Paraoa Bona Gwarume Haida Amo Hutuma Ia Ubua

Aposetolo 12 be Galilea ai idia karaia haroro gaukara idia moalelaia, bona “idia karaia bona hadibaia gaudia ibounai be Iesu dekenai idia gwauraia.” Ita diba idia hesiku bada. To taunimanima momo idia lao mai dainai, idia be nega lasi aniani totona. Unai dainai Iesu ia gwau: “Namona be taunimanima lasi gabuna dekenai ita lao bona umui laga-ani sisina.”​—Mareko 6:30, 31.

Bouti ta idia guia, reana Kaperanauma kahirakahira, bona Ioridane Sinavai ena ist kahana idia lao, unai gabu be Betesaida amo ia daudau. To idia lao neganai, hutuma ese idia itaia, bona ma haida danu idia kamonai. Bena kone amo idia heau lao, bona bouti ia ginidae neganai, idia noho vadaeni.

Iesu be bouti ia rakatania neganai, hutuma ia itaia bona ia hebogahisi henidia, badina idia be mamoe mai ena naria tauna lasi bamona. Vadaeni idia dekenai Basileia ena “gau momo ia hadibaia matamaia.” (Mareko 6:34) “Gorere taudia ia hanamodia” danu. (Luka 9:11) Adorahi momokani ai, hahediba taudia be ia dekenai idia gwau: “Inai be daudau gabuna bona ia leiti vadaeni, hutuma oi siaia lao, unai amo kahirakahira hanuadia dekenai do idia lao bona aniani idia hoia.”​—Mataio 14:15.

Iesu ia haere: “Do idia lao lasi, to umui ese idia dekenai aniani umui henia.” (Mataio 14:16) Ena be Iesu be do ia karaia gauna diba, to Filipo ia tohoa totona, ia henanadai: “Edeseni amo paraoa do ita hoia inai taudia idia ania totona?” Filipo ia nanadaia, badina ia be kahirakahira ia noho hanuana, Betesaida, amo. To do idia hoia paraoa be do ia hegeregere lasi. Tatau ibounai be 5,000 bamona. Bona hahine bona natudia idia duahia neganai, reana namba ia daekau 10,000 mai kahana! Filipo ia gwau: “Ena be 200 denarioa amo paraoa ita hoia, bona idia ta ta dekenai sisina sisina ita henia, to unai be do ia hegeregere lasi.”​—Ioane 6:5-7.

Reana Andrea ia ura hahedinaraia hutuma do idia ubua be hegeregere lasi dainai, ia gwau: “Inai mero maragina be mai ena bali paraoa 5 bona gwarume maragidia rua. To inai aniani amo hutuma be edena bamona ita ubua diba.”​—Ioane 6:9.

Inai be siahu negana, bona lagani 32 C.E. ena Pasova negana be kahirakahira, bona rei matamata ese ororo ia koua. Iesu ese ena hahediba taudia ia hamaoroa, hutuma do idia hadibaia, rei latanai idia helai totona, orea haida be 50 bona haida be 100. Iesu ese paraoa 5 bona gwarume rua ia abia bona Dirava ia tanikiu henia. Bena paraoa ia makohia bona gwarume ia haria. Bena hahediba taudia dekenai ia henia, taunimanima dekenai idia hariharilaia totona. Unai taudia ibounai idia aniani ela bona idia boga kunu momokani!

Gabeai Iesu ese ena hahediba taudia ia hamaoroa: “Aniani oredia umui haboua, unai amo aniani do umui negea kava lasi.” (Ioane 6:12) Unai aniani oredia be bosea 12 lalonai idia hahonua!