Elda Taudia Bona Hesiai Taudia Edia Lalo-Tamona Naria

NEGA sisina Pentekoste 33 C.E. murinai, hekwakwanai ta be Keristen ekalesiana matamatana lalonai ia vara. Vabu ogogamidia naridia dalana idia lailaia vadaeni, to “Helene gado idia hereva Iuda taudia ese Heberu gado idia hereva Iuda taudia dekenai idia maumau. Idia gwau, ‘Dina ibounai, aniani idia haria neganai, aiemai vabu dekenai umui henia hegeregere lasi.’ ”​—Kara 6:1.

Aposetolo ese unai maumau herevadia idia kamonaidia neganai, idia ese “diba tahua taudia ibounai idia boiridia hebou, idia gwau, ‘Ia namo lasi Dirava ena hereva haroro gaukara ita hadokoa, aniani haria gaukara karaia totona. Aiemai varavara e, umui huanai tatau 7 umui abia hidi, ladana namo taudia, Lauma Helaga bona aonega dekenai idia honu taudia, idia dekenai inai gaukara do ita henia.’ ”​—Kara 6:​2, 3.

Inai ese Keristen ekalesiana naria dalana taravatuna badana ta ia hahedinaraia. Diba taudia haida idia hagaukaradia, gaukara haragadia do idia naridia totona, bona ma haida ese lauma gaukaradia metaudia idia naridia. Inai be idaunegai Israelana ai idia badinaia dalana hegeregerena. Iehova ese Arona bona ena natuna bona ena tubuna ia duanaidia, hahelaga taudia ai do idia lao bona boubou gaudia be ia vairanai do idia hahelagadia. To Levi taudia ia haganidia do idia durudia, ia gwau “hebou kalagana ena kohu iboudiai do idia naridia.” (Numera 3:​5-10) Unai hegeregerena, hari inai negai kongregesen ena hesiai taudia ese elda taudia idia durudia.

Elda Taudia Bona Hesiai Taudia Edia Gaukara

Baibel ese elda taudia bona hesiai taudia edia dagi taravatudia ia gwauraidia. (1 Timoteo 3:​1-10, 12, 13; Tito 1:​6-9) Idia gaukara helulu lasi, to idia tahua gauna tamona be, kongregesen do idia hatubua. (Efeso 4:​11-13 itaia.) To kongregesen lalonai idia karaia gaukaradia be idauidau. Petero ese elda taudia ia haganidia, ia gwau: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia.” (1 Petero 5:2) Idia ese inai gaukara helagana ena anina be Dirava vairanai idia gwauraia.​—Heberu 13:17.

To Baibel ia gwau lasi hesiai taudia danu do idia hahediba namonamo diba be namo. Edia gaukara be elda taudia edia hegeregeredia lasi. Aposetolo edia negai, edia imadia amo idia karaia loulou diba gaukaradia be momo. Reana unai gaukara ta be pepa idia hoia, idia eiava haida ese Baibel ena hereva ia latanai do idia torea hanai totona.

Hari inai negai, hesiai taudia ese mai anina bada gaukaradia idauidau kongregesen lalonai idia karadia. Kongregesen ena akaun bona ena teritori idia naridia, magasin bona buka idia hariharilaidia, bona Kingdom Hall idia naria. Idia haida, edia diba be hegeregere taudia, be hahediba gaukarana ai idia hagaukaradia reana; nega haida Kongregesen Buka Stadi idia naridia, Hesiai Hebou lalodiai idia haroro, bona pablik tok idia karaia.

Elda taudia bona hesiai taudia be mai edia lalo-tamona ida idia gaukara hebou neganai, kongregesen be lauma dalanai idia naria namonamo bona idia haheaua namonamo. Unai neganai kongregesen taudia idia moale, idia goada, bona lauma dalanai anina idia havaraia. Paulo ese horoa taudia Efeso ai be ia tore henidia, ia gwau: “Keriso be kwarana dainai, tauanina ena kahana ibounai be ia dainai idia noho hebou bona idia gaukara hebou, bona kara ibounai laloa tamona dekena amo idia karaia. Ta ta edia gaukara, edia gaukara korikori idia karaia noho. Unai dala dekenai tauanina be lalokau dekena amo ia tubu daekau noho.”​—Efeso 4:16.

Namona be elda taudia bona hesiai taudia be unai bamona do idia lalo tamona toho. To unai bamona lalo-tamona be ia vara kava lasi. Namona be idia hatubua bona idia naria namonamo.

Elda Taudia Idia Karaia Diba Karadia

Gau badana be elda taudia edia lalodia do idia parara idia be kongregesen ena hesiai taudia edia biagudia lasi. Lalo-tamona momokani ia noho neganai, elda taudia idia laloa hesiai taudia be edia bamodia, idia ida Dirava ena hesiai idia lao henia hebou taudia. (1 Korinto 3:​6-9 itaia.) Roma 12:10 ia gwau: “Umui ta ta danu do umui matauraia.” Unai dainai elda taudia ese hesiai taudia idia kara henidia mai edia hemataurai ida; hahemaraidia karadia idia karaia lasi. Bema hesiai taudia be sibodia edia gaukara karaia daladia matamatadia idia lalohadailaidia mai edia lalo-maoromaoro ida, elda taudia ese idia koudia lasi, to idia hagoadadia. Idia kara henidia mai edia hemataurai ida dainai, edia kara namodia idia habadadia, bona idia durudia, edia gaukara kongregesen lalonai do idia moalelaia totona.

Namona be elda taudia ese inai danu do idia laloatao: Dirava ena mamoe oreana do idia naria, anina be kongregesen ena hesiai taudia danu do idia naridia. Momokani, unai hesiai taudia be mai edia dagi dainai, namona be lauma dalanai idia goada. To, orea taudia oredia hegeregeredia, nega ta ta ai heduru idia abia be namo. Namona be elda taudia idia ura bada lauma dalanai do idia tubu daekau.

Unai hegeregerena, aposetolo Paulo ese tauhau Timoteo ia hedavari henia neganai, maoromaoro ena goada ena mamina ia abia dainai, “ia ura Timoteo ia danu idia lao.” (Kara 16:3) Bena Timoteo ese Paulo ia bamoa loaloa dainai, Paulo ese ia hadibaia namonamo. Gabeamo Paulo ese Keristen taudia Korinto ai be ia tore henidia, ia gwau: “Inai totona Timoteo lau siaia, ia lao umui dekenai. Ia be lauegu lalokau merona, mai ena kara momokani danu, Keriso ena mauri dalana lalonai. Ia ese lauegu gaukara bona lauegu kara Iesu Keriso ena mauri matamata lalonai umui do ia hadibaia.”​—1 Korinto 4:17.

Elda taudia e, emui kongregesen ena hesiai taudia edia goada ibounai umui gaukaralaia matama vadaeni a? Lauma dalanai do idia tubu daekau totona, pablik tok karaia daladia bona Baibel ena anina tahua daladia be umui hadibalaidia a? Idia hegeregere taudia be umui boiridia, idia be umui ida manoka taudia do umui vadivadi henidia hebou, a? Haroro gaukarana ai umui be idia ida umui gaukara hebou, a? Iesu ena parabole ta lalonai, biaguna ese ena hesiai taudia mai edia kamonai ta ta ia hanamodia, ia gwau: “Namo herea! Oi be hesiai tauna namona, kara maoromaoro tauna.” (Mataio 25:23) Hesiai taudia, edia gaukara be dala namona ai idia karadia mai edia lalo-manau ida taudia, be unai bamona umui hanamodia badabada a? (Hereva Lada-isidia 3:27 itaia.) Bema lasi, do idia laloa umui ese edia gaukara umui laloa maragi, a?

Unai hegeregerena, namona be elda taudia ese edia lalohadai be hesiai taudia do idia hamaorolaidia namonamo. (Hereva Lada-isidia 15:22 itaia.) Namona be gaukara do idia henidia kava lasi bona idia edia amo do idia kokidia kava lasi. Ta ena diba be kongregesen lalonai do idia gaukaralaia badabada dalana do idia herevalaia hebou mai edia guriguri ida be namo. (Mataio 25:15 itaia.) Gaukara ta do idia henia neganai, namona be karaia dalana do idia hadibalaia goevagoeva. Hereva Lada-isidia 11:14 ia gwau: “Hahekau namona be lasi neganai, taunimanima idia moru.”

Tadikaka ta ese akaun, o magasin, o buka dipatmen do ia naria matama neganai, reana do ia davaria faila idia maoro lasi o idia haida idia boio, bena unai dainai ena lalona do ia hisihisi. Korinto Ginigunana 14:40 ia gwau: “Ekalesia ena gaukara ibounai umui karaia namonamo, mai dala maorona, karaia kava lasi.” Namona be elda taudia ese gaukara karadia daladia be tadikaka do idia hadibalaidia, bona unai dala badinadia daladia be sibodia edia kara amo do idia haheitalaidia danu be namo. Hegeregere, namona be elda taudia ese dala do idia karaia, hua toi toi ai ta ese kongregesen ena akaun do ia sekea. Bema unai kara mai anina badana be idia reaia, reana unai dainai hekwakwanai do idia vara bona hesiai taudia ese orea ena hahegani do idia lalodia maragi.

To bema toana be tadikaka ta ese ena gaukara ia karaia namonamo lasi, elda taudia be edena bamona do idia kara be namo? Namona be do idia hadokoa haraga lasi, to ia ida unai hekwakwanai do idia herevalaia hebou be namo. Ia vara reana badina be idia hadibaia namonamo lasi dainai. Bema unai murinai ena gaukara ai ia do hegeregere lasi, reana gaukara idauna ai do ia kwalimu diba.

Lalo-tamona havaraia totona, namona be elda taudia do idia manau danu. Filipi 2:3 ese Keristen taudia ia sisiba henidia, ia gwau: “Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ ” Unai hegeregerena, bema atendan ta ese elda ta ia hamaoroa ia poinia gabuna ai do ia helai, namona be do ia kamonai henia; namo lasi ena lalona ai do ia gwau ia be elda ta unai dainai do ia kamonai henia be badina lasi. Reana atendan be Gima Kohorona ena hereva ta dainai ia hereva, to namona be ia diba unai be taravatu lasi.a Hesiai tauna ta idia henia gaukarana be elda ta ese do ia taravatulaia kava lasi.

Hesiai Taudia ese Lalo-Tamona Idia Havaraia Dalana

Aposetolo Paulo ia gwau namona be “diakono taudia” ese edia gaukara do idia laloa namonamo. (1 Timoteo 3:8) Unai ese badu do ia koua. Bema oi be kongregesen ena hesiai tauna ta, emu gaukara oi karaia mai emu goada bona mai emu ura ida, a? (Roma 12:​7, 8) Emu gaukara karaia namonamo dalana be oi tahua vadaeni a? Oi idia abidadama henia diba a? Africa tanona ta ai hesiai tauna ta ese gaukara toi ia naridia kongregesen lalonai. Ia gwau: “Anina be lau hekwarahi bada, to hekwarahi ese ta ia hamasea lasi.” Momokani, idia gaukara badabada taudia ese moale bada idia davaria.​—Kara 20:35.

Bema elda taudia ida umui gaukara hebou guguru, unai amo lalo-tamona do umui havaraia. Heberu 13:17 ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho nega ibounai. Gabeai idia ese Dirava ena vairanai edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia henunai do umui noho. Bema inai bamona umui karaia neganai edia gaukara mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.” Momokani, elda taudia idia goevadae lasi, bona reana edia kerere davaridia be haraga. To maumau ese heabidadama ia haorea. Emu moale ia haorea diba, bona kongregesen taudia ia hadikadia diba. Aposetolo Petero ia gwau: “Eregabe taudia e, umui ese gunalaia taudia do umui kamonai henia. Umui ibounai do umui laloa manau . . . Dirava ena imana goadana henunai do umui manau, vadaeni iena nega namona lalonai ia ese umui do ia abia isi.”​—1 Petero 5:​5, 6.

Bema ‘ekalesia ena gunalaia tauna ena dagi oi tahua’ to oi idia laloa lasi neganai, unai sisiba oi badinaia be namo. (1 Timoteo 3:1) Bema emu lalona ia manau, do oi “laroa” noho diba. (Rohe-ahu Bukana 3:24) Namona be elda taudia do oi badu henidia lasi, emui gaukara hebou dalana do oi hadikaia garina. Namona be do oi nanadaidia, emu kara be edena bamona do oi hanamoa be namo. Do idia laloa oi be lauma dalanai oi tubu daekau noho, badina be emu lalona be hegeregere momokani sisiba do oi abia dae bona do oi badinaia.

Bema hesiai tauna ta ena diba be herea, eiava bema ena edukeisini o ena ladana be bada, elda taudia do ia hereadia toho hedibaganina o sibona ena diba do ia heagilaia hedibaganina edia mamina do ia abia be haraga, to lalo-manau ese do ia durua diba, do ia laloa maoromaoro noho totona. Hereva Lada-isidia 11:2 ia gwau: “Aonega be manau taudia dekediai.” Lalo-manau tauna be sibona ena manoka ia diba. Ena lalona ia hegeregere ena diba do ia gaukaralaia elda taudia durudia totona. Ena lalo-manau dainai, reana ena lalona ia parara, ena be tanobada ena aonega momo ia abia vadaeni to lauma aonegana bona lalopararana ai ia do dabu, bona unai kara ai elda taudia ese idia hereaia reana.​—1 Korinto 1:​26–2:13; Filipi 1:9.

Momokani, elda taudia bona hesiai taudia edia gaukara be mai anina bada, badina be unai amo kongregesen taudia iboudiai idia durudia diba. To unai bamona do idia karaia totona, namona be do idia gaukara hebou mai edia lalo-tamona ida, ‘do idia manau, do idia manada bona do idia haheauka. Bema haida ese metau idia henidia neganai do idia lalokau henidia noho. Lauma Helaga ese idia dekenai laloa tamona ia henia vadaeni, iena maino dekena amo. Inai maino be varo bamona ia guidia hebou, orea tamona. Vadaeni do idia naria namonamo, inai maino do idia dogoatao noho.’​—Efeso 4:​2, 3.

[Footnotes]

[Picture on page 27]

Elda taudia idia laloa hesiai taudia be edia bamodia, idia ida Dirava ena hesiai idia lao henia hebou taudia