Iesu Ena Mauri Bona Gaukara

Iesu be Hoa Dalana amo Taunimanima Tausen Momo Ia Ubudia

APOSETOLO taudia 12 be mai moale danu Galilea tanona dekenai haroro gaukara badana idia karaia vadaeni. Bona, Ioane Bapatiso ia mase murinai, idia giroa lao Iesu dekenai bona edia ekspiriens namodia idia gwauraia hedinarai. Iesu ia itaia edia tauanina idia manoka bona taunimanima momo herea idia mai idia lao dainai idia be nega lasi idia aniani totona, unai dainai Iesu ia gwau: “Umui mai, taunimanima noho lasi gabuna ita lao, ita laga-ani sisina.”

Reana Kaperanauma kahirakahira dekenai vanagi idia guia bona taunimanima idia noho lasi gabuna dekenai idia lao, reana Betesaida idia hanaia Ioredane ena mairiveina kahana dekenai idia lao. To idia lao neganai, taunimanima momo ese idia itaia bona ma haida ese edia lao sivaraina idia kamonaia. Unai dainai idia iboudiai idia heau lao kone dekenai, bona vanagi ia ginidae neganai idia iboudiai idia naria noho.

Iesu be vanagi amo ia diho bona taunimanima hutuma ia itaia neganai, ia bogahisihisi idia dekenai badina idia be mamoe hegeregere, bona naria tauna lasi. Unai dainai edia gorere taudia ia hanamodia bona sivarai momo idia dekenai ia hadibaia.

Hora momo idia hanai murinai, Iesu ena hahediba taudia be ia dekenai idia mai, bona idia gwau: “Inai be aniani lasi gabuna, hanuaboi be kahirakahira ia mai. Hutuma oi siaia lao namo, idia lao uma bona hanua maragidia, aniani haida idia hoia, idia ania.”

To, Iesu ia haere idia dekenai, ia gwau: “Umui sibona ese aniani umui henia idia dekenai.” Iesu ia diba dahaka do ia karaia, to ia ura Filipo ia tohoa, unai dainai ia dekenai ia gwau: “Ita be edeseni aniani gaudia do ita hoia, inai taunimanima do ita ubua totona?”

Filipo ia laloa idia hegeregere lasi unai taudia hutuma idia ubua totona. Badina idia helai tatau iboudiai be 5,000 bamona, bona hahine bona natudia idia duahia neganai idia iboudiai be 10,000 bamona! Filipo ia haere, ia gwau: “200 kina [unai neganai dina tamona ena gaukara davana be K1.00] dekenai aniani gaudia do ita hoia to do ia hegeregere lasi, sisina sisina sibona do idia ania.”

Reana unai taunimanima hutuma idia ubua ia hegeregere lasi hahedinaraia totona, Andrea ia gwau: “Mero maragi ta iniseniai, ia be mai ena paraoa maragidia 5 bona gwarume maragidia rua.” Bena ma ia gwau: “To unai be edena bamona do ita karaia, taunimanima be momo herea?”

Unai sivarai ia vara lagani 32 C.E. ai, Paseka aria kahirakahira do idia karaia neganai, bona ia be garalou ena nega dainai rei momo ia noho. Unai dainai Iesu ese ena hahediba taudia ia hamaorodia taunimanima do idia hereva henidia idia 50 50 dekena amo orea ta ta dekenai do idia helai diho rei dekenai. Bena unai paraoa 5 bona gwarume rua ia abia, guba ia raraia sisina, bona unai aniani totona ia guriguri. Vadaeni paraoa ia makohia bona gwarume ia atoa hegaegae. Ena hahediba taudia dekenai ia henia, bena idia ese taunimanima dekenai idia haria. To hoa gauna be inai, unai taunimanima hutuma idia aniani ela bona edia bogana idia kunu!

Murinai, Iesu ese ena hahediba taudia dekenai ia gwau: “Aniani orena do umui haboua, kahana maragimaragi ta do ia boio lasi.” Unai idia karaia neganai, bosea 12 idia hahonua, unai be taunimanima idia ania haorea lasi gaudia unai! Mataio 14:​13-21; Mareko 6:​30-44; Luka 9:​10-17; Ioane 6:​1-13.

◆ Dahaka dainai Iesu be taunimanima idia noho lasi gabuna ta ia tahua ena aposetolo taudia totona?

◆ Iesu ese ena hahediba taudia be edeseniai ia hakaudia lao, bona dahaka dainai idia laga-ani diba lasi?

◆ Hora momo idia hanai neganai, Iesu ena hahediba taudia be dahaka idia gwau, bona Iesu ese dahaka ia karaia unai taunimanima ia durudia totona?