tuarina Ginigunana ia ore murinai, sivarai namona idia harorolaia goadagoada tatau bona hahine be 4,000 bamona sibona, idia momo be orena taudia. Iehova ese dala ia kehoa neganai, idia ese edia reke idia atoa diho, bona taunimanima momo idia abia. Tanobada ibounai tuarina iharuana murinai, Iehova ese dala matamatana ta ia kehoa haoda gaukarana durua totona. Gilead ena Watchtower Bible School dekenai idia lao misinari taudia ese tano idauidau momo herea dekenai idia lao haroro gaukara idia gunalaia totona. Unai tano haida be Japan, Italy, bona Spain, bona idia lao matamaia neganai idia laloa taunimanima momo do idia abia lasi, to gabeai taunimanima momo herea idia abia. Danu, vanegai ita kamonai Europe ena East kahana dekenai taunimanima haoda henia gaukarana be namo herea momokani.
17 Hari inai nega lalonai, tano momo dekenai reke be kahirakahira ia darea. Taunimanima momo herea idia abia, unai dainai kongregesen bona sekit matamatadia idia karaia. Unai matamata taudia momo dainai nega ibounai Kingdom Hall bona Assembly Hall matamatadia idia haginidia. Unai taunimanima momo naridia totona elda bona hesiai taudia ma haida idia tahudia. Lagani 1919 ai, unai abidadama bada taudia ese gaukara badana idia hamatamaia. Isaia 60:22 ena hereva be ia guguru momokani. Ia gwau: ‘Maragina be 1,000 ai do ia lao.’ Guna haoda taudia be 4,000, to hari edia namba be milion hani ia hanaia. Bona dokona ia do mai lasi.
18. Keristen ginigunadia edia nega lalonai, lauma dalanai taunimanima idia haoda henia ena kara namona be edena bamona ita tohotohoa diba?
18 Ita ta ta ibounai dekenai unai ena anina be dahaka? Taunimanima do idia haoda henia totona, Iesu ese Petro, Andrea, Iakobo, bona Ioane ia boiridia neganai, Bible ia gwau: “Gau ibounai idia rakatania, Iesu ena murina dekenai idia raka” totona. (Luka 5:11) Unai be haheitalai namona abidadama bona gaukara goadagoada karadia dekenai! Ita danu be sibona eda ura dadaraia karana ita habadaia diba, bona herevana ita dekenai dahaka do ia vara, ita hegaegae noho Iehova ena gaukara ita karaia totona, a? Taunimanima milion momo idia gwau unai bamona idia karaia diba. Keristen ginigunadia edia nega lalonai, Iehova ia ura gabudia dekenai hahediba taudia idia haoda taunimanima idia abia totona. Ena be idia be Iuda taudia eiava idia be Idau Bese taudia, to iboudiai idia haoda henidia. Namona be taunimanima ibounai ita haroro henidia danu, ta ita dadaraia lasi.
19. Dahaka do ita karaia bema ita haoda gabuna dekenai kamonai taudia momo ita davaria lasi?
19 To, bema harihari oiemu teritori dekenai kamonai taudia oi davaria lasi, dahaka do oi karaia? Oi lalohisihisi lasi. Laloaboio lasi, hahediba taudia be hanuaboi ibounai lalonai idia haoda bona gwarume ta idia davaria lasi, bena murinai Iesu ese edia reke be gwarume amo ia hahonua. Lauma dalanai unai bamona do ia vara diba danu. Hegeregere, Ireland dekenai, mai edia abidadama Witness taudia be lagani momo lalodiai idia hekwarahi bada, to edia gaukara amo anina bada idia davaria lasi. To, hari be unai bamona lasi. Lagani 1991 Yearbook of Jehovah’s Witnesses ena ripoti lalonai, ia gwau 1990 ena hesiai lagani dokonai, Ireland be hua 29 ta ta ibounai lalonai edia gaukara ia bada ia lao! Reana oiemu teritori dekenai unai bamona do ia vara danu. Iehova ese dala ia do koua lasi dainai, namona be haoda gaukarana do ita karaia noho!
20. Taunimanima abia totona, edena negai haoda gaukarana do ita karaia be namo?
20 Israel lalonai, haoda taudia be hanuaboi dekenai gwarume idia tahua, taunimanima be edia mahuta gabuna dekenai idia mahuta namo neganai. Edia ura negana lalonai idia lao lasi, to idia lao gwarume momo idia abia diba negana lalonai. Namona be ita danu iseda teritori do ita laloa namonamo, bona taunimanima momo idia noho neganai bona idia ura kamonai negana lalonai haoda gaukarana ita karaia. Reana unai be hanuaboi neganai, Saturday bona Sunday, eiava ma nega ta dekenai, herevana edena negai, to namona be ita goada karaia kudou-maoro taudia ita davaria totona.
21. Bema iseda teritori dekenai ita haroro momo, dahaka ita laloatao be namo?
21 To bema iseda teritori dekenai ita haroro momo be edena bamona? Moni gaukara dainai idia haoda taudia be nega momo idia maumau badina idia gwau nega momo haoda taudia ese gwarume idia tahua dainai gwarume be idia momo lasi. Lauma dalanai haoda gaukara momo ita karaia dainai gwarume idia momo lasi, a? Lasi momokani! Ena be teritori momo dekenai idia haroro momo, to anina idia do davaria diba. Gabu haida dekenai idia haroro momo dainai anina bada idia davaria. To, bema nega momo ruma haida dekenai umui vadivadi henidia, laloaboio lasi, taunimanima idia noho lasi rumadia dekenai umui giroa lou. Namona be kiki hereva idauidau umui diba. Bona laloaboio lasi nega sisina murinai Witness ma ta do ia mai vadivadi henia totona, unai dainai do umui hereva daudau lasi eiava ruma tauna do umui habadua lasi. Bona dala dekenai bona nega bona gabu idauna dekenai mai aonega danu do umui haroro. Lauma dalanai nega ibounai bona dala idauidau momo dekenai emui reke do umui gaukaralaidia.
22. Hari inai nega lalonai mai moale danu dahaka gaukara ita karaia?
22 Laloaboio lasi, unai bamona haoda gaukarana amo haoda taudia bona gwarume danu ese namo idia davaria diba. Taunimanima ita abia neganai, bona idia goada neganai, idia be mauri hanaihanai do idia abia diba. Paulo ese Timoteo ia hagoadaia, ia gwau: “Inai kara namodia do oi karaia noho, badina unai dekena amo oi sibona mauri do oi davaria, bona oi idia kamonai taudia danu mauri do idia davaria.” (1 Timoteo 4:16) Iesu ese ena hahediba taudia dekenai haoda gaukara lauma dalanai idia ia hadibaia, bona iena siahu henunai unai gaukara ita do karaia noho. (Apokalupo 14:14-16 itaia danu.) Bona mai moale danu ita ura iena siahu henunai unai gaukara ita karaia! Iehova ese dala ia do koua lasi negana lalonai namona be mai iseda goada ida iseda reke ita atodia diho noho. Gaukara ma ta ena namo ese taunimanima haoda henia gaukara ena namo ia hanaia lasi, ani?
Inai Oi Laloatao, A?
◻ Iesu ese ena hahediba taudia ia hadibaia dahaka gaukara do idia karaia totona?
◻ Iesu be edena bamona ia hahedinaraia ia mase murinai lauma dalanai haoda gaukarana ia ore lasi?
◻ Keristen ginigunadia edia nega lalonai, lauma dalanai haoda gaukarana ia hanamoa dalana be dahaka?
◻ “Lohiabada ena dina” lalonai, reke idia atoa diho neganai, idia abia taunimanima ena bada be dahaka?
◻ Ita ta ta be edena bamona taunimanima haoda henia gaukarana dekenai do ita kwalimu bada diba?
[Picture on page 15]
Iesu ia toreisi lou murinai, iena aposetolo taudia ese Dirava ia henidia gaukarana, taunimanima haoda henia gaukarana unai, idia habadaia